Umen 2

Ninin Votut mai sien meatin keil koa aling demkatien one en Iesu

1 Navong avong ten anien koa avise en ‘Pentekos’ emai, meatin vasi keil koa aling demkatien one en Iesu umai alah ruai en eim tai.[a] 2 Hatte tas, keil along verien tai koa ka en out nesa ka mai suval eang koa muhuh keih. Verien koanik sien vasi eim koa amul arondan ien. 3 Evus, tounah tai kistal en eim enek koa vilhili suval ahang koa rasil va mulomal retai en vatin meatin keil.[b] 4 Ka en avong enek, keil vasi avilelau en Ninin Votut. Ka Ninin san keihoen min keil koa sakin keil aselus en selusien sav keil koa rovitei one kati.[c]

5 En avong enek, Siu keil koa aka en kantri savsav keil houlu aro en out Serusalem. Umai veni demkatien one keih en Ahi ka e vati avaha netan min Ahi en avong ten Pentekos. 6 Ka navong meatin keil enek along verien koanik, keil houlu umai out tas keke availea asa mul kur out. Ka navong keil umai vesesal, amutimanin veni along meatin keil onen Iesu amul aselus en selusien savsav keil one. 7 Keil amusil ka avis keil eris avit, “!Ei, meatin keil ekek koa amul aselus ekok, keil vasi avi me-Kaleli keil enges![d] 8 ?Sakini, mukave suk ir rolong keil amul aselus en selusien kati keil orer? 9 Ir roka en out Partia, Midia, ka Ilam; en out Mesopotemia, Sudea, ka Kapadosia; en out Pontas ka Esia. 10 Roka mun en out Frikea ka Pampilia, en out Isip ka en out keil en kantri ten out Libia koa mul vesesal en out Saerin. Tei en ir aka Rom ka avi Siu keil kati, ka teisav en ir umai akur demkatien onen Siu keil enges. 11 Ka tei en ir emun avi ten out Krit ka Arebia. !Ka avaseini keke roka en out savsav keil houlu, ir vasi romul rolong meatin keil enek amul aselus en selusien kati keil orer usil marmari tounah keil koa Ahi mul mumoni!” 12 Keil vasi amutimanin ka amundem usili houlu. Sakini, keil avis sase en keil avit, “?Asa varei aneite ten tounah keil ekek?”

13 Ka teisav en keil aselus karen keil avit, “!Meatin keil ekek amun uaen houlu koa keih ka avi vau eni!”

Pita san selusien tai va min vangi meatin keil

14 Evus, Pita mulomal ral min eiloheh teindan tai (11) sav keil, ka viso va min vangi meatin keil vit, “Kami Siu keil, ka kami vasi koa miro en out Serusalem en avong ekek, mihesan ralingomi minau ka nihiten aneite ten tounah enek min kami. 15 Meatin keil ekek armunmuntei vasuval koa kami mimundemi. Avong koanek vi naen klok en visokon enges. 16 Vuo. Tounah koa mimul milesi suval etin asa koa Ahi viteni ka en provet Soel telamu vit,

17 ‘En avong ekor keil,

inau nisan Ninin Votut onak min meatin vasi keil.

Ehon ka atouli keil onami ihit luvat selusien keil onak.

Meatin hau keil iles leisanien keil ka ulmatu keil ilei kilea en tounah heka en matil vovoien keil.

18 En avong keil enek, inau nitah Ninin Votut onak

heha hesien meatin vasi keil onak heha hetokol meahos ka atou keil emun koa avi slev enges.

Anatin, keil emun, ihit luvat selusien keil onak.

19 Inau numon marmari tounah keil ikistal en teilang,

ka nitie lat keihoen onak en out netan.

En out netan, numon tounah sal keil hekur out koa hesuval avong ten vaeen:

ara houe, ka ahang ka eas teni hel en out vasi.

20 En teilang, meteiai hemalikelik,

ka avati hemai hehilhili hesuval ara.

Navong meatin keil iles tounah keil ekek kur out,

ilea keke mari avong ten hetetamenien onen Ahi Asuv vesesal vamai vakistal koa houmon kot en meatin vasi keil.

21 Ka en avong enek, koakeil vasi avise inau ven kataunien,

inau, Ahi Asuv, nutut moulien one.’ ” Soel 2:28-32[e]

22 Pita selus eris min keil vit, “!Tuak eli keil ten out Isrel, mihetaengon selusien keil ekek! Navong Iesu ten out Nasaret ro veah ral min kami, Ahi rie lati keke vi Mesaea onen ka en keihoen koa sani mini keke voumon merikel keil ka marmari tounah sav keil en metomi koa sakin kami mimutimanin eni. Kami vasi mikilea revi en koanek.[f] 23 Ka musil lingkatien onen, Ahi koa kilea en tounah vasi koa kur out ling Iesu va en hemi. Ka kami, misan matien mini en sakien koa mikeih kat koakeil armusiltei mengkatien keil onen Ahi keke uva amuti kati en aiveave.[g] 24 Ka Ahi sakini moul eris ran matien keke herkurtei mun mahien teni. Veni keihoen ten matien sakras vahuli kati.[h] 25 Koanik suval koa asuv houlu Deved telamu viteni usil Iesu vit,

‘Lisenges, nales Ahi Asuv en usite matu onak.

Ka nirmetautei veni kei ro vesesal ven inau.

26 Anatin, nasi nau, nasan masmasien va mini.

Ka naling desien onak eni keke heting koe teiai onak.

27 Anatin, nakilea keke hermaentei ninin onak heto en out ten matien.

Ka hermaentei teiai onak, meatin votut onen, hemande en avul tatetahinien.[i]

28 Kei rie sise keke mamoul eni.

Nisi nau lisenges veni kei ro vesesal ven inau.’ ” Sam keil 16:8-11

29 Pita selus eris min vangi meatin keil vit, “Tuak eli keil ten out Isrel, inau nihiteni hemal enges min kami usil Deved, avu orer. Kei mat, ka arahini. Ka out tatetahinien onen mul veah ekok rokol kosa.[j] 30 Rokilea keke kei vi provet tai. Kei kilea keke Ahi mumon hatkatien takeih tai mini keke hesakin tai en vatiamal onen hekur vulin ka hemai hehi asuv houlu.[k] 31 Asuv houlu Deved lei kilea asa koa Ahi houmoni en avong keil koa hemai. Sakini, selus usil hemukave Mesaea hemoul eris ran matien navong viteni vit,

‘Ahi hermaentei ninin onen heto en out ten matien.

Ka hermaentei teiai onen hemande en avul tatetahinien.’ Sam keil 16:10

32 Koanik mul selus usil Iesu koa Ahi sakini moul eris ran matien, ka komai vasi ekek melesi keke vi anatin.[l] 33 Ahi vati lati vina nesa keke vato en out ten hetetamenien en usite matu onen, ka Tata onen san Ninin Votut mini suval koa kei vat kati min komai. Ka kosa, asa koa milesi ka miraengoni vi Ninin Votut enek koa Iesu sani min komai.[m] 34 Ir vasi rokilea keke rovitei asuv houlu Deved koa vina en out nesa. Ka Deved varei selus usil Iesu Kristo navong viten selusien koanik vit,

‘Ahi Asuv selus min Asuv onak vit,

“Kitondan en usite matu onak,

35 hetokol avong koa niling koakeil avi vativieh ral minuk en hem.” ’ Sam keil 110:1[n]

36 Sakini, me-Isrel vasi keil, kami miheilea revi mok keke Iesu enek, Ahi lingi vi Mesaea ka Asuv orer. !Ka vi kei varei koa kami mimuti kati en aiveave!”[o]

37 Navong meatin keil along selusien onen, e von ka tine mis. Sakini, avis Pita ral min eiloheh sav keil avit, “?Tuak keil, asa li mehoumoni suk?”[p]

38 Pita vit kesi vit, “Tetai en kami hehiles ran tisaen keil onen ka hemaen komai mehehi baptaes eni en isen Iesu Kristo. Hesakini, Ahi helah lat tisaen keil onen rani ka helele hetahos eris mini. Hevus, Ahi hesan Ninin Votut onen mini hesuval sanien tai.[q] 39 Kami vasi mihoumoni hemukonek veni Ahi mumon hatkatien koanik ral min kami ka titami keil, ka ral min koakeil vasi amul soutin. Anatin, Ahi Asuv vat kati keke kei hesan Ninin Votut onen min koakeil vasi kei vise keil avamai avahi meatin keil onen.”[r]

40 Pita sel kat keil keih ral min selusien sav keil emun. Ka peah keil vit, “!Mihehis Ahi keke houtut moulien onami ran mahien koa hesani hemai ven meatin tisa keil ten avong kosa!”[s] 41 Evus, meatin keil houlu akur anatin en selusien onen, ka amaen keil avi baptaes en keil. En avong enek, vesesal meatin keil taosen etel (3,000) umai ka akapil vituai ral min koakeil aling demkatien one en Iesu.[t] 42 Ka en avong vasi, meatin keil enek amusil kat revi sakien keil enek: alah ruai, along kat asa koa eiloheh keil avisein keil eni, ariti anien min keil, akur Anien Votut onen Asuv, ka avis vituai.[u]

Sakien onen koakeil koa aling demkatien one en Iesu

43 Avong houlu mai muli, Ahi mumon merikel keil ka marmari tounah sav keil houlu mun ka en hen eiloheh keil. Koanik sakin meatin keil vasi amutimanin, ka avouhou imok min Ahi.[v] 44 Ka koakeil vasi aling demkatien one en Iesu, lises aro vituai, ka aso vituai en tounah vasi keil one keke vakataun koakeil atamurei en tounah.[w] 45 Ka tei en keil asalem en hati atan keil one vuo tounah sav tai, ka asan mani teni va min koakeil atamurei en tounah.[x] 46 En avong vasi, keil alah ruai en teahu ten Eim Votut onen Ahi. Ka en teim keil one, alah ruain anien ae ral min tinahos ka akanian vituai ral min sien.[y] 47 Keil amasmas Ahi, ka meatin vasi keil avouhou min keil. Ka en avong vasi, Asuv Iesu mul sakin meatin keil houlu tamun umai akapil vituai ral min keil ka mul mutut moulien one.[z]

<- Umen 1 Umen 3 ->