2 King 21

Asuv houlu Manase ten out Sudah mum tisa en meten Iahova

2 King 21:1-6,10-16

1 Navong me-Sudah keil aling Manase, natin Hesekaea, mai vi asuv houlu one, sua onen vi teindan elu (12). Kei ro en taon ten out Serusalem ka losil kat meatin keil onen sua hanumau elu ka teindan elim emun (55). Ka mama onen, isen Hepsiba. 2 Asuv houlu Manase mum tisa en meten Iahova[a] veni musil sakien tatisa keil onen meatin keil koa Iahova mu rasilin keil ran atan enek keke vasani suk min me-Isrel keil. 3 Kei va en hoi hou keil ka mum revi ahor keil onen ahi savsav keil koa tata onen, Hesekaea, kopahas keil mulamu. Kei mumon ahor onen ahi Baal keke meatin keil avaha netan mini, ka sakin tei en meatin keil amumon nana tai onen ahi Astata suval asa koa asuv houlu Ehab mumoni mulamu. Ka Manase va netan min meteiai, avati ka hitu keil emun. 4 Mumon ahor keil emun onen ahi sav keil neim en Eim Votut onen Iahova varei, out koa Ahi vit isen hel ien lisenges.[b] 5 Ka hae en Eim Votut enek, en out ten sanien varei, kei mumon ahor keke vaha netan min meteiai, avati ka hitu keil emun ien. 6 Kei mu vini natnali ka muniti vi sanien tai onen min ahi sav tai. Kei mumon eimas ka vis koakeil ales sise, koakeil avi lingling temat, ka koakeil emun aselus min ninin tisa keil keke vailea asa koa hemai hekistal. Sakien keil ekek atisaso revi mok en meten Iahova ka sakin kei vuroh kat asuv houlu Manase.

10 Iahova selus ka en provet onen keil koa avi meatin toumien onen vit, 11 “Sakien keil onen asuv houlu Manase atisaso mok mulin sakien tatisa keil onen me-Amor keil koa aro en atan enek mulamu. Kei sakin me-Isrel keil umot en tisaen navong uva netan min nana keil koa kei ling keil en vulie. 12 Sakini, inau, Iahova, Ahi onen me-Isrel keil, nisan mahien tai koa hemariso vis hemariso mok hemai heha kat meatin keil ten out Serusalem ka Sudea. Ka longlongien keil teni hesakin koakeil ilonge, e hehon eni. 13 Anatin, nisan mahien min meatin keil ten out Serusalem, hesuval koa namumoni min meatin keil ten out Sameria. Numoni en keil hesuval koa namumoni min asuv houlu Ehab ten out Isrel navong keil amu vinvini vasi ehon keil ten amal onen. Anatin, inau nikulat vasi meatin keil ran out Serusalem ka out enek hemai heto hesuval pelet tai koa amumoteini muto ka avovoh eni. 14 Avaseini munak tei en meatin onak keil imoul ilohosai, inau nilokovein keil ka nisan keil iha en hen vativieh keil one. Anatin, koakeil avi vativieh keil one ihuli kat keil ka ilah tounah keil one hehi one. 15 Numon koanek min meatin keil onak veni keil amules amumon tisaen en metok ka asakin nau tinok vepeng houlu kat keil. Meatin keil enek amules amumoni mukok minau en avong avu one keil alokovein out Isip mai rokol kosa.”

16 En moulien onen asuv houlu Manase, kei sakin me-Sudah keil uva netan min ahi savsav keil ka amum tisa houlu en meten Iahova. Ka en meten Ahi emun, kei mumon taon ten out Serusalem vilelau en ran meatin tetahos keil koa kei mu vinvini keil.

Asuv houlu Manase va en eim takeih en out Babilon ka, en out enek, rendemien onen va netan ka lei kilea suk tisaen keil onen. Sakini, Ahi maeni vaha ris Serusalem. [c]

Amon mai vi asuv houlu onen me-Sudah keil

2 King 21:19-24

19 Navong Amon mai vi asuv houlu ten out Sudah, sua onen vi hanumau tai ka elu mun (22). Mama onen, isen Mesulemet, natnahin Harus ten out Sotbah. Asuv houlu Amon losil kat me-Sudah keil en out Serusalem ten sua elu nges (2). 20 Kei mumon tounah koa tisa en meten Iahova suval koa tata onen Manase mumoni mulamu. 21 Kei musil vasi sakien tatisaso keil onen tata onen: nana keil koa tata onen va netan mini, kei mun va netan mini. 22 Asuv houlu Amon sesein Iahova, Ahi onen avu onen tata keil one telamu, ka romusiltei sakien keil koa Iahova en vati.

23 Ka en avong tai, hetetamen keil onen asuv houlu Amon aviles mini, ka amuasi mat en teim sen. 24 Ka meatin keil ten out Sudah amuas hetetamen keil esuk enek, ka aling natin Amon kur vulin vahi asuv houlu one, isen Sosaea.

<- 2 King 20 2 King 22 ->