1 Samuel 16

Iahova rie lat Deved vamai vakes Sol vahi asuv houlu onen me-Isrel keil

1 Samuel 16:1-7,10-14

1 En avong tai, Iahova kistal min Samuel ka viteni mini vit, “?Kiles kilonge hetisa ven Sol heha vio … hevus nengeis? Inau naseseini tuai keke hervitei mun asuv houlu onen me-Isrel keil. Sakini, kosa, kikur oel ka kiha en taon ten out Betlehem. En out enek, kihisu min meatin tai, isen Tiese, veni narie lat natnali tai tuai vamai vahi asuv houlu onen meatin keil onak.”

2 Samuel visi vit, “?Numoni hemukave? Munak Sol hetaengoni, kei hemai houas inau nimat.”

Ka Iahova vit kesi mini vit, “Kilamun buluk koa vi atahas hau hetal minuk, ka kihiteni keke kovoual kovaha en out ekek kovasan sanien votut tai vaha minau. 3 Evus, kisisil en Tiese keke hemai en sanien enek, ka inau nihiteni minuk asa kumoni. Meatin koa nitie minuk, kitah oel en vatin vatie lati keke kei hekes Sol hemai hehi asuv houlu.”

4 Sakini, Samuel mumon asa koa Iahova viteni mini ka va en out Betlehem. Ka navong hetetamen keil ten out enek alesi mul mai, umai vesesal veni ral metauen ka avisi avit, “?Provet, kumai kovahiten tounah koa tahos, vuo tounah koa tisa?”

5 Ka vit kesi min keil vit, “Numai en rendemien koa tahos masan sanien votut tai vaha min Iahova. Sakini, miheha mihesak motein kami mivato. Hevus, mihemai ris.” Evus, sisil en Tiese ka natnali keil umai veni voumon keil avato keke iha en sanien votut koa houmoni.

6 Navong Tiese ka natnali keil umai akistal veni, Samuel meten rei navong les moeite, koa isen Eliab, ka mundem sasen eni vit, “Anatin eli, meatin koa mulomal ekek, kei varei Iahova rie lati.”

7 Ka Iahova viteni mini vit, “Vuo, inau nalei sesein koanek. Konandemtei usil aven meatin, koa taveah mukave vuo veinan tahos mukave. Inau narlei kantei meatin vasuval meatin keil ten out netan. Meatin keil amul ales aven meatin keil enges, ka inau, nalei kirisil va en rendemien onen.”

10 En sise enek, Tiese lah natnali keil koa avi oulu (7) ka rie keil min Samuel. Ka Samuel viteni mini vit, “Vuo, Iahova rorie lat etai koakeil ekek.” 11 Evus, visi vit, “?Keil vasi keiek?”

Tiese vit risi mini vit, “Tai koa vi tasikor, kei mul losil kat sipsip keil osak enges.”

Ka Samuel viteni mini vit, “San selusien vaha mini vamai. Rehertotantei hetokol kei hemai.”

12 Sakini, Tiese sila meatin tai va vahiteni mini vamai. Navong emai, Samuel lesi keke vi litetai tai koa aven malekuh ka veinan tahos. Ka Iahova viteni min Samuel vit, “!Kei varei! Mea kitah oel en vatin vatie lati keke kei hemai hehi asuv houlu hau onen me-Isrel keil.”

13 Sakini provet Samuel kur oel ka mutahi en vatin Deved en meten tunali keil. Hatte tas, ninin onen Iahova mai sien Deved ka mul katauni en avong enek va. Evus, provet Samuel mumon sanien votut onen va min Iahova, ka va ris teim onen en out Ramah.

14 Ka en asuv houlu Sol, Iahova kulat ninin onen rani, ka sa kes ninin tisa tai mini koa sakin metauen mul ien.

<- 1 Samuel 15 1 Samuel 17 ->