Romanus 9

Uhokri Ikaksa Kaayhsima Kabayka Ta Gitkis Judeyenepwi

Át 3.25; Rom 3.2; Ef 2.3

1 Nukebyupwi, nah kaayhsima muwaka nuyakipwi judeyenepwi pukuhpa inakni Uhokri gamnihra. Ku samah Cristo ay nupithu nah awna inakni yuwit inyerwatbakin. Ka nuwasemnima. Gaytakkis hiyeg ikí ku nah ka batek gikakkis hiyeg judeyenepwi. Bawa nah inyerwa batek gikakkis. Nah hiyakni abet nuhiyakemni Uhokri Gitip akki nuthu ku inakni yuwit inyerwa.

2 Nah wakaymni gidahankis hiyeg judeyenepwi kaayhsima. Nah kayah gidahankis takunipti apititak nuyakni.

3 Pi kabaytekama nahwatkam biyuk giw Cristo mpinekata igkis nukebyupwi judeyenepwi biyuke giw. Nah kadniye gidahankis mmanawa wahawkri pahapwiwa gikakkis. Igkis israelyenepwi hawwata ke nahbe.

4 Minikwak wahawkripwi israelyenepwi kabunuga gikak Uhokri. Ig Uhokri keh igkis humaw gihiyegapu. Ig ekkenenekwa gannu gitkis akak gamuwyi. Ig akki gitkis ku pariye gimawkan. Ig akki gitkis gikumadukan. Ig akki gitkis adahan ku samahpa igkis kiyathig. Ig ikakse gitkis kaayhsima kabayka.

5 Gahawkrikis pitatyepwi igkis kiyatye hiyeg igkis amekene Abrawh gikak amekene Izaki amekene Jakó. Igwa Cristo kinagsaw ay gibetkis israelyenepwi ig ku pariye kumadukene madikte, ig ku pariye Uhokri ku pariye kis adahan wixwiy kabayhig adahan apanenekwa. Ameh.

Uhokri Giwn Ka Waditnepyenenma

Rom 3.1; Gál 4.21; 2 Tim 2.13

6 Henneme igkis israelyenepwi ka utí madikte ini kabayka ku pariye Uhokri ikakse gitkis gihiyegapu. Ka sam. Inakni giwn ka waditnepyenenma. Ka ik adahan wis awna ku giwn he waditnepyenen. Mmanawa igkis israelyenepwi igkis ka madiktema igyerwa Uhokri gihiyegapu.

7 Ini ku samah igkis amekene Abrawh gihiwhipwi ka innema keh igkis humaw Uhokri gihiyegapu nikwe. Nah kehte abektey gikakwa amekene Abrawh. Ig amekene Abrawh kakamkayh piyana gikebyikis ig amekene Izaki gikak ig amekene Ismael henneme igkis ka piyamatema gikamkayh igyerwatma giwntak Uhokri. Ig Uhokri awna:

“Nerrasnen gikamkayupwi Izaki nerrasnen ik adahan igkis humaw nuhiyegapu.”

8 Igme amekene Ismael ig amadga wayk awaku ku samah amekene Abrawh mpiksaw kakamkayh akak gikehbetannenwa. Nikwe ig amekene Ismael gikamkayupwi ka humaw Uhokri gihiyegapu. Igme gikamkayh amekene Izaki ku pariye igyerwa giwntak Uhokri, ku pariye ig Uhokri ikakse git, iggi gikamkayupwi humaw Uhokri gihiyegapu.

9 Mmanawa ig Uhokri ikakse amekene Izaki ta git amekene Abrawh. Ig awna git:

“Adahan pahak kamukri apim ig kayg nah keh pihayo Sara kakamkayhnek.”

Hennewatbaki ig Uhokri gikaksan git.

10 Igme amekene Izaki, ig kuwis kiyapariye kuwis, ig Uhokri hawwata ikakse ku pariye danuh ta gitkis gidahanwa gikamkayupwi. Apim ini ig wahawkriwiy Izaki kakamkayh abes gukak gihayo amakano Rebeka. Ig eggutye kewye Esaú. Igme butitwiye kewye Jakó.

11-12 Igkis abes yumahte amadga hawkri, igkis yumahte gikehnikis iné mbayka iné kabayka, henneme kuwis ig Uhokri ikakse ku pariye danuh gitkis. Ig awna gut amakano Rebeka:

“Ku aysaw pis kakamkayhnek, ner eggutye kumadukakanek gapit ner butitwiye.”

Inakni arekhetni huwewe wot ku Uhokri apanenekwa ig kaniy gihiyegapu ku pariye gimawkan. Ka akakma ukehbetannenwatma wis kaniykiswa git. Henneme ig humakwi ta gimkat giwnteknewa.

13 Hennewa inakni gikaksan gut amakano Rebeka in kuwis kahayak kuwis mmanawa ariwnteke ini, ayipa guhiwhipwikis amadga hawkri, ig Uhokri awna:

“Nah kuwis kapigsa Jakó gihiwhipwi. Igme Esaú gihiwhipwi nah ka kapigsigkis.”

Hennewatbaki ig Uhokri gannasan awna.

Yuma Pahapwinama Waytakwiy Kis Adahan Uhokri Amnihgi Henneme Uhokri Amnih Ku Pariye Ig Amnihkere

Ex 33.19

14 Nawenétke pahapwi yaytak hiyapni henne, ig awna: “Uhokri ka keh wadit ku samah ig ka kapigsa amekene Esaú gihiwhipwi.” Nukebyi, ka muwaka awna inakni henne.

15 Mmanawa ig Uhokri awna ta git amekene Moís. Giwn:

“Nah amnih ku pariye nah amnihkere. Nah bayahmina ku pariye nah bayahminekere.”

16 Nikwe kawki umawkanma keh ig kaniypewi. Iné kawnata ukehbetannenwatma. Igwa Uhokri kaniy ku pariye ig amnihkere giwnteknewa.

17 Ig Uhokri gannasan minikweknene akki inakni huwewe wotwiy. Mmanawa in akki ku samah ig keh gikak amekene Faraó. Ig awna git:

“Nah keh pis humaw hiyeg gikiparakis kahadbe madikte hiyeg hiyá ku samah nah kanannusima hiyak pikak. Kahadbe igkis hiyapni henne, igkis kinetihwa numinhu muwwapu amadga hawkri.”

18 Hennewa ig Uhokri amnih ku pariye ig amnihkere. Ig dahkis ku pariye giyakni ig dahkiskere.

19 Nawenétke pahapwi yaytak hiyapni henne, ig awna nuthu: “Nikwe ka amekene Faraó gihawkanaprikma ku ig dahkise giyakni. Mmahki ig Uhokri sarayhni gipitit? Ig kehne ku samah Uhokri ikiswanaw gidahan.”

20 Nukebyi, ka ba awna inakni henne. Pis he hiyeg amadgayanen inin. Pariyenekap adahan pis karatonaw gitiput Uhokri? Yuma pahapwinama waytakwiy kis adahan Uhokri amnihgi. Wixwiy ka ariknawnama gitiput. Wixwiy kewa parawkambe. Igme Uhokri ig kewa pahapwibe ku pariye batak ini parawkam. Pahapwi gibatkan ka hiyá inma awna git: “Mmahka pis kehun henne?”

21 Ku pariye batak parawkam ig ik adahan ig batakni ku samah gimawkan. Ariwntak pahawo parawkam ig ik adahan ig keh pisaya teggin. Pahá teggin barewye adahan kibeyne kawihka, pahame teggin mbeyepye adahan kawihka hennen. In ka adahanma bayahka.

22 Hawwata ig Uhokri gikakkis hiyeg. Gaytakkis hiyeg ig kapigsigkis. Gaytakkisme ig ka kapigsigkis. Ignes kawih adahan padekwiki hawwata ke pahá tegginbe mbeyepyebe. Henneme ig kiyakan adahan gipedkeptenkis. Mmanawa ig muwaka akki ku samah ig ka batek akak patahwaki. Ig muwaka akki hawwata ku samah ig detye adahan pisenwa akak patahwaki. Nerras ku pariye ig ka kapigsigkis igkisnewa kawih adahan arekhetni ini.

23 Hawwata akiw ig muwaka akki ku samah ig kagamnihrasima. Ig muwaka akki ku samah gamnihra in kibeynewatnen. Nerras ku pariye ig kapigsigkis adahan ignes kawih gikiythani, igkisnewa kawih adahan arekhetni ini gamnihra.

Uhokri Amnih Hiyeg Kane Judeyenepwima Payak Gikakkis Hiyeg Judeyenepwi

Át 10.34; Rom 15.7; Gál 3.28; Ef 2.16

24 Kibeyne, nukebyupwi, wixwiy gikanyanpu adahan ig ukapriwtenwiy. Waytakwiy hiyeg judeyenepwi. Waytakwiyme hiyeg kane judeyenepwima. Henneme kibeyne, wixwiy madikte gibetkipu gikanyanpu.

25 Hennewa in ku samah in awna amadgatak amekene Oséyas gikagtan. Ayge ig awna:

“Nerras hiyegipiyenepwi ku pariye kane judeyenepwima ku pariye pitatye ka ndahanma, kurime nah keh igkis humaw ndahan. Nerras ku pariye pitatye nah ka batek gikakkis kurime nah keh igkis humaw nubetkipu. 26 Ku kapit waxri ku kiney minikwak nah awna gitkis ku igkis ka nuhiyegapuma aygewata igkis kanumkanek Uhokri dehetniye gikamkayupwi.”

27 Giminkisme hiyeg israelyenepwi ig Uhokri gawnepe amekene Isaías awna:

“Yis israelyenepwi, yis kaayhsima yikebyi ke kayhbe akigbimna parawhokwa. Henneme ka kibitema yaytak isamtawnek. 28 Mmanawa Ukiparawiy ka ayipwi hiyapkis yit apatra yitaraksan ku samah ig kuwis awna. Ig hiyapkis yit pahatyamin amadga wayk.”

29 Hawwata ig amekene Isaías awna:

“Ig Ukiparawiy Uhokri ig kagidatnisima. Waké ig ka amnih mpitha waytakwiybe, nikwekam madikte wixwiy biyukwikam. Wixwiy biyukap ke hiyeg sodomayenepwibe ke hiyeg gomohayenepwibe.”

Hennewa in ku samah ig amekene Isaías awna.

Kabá Madikte Hiyeg Judeyenepwi Kote Kamaxwekere Gipitit Jesus

30 Nawenétke pahapwi yaytak hiyapni henne, ig awna: “Mmahki Uhokri gawnepepu awna inakni yuwit?” Nukebyi, igkis awna inakni yuwit henne adahan ekkene wot ku nerras hiyeg kane judeyenepwima ku pariye minikwak kane mpiksaw wew wadit giwtrik Uhokri, kurime igkis wageswe kewa kibeynepwibe giwtrik awaku ku samah igkis kamaxwa ta gipitit Cristo.

31 Igkisme hiyeg israelyenepwi ku pariye mpiksewnes wew wadit giwtrik Uhokri akak ku samah igkis ihpenes amekene Moís gikumadukan, igkis mpiksewnes henneme igkis ka hiyá igkisma wageswa kewa kibeynepwibe giwtrik.

32 Nawenétke pahapwi yaytak hiyapni henne, ig awna: “Mmahki igkis ka hiyá igkisma?” Nah akkite pit. Awaku akak gikehbetankisnenwa igkis mpiksaw adahan igkis ikaw kibeyne giwtrik Uhokri. Igkis ka kamaxwekere gipitit Kiyapwiye Jesus. Amun ini nikwe ig Kiyapwiye Jesus humaw kewa pahow tipbe ku kapitit igkis tese igkis tuguhe dunibdiwarumpi.

33 Hennewatbaki ig Uhokri gannasan minikweknene awna. In awna:

“Ipegnay. Aysawnemenek nah ke wotbe nah ikis pahow tipbe ay gibetkis hiyeg siyawhyenepwi. Eggu tip keh igkis tuguhe dunibdipiwarumpikisnek. Ku samah pahapwi kiyimwihwa akak tip ku kapit ig tes gikugku, igkis judeyenepwi hawwata igkis kiyimwihwanek gikak ner ku pariye nah ikis ayge gibetkis. Henneme ku pariye hiyeg kamaxwenepwi gipitit igkis ka tuguh dunibdipinama. Igkis ka marakwa gipitkis gitiput Uhokri. Hennewatbaki ig Uhokri gannasan awna.

<- Romanus 8 Romanus 10 ->