1 Ariwnteke ini nah hiyá pahapwiwa ahj akiw. Ig muhuk inugiktak. Ig kagidatnisima. Gamuwyi uguhe madikte waxri.

2 Nah timá ig kabiman akak madikte giwakemni. Giwn:

―In paytwempu nopsadnene Babilôniya in biyuk. In biyuk. Kuri he wapityenen msakwa ayge. Anmapti mbeyepye kapinwene ayge payak akak madikte kuhipra asanawkapye patahwapye. 3 Mmanawa ini paytwempu in kewa pahapu tino powkemnipyobe, eg higapkise guwinwa guhigpan kaahawnasima ta gitkis madikte hiyeg. In win innebaki gumahyakemni. Madikte ikiparat amedgenepwi inin igkis ke wotbe igkis powkemnihwe gukak. Hawwata madikte piyuknepwi amedgenepwi inin igkis dax karukri kaayhsima akak gumahyakemni.

Hennewatbaki ig ahj awna.

4 Ayteke nah timá pahá ikupimnat awna ayta inugiktak. In awna:

―Nuhiyegapu, ka yi muwaka daxtasaw gukak no tino akak gumahyakemni. Amawka yis ka patahwa gukak kahadbe yis ka hiyá mbeyne payak gukak. 5 Mmanawa gukehni gupathawni kiyesihwe imuhew he danuhe ta amadgat en. Kuri nikwe ig Uhokri hiyak akak ini guhiyakemni mbeyepye.

6 Ayteke in ikupimnat awna ta gitkis ahj. In awna:

―Kuri hiyawa yis diyuhkis guwak. Katiwnisanay gutaraksan gut mapiy pimaput apitmin ku samah gumebyemni. Kipunsanay gugobla akak higapka mapiy pimaput apitmin ahawna ku samah ini higapka ku pariye eg higapkise ta gitkis hiyeg. 7 Eg kuwis kawih kaayhsima gukiythani ta gupitit. Eg wew akak kaayhsima batekka amadgaya inin. Kuri yisme kawihkisnay ta gupitit kaayhsima kayahwaki akak kaayhsima kadniki. Mmanawa eg awna gunaktin: “Nah bat ay nah ikiparawa nah. Nah ka madankunoma mmanawa madikte hiyeg wew nukakhu. Awetupye nah hiyá kadniki.” 8 Apatra inakni guwn, kaayhsima mbeyne danuh ta gut pahatya amin hawkri. Miyaka akak kadniki, mihetniki danuh gutnek. Eg bukehpikanek akak tiket. Mmanawa Ukiparawiy Uhokri kagidatnisima adahan ig hiyapkis gut apatra gupathawni.

Hennewatbaki ini ikupimnat awna.

9 Nerras ikiparat amedgenepwi inin ku pariye ke wotbe powkemnihwepyebe gukak no tino, ku pariye aharitnepwi batekka amadgaya inin, igkis hiyapni henne, igkis tihenek igkis kadninek mpiynepepye. Ta gitkis in ke wotbe igkis hiyá pahá paytwempu in wohe pahate, igkis hiyá nisayan pes nipititak.

10 In ke wotbe igkis tabirbet piyawakte ariw ini paytwempu akak madikte gapisnikis. Mmanawa igkis apis abohri ini mbeyne ku pariye danuh ta gut. Apim ini in ke wotbe igkis awna gitkis nerras paytwempuyenepwi ayge. Giwnkis:

―Akayih. Yis paytwempuyenepwi apit Babilôniya yis kuwis utí kaayhsima mbeyne. Kuhwekwa yipin nopsadnene apitminene. Hiyaksa kuri pahatya amin kaayhsima mbeyne hiyapkiska yit.

11 Hawwata akiw madikte piyuknepwi amedgenepwi inin igkis hiyapni henne, igkis hawwata tihenek. Igkis kadni giharitkis nerras paytwempuyenepwi. Igkis ka kadni giharitkis awakuma igkis batek gikakkis henneme awaku yuma hiyeg ay akiw adahan isimwiyi gewkanbetkis gitkis akiw.

12 Yuma hiyeg isimwiyi karukri wahano kuwikwiye gitkis akiw, iné karukri wahano seyno, iné tip ku pariye bukabkahwapu, iné akabdat kaneatiwnisima, iné kamis kibeyne mtibete, iné kamis bareswetet, iné kamis duruweh, iné ah imihne madikte, iné arikna madikte kehka puwikne giwahra, iné arikna madikte kehka ah kaatiwnisima, iné arikna madikte kehka kuriwra, iné arikna madikte kehka sipari, iné arikna madikte kehka tip.

13 Yuma hiyeg isimwiyi gitkis akiw ini “kanela”, ini adahan maguhene axka, iné igkis kawnata isim iyayrti imihnepye, iné pommad, iné ini imihgi kewye “mirra”, iné win, iné diluy, iné kuwak, iné pak, iné muttuh, iné kaway, iné giwewtenkis, iné ibukti. Yuma hiyeg isimwiyi ariknawnama akiw. Iné igkis kawnata isim hiyeg gihiyakemnikis akiw.

14 Hennewa, yis mahayakamnapye, madikte ini maguwka amadgaya inin ku pariye yis miyarhaw aharit, madikte biyukenek. Madikte igkiska amadgaya inin biyukenek. Madikte barewka amadgaya inin biyukenek. Yis ka takunima hiyapni akiw.

15 Apim ini nerras piyuknepwi ku pariye humaw igisapye awaku ku samah nerras paytwempuyenepwi isimwiyi ini arikna gitkis, in ke wotbe ignekis tabirbet piyawakte ariw ini paytwempu akak madikte gapisnikis. Mmanawa igkis apis abohri ini mbeyne ku pariye danuh gitkis nerras paytwempuyenepwi. Ayge igkis tihenes, igkis kadnibdikis mpiynepepye.

16 Igkis awna:

―Akayih. Kaayhsima mbeyne danuh arit ini paytwempu nopsadnene. Kuhwekwa in kewa pahapu tinobe bareswapu akak kamis kaneatiwnisima, kamis ugageboye, kamis duruweh, eg bareswapu akak karukri wahano, akak tip bukabkahwapu akak akabdat kaneatiwnisima. 17 Hiyaksa kuri pahatya amin eg biyukse madikte.

Hennewatbaki igkis piyuknepwi awna.

Hawwata akiw madikte nawiy akaptena gikakkis madikte gihiyegapukis, madikte gumadgayapu, madikte nerras ku pariye kannipwiye ahakwa parawhokwa, in ke wotbe igkis madikte tabirbet piyawakte ariw ini paytwempu.

18 Igkis hiyapni ku samah in wohe, ku samah nisayan pes nipititak, igkis kabimannek. Igkis awna:

―Yuma paytwempu akiw kema inima paytwempuma.

19 Apim ini igkis padak wayk gitewharitkisnek. Igkis tihebdinek, igkis kadnibdinek. Ayge igkis awnanek:

―Akayih. Ini paytwempu nopsadnene ini iwetrit ku kiney madikte hiyeg nawiy akipara nawiypukewne parawhokwa igkis humaw igisapye awaku kaayhsima igiska ayge. Hiyaksa kuri pahatya amin madikte biyuke.

Hennewatbaki igkis hiyeg awnanek.

20 Yisme yis inugikyenepwi, yis ka muwaka kadni. Hiyawa yis batek awaku ku samah ini paytwempu biyuk. Yis Uhokri gihiyegapu, hiyawa yis batek. Yis Uhokri giwatnipwi, yis Uhokri gawnepepu, hiyawa yis batek. Mmanawa ig Uhokri hiyapkis gitkis nerras paytwempuyenepwi apatra ku pariye gitaraksankis yikak.

21 Ayteke nah hiyá pahapwi ahj detye ig kidise pahow tip nopsadminnano kewa pahow sepbe. Ig padekwig ta parawhokwat. Ig awna:

―Inin arekhetni adahan ku samah ini paytwempu nopsadnene Babilôniya in biyuke kibentenwa. Akak nihawna in mpiya. Ka takunima in hiyapka akiw.

22 Ayteke ig ahj awna gitkis nerras paytwempuyenepwi. Giwn:

―Ka takunima timapka arigman ayge yibet akiw iné hebbek aman, iné aramtem guman, iné tohompet aman. In ka timapka akiw ayge yibet. Yuma hiyeg kannuhyepwi utipka ayge yibet akiw. Ka takunima timapka maripkaman ayge yibet akiw. 23 Yuma abukati hiyapka ayge yibet akiw. Ka takunima timapka ayge yibet akiw awayg ahegbetene ginetni gukak gibetki. Kuri yis hiyá mbeyne kaayhsima mmanawa nerras kinistekeputnepwi ayge yibet ignes mpiynepepye wages hiyeg adahan igkis keh ku pariye gihiyakemnikis tuguh. Yis hiyá mbeyne kaayhsima apatra ku samah yis kinisne madikte hiyeg amadgayapu inin akak yiyahmara.

Hennewatbaki ig ahj awna.

24 Igkis paytwempuyenepwi apitnenepwi Babilôniya igkis hiyapkiska kaayhsima mbeyne gitkis apatra ku samah igkis umehekeputnepwi mmanawa migat utepka ayge gibetkis. Uhokri gawnepepu gimigkis gikakkis gihiyegapu gimigkis ayge. Hawwata madikte hiyeg ku pariye umehpika amadga hawkri gimigkis ayge.

<- Apokalípsi 17Apokalípsi 19 ->