SAN MATEO 22

Ejemploe tti quiai are tottehe na

1 Jesús coexinhi ndac̈ho iná ngain na de ixin ejemplo, co ndac̈ho:

2 ―Tti ttetonha Dios ngajni, mé inchin joinchehe ná rey que coín ná vandango are cottehe xitsihi. 3 Jehe rey mé coetonhe cain xinchehe ẍé para joindache xa cain chojni que ovintteinvitado para sijine na ngain vandango mé, pero cain chojni mé c̈hoha na cjoi na. 4 Jehe rey mé cjan rroanha icha ninchehe ẍé, co ndac̈ho ngain na: “Ndache ra cain chojni que ote invitado que otsí na sine na ixin onchao jí comida. Ndache ra na ixin janha ocoetonha para venhe coxinttahna co cain coxigo que janha jointtanttao, co cainxin onchao jí. Ndache ra na que tsí na ngain vandango jihi.” 5 Pero cain tti chojni que ovintte invitado c̈hoha na cjoi na. Ná de jehe na sacjoi na ngataon jnguihi na, co iná na ngain negocioe na, 6 co icanxin na tse na jehe ninchehe ẍé rey mé, co feo joinchehe na ngain na hasta nagoenxon na na. 7 Cottimeja rey mé anto coñao, co rroanha cain xisoldadoe para nagoenxon xa cain jehe tti chojni que cjoaya co cjoaga xa rajné na. 8 Cottimeja ndac̈ho rey mé ngain ninchehe ẍé: “Vandango onchao jí, pero cain chojni que jointtainvitá rrojine na tequininxinha na para rroquí na. 9 Jai ttji ngain cain nttiha yeye co ndache ra cain chojni que setan ra que tsí na sine na.” 10 Cain ninchehe ẍé rey mé vac̈hje na ngain cain nttiha, co joatse na cain chojni que vetan na, tti jian co tti jianha; co jamé hasta caon nchia mé de chojni.

11 ’Cottimeja jehe rey mé joixinhi para joitsjehe cain chojni que tejine, co jehe vicon nttiha ná xí, pero diguitoxinha xa inchin ná chojni que ttji ngain ná vandango. 12 Jehe rey ndac̈ho ngain tti xí mé: “Amigo, ¿quedonda joixinxin jaha nttihi que ditoxinha para ngain vandango jihi?” Pero jehe tti mé tencoa. 13 Cottimeja rey mé ndac̈ho ngain tti nitedayá láto ngain mesa: “Ttia ra xí yá de rotté xa co de rá xa co diganca ra xa ndoja ngain tti naxin xehe tti rrotsjanga xa co sinetaon neno xa.” 14 Ixin janha nichjá anto tsje chojni, pero cainxinha na rinao na na janha.

Tti rroxenga hna ngain impuesto

(Mr. 12.13‑17; Lc. 20.20‑26)

15 Cottimeja xifariseo savinttecji xa, co vinttecjao chó xa queẍén sinchehe xa para sinchenichja xa Jesús ná cosa nchaoha para mé tsjanguixin xa Jesús. 16 Mexinxin rroanha xa canxion chojní xa, conixin canxion chojní Herodes para joindac̈ho na ngain Jesús:

―Maestro, janha na nona na que soixin ndac̈ho tti ndoa, co soixin ndoa nchecoenhe chojni de ixin Dios, co ncheha caso tti nichja icha chojni ixin soixin ncheha juzgado chojni rico ojé que chojni noa. 17 Ndachjenji ni ra: ¿Anchao jí tsjenga na hna impuesto ngain xiemperador, o ani nahi?

18 Pero Jesús oconohe de tti jianha que jehe xa teẍaxaon xa de ixin jehe, co jehe ndac̈ho ngain xa:

―¡Jaha ra ẍo ncheha ra tti ndac̈ho ra! ¿Quedonda rinao ra sincheyana ra? 19 Tjagohna ra ná tomi que ttjengaxin ra hna impuesto.

Co jehe na cjoagoe na Jesús ná tomi de plata que vanchegonda chojni tiempo mé. 20 Are vicon Jesús tomi mé joanchiangui ngain na co ndac̈ho:

―¿Quensen con jinganito jihi, co quensen nombré jitaxin jihi?

21 Jehe xa vinttendac̈ho xa:

―Con xiemperador co nombré xa.

Cottimeja Jesús ndac̈ho ngain xa:

―Chjehe ra xiemperador tti jiquininxin xa co danjo ra ngain Dios tti jiquininxin sayé jehe.

22 Are vinttequinhi xa jihi, jehe xa vinttegoan xa admirado; co nttiha cointtohe xa Jesús co jehe xa savinttecji xa.

Canxion chojni joanchiangui queẍén tti rroxechon ni

(Mr. 12.18‑27; Lc. 20.27‑40)

23 Ngain nchanho mé canxion xisaduceo cjoi xa para joitsjehe xa Jesús. Xisaduceo vaguitticaon xa que chojni que ndadenhe irroxechonha na; mexinxin joanchiangui xa ngain Jesús co ndac̈ho xa:

24 ―Maestro, ley que vayé Moisés jitaxin que si ná xí que jicao xa c̈hihi xa ndasenhe xa co ẍonhi chjan tsinttohe xa, chonda que ná xanchó xa xanxí secao nc̈higanha mé co rrochonda na chjan para que chjan mé sehe xan inchin xenhe tti ndavenhe. 25 Nttihi ngayehna janha na vintte yáto xanxí, cain xanchó xan. Xansaho vecao xan c̈hihi xan pero ndavenhe xan, co ixin ẍonhi chjan cointtohe xan, nc̈higanha mé vecao nc̈ha xanchó tti ndavenhe, xanyoxin. 26 ẍajeho jamé conhe ngain xanyoxin cai, co después vecao nc̈ha xanninxin, pero ẍajeho jamé conhe, co hasta vecao nc̈ha tti xanyatoxin co ẍonhi chjan joichonda nc̈ha. 27 Co después de cain mé, cai jehe nc̈ha ndavenhe nc̈ha. 28 Mexinxin ndachjenji ni ra, are rroxechon cain ni yá, ¿quexehe de tti yáto xanchó mé sehe mero xixihi jehe nc̈hí mé ixin cain xan vinttecao xan ẍajeho nc̈hí mé?

29 Jesús ndac̈ho:

―Jaha ra noaha ra quehe tendac̈ho ra ixin noaha ra tti jitaxin ngain Palabré Dios, ni noaha ra tti joachaxin que chonda Dios. 30 Ixin cain chojni que ondavenhe, are rroxechon na, isinttecaoha chó na de xí co ni de nc̈hí, ixin are mé sintte na inchin cain ángel de Dios que te ngajni. 31 Pero de tti jaha ra danchianguina ra de ixin tti chojni que ndadenhe, ¿atsjeha jaha ra tti jindattjo ra Dios mismo? Jehe dindac̈ho janhi: 32 “Janha tti Dios de Abraham co Isaac co Jacob.” Dios jeha Dios de tti nindadiguenhe, sino que Dios de chojni que techon.

33 Cain chojni que te nttiha, are vinttequinhi na yá, cain na vinttegoan na admirado de ixin tti nichja Jesús.

Tti icha importante que ttetonha Dios

(Mr. 12.28‑34)

34 Are xifariseo conohe xa que Jesús ndajoinchetencoa xisaduceo, jehe xifariseo ẍatte xa ngain Jesús. 35 Co ná de jehe xa que vehe xa maestroe ley Israel joinao xa rrojinchenichja xa Jesús ná cosa nchaoha; mexinxin joanchiangui xa ngain Jesús co ndac̈ho xa:

36 ―Maestro, ¿quexehe tti icha importante que ttetonha Dios sinchehe ni?

37 Jesús ndac̈ho:

―“Rinao Dios, ngain ansean, conixin ngain almá, conixin ngain joarrixaoan.” 38 Jihi tti icha importante, co tti saho que ttetonha Dios sinchehe ni. 39 Co tti yoxin chiaon ẍajeho ixin ndac̈ho: “Rinao cain chojni inchin rinao cuerpoa.” 40 Jehe cayoi cosa yá tti icha importante de ngain ley que vayé Moisés co de cain tti ndac̈ho cain profeté Dios.

Tti dindac̈ho David de ixin Jesucristo

(Mr. 12.35‑37; Lc. 20.41‑44)

41 Are cain xifariseo ẍa tate xa nttiha, 42 Jesús joanchiangui ngain xa co ndac̈ho:

―¿Quehe ẍaxaon ra de ixin Cristo? ¿Quensen mé?

Jehe xa vinttendac̈ho xa:

―Mé tsixin de ngain razé rey David.

43 Cottimeja ndac̈ho Jesús:

―Mexinxin ¿quedonda Espíritu Santo joinchenichja David, co David joincheguinhi Cristo, soixin? Ixin David dindac̈ho:

44 Tti Ttetonha cainxin cosa ndac̈ho ngain tti Ttetonna janha:

“Darihi ngain lado jian na

hasta que janha sinttagacha jaha de ngain cain tti ningaconha.”

45 Mexinxin, ¿queẍén que Cristo jehe ná xannttí David si jehe David mismo ndac̈ho que Cristo tti ttetonha ngain jehe?

46 Co ni ná xa iẍonhi ndac̈ho xa ngain Jesús, co desde ngain nchanho mé ni ná xa iẍonhi joanchianguihi xa Jesús.

<- SAN MATEO 21 SAN MATEO 23 ->