1 Saho rrittetonha jaha que chojni que ditticaon Jesucristo chonda que sinchetsenhe na ñao Dios, sinchecoanxinhi na Dios, sanchia na Dios co sanjo na gracias ngain Dios para cainxin chojni. 2 Jañá nchetsenhe ñao Dios para ixin cain chojni que chonda joachaxin para ttetonha ngain gobierno co chojni que ttetonha ngain cain rajna para que ján na nchao sontte na c̈hjoin co ẍonhi tseto na co sontte na inchin Dios rinao co para icha chojni rrochonda na respeto nganji na. 3 Cain jihi jian co tti ncheẍoxinhi Dios tti chjá na iná vida naroa. 4 Jehe rinao que cainxin chojni sayé iná vida naroa co satsoan na tti ndoa. 5 Jí nacoaxinxon Dios, co jí nacoa tti nchao tsintte chojni para ngain Dios, co tti xí mé, jehe Jesucristo. 6 Jesucristo joanjo cuerpoe para ndavenhe para que cjoenga hna tti jianha que nttoho na cainxin na. Co jihi joiconhe ngain tiempo que Dios ondac̈ho icha antes que rrojiconhe. 7 Mexinxin Dios coinchiehe na janha para ná representanté Jesucristo co para tjagoa tti chojni que jeha judío de ixin tti ndoa que dotticaon na. Janha ditticanho Cristo, mexinxin janha nichja tti ndoa co nichjaha tti ndoaha.

8 Mexinxin janha rinaho que ngain ngoixin nontte xí sinchecoanxinhi xa Dios. Co are rrotsin rá xa para sinchecoanxinhi xa Dios, pero joxon rá tti chojni que ẍonhi jianha joinchehe para que Dios sicon rá naroa. Co tsoñaoha xa ni tsetocaoha chó xa de ixin chijni. 9 Co janha rinaho que nc̈hí sinttengá nc̈ha lonttoe nc̈ha inchin jiquininxin conixin jian joarrixaon co rroẍanotaon cuerpoe nc̈ha tti jiquininxinha sicon chojni. Are rrojinji nc̈ha co tsette lazoe nc̈ha pero inchin jiquininxin co ẍonhi cosa anto rentte tsentaha já nc̈ha, ni cosa anto rentte que settea nc̈ha, ni lontto que anto rentte para sengá nc̈ha. 10 Nc̈hí sehe nc̈ha c̈hjoin, pero de ixin tti jian que sinchehe nc̈ha inchin nc̈hí que dac̈hjeyexin ngain cosa jianha co dintte nc̈ha jian ngain Dios. 11 Nc̈hí chondaha nc̈ha que rronichja nc̈ha are tsinhi nc̈ha ngaxinhi nihngo para jamé tsangui nc̈ha inchin chojni que ditticaon tti ditonhe. 12 Janha danjoha joachaxin para que nc̈hí sinchecoenhe nc̈ha chojni are icha chojni sintte na ngaxinhi nihngo, co ni tsetoanha nc̈ha ngain xí; chonda nc̈ha que rrotencoa nc̈ha. 13 Ixin Dios saho joinchechjian Adán, cottimeja Eva. 14 Co jeha Adán tti joincheyehe Satanás, sino que Eva tti joincheyehe Satanás. Co ixin Satanás nchao joincheyehe Eva, mexinxin después Eva joinchehe cosa jianha. 15 Pero masqui Dios ndac̈ho que anto tangui para ná nc̈hí are ncheconcjihi nc̈ha chjan, pero ẍonhi tsonhe nc̈ha si jehe nc̈ha ditticaon nc̈ha Dios, co si rinao nc̈ha cain chojni, co si sehe nc̈ha jian inchin rinao Dios conixin jian joarrixaoen nc̈ha.

<- 1 TIMOTEO 11 TIMOTEO 3 ->