Tjukurpa Jesulu Johnta Utiṟa Nintintja

Revelation

Nyangatja Ngaṉmanytju Nyakula Wangkanytjaku

Nyangatja Godaku tjukurpa Johntu walkatjunkunytja Jesulu palula utiṟa nintinnyangka. Paluṟu walkatjunu manta tjukutjukungka nyinara ngura ini Patamatjala, uṟu puḻkangka nguṟurpa. Panya Jesuku mirpaṉtju tjuṯangku palunya witiṉu tjukurpa Jesunyatjara rawangku para-wangkanyangka. Munuya palunya pautangka katira tjunu ngura nyara palula, ka paluṟu tjailangka puṟunypa nyinangi.

Ka ngura nyara palula nyinanyangka Kurunpa Miḻmiḻṯu palunya nintiningi tjukurpa tjuṯa, ka paluṟu kuruntu nyangangi munu kuliningi ngula nyaaringkuku manta winkingka. Ka Jesulu palula wangkangu tjukurpa uwankara paluṟu nyakunytjatjanungku nyiringka walkatjunkunytjaku munu nyiri palunya iyantjaku ngura tjuṯakutu Jesuku walytja tjuṯakutu.

Palu nyara palula aṟangka ngura winkingka Jesuku mirpaṉtju tjuṯangku Godaku walytja tjuṯa puḻkaṟa kuraningi, munuya tjananya ananingi, pungangi, iluntanangi, tjara tjailangka tjarpatjunangi, munuya tjanampa tjituṟu-tjituṟu puḻka palyaningi. Ka tjukurpa nyangatja Jesulu Johnta utiṟa nintinu paluṟu walkatjuṟa tjanalakutu iyantjaku tjana kuliṟa raparingkula kuṉpu ngaṟanytjaku Jesuku Christaku.

Jesulu tjukurpa tjuṯa Johnta kurunta nintinu tjukurpa wiṟu tjuṯa. Kaya Jesuku walytja tjuṯangku tjukurpa nyanganpa iriti riitamilaṟa uti kuliningi ngula nyaaringkuku manta winkingka. Palu Jesuku mirpaṉtju tjuṯangkuya riitamilaṟa puṯu kuliningi panya tjukurpa nyanganpa kumpilpa nguwanpa. Panya Jesulu tjukurpa nyanganpa nintinu palumpa walytja tjuṯangku kuliṟa raparingkunytjaku pika puḻka tjanala wirkankunyangka. Panya tjukurpa nyanga palula tjanalanguṟuya kuliningi Godalu yaaltjingaṟa palumpa walytja tjuṯa wankaṟunkupai, munuya palulanguṟu puḻkaṟa mulamularingkula nguḻuringkuwiya rapa nyinangi.

Uwa, Johntu kutjupa kutjupa tjuṯa kuruntu nyangu panya tjiya wiṟu mulapa Godanya nyinapai, munu kuka ayinayini 4 nyaḻpi tjuṯatjara, munu angelpa tjuṯa, mamu ayinayini maṉkurpa, nyiri rulumapi kiṯi 7-tjara, angelpa 7-tu tuṟampata puuṟa wangkatjingannyangka, nyanytju tjuṯa, munu lamalama, munu kutjupa kutjupa tjuṯa kuḻukuḻu. Ka nyanganpa uwankara Jesulu nintinu Johnta paluṟu nganaṉa kuḻu nyakula kampa kutjupaṟa puḻkaṟa nguriṟa kulintjaku, munu kuliṟa nguḻu wiya Godaku puḻkaṟa mulamularingkunytjaku. Panya tjukurpa nyanga palula tjanalanguṟu nganaṉa kulini mulapa Jesunya Christanya Mayatja puḻka mulapa nyinanyi uwankarangka waintarinytja. Munula kulini mulapa Godalu palumpa mirpaṉtju tjuṯa uwankara wiyalku Jesula Christalawanungku Satannga tjananya kuḻu piṟuku wanka nyinanytjaku wiya. Munula piṟuku kulini mulapa Godalu palumpa walytja tjuṯa mantjilku tjana Jesunya tungun-tunguntu rawangku waṉannyangka, kaya palula tjungu tiṯutjara nyinaku ngura kuwaritja wiṟu mulata.

Tjukurpa nyanganpa ngarinyi:

1:1-8 Johntu ngaṉmanytju wangkanytja

1:9—3:22 Jesulu wangkanytja palumpa walytja tjuṯaku ngura 7-ta nyinanytja tjuṯaku

4:1-11 Godanya waḻkuntja ngura ilkaṟitjangka

5:1—8:1 Nyiri rulumapi munu Lamalamanya

8:2—11:19 Angelpa 7-tu tuṟampata puuṟa wangkatjingantja

12:1—15:4 Tjukurpa 7-pa kutjupa Johntu nyakunytja

15:5—16:21 Angelpa 7-tu ilkaṟinguṟu pika kura pitinguṟu mantangka tjutintja

17:1-18 Minyma kura munu mamu kata 7-tjara

18:1—19:4 Tawunu Puḻka Papilannga Piḻukatinytja

19:5-10 Lamalamangku kuri aḻṯinytja

19:11-21 Nyanytju piṟanta pitjanytja

20:1-10 Godalu Satannga waṟungka waṉinytja

20:11-15 Tjiṉṯu maḻatjangka Godalu ngurkantankunytja

21:1-8 Ilkaṟi kuwaritja munu manta kuwaritja

21:9—22:5 Tawunu Jerusalemanya kuwaritja

22:6-21 Jesunya maḻaku pitjanytja

1-2 Kulinmaya Jesuku walytja tjuṯangku! Panya ngayuluṉa Johnnga, Jesuku Christaku waṟkaripai, munuṉa tjukurpa nyangatja kuwari nyurampa walkatjunanyi Jesulu ngayunya nintinnyangka. Panya Godalu palula utiṟa tjakultjunu kuwari nguwanpa nyaaringkuku nyanga palula maḻangka. Munu paluṟu angelpa wituṟa iyaṉu ngayulakutu aṟa nyanga palunya ngayula wirkaṟa wangkara nintintjaku. Kaṉa nintiringkula kuwari nyanga nyurampa ngapartji walkatjunanyi uwankara ngayulu nyakunytjatjanungku kulintjatjanungku, panya Godanya mukuringanyi nyura kuḻu kulintjaku tjukurpa nyanga kuwari nguwanpa nyaaringkunytjanya. Nyangatjaṉa tjukurpa Godalanguṟu nyurala tjakultjunanyi, Jesulu Christalu kuḻu wangkanytja. 3 Ka nyura tjukurpa nyanga palunya nyakula kulinnyangka nyuranya Godalu pukuḻmankuku. Ka nyura tjukurpa nyangatja wangaṉarangku kuliṟampa palya alatjiṯu nyinaku. Panya aṟa uwankara nyanga ngayulu nyakula nintiringkunytjanya kuwari nguwanpa utiringkuku.

4 Uwa, kaṉa ngayulu lita nyangatja kuwari nyuralakutu ma-iyaṉi Godaku walytja tjuṯakutu manta pala Aitjala nyinanytja tjuṯakutu, panya nyura tawunu 7-ta nyinanyi munu nyura church walytja walytjangka tjunguringkupai Godanya waḻkuntjikitja. Ka Godalu nyuranya pukuḻtjungku kanyinma munu kurunpa pukuḻpa nyinanytjaku palyanma. Paluṟu panya kuwaripatjara mulapa nyinanytjatjanu kuwari nyanga nyinanyiṯu munu paluṟu panya ngula pitjanyi. Godanya panya mayatja puḻka nyinanyi tjiya wiṟungka. Ka panya palumpa Kurunpa 7 ngaṟanyi palula kuranyu. Nyanga paluṟu tjana kuḻu nyuranya pukuḻtjungku kanyinma pukuḻpa mulapa nyinanytjaku. 5 Ka palu puṟunytjuṯu Jesulu Christalu kuḻu nyuranya pukuḻmaṟa kanyinma. Paluṟu panya mantakutu pitjala palumpa mamaku tjukurpa tungun-tunguntu wangkangi munu panya ilungu. Ka panya Mamalu palunya-waraṟa pakaltjingaṉu munu palulanguṟu nganaṉanyalpi ilunyangka palu puṟunytjuṯu pakaltjingalku. Ka Jesunya mayatja puḻka mulapa nyinanyi mayatja mantatja uwankarangka waintarira.

Panya paluṟu-maṉṯu nganampa puḻkaṟa mukuringkupai, ka panya nganaṉanya kura palyantjitjanguṟu pungkunytjaku ngaṟangi palu paluṟu nganaṉanya kura nyinanyangka nyakula ngalkilpa ilungu nganaṉa kaṟalyarira wankaṟu nyinanytjaku. 6 Munu palulanguṟu paluṟu nganaṉanya walytjanmanu Godala wangaṉarangku kulintjaku, munu paluṟu nganaṉanya tjukurtjara tjuṯa tjunu Godaku palumpa Mamaku nganaṉa aṉangu watarkitja tjuṯangka Tjukurpa Palya tjakultjunkunytjaku tjana ngapartji kuliṟa Jesuku walytjaringkunytjaku. Uwa, Jesunya panya wiṟu mulapa pitalytji puḻka witulya puḻkanya nyinanyi, kala uti palunya tiṯutjarangku mirawaṉima. Uwa, mulapala uti palunya kutju waḻkunma.

7 Nyawaya! Jesunya ngula ngangkaḻingka maḻaku pitjaku, kala aṉangu winkingku nyakuku, munu puṉu kaṯakutjarangkaya wakaṟa utitjunkunytjalu tjana kuḻu nyakuku. Munuya palunya nyakula aṉangu uwankara puḻkaṟa tjituṟu-tjituṟurira ulaku. Uwa, mulapa nyanga alatjiriku.

8 Ka Mayatja Godalu nyanga alatji wangkanyi, “Panya ngayulu kuwaripatjara mulapa uwankara wiyangka nyinanytjanya, munuṉa kuwari paluṟuṯu nyinanyi tiṯutjara, munuṉa uwankara wiyaringkunyangka ngayulu nyinaku alatjiṯu paluṟuṯu. Munu panyaṉa ngula pitjaku paluṟuṯu.” Alatji Godalu paluṟunku wangkanyi witulya puḻkangku.

9 Ngayulu Johnnga, nyurampa panya walytja, panya nyuntu nganaṉa Jesuku walytja tjuṯa nyinanyi. Ka panya Godanya wantipai tjuṯangku nyuranya kuralpai, palu puṟunypaṉiya ngayunya kuḻu kuralpai, panya nganaṉa Jesuku walytjaringkunyangka. Palu tjana ngayunya alatji kurannyangka ngayulu tungun-tunguntu rapangku Jesunya waṉaningi nyura puṟunytju. Kaṉiya palulanguṟu witiṉu munuṉiya katira tjunu manta tjukutjukungka uṟu puḻkangka nguṟurpa ngura ini Patamatjala. Panya ngayulu Godaku tjukurpa ngura tjuṯangka para-ngaṟala wangkangi, tjukurpa panya Jesunyatjara. Kaṉiya nyara palulanguṟu ngayunya ngura nyanga palula katira wantikatingu. 10 Kaṉa manta nyanga palula nyinangi rawa alatjiṯu, ka Mayatjaku tjiṟirpi ngaṟanyangka Kurunpa Miḻmiḻṯu ngayunya witulya puḻkangku nintiningi.[a] Kaṉa palulanguṟu tjaṉangka wangka kulinu puḻkaṟa wangkanyangka, panya tuṟampata wangkatjingalpai, palu puṟunypaṉa wangka kulinu. 11 Alatjiṉi wangkangu, “Nyuntu kuwari nyanga kutjupa kutjupa tjuṯa nyanganyi, munun nyakunytjatjanungku nyiringka walkatjura munu iyala Jesuku walytja tjuṯakutu ngura nyara kutjupa tjuṯangka nyinanytja tjuṯakutu ini ngura nyangankutu Ipitjalakutu, Muunalakutu, Puukamalakutu, Tjayatiṟalakutu, Tjaatitjalakutu, Pila-talpiyalakutu, munu Layatiyalakutu.” Alatjiṉi wangkangu.

12 Kaṉa kulintjatjanungku kulinu, “Nganaluṉi nyangatja wangkanyi?” Munuṉa pinkuraraṟa nyangu puṉu panya tili katuṟa kanyilpai 7 ngaṟanyangka. Puṉu panya paluṟu tjana gold-nguṟu palyantja. 13 Ka palula tjanala nguṟurpa ngaṟangi wati puṟunypa mantara waṟatjara munu paluṟu piḻpirwanungku nanpa puṟunypa karpiṟa kanyiningi gold-nguṟu palyantja. 14 Ka paluṟu mangka piṟanpa mulapa tili puḻka puṟunypa irnyaningi ngangkaḻi puṟunypa, munu paluṟu kuṟu waṟu tili puṟunypa irnya-irnyaningi. 15 Munu paluṟu tjina irnyaningi, panya ayana waṟungka tjunkunyangka waṟu tili winki irnyalpai, palu puṟunypa. Kaṉa palunya wangka kulinu kapi uṟu waḻa rurkuntja puṟunypa. 16 Ka paluṟu maṟa wakungku kililpi 7 kanyiningi. Munu tjaangku tjuḻa waṟa iṟi kampa kutjara kanyiningi. Ka yunpa paluṟu pitalytji puḻkangku irnyaningi, panya tjiṟirpingku kaḻaḻa irnyalpai, palu puṟunypa.

17 Munuṉa palunya nyakula punkaṟa ngaringi palula tjinangka miri ilunytja puṟunypa. Kaṉi maṟa wakunguṟu pampuṟa wangkangu, “Nguḻuringkuwiya rapariwa. Ngayuluṉa ngaṉmanyitja mulapa uwankara wiyangkalpi nyinanytjanya, munuṉa tiṯutjara mulapa nyinanyi panya manta ilkaṟi wiyaringkunyangkaṉa ngayulu nyinaku alatjiṯu wiyaringkuwiya. 18 Ngayuluṉa Wanka Nyinapainya. Ngayulu ilungu palu kuwariṉa wanka tiṯutjara nyinanyi wiyaringkunytja wiya alatjiṯu. Ngayulu mayatja puḻkangku ngurkantaṟa wangkapai ilunytjaku munuṉa ngayulu ngurkantankupai ngananya miriku ngurakutu ankuku.

19 “Uwa John, nyuntu kuwari nyakunytjatjanungku nyiringka walkatjura panya ngayulu nyuntunya nintintja uwankara. Panya ngayulu kuwari nyuntunya nintini kuwari kuranyitja nyaaringanyi munu piṟuku ngula maḻatja nyaaringkuku. Ka nyuntu nyanganpa uwankara nyakunytjatjanungku nyiringka walkatjura. 20 Kuwarin nyanganyi kililpi nyanga 7 ngayulu maṟa wakungku kanyinnyangka, munun piṟuku nyanganyi puṉu nyanga tili katuṟa kanyilpai 7 ngayula para-ngaṟala arintankunyangka. Palu nyanga tjana nyaa nintini kililpi, tili kanyilpai 7-tu kuḻu? Wiya, nyanga alatjiya nintini. Kililpi 7-tu nintini angelpa 7 panya paluṟu tjana kanyilpai Godaku walytja tjuṯa ngura nyara 7-ta nyinanytja tjuṯa. Ka tili kanyilpai 7-tu nintini Godaku walytja tjuṯa tawunu nyara 7-ta nyinanytja tjuṯa.” Panya nyanga alatjiṉi Jesulu kuwari nintiningi.

Revelation 2 ->