Tjukurpa Palya Matthew-lu Walkatjunkunytja Matthew Nyangatja Ngaṉmanytju Nyakula Wangkanytjaku Nyangatja Godaku tjukurpa wati ini Matthew-lu walkatjunkunytja Jesunyatjara. Matthew-nya panya ngaṉmanypa wati mani mantjilpai nyinangi munu paluṟu aṉangu Jew tjuṯanguṟu mani mantjilpai wati mayatja puḻka Rome-anya nguraṟaku tjunkunytjikitjangku. Palu ngula Jesulu palunya iwarangka itingka nyakula ngurkantanu palumpa nintintja nyinanytjaku, ka paluṟu waṟka panya palunya wantikatingu munu Jesula tjanala tjunguringkula para-pitjalinangi yiya maṉkurpa munu palula tjukurpa tjuṯa kuliṟa nintiringangi. Ka panya Jesunya ilunytjatjanu wankaringkula pakannyangka maḻangka Matthew-lu kuḻu palunya nyangu wanka para-ngaṟanyangka. Ka nyiri nyangangka Matthew-lu tjakultjunanyi Jesunya Wankaṟunkupainya, panya Godalu palunya ngaṉmanytju kalkuṉu Aipuṟamaku walytjapitinguṟu utiringkunytjaku, ka panya palunyaya wati wangkatjara tjuṯangku nyiringka iriti walkatjunangi. Munu Matthew-lu kuḻu alatji tjakultjunanyi panya Christanya Mayatja puḻka nyinanyi aṉangu Godaku walytjapitiku munu paluṟu nganaṉanya wangkanyi panya Christalulanya nintinu tjukaṟuru palyanyku nyinanytjaku. Tjukurpa nyanganpa ngarinyi: 1:1—2:23 Jesunya iṯi ngarinytja 3:1—4:11 Jesunya baptise-katinytja munu Satantu palunya kurantjikitjangku arkantja 4:12—18:35 Jesulu aṉangu tjuṯangka tjukurpa wangkara nintintja munu pikatjara tjuṯa palyaṟunguntja 19:1—20:34 Jesulu tjukurpa kutjupa tjuṯa wangkanytja munu miracle kutjupa tjuṯa palyantja 21:1—23:39 Jesunya Jerusalemalakutu tangkiyingka tatiṟa ankunytja, munu timpulangka tjarpara tjukurpa tjuṯa wangkanytja 24:1—25:46 Jesulu palumpa nintintja tjuṯangka tjakultjunkunytja ngula nyaaringkuku 26:1—27:66 Jesunya witintja munu puṉu kaṯakutjarangka wakaṟa utitjunkunytja 28:1-20 Jesunya wankaringkula pakantja
1 Tjukurpa nyangatja Jesunya Christanyatjara. Panya Aipuṟamalanguṟu Isaacanya utiringu ka nyara palulanguṟu maḻatja maḻatja utiringkula waṉaṟa Davidanya utiringu. Ka Davidalanguṟu maḻatja maḻatja ma-ngaṟala waṉaṟa maḻatjalta Jesunya utiringu. Uwa, Aipuṟamalanguṟu ini nyanga paluṟu tjana ma-ngaṟala waṉaṟa Jesulalta wirkanu, ini nyanganpa 2 Panya Aipuṟamaku katja ini Isaacanya, ka Isaacaku katja ini Jacobanya, ka Jacobaku katja tjuṯa wati ini Judah-nya tjana. 3 Ka Judah-lu minyma ini Taimanya aḻṯingu munu pula katja kutjara kanyinu ini Piṟitjinya pulanya Tjiṟanya. Ka Piṟitjiku katja ini Itjuṟannga, ka Itjuṟanku katja ini Raamanya. 4 Ka Raamaku katja ini Amina-tapanya, ka Amina-tapaku katja ini Naatjannga, ka Naatjanku katja ini Tjalmannga. 5 Ka Tjalmantu kungkawaṟa ini Rayapanya aḻṯingu munu pula katja ini Pawatjanya kanyinu, ka Pawatjalu kungkawaṟa ini Ruthanya aḻṯingu munu pula katja ini Uupitanya kanyinu. Ka Uupitaku katja ini Jesse-nya. 6 Ka Jesse-ku katja ini Davidanya, panya Godalu wati nyanga palunya ngurkantaṟa tjunu aṉangu Israelkunu tjuṯa mayatjarira kanyintjaku.
12 Ka panya Tjikanayaku katja ini Tjiyaltilnga, ka palumpa katja ini Tjiṟapapilnga. 13 Ka Tjiṟapapilku katja ini Apiyutanya, ka palumpa katja ini Iliya-kimanya, ka palumpa katja ini Aitjunya. 14 Ka Aitjuku katja ini Tjaitakanya, ka palumpa katja ini Akimanya, ka Akimaku katja ini Iliyutanya. 15 Ka Iliyutaku katja ini Iliyatjanya, ka palumpa katja ini Matjannga, ka palumpa katja ini Jacobanya. 16 Ka panya Jacobaku katja ini Josephanya Mary-ku panya kuri, ka panya Mary-lu kanyinu katja ini Jesunya ini kutjupa Christanya Godalu panya kalkuntjanya.
17 Uwa, walytjapiti nyanga tjanalanguṟu Jesunya iṯi ngaringu, panya Aipuṟamalanguṟu pakaḻi maḻatja maḻatja 14 ma-nyinara waṉaṟa wiyaringu, ka Davidanyalta tjanalanguṟu utiringu. Ka panya Davidalanguṟu piṟuku nampa palu puṟunypaṯu pakaḻi maḻatja maḻatja ma-nyinara waṉaṟa wiyaringu, kaya nyara palula aṟa tjananya warmaḻangku pitjala katingu ngura Papilantakutu. Ka nyara palulanguṟu piṟuku nampa palu puṟunypaṯu pakaḻi maḻatja maḻatja 14 ma-nyinara waṉaṟa wiyaringu, ka palula tjanalanguṟu Jesunyalta iṯi ngaringu.
18 Nyanga alatjiringu Jesunya Christanya Godalu panya kalkuntjanya iṯi wirkankunytjaku. Panya kungkawaṟa ini Mary-nya wati ini Josephalu kalkuntja paṯaṟa nyinangi palumpa ngunytjuku ngurangka munu pula kuwaripaṯu tjunguringkunytja wiya paṯupaṯu nyinangi ngula aḻṯinytjikitja. Ka Mary-nya ngaṉmanypa pakuringu Kurunpa Miḻmiḻṯanguṟu, Josephalu aḻṯinytja kuwaripangka.[a] 19 Ka Josephalu Mary-nya nyakula kuliningi wati kutjupangku kampangkaṯu kurantja-palku panya paluṟu Kurunpa Miḻmiḻṯu palyantjitjaku ngurpa. Panya Josephanya wati palya mulapa munu paluṟu Mary-nya kuṉṯaringkunytjaku-tawara tjuṯa miṟangka wangkanytja wiyangku wantingi. Tjinguṟu tjuṯangka miṟangka wangkanyangka kuliṟa aṉangu tjuṯangku kungkawaṟa palunya wati kutjupangka kampangkaṯu ngarinyangka-palku kulinma munuya palunya apungka atuṟa iluntanama. Palula-tawara Josephalu kulinu, “Palyantiṉa wantiku aḻṯiwiyangku, kanti ngunytjungka ma-nyinama.”
20 Ka alatji Josephalu unngu kulinnyangka Mayatja Godaku angelpa palula utiringu mungangka paluṟu ngarira tjukurmankunyangka, munu wangkangu, “Josepha, Davidakun katja, kulilaṉi! Kuṉṯaringkunytja wiyangku wantima Mary-nya aḻṯira kanyintjikitjangku panya iṯi nyanga paluṟu Kurunpa Miḻmiḻṯanguṟu, wati kutjupanguṟu wiya. 21 Ka paluṟu iṯi katja kanyilku, ka kanyinnyangka nyuntu palunya inila Jesunya panya ini nyanga paluṟu wangkanyi alatji, ‘Paluṟu palumpa walytja tjuṯa wankaṟunkuku Godalu tjananya kura tjuṯa palyantjitjanguṟu pungkula wiyantjaku-tawara.’ ”[b]
22-23 Panya tjukurpa nyanga palunya Mayatja Godalu ngaṉmanytju wangkara kalkuṉu wati wangkatjara ini Aitjayala nyanga alatji,
24 Ka Josephanya kunkuntjanu wankaringu munu angeltu palula wangkanytja kuliṟa palyaṉu munu Mary-nya aḻṯira palumpa waḻingka kanyiningi. 25 Palu pula tjungu ngarinytja wiyaṯu iṯi ngarinytjaku paṯaṟa. Munu pula ngula iṯi wirkankunyangka palunya ininu Jesunya.
Matthew-ku 2 ->- a Tjakangku wati Jew-ngku kungkawaṟaku mukuringkula ngaṉmanytju kalkulpai palunya kutju ngula aḻṯinytjikitjangku, ka kungkawaṟa paluṟu palumparipai ka wati kutjupangku palunya puṯu aḻṯinyi. Palu wati paluṟu kalkuntjatjanu paṯu nyinapai palula tjunguringkunytja wiya munu ngula kutju aḻṯira tjunguringkupai walytja tjuṯangku palunya pulanya inma puḻkangka tjungunnyangka. Nyara palula aṟangka kutju pula tjunguringkupai munu waḻi kutjungka nyinapai. Palu nyara palula kuwaripangka aṉangu tjuṯangku nintingku kulilpai kungkawaṟa panya paluṟu watiku panya kalkuntja nyinanyangka.
- b Psalm 130:8
- c Aitjayaku 7:14