1 Munu palulanguṟu Josephalu kuṯa maṉkur-kutjara ngurkantaṟa katingu mayatja panya Piiṟalakutu. Munuya wirkaṟa Josephanya kutjulta ngaṉmanypa tjarpangu munu wangkangu Piiṟala, “Ngayuku mama munu kuṯa tjuṯa pitjangu Kainantanguṟu puluka, tjiipi, nanikuta winkitjara ulytja winkitjara kuḻu. Munuya wirkaṟa nyinara paṯaṉi ngura nyara Katjinta. 2-4 Ka nyangaṉa katingu ngayuku kuṯa maṉkur-kutjara nyuntu nyakunytjaku.”

Ka Piiṟalu nyakula wangkangu tjanala, “Waṟka nyaangka nyura waṟkaripai?”

Kaya palula wangkangu, “Nganaṉa puluka, tjiipi, nanikuta kanyilpai nganampa mamangka tjamungka aṟangka. Munula pitjangu ngura nyangangka nyinanytjikitja panya Kainannga ukiṟi wiya kuka tjuṯangku ngalkuntjaku. Kala wanyu palya nyinaku ngura nyarangka, Katjinta?”

5-6 Ka Piiṟalu wangkangu Josephala, “Palyaya pitjangu nyuntumpa mama munu nyuntumpa walytjapiti. Ka Itjipanya nyanga manta puḻka, ka paluṟu tjana palya ngura nyara Katjinta nguraṟarira nyinaku, panya ngura nyaratja palya mulapa. Ka-puṯa tjinguṟu nyuntumpa walytja kutjupa tjuṯa kuka palyanyku kanyilpai nyinanyi. Palunya tjananya-puṯa wangka, kaya pitjala kuka nyanga ngayuku tjuṯa kuḻu kanyinma.”

7-8 Palula maḻangka Josephalu palumpa mama Jacobanya ngalya-katingu Piiṟalu nyakunytjaku. Ka Jacobalu wirkaṟa Piiṟanya wangkara pukuḻmanu. Ka Piiṟalu palula tjapinu, “Nyuntu yaalaṟa iṯi ngaringu?” 9-10 Ka paluṟu wangkangu, “Iriti mulapaṉa ngaringu, panya yiya nampa nyangatja 130 nyinangi. Munuṉa ngura nyaranta rawa para-ngaṟangi. Palu ngayuku mama munu tjamu pula rawa mulapa nyinangi ngayula waintaṟa. Ka ngayuluṉa pulala ngaṯalpa nguwanpa nyinangi munuṉa kutjupa kutjupa tjuṯanguṟu rawa tjituṟu-tjituṟu para-ngaṟangi.” Munu alatji wangkara wiyaringkula Jacobalu Godala tjapinu Piiṟanya pukuḻmankunytjaku. Munu palulanguṟu anulta ngurakutu.

11-12 Ka Josephalu kulinu Piiṟalu wangkanytja munu palumpa mama, kuṯa tjuṯa, walytja uwankara katira tjananya ngura panya Katjinnga ungu alatjiṯu tjananku kukatjara nyinanytjaku manta panya Itjipala. Ka ngura nyara palula itingka ngura tawunu puḻka ngaṟangi ini Ramatjinya. Ka Josephalu tjananya uwankara mai rawangku ungkukatingi pukuḻpa nyinanytjaku.

13-14 Ka ailuru panya rawa ngaṟanyangka ngura uwankarangka Itjipala Kainanta kuḻu mai pakantja wiya alatjiṯu ngaṟangi. Kaya aṉangu tjuṯa paḻtjatjiratjarira wailu-wailuringu munuya Josephalakutu rawa pitjangi maningka mai payamilantjikitja. Ka mani panyatja paluṟu katipai Piiṟalakutu. Palu tjana maningka mai payamilaṟa mani wiyaningi. 15 Palulanguṟuya mani uwankara wiyaringkunyangka Itjipanya nguraṟa tjuṯangku Josephalakutu pitjala ngatjiningi mai ungkunytjaku alatji wangkara, “Nganampa mani wiyaringu. Mailanya uwa paḻtjaku ilunytjaku-tawara. Nyuntun mai puḻkatjara.”

16-17 Ka Josephalu wangkangu, “Mani wiyangkampaya kuka puluka tjiipi kutjupa kutjupa uwankara ngalya-katira uwa, kaṉa nyuranya mai ungkuku.” Kaya palulanguṟu puluka, tjiipi, nanikuta, tangkiyi, nyanytju uwankara maikitjangku katira ungangi. Munuya mai mantjiṟa ngalkula wanka nyinangi nyara palulanguṟu.

18-19 Palu kuḻi kutjupangka palula maḻangkaya piṟuku pitjangu palulakutu maiku ngatjintjikitja. Munuya pitjala wangkangu, “Mayatjan wiṟu. Nyuntu panyan mani kuka puluka, tjiipi kutjupa kutjupa uwankara kanyini nganaṉa ungkunytja. Kala mantangka kutjulta nyinanyi. Ungamalanya ilunytjaku-tawara mai. Palu nyuntu mai ungkuwiyangku wantinyangkampa nganaṉa ilura wiyaringkula ka manta kutjuringkuku. Palu wanyu paama nyanga nganampa mantjila mayatja Piiṟaku nganaṉanya mai ungkula. Munu nganaṉanya kuḻu mantjila palumparinytjaku, kala nganaṉa palumpalta waṟkarima palumpa paama tjuṯangka. Alatji palyala munulanya uwa mai uṉinypa nyuma palyaṟa ngalkuntjaku munu uṉinypa kutjupa kuḻu mantangka tjunkula mai kutjupa pakaltjingantjaku.”

20-21 Ka Josephalu tjananya mai ungkula tjanampa paama tjuṯa Itjipala winkingka mantjiningi mayatja Piiṟakurinytjaku. Panya ailuru puḻka rawa ngaṟangi, kaya paama kanyilpai uwankarangku tjanampa paama Piiṟanya ungangi maikitjangku. Munuya aṉangu Itjipanya nguraṟa uwankara Piiṟaku waṟkaringi manikitja wiya maikitja kutju. 22 Palu Josephalu wati tjukurtjara tjuṯaku paama tjuṯa payamilantja wiyaṯu, panya Piiṟalu tjananya inma kanyinnyangka mani ungkupai, kaya mani pala palula mai tjananku payamilaningi.

23 Munu Josephalu aṉangu uwankarangka Itjipala nyinanytja tjuṯangka wangkangu, “Panya ngayuluṉa mantjinu uwankara nyuralanguṟu Piiṟaku munuṉa nyuranya kuḻu mantjinu nyura Piiṟaku waṟkarinytjaku. Munuṉa kuwari nyuranya unganyi uṉinypa tjuṯa mai panya nyara mirka ngarinytjitjanguṟu nyura mantangka tjunkula mai kutjupa pakaltjingantjaku. 24 Ka ngula mai pakannyangka kaṯaṟa uṯuḻuṟampa kaṉiṟa nyura kutjungku kutjungku mai uṉinypa tjara-tjaraṟa uṯuḻu 5 palyala munu palulanguṟu uṯuḻu kutju mayatja Piiṟanya uwa, munu uṯuḻu 4 palya kanyinma nyuranku mai palyaṟa ngalkuntjikitjangku munu uṉinypa kuḻu mantangka tjunkula pakaltjingantjikitjangku.”

25 Kaya palula wangkangu, “Nyuntu mayatja palya. Nyuntu nganaṉanya wankaṟunu ilunytjaku-tawara, kala nganaṉa palya waṟkariku mayatja panya Piiṟaku.” 26 Nyanga alatjiya nyinangi Josephalu wangkanytjitjangka kuliṟa munuya yiya kutjupa yiya kutjupa rawangku mai uraṟa tjaraṟa tjara tjukutjuku tjukutjuku Piiṟanya katira ungangi. Palu wati panya tjukurtjara tjuṯaku paama tjuṯa Piiṟalu mantjintja wiyangku wantingi, kaya kanyiṟa mai walytjangku pakaltjinganingi munuya Piiṟanya tjaraṟa tjara ungkunytja wiya.

27 Ka Jacobanya, panya ini kutjupa Israelnga, munu palumpa walytjapiti pukuḻpa nyinangi manta Itjipala ngura nyara Katjinta. Munuya tjana tjitji tjuṯa kanyinu. Ka uwankara tjanampa puḻkaringu ulytja, mani, mai, puluka, tjiipi, nanikuta uwankara.

28 Ka Jacobanya nyara palula nyinangi kuḻi nyiṉnga 17 aṟa munu palulaṯu tjiḻpi mulararingu yiya tjuṯa mulapa 147 nyinanytjatjanu. 29-31 Palulanguṟu paluṟu uparingkula kulinu, “Ngayulu ilunytjaku tjinguṟu ilaringu.” Munu paluṟu wituṉu aṉangu kutjupa ankula palumpa katja Josephanya aḻṯira ngalya-katinytjaku. Ka Josephanya pitjanyangka paluṟu ngaripaingka nyinara wangkangu, “Ngayulu wiyaringkunyangkaṉi katira ngayuku mamangka panya itingka tjuṉutjura ngura nyara Kainanta. Wanyuṉi nyuntu kalkula ngura nyanga Itjipala tjuṉutjunkunytja wiyangku katira Mamala itingka tjuṉutjunkunytjikitjangku.”

Ka Josephalu wangkangu, “Uwa, palyaṉanta nyuntumpa mamangka itingka tjuṉutjunanyi.”

Ka mamangku wangkangu, “Palu ngayulu mulamularingkunytjaku ngayunya kalkula alatji. Paṉṯaṉi pampula, panya nyuntu ngayunya paṉṯa pampuṟa kalkuntjatjanungku maḻa puṯu wantinyi.”

Palulanguṟu Josephalu paṉṯa pampuṉu munu kalkuṟa wangkangu, “Ngayulu nyuntunya ilunyangka katira tjuṉutjunanyi ngura panya Kainanta tjamula itingka.” Ka kalkunnyangka Jacobanya pukuḻaringu munu ngaripaingka waṯungaṟakatira Godanya waḻkuṉu, palumpa pukuḻarira.

<- Genesis 46Genesis 48 ->