Tjukurpa Palya

Ngaṉmanyitja munu Maḻatja

Published by Bible Society Australia

Sydney

GPO Box 9874, Sydney, NSW 2001

Tjukurpa Palya

The Bible in Pitjantjatjara, Central Australia

(Containing Old Testament Portions and the full New Testament)

 

Copyright © 2002, 2007, 2019 Bible Society Australia

 

Cover illustration by Nyuwara Tapaya. Used with permission.

 

1st printing 2002 (750)

2nd printing with revisions 2007 (500)

3rd printing 2009 (700)

4th printing 2013 (500)

5th printing with revisions 2019

Ngaṉmanytju Nyakula Wangkanytjaku

“Tjukurpa Palya” Godaku tjukurpa, panya paluṟu palumpa walytja kutjupa tjuṯangka wangkangi, kaya nyiringka walkatjunu munuya nyiri palunya tjananya rawangku kanyiningi.

Panya ngaṉmanytjuya Moselu tjana walkatjunangi wangkatjara kutjupa tjuṯangku kuḻukuḻu. Kala tjukurpa nyanga palunya tjananya wangkapai, “Tjukurpa Palya Ngaṉmanyitja.” Panya iriti mulapaya tjukurpa nyanga palunya walkatjunangi wangka Iipuṟungku nyanga alatji:

 

בְּרֵאשִׁ֖ית בָּרָ֣א אֱלֹהִ֑ים אֵ֥ת הַשָּׁמַ֖יִם וְאֵ֥ת הָאָֽרֶץ׃

 

Tjukurpa nyanga paluṟu kuranyitja mulapa Genesis chapter 1 munu verse 1. Ka tjukurpa nyangatja ngaṟanyi nganampa wangkangka nyanga alatji:

Kuwaripatjara mulapa Godalu ilkaṟi munu manta palyaṉu uwankara wiyangka.

Ka panya Jesulu mantangka nyinaralpi tjukurpa nyanga ngaṉmanyitjanguṟu aṉangu tjuṯangka utiṟa tjakultjunangi, munu paluṟu tjukurpa kutjupa tjuṯa kuḻu wangkangi kuwaritja tjuṯa kuḻu. Ka paluṟu ilkaṟikutu maḻaku ankunyangka maḻangka wati kutjupa tjuṯangku nyiri tjuṯangka walkatjunu tjukurpa palunyatjara Kurunpa Miḻmiḻtu nintinnyangka. Kaya Jesulu iyantja kutjupa tjuṯangku lita tjuṯa kuḻu walkatjuṟa iyaṉu ngura tjuṯakutu Jesuku walytja tjuṯakutu. Kala tjukurpa nyanga palunya tjananya wangkapai, “Tjukurpa Palya Maḻatja.” Wati paluṟu tjana panyaya nyiri tjuṯangka tjukurpa Jesunyatjara walkatjunu wangka Kuṟikingku nyanga alatji:

 

εν αρχη ην ο λογος, και ο λογος ην προς τον θεον, και θεος ην ο λογος

 

Tjukurpa nyanga paluṟu Johnku tjukurpa chapter 1 munu verse 1. Ka tjukurpa nyangatja ngaṟanyi nganampa wangkangka nyanga alatji:

Kuwaripatjara mulapa uwankara wiyangka Godanya nyinangi, ka palula tjungu kutjupa nyinangi ini Tjukurnga. Panya paluṟu Godanya alatjiṯu.

Ka nyiri nyanga “Tjukurpa Palyangka” tjukurpa Maḻatja uwankara ngaṟanyi Jesunyatjara panya walkatjunkunytja. Palu tjukurpa Ngaṉmanyitja Moselu tjana panya walkatjunkunytja uwankara ngaṟanytja wiya tjara kutju ngaṟanyi. Ka nganaṉa tjukurpa palyalpai tjuṯangku tjukaṟurungku Iipuṟungka munu Kuṟikingka tjungu palyantjikitjangku rawangku arkaningi tjukurpa nyanga palunya tjukaṟuru mulapa ngaṟanytjaku nganampa wangkangka.

Nyuntu nganaṉa ngurpa Jesuku yunpaku, panya iriti kamaṟa wiya ngaṟangi palunya putukuṟapamilantjaku. Palu nganaṉa ninti panya Jesunya wati Jew nyinangi, ka palumpa maḻpa tjuṯa kuḻu Jew tjuṯa. Munula ninti tjanampa mantaraku munu tjanampa nguraku. Ka nyiri nyanga “Tjukurpa Palyangka” picture tjuṯa ngaṟanyi nganaṉa tjukurpa nyakula wangkara tjukaṟurungku kulintjaku.

Ka nyiringka nguṟurpa picture kalatjara tjuṯa ngaṟanyi, ka nyura picture nyanga palunya tjananya nyakula kulilku kuwaripatjaranguṟu panya Godalu manta palyantjitjanguṟu munu maḻatja mulapakutu panya Jesulu pitjantjikitjangku wangkanytjitjakutu.

Ka picture palula tjanala maḻangka map tjuṯa kuḻu ngaṟanyi manta tjuṯa munu uṟu tjuṯa kuḻu nintintjaku, ka nyanga palunya tjananya nyakula nyura tjukaṟurungku kulilku ngura ini tjuṯa panya Israelnga munu Itjipanya munu Rome-anya munu ngura kutjupa kutjupa tjuṯa kuḻukuḻu.

Ka Revelationta maḻangka tjukurpa kutjupa ngaṟanyi nyura nyakula nintiringkunytjaku ini Aṟa Tjuṯa Aṉangu Israelkunu Tjuṯaku.

Ka palula maḻangka kutjupa ngaṟanyi nyura nyakula tjukurpa kutjupa kutjupa tjuṯa ngurintjaku nyiri nyanga “Tjukurpa Palyangka”. Panya Godalu tjukurpa aṟa tjuṯa nganaṉala wangkangi kuliṟa nintiringkunytjaku munu wangaṉarangku kulintjaku. Palu kutjupa-aṟala tjukurpa kutjupa puṯu ngurilpai, kala tjinguṟu puṯu ngurira nyiringka maḻarku mulapa nyangama kalanya alpamilaṉi tjukurpa ngurintjaku.

Uwa, ka nyura tjinguṟu tjukurpa nyakula wangkara kutjupa-aṟa walka tjukutjuku nyakuku tjukurpangka nguṟurpa ngaṟanyangka katu nguwanpa nyanga puṟunypa – *. Munu nyura uti kililpi ngaṟanyangka nyakula nyiringka tjaṟu nyawa munu nyura piṟuku nyakuku kililpi kutjupa line-ngka tjaṟu. Ka kililpi palula itingka tjukurpa kutjupa ngaṟanyi, panya tjukurpa nyara paluṟu nintini tjukurpa nyara katutja tjukaṟurungku kulintjaku. Ka nyura uti nintiringkunytjikitjangku tjukurpa pala tjaṟu ngaṟanytjanya nyakula wangka munu palulanguṟu nyakula wiyaringkula piṟuku katu nyawa munu kililpi panya katutjanguṟu piṟuku nyakula wangkara waṉanma Godaku panya tjukurpa. Palu tjukurpa panya line-ngka tjaṟu ngaṟanytja tjuṯa Godaku tjukurpa wiya, palu nintini kutju nyura Godaku tjukurpa tjukaṟurungku kulintjaku.

Uwa, munu kutjupa-aṟa nyura Godaku tjukurpa nyakula wangkara walka tjukutjuku aṉangitja nyakuku nyanga puṟunypa:

Aṉangu nyangangku nintini tjukurpa Godala tjapintjatjara.

Aṉangu nyangangku nintini tjukurpa Godanya waḻkuṟa mirawaṉinytjatjara.

Aṉangu nyangangku nintini tjukurpa utiṟa wangkanytjatjara.

Uwa, ka nyura tjukurpa nyangatja riitamilantjikitjangku Kurunpa Miḻmiḻṯa-waraṟa tjapila, ka paluṟu nyuranya nintilku nyiri nyanga Godaku tjukurnguṟu. Panya Jesulu palumpa nintintja tjuṯangka wangkangu alatji,

“Nyura ngayuku mukuringkulampa uti wangaṉarangku kuliṟa palyanma ngayulu wangkanytjitja. Kaṉa ngayulu Mamala tjapilku, ka paluṟu Kurunpa Miḻmiḻnga nyurala unngu tjarpatjunkuku nyurala tjungu tiṯutjara nyinara nyuranya alpamilantjaku. Ka Kurunpa nyanga paluṟu nyuranya tjukurpa tjukaṟuru nintilku.” (Johnku 14:15-17a)

Alatji Jesulu wangkangu.

Uwa, ka Mayatja Jesulu Christalu nyuranya pukuḻtju puḻkangku kurunpa pukuḻmaṟa kanyinma. Uwa mulapa.