Wati Wangkatjarangku Itjikiltu Walkatjunkunytja
Ezekiel
Nyangatja Ngaṉmanytju Nyakula Wangkanytjaku
Nyangatja Godaku tjukurpa wati panya wangkatjara ini Itjikiltu walkatjunkunytja. Panya paluṟu Godalu wangkanytja Israelkunu tjuṯangka tjakultjunangi paluṟu tjana ngura kutjupangka parari nyinanyangka ngura panya ini Papilaniyala. Panya wati nyara palunya nguraṟa tjuṯaya ngaṉmanypa warmaḻa pitjangu munuya Israelkunu tjuṯa pungkula wiyaṉu munuya tjara kutjupa witiṟa maḻakungku katingu tjanampa ngurakutu, kaya nyara palula nyinara puḻkaṟa tjituṟu-tjituṟuringu kuliṟa, “Yaalaṟala maḻaku ankuku ngura walytjakutu? Tjinguṟula ngura nyanga malikitjangka rawa nyinara iluku.” Ka nyara palulanguṟu Godalu Itjikilnga palumpa wangkatjara tjunu palumpa tjukurpa tjanala tjakultjunkunytjaku.
Palu Itjikiltu tjukurpa waṟa mulapa walkatjunu, kala nyiri nyangangka tjukurpa maṉkurpa kutju walkatjunu. Panya chapter 34-ngka tjukurpa ngaṟanyi Mayatja Godalu Israelkunu tjuṯangka wangkanytja. Panya paluṟu tjanampa puḻkaṟa mukuringkupai munu tjananya wiṟuṟa aṯunymaṟa kanyilpai, panya wati tjiipi aṯunymankupaingku tjiipi tjuṯa wiṟuṟa kanyilpai, palu puṟunytju. Palu panya Israelkunu tjuṯaku wati aṯunymankupai tjuṯangku tjananya mulamulangku aṯunymankunytja wiyangku wantingi, ka Godalu tjanampa mirpaṉarira tjananya paiṟa wangkangi aṉangu tjuṯa tjukaṟurungku aṯunymaṟa kanyintjaku.
Ka chapter 37-nta tjukurpa ngaṟanyi Godalu Itjikilta nintintja. Panya paluṟu nintinu tarka tjuṯa wankaringkula pakantja, ka nyara palulanguṟu Itjikilnga nintiringu panya ngula Godalu Israelkunu tjuṯa wankalku munu wati paluṟu tjanala tjakultjunu Israelkunu tjuṯangka tjana kuliṟa pukuḻarinytjaku.
Tjukurpa nyanganpa ngarinyi:
33:30-33 Godalu Tjukurku Ngunti Pukuḻaripai Tjuṯa Paintja
34:1-31 Godalu Wati Aṯunymankupai Tjuṯa Puntuṟa Wangkanytja
37:1-14 Godalu Aṉangu Tjuṯa Wankantjikitjangku Kalkuntja

Godalu Tjukurku Ngunti Pukuḻaripai Tjuṯa Paintja

30 Ka Godalu alatji wangkangu wati ini Itjikilta, “Wati awa! Nyawa! Nyuntumpa walytja nyara tjuṯangku nyuntunya wangkanyi. Tjanaya kapuṯu kutjupa kapuṯu kutjupangku nyinara nyuntunya wangkapai alatji, ‘Wanyula Itjikilta ankula kulinma! Tjinguṟu paluṟu tjukurpa kutjupa kulinu Mayatja Godalu palula wangkanyangka munu kuwari kulintjatjanungku tjakultjunanyi.’ Alatjiya nyuntunya wangkapai.

31 “Munuya palulanguṟu paluṟu tjana pitjala nyinakatira kulilpai nyuntu tjukurpa wangkanyangka tjanala. Palu paluṟu tjana kulintjatjanungku nyuntu wangkanytjitja tjuṯa palyantja wiyangku wantipai alatjiṯu. Munuya alatji kutju wangkapai, ‘Awa! Tjukurpa wiṟunya palangku wangkangu kuwari nganaṉala! Wiṟu mulapa!’ Palu nyanga palu puṟunypa wangkanyangka nyuntu kuliṟa mulamularingkuwiyangku wantima, panya tjana unytjungku kutju wangkanyi, munuya tjukurpa panya palumpa mapalku watarkuripai kuruntu mantjintja wiya. Panya paluṟu tjana mukuringkunytja tjuṯa kutju palyalpai nyuntu panya wangkanytja wantira. Munuya paluṟu tjana utitja tjuṯa kutju rawangku kulilpai, panya mani, mai, munu kutjupa kutjupa wiṟu tjuṯa manyungku mantjintjikitjangku. 32 Uwa, nyuntu tjananya wangkara wituwitunnyangkaya kuliṟa wantipai alatjiṯu. Utiya ngayuku tjukurpa nyuntu tjanala wangkanyangka kuliṟa tjukaṟurungku palyanma. Palu tjana kulilpai kutju wangaṉarangku kuliṟa palyantja wiyangku. Panya aṉangu tjuṯa inma wiṟu kulintjikitja tjunguringkupai munu kuliṟa pukuḻaripai, palu puṟunypaya paluṟu tjana pitjala nyuntu wangkanyangka kuliṟa unytju pukuḻaripai, munuya maḻangka tjukurpa mapalku watarkuripai wangaṉarangku kuliṟa palyantja wiyangku.” Alatji Godalu wangkangi Itjikilta.

Munu piṟuku wangkangu alatji, 33 “Palu maḻangka ngula kutjupa kutjupa kura puḻka ngayulu wangkanytja palula tjanala wirkankuku, kaya nyara palula aṟangka tjana maḻa kutju nyuntunya kulilku, ‘Munta-uwa! Wati panyatja mulapa panya Godaku wangkatjara nyinangi, munu panya nganaṉala tjukaṟurungku tjakultjunangi Godalu wangkanytjitja uwankara.’ Alatjiya kulilku.”

<- Itjikilku 32 Itjikilku 34 ->