1 Ka Mayatja Godalu alatji Mosela wangkangu, 2 “Piṟa ini Apipala tjiṟirpi ngaṉmanyitjangka tiinta panya miḻmiḻpa ngayuku palyaṟa ngaṟatjura. 3 Munu tjiwa panya kutjara tjukurpa panya puḻkatjara Pakutja Kalkuntjitjangka unngu tjarpatjura munu pakutja panya kalkuntja tiintangka unngu tjura munu mantara palula kuranyu waṟaly-waṟalytjura kumpilpa ngaṟanytjaku. 4 Munu taipula katira tjura munu kutjupa kutjupa tjuṯa kuḻu katira tjura taipulangka katu. Munu lampa panya tili tjuṯa witiṟa kanyilpai katira tjura munu piti uwilatjara palula katu tjura tili kampanytjaku. 5 Munu taipula panya tjukutjuku paṉṯi wiṟu tililpai katira tjura pakutja kalkuntjitjangka kuranyu. Munu mantara waṟa kuranyu waṟaly-waṟalytjura tiinta tjaangka. 6 Munu tjura tiintangka kuranyu pitjilpa panya puḻka, panya kuka tiliwakaṟa Godanya ungkula waḻkuntjaku. 7 Munu piti puḻka panya paltjilpai tjura pitjilpangka muṉkara tiintangka tjangaṯi munu kapi paltjintjaku tjutila. 8 Munu tiinta miḻmiḻṯa para-muṟutjuṟa waṉala puṉu tjuṯa piintji palyantjikitjangku munu palula maḻangka mantara para-tjunkula arintaṟa waṉala patintjikitjangku. Munu piintji tjaangka mantara waṟa kutjupa waṟaly-waṟalytjura.

9 “Munu palulanguṟu uwankara palyaṟa tjunkunytjatjanungku uwila wiṟu panya miḻmiḻmankupaingka pitinguṟu tjutiṟa para-kurpiṟa waṉala Tiinta Miḻmiḻpa, munu kutjupa kutjupa tiinta unngu nyinanytja tjuṯa kuḻu kurpila nyanga tjananya uwankara miḻmiḻmankunytjikitjangku. 10 Munu palulanguṟu pitjilpa panya kuka tiliwakalpai uwila panya palula kurpila palunya kuḻu miḻmiḻmankunytjikitjangku munu ayana panya waṟika puṟunypa tjuṯa kuḻu kurpila palunya tjananya kuḻu miḻmiḻmankunytjikitjangku. 11 Munu palu puṟunytjuṯu piti panya paltjilpai kurpiṟa miḻmiḻmanama, piti maṉa kuḻu.

12 “Munu Aaronnga palumpa katja tjuṯa kuḻu ngalya-kati tiinta pala miḻmiḻpakutu munu tjananya minangka paltjila. 13 Munu Aaronnga mantara panya wiṟu mulata tjarpatjura munu uwila panya miḻmiḻṯa palunya kurpiṟa miḻmiḻmara paluṟu tjukurtjararingkula ngayuku waṟka palyantjaku. 14 Munu palumpa katja tjuṯa kuḻu katira mantara panya wiṟu tjuṯangka tjarpatjura. 15 Munu palu puṟunypaṯu tjananya uwilangka kurpiṟa miḻmiḻmara tjana kuḻu tjukurtjararingkula ngayuku waṟka palyantjaku. Uwilangka kurpiṟa miḻmiḻmankunytja nyanga paluṟu nintini tjana tjukurtjara tjuṯa tiṯutjara ngaṟanytjaku nyanga palula tjanala maḻangka kuḻu kutjupa ngapartji piṟuku ngaṟanytjaku munu piṟuku maḻatja maḻatja.” Nyanga alatji Godalu Mosela wangkangu tjana palyantjaku. 16 Ka Moselu uwankara palyaṉu Mayatja Godalu wangkanytjitja.

17 Kaya Israelkunu tjuṯa ngura Itjipalanguṟu ankula nguṟurpa yiya kutju wiyaringu. Kaya pala palula aṟangka piṟa ngaṉmanyitjangka Moselu tjana tiinta panya miḻmiḻpa palyaṟa ngaṟatjunu tiinta panya Godanya Tjunguringkupai. 18 Tjana puṉu tjuṯa-waraṟa muṟutjunkula puṉu waṟa tjuṯa kaṯakutjara kaṯakutjara para-ngaritjuṟa waṉaṉu katu kuḻu. 19 Munuya palulanguṟu tiinta tjiipi miṟinguṟu palyantja katu ngampaḻtjunu munu palulanguṟu tiinta kutjupa antipina miṟinguṟu palyantja palula katu ngampaḻtjunu panya Godalu wangkanytjitjangka.

20 Ka Moselu puḻi panya tjiwa kutjara tjukurpa puḻkatjara mantjiṟa Pakutja panya Kalkuntjitjangka unngu tjarpatjunu. Munu palulanguṟu puṉu waṟa kutjara kampa kutjara tjunu witiṟa katinytjaku, munu pakutja palula katu liita panya nyaḻpitjara kutjara katu ngaparku nyinanytja kutjaratjara angatjunu. 21 Munu palulanguṟu Pakutja panya Kalkuntja Tiinta Miḻmiḻṯa unngu tjarpatjunu kampa wiluṟara munu mantara waṟa panya waṟaly-waṟalytjunu kuranyu, panya alatji Godalu wangkangu pakutja palunya kumpiṟa kanyintjaku.

22 Munu palulanguṟu taipula panya mai tjunkupai katira tiinta unngu tjarpatjunu kampa alinytjara mantara panya waṟaly-waṟalyngaṟanytjala kakaraṟa. 23 Munu mai nyuma katu tjunu mai panya Godanya ungkunytjitja, panya alatji Godalu palunya tjunkunytjaku wangkangu. 24 Munu lampa panya tili tjuṯatjara tiinta unngu tjarpatjunu taipulangka uḻpaṟira. 25 Munu nyara palula Mayatja Godala miṟangka Moselu tili panya tjuṯa tiliṟa wantingu Godalu wangkanytjitjangka. 26 Munu palulanguṟu taipula tjukutjuku wiṟu paṉṯipaitjara katira tiinta unngu tjunu mantara panya waṟaly-waṟalyngaṟanytjala kuranyu. 27 Munu paluṟu nyaḻpi wiṟu paṉṯipai tjuṯa tiliṟa wantingu wiṟu paṉṯinytjaku, panya alatjingantjaku Godalu wangkangu. 28 Munu palulanguṟu mantara waṟa tiinta tjaangka waṟaly-waṟalytjunu. 29 Munu piṟuku pitjilpa panya kuka tiliwakalpai katira tjunu Tiinta Miḻmiḻṯa kuranyu kampa kakaraṟa. Munu pitjilpa pala palula paluṟu kuka tjunkula tiliwakaṟa mulurunu Godanya ungkula waḻkuntjikitjangku munu mai uṉinypa tjuṯa kuḻu tjunkula tiliwakaṟa Godanya ungu, panya Godalu wangkanytjitjangka. 30 Munu piti panya paltjilpai puḻka katira tjunu pitjilpangka muṉkara tiintangka tjangaṯi, munu kapi kuḻu tjutinu paltjintjaku.

31-32 Kayanku Moselu, Aarontu munu palumpa katja tjuṯangku kuḻu manyirka, tjina kuḻu paltjiṉu piti panya palula Tiinta Miḻmiḻṯa tjarpanytjikitjangku. Munuya palu puṟunypaṯu tiṯutjarangku paltjiningi Tiinta Miḻmiḻṯa tjarpanytjikitjangku munu pitjilpa kuka tiliwakalpaikutu pitjanytjikitjangku, panya Godalu Mosela wangkangu alatji palyantjaku. 33 Munuya palulanguṟu Moselu tjana piintji panya uṟilta para-ngaṟala waṉalpainya para-tjunkula arintaṟa waṉaṟa wiyaṉu munu mantara waṟa kutjupa piintji tjaangka waṟaly-waṟalytjunu. Ka uwankara tjana palyantja piintji unngu ngaṟangi. Munuya nyanga tjananya uwankara palyaṟa tjunkula wiyaṉu Moselu tjana.

34 Ka palulanguṟu ngangkaḻi panya waṟangku ukalingkula tjutuṉu tiinta panya miḻmiḻpa, ka Godaku pitalytjingku tiinta panya unngu puḻkaṟa irnyaningi. 35 Ka nyanga palulanguṟu ngangkaḻingku tjutuṟa ngaṟanyangka Mosenya Tiinta Miḻmiḻṯa puṯu tjarpangi pitalytjingku puḻkaṟa irnyannyangka. 36 Ka ngangkaḻi panyatja tiinta panya miḻmiḻpanguṟu katuringkula ankunyangka kutjuya Israelkunu tjuṯangku ngura kutjupangka pakaṟa ma-tjunangi. 37 Palu ngangkaḻi paluṟu Tiinta Miḻmiḻṯa ngaṟanyangkaya ankuwiya ngura palulaṯu nyinapai. 38 Ka Mayatja Godanya Israelkunu tjuṯangka tiṯutjara nyinangi tjana para-ngaṟanyangka, panya Godaku ngangkaḻi kaḻaḻa mungangka kuḻu tiinta panya miḻmiḻṯa ngaṟapai, palu mungangka waṟu tili ngangkaḻingka unngu ngaṟapai. Kaya Israelkunu tjuṯangku kaḻaḻa mungangka kuḻu rawangku nyakula kulilpai Mayatja Godanya tjanala nyinanyangka.

<- Exodus 39