Tjukurrpa Nyangutja 15

Yilkari ngurrara tjuṯangku tjananya miiṉṯanku mirrintankukitjangku

1 Palulanguru ngayulu Tjaanalu ilkari rawangku nyakula kutjupa kutjupalpi nyangu. Katutjaku ilkari ngurrara tjapanpala yanangi yaṉangu tjuṯa tjananya miiṉṯankula yiluntankukitja. Kala, Katutjalu wiya ilkari ngurrara kutjupa tjuṯa tjananya piyuku watjalku yaṉangu tjuṯa iluntankukitjangku, wantiku tjananya.

2 Palulanguru ngayulu Tjaanalu nyangu kilaatja yuru tiṉalingku nguwanpa ngarringi. Kilaatja palula waru kamparra wanaṉingi. Waru tjatjaka nguwanpa kilaatja palulawana ngarripayi. Yaṉangu tjuṯaya kilaatja palula tjayiṯingka ngarala waṉingi, tjikipaka yuru ngurrara palunya waḻkuntjawiyangku wantipayi tjuṯa. Wiya paluru tjana tjikipakaku nampatjarra marangka ngarangi, wiya tjana ngalyangka nampa palunyatjarra ngarangi. Katutjalu tjanampa yunyparringkula yungu kiitawu nguwanpa kutju iitji. 3 Kiitawu nguwanpatjarrangkuya warralpayi tuḻku palunya. Yirriṯi Katutjaku waarrkana Muutjalu, tjiipi wiima paluruṯarra tuḻku palunya warralpayi.

“Nyuntu Katutjanya mayutju tiṉa nyinanyi, ngangkari tiṉatjarra. Nyuntu kutu ngangkari tiṉangku palyalpayi. Yaṉangu yuwankarraku nyuntu mayutju palya nyinanyi, manta ngaa ngurrara tjuṯaku, manta kutjupa kutjupa ngurrara tjuṯakuṯarra. Nyuntu wiya tjaampalaku yunypawiya nyinarra kutjupa tjuṯaku yunypa nyinanyi, wiya. Yuwankarraku nyuntu yunypa nyinarra walytjangku kulira tjukarurru watjalpayi. 4 Nyuntu kutju tjukarurru nyinanyi kuya palyantjawiya. Yalatji nyuntu nyinanytjala yaṉangu uwankarrangkuntaya puḻkawaṉinyi. Ngula kutjupa tjuṯangku nyuntunya puḻkawaṉimalpa manta kutjupa kutjupa ngurrara tjuṯangku, nyuntumaṉṯunu mayutjungku tjukarurru wangkarra nyinapayi, wiyanta kutjupangku watjara pinkurrtjingalku.”

5 Palulanguruṉa Tjaanalu nyangu kaliki tiṉa alytjura ngaranytjala. Kaliki paluru tjaatji tiṉalingku ngarapayi Katutjaku. 6 Tjaatji palulaya Katutjaku ilkari ngurrara tjapanpala paluru tjana pakaṉu, yankula yaṉangu tjuṯa miiṉṯankukitja. Paluru tjana kalikinguru pakara kuuta tjulkura waṯawaratjarra ngarangi. Piilta ngarrkawanaṯarra kuultatjanu palyaṉutja ngarangi. 7 Puupala kuru tjuṯatjarra paluru tjana ngarangi. Puupala palunyatjanu kutjungku tjananya tiitji kuultatjanu palyaṉutja yungu ilkari ngurrara tjapanpala panyapa tjuṯaku. Kutju iitji tjananya yungu. Tiitji palula tjanala ngarripayi kapi puyitjina. Katutjalu tjananya watjaṉu tiitji tjuṯa katirra yaṉangu kuya tjuṯa mirrintankunytjaku. Katutja paluru mayutju kana kutu nyinamalpa, paluru yaṉangu kuya tjuṯa tjananya mirrintankuku. 8 Palulanguru tjaatji palula puyu pakara unnguwana ngarangi, Katutjanya ngangkari tiṉatjarra unngu nyinangitjangka. Katutjalu tjananya ilkari ngurrara panyapa tjuṯa watjaṉu, “Yaṉangu tjuṯa nyurrangarri marrkuntjaku, tjana wiya tjaatji ngaangka tjarrpanytjaku. Nyurrangarri tiitji tjuṯa katirra mantakutu yaṉangu tjuṯawana yintirra mirrintankunytjaku. Palulanguru yaṉangu tjuṯa, nyurrangarriṯarra tjaatji ngaangka piyuku tjarrpaku.”

<- Tjukurrpa Nyangutja 14 Tjukurrpa Nyangutja 16 ->