Tjukurrpa Nyangutja 12

Maanytjangka kungka ngaraku, waṉampi tiṉaṯarra ngaraku

1 Ngayulu Tjaanalu nyangu ilkari kutjupa kutjuparrinytjala. Nyanguṉa minyma maanytjangka ngaranytjala. Paluru mantarra kutjupatjarra ngarapayi, tjiṉṯu nguwanpatjarra. Katangka mukaṯi nguwanpa ngarangi piṉṯirri tuwalpala. 2 Paluru mikintjarra ngarala yulapayi pipirri mantjilkitja. 3 Ngayulu kutjupa nyangu waṉampi tiṉa ngaranytjala tjatjaka. Kata tjapanpalatjarra waṉampi paluru ngarangi. Kata tjuṯangka wuuna tiinpala ngarangi. Kata kutjungka walyi kutju ngarangi. Kata kutjupangka walyi kutjupa ngarangi. Yalatji kata tjapanpalangka walyi tjapanpala ngarangi. 4 Wipungku paluru piṉṯirri tjuṯa mantjira waṉingu mantakutu. Piṉṯirri tjuṯalingku kutjupa kutu ngarangi. Waṉampi paluru minyma panyapakutu yankula paṯaṉingi pipirri yutitjarrinytjala ngalkukitja. 5 Ilkari ngurraraṯarra paṯalpayi pipirri wiima palumpa yutitjarrinytjaku. Palunyatjanu minyma paluru katja wiima mantjintjala ilkari ngurrara paluru parrpaṯu pipirri wiima palunya mantjira katingu Katutjaku ngurrakutu. Katirra palumpa tjiiyi palyangka ngarritjunu. Pipirri wiima paluru tiṉarringkula yaṉangu tjuṯa tjananya mayutju yunytjuwiyangku kanyilku. 6 Palunyatjanu minyma paluru tjalkaḻungu ngurra kapiwiyakutu kumpira. Irriṯi Katutjalu ngurra palunya palyaṉu, minyma paluru palula palya nyinanytjaku. Katutjalu minyma palunya kutu kumpitjura kanyilpayi yiiya maṉkurrpa.

7 Waṉampi paluru tjikipaka tjuṯa ilkaringka kanyilpayi, palumpa waarrkana tjuṯa. Ilkari ngurrara tiṉangku yini Maakulaluṯarra ilkari ngurrara tjuṯa kanyilpayi. Maakulalungarri waṉampiku waarrkana tjuṯa pikangku pungkupayi. 8-9 Maakulalungarri tjananya pungkula nguḻutjingara mantakutu wantirriyaṉu, Katutjaku ngurrangka waṉampi, palumpa waarrkana tjuṯaṯarra kutu nyinatjipingka. Waṉampi paluru mamu tjuṯaku mayutju nyinanyi. Paluru yaṉangu tjuṯa tjingapungkupayi kuya palyantjaku. 10 Palulanguru ngayulu Tjaanalu ilkaringuru raapa wangkanytjala kuliṉingi yalatji,

“Kuwarri Katutjalu tjananya palumpa walytja tjuṯa kanyinmalpa. Yilta paluru mayutju tiṉa nyinanyi, palumpa walytja Kurayitjanyaṯarra mayutju tiṉa nyinanyi. Mamu tjuṯaku mayutju irriṯi Katutjala ila ngarapayi. Paluru kutu palula ngunytji watjalpayi yalatji, ‘Nyuntupa walytja tjuṯa kuya nyinanyi mantangka. Nyuntu tjananya pungkunytjaku.’ Kuwarrilpi paluru wiya nyinanyi ilkaringka, wiya.

11 “Kurayitjanya paluru tjiipi wiima tjawirrilyi nguwanpa watiyangka mirrirringu ngurrka yintirra, yaṉangu tjuṯaku kuya waṉikitja. Tjaampalangkuya Katutjaku wangka kulira Kurayitjaku walytja tjuṯaya nyinapayi. Mamu paluru tjananya puṯu tjingapungkupayi kuya palyantjaku. Kutuya Yiitju Kurayitjaku tjukarurru nyinanytjala kuya tjuṯangku tjananya mirri pungu.

12 “Ilkari ngurrara tjuṯa yunypa nyinanytjaku, Yiitju Kurayitjanya yaṉangu tjuṯaku mirrirringutjangka. Manta ngurrara tjuṯa kuunyiya nyinanyi, yuru tjayiṯingka nyinapayi tjuṯaṯarra. Paluru tjana wiḻa kuya nyinanyi mamuku mayutju tjanalawana nyinanyingka. Mamu paluru Katutjaku yunytjuwiya nyinanyi yalatji kulira, ‘Rawawiya paṯara Katutjaluṉi ngayunya pungkula wiyalku.’ ”

13 Waṉampi paluru yalatji kuliṉingi, “Ngayulu ngaangka mantangka nyinaku, wiyaṉa ilkaringka yankula nyinaku, Katutjaluṉi payira wantirriyaṉutjangka.” Yalatji kulira paluru minyma palumpa ngurririnangi manta kapiwiyawana, nguḻura wanara ngalkura iluntankukitjangku. 14-16 Palulanguru ilkari ngurrara kutjupangku minyma palula nyaḻpi kutjarra nganytjatjunu, paarrpakara ngurra kutjupakutu yankunytjaku. Paluru waḻawurru nyaḻpi tiṉa nguwanpatjarra yulytjayinangi. Palulanguru waṉampi paluru kapi tjaatjanu yulkapatjura wantirriyaṉu, minyma palunya kapitjarrangku mirrintankukitjangku. Manta puntura pirrtjipirrtjirra pilarringu kapi ngaṯi palula punkantjaku, minyma palulamarra. Palunyatjanu minyma paluru nyaḻpitjarra paarrpakara yanu ngurra kutjupa kapiwiyakutu. Palula ilkari ngurrara tjuṯangku palunya kutu yaṉṯayaṉṯalpayi yiiya maṉkurrpa, mamu palulamarra. 17 Palulanguru waṉampi paluru minymaku ngurrkurringu. Ngurrkurringkula paluru minyma palumpa katja yuṉṯalpa kutjupa tjuṯaku ngurririnangi pungkukitja, palumpa ngaṉṯitja tjuṯakuṯarra. Paluru tjana Katutjaku walytja tjuṯa nyinarra Yiitjuku wangka kulira tjukarurru nyinanyi. Palunya tjananya nguwanpa Yiitjuku walytja yuwankarraya nyinanyi minyma palumpa walytja. 18 Waṉampi paluru yurungka tjayiṯingka mantangka ngarringu.

<- Tjukurrpa Nyangutja 11 Tjukurrpa Nyangutja 13 ->