1 Yiitjulu palumpa kutunguḻu tjuṯa tjananya watjaṉu, “Tjuṯangku nyurrangarrinya yilta tjingapungku, yalatji tjana tjingapungkupayingku kuya palyalku. Ngula Katutjalu palunya tjananya warukutu waṉiku. Tjinguru wati kutjupangku ngayuku walytja kuya palyantjaku tjingapungku. Yalatji paluru tjingapungkupayingku kuya palyalku. Ngula Katutjalu palunya warukutu waṉiku. 2 Tjingapungkupayi palunya tjinguru yaṉangu kutjupangku witira tjiina puḻi tiṉatjarra nguṉṯiwana tayimapira iluntanku, yuru tiṉangka waṉirra. Yalatji palya tayimapira iluntankunytjaku. Ngula tjingapungkupayi palunya Katutjalu warukutu waṉiku. 3 Katutjalu nyurrangarrinya puntura yitjipungkupayingkamarra wiya nyurrangarri Katutjaku walytja kutjupa tjingapungkunytjaku, paluru kuya palyantjaku. Yalatji tjingapungkunytjawiya nyurrangarri nyinanytjaku.

“Tjinguru ngayuku walytja kutjupangkunta kuya palyantjala, palulakutu nyuntu yankula purinypangku wangkanytjaku. Tjinguru kulira yaṉangu palurunta yalatji watjalku, ‘Ngayuluṉanta wiyawanangku kuya palyaṉu, ngayulu kuya palyalwiyangku wantimara.’ Yalatji paluru watjantjala nyuntu yalatji yilta wangka!, ‘Ngayulu nyuntupa wiya ngurrkurringanyi, ngayuluṉanta nyuntupa kalypa nyinanyi.’ 4 Tjinguru ngayuku walytja kutjupangkunta aaḻi kuya palyalku. Paluru rawawiya nyinarra yankulanta piyuku watjalku, ‘Ngayuluṉanta wiyawanangku kuya palyaṉu, ngayulu kuya palyalwiyangku wantimara.’ Yalatji palurunta watjantjala nyuntu yalatji yilta wangka!, ‘Ngayulu nyuntupa wiya ngurrkurringanyi, ngayuluṉanta nyuntupa kalypa nyinanyi.’ Paluru rawawiya nyinarra piyukunta yankula kuya palyara wantikatiku. Paluru rawawiya nyinarra yankulanta watjalku, ‘Ngayuluṉanta wiyawanangku kuya palyaṉu, ngayulu kuya palyalwiyangku kulinmara.’ Yalatji palurunta watjantjala nyuntu yalatji yilta wangka!, ‘Ngayuluṉanta nyuntupa wiya ngurrkurringanyi, ngayulu nyuntupa kalypa nyinanyi.’ Tjinguru yalatji nguwanpa tjiṉṯu kutjungka walytja palurunta tjapanpalangara kuya palyara wantikatiku. Paluru tjapanpalangara rawawiya nyinarra yankulanta watjalku, ‘Ngayuluṉanta wiyawanangku kuya palyaṉu, ngayulu kuya palyalwiyangku wantimara.’ Yalatji palurunta watjantjala nyuntu yalatji tjapanpalangara yilta wangka!, ‘Ngayulu nyuntupa wiya ngurrkurringanyi, ngayulu nyuntupa kalypa nyinanyi.’ ”

5 Yiitjuku kutunguḻu tjuṯangku kulira palunya watjaṉu, “Nintilalanyatju!, nganaṉa nyuntupa wangka puntura kulira tjukarurru nyinanytjaku, kutjupangkulanyatju kuya palyantjala nganaṉa ngurrkurringkunytjawiya nyinanytjaku.” 6 Mayutju Yiitjulu tjananya watjaṉu, “Ngayuku wangka nyurrangarri yiltangku kulira ngayukuṉu ngangkaritjarrangku watiya ngaatjanya yaṉangu nguwanpa watjalku, ‘Watiya, pakara ngurra kutjupakutu nyuntu yarra! Yankula yurungkalpi tjarrparra ngarama!’ Panyapanyurra watjantjala, pakara yankula yurungka ngaramalpa.”

7 Yiitjulu tjananya yara kutjupa watjaṉu, nintilkitjangku. “Tjinguru nyuntu mayutju nyinaku, waarrkana kutjutjarra. Nyuntu waarrkana yalatji watjalku, ‘Kaanangka nyuntu kuwarri waarrkarri!’ Tjiṉṯu kutjupangka tjinguru nyuntu waarrkana palula yalatji watjalku, ‘Tjiipi tjuṯa yankula yaṉṯayaṉṯanma!’ Tjiipiwana waarrkarringkula waarrkana paluru nyuntupa waaḻangka waarrkarrikitja ngalyanku. Ngalyankula tjarrpanyingka wiya nyuntu mayutjungku watjalku yalatji, ‘Ngalya yarra, tiipulangka nyinakati! Nyuntu nyinanyingka ngayulu kutjara kuka an mangarri ngalya katirra tjunku nyuntupa.’ Wiya yalatji. 8 Paluru tjiipiwana waarrkarringkula waaḻangka tjarrpanytjala nyuntu mayutjungku watjalku, ‘Kuka an mangarri kutjaratju ngalya kati! Ngayuluṉa ngalkura tjikira wiyantjala, ngaṉṯilpinu nyuntu ngalkura tjikilku.’ 9 Waarrkanangku mangarri kukaṯarra kutjara ngalya katinyingka, wiyanyurra mayutju tjuṯangku waḻkulpayi, ‘Nyuntu palya ngayuku mangarri kukaṯarra yurrunpa ngalkuwiyangku ngalya katingu.’ Nyuntu waḻkuwiyangku wantipayi. Yalatji kuka kutjara ngalya katinytja waarrka palumpa. Mayutjungku watjantjala paluru yalatji palyantjaku. 10 Yara yalatji nguwanpa nyurrangarri Katutjaku waarrkana tjuṯa nyinanyi. Katutjalu nyurrangarrinya watjantjala, yankulanyurra palyantjaku. Katutjanya yilta mayutju nyurrangarrimpa nyinanyi. Yalatjinyurra kulintjaku, ‘Nganaṉa waarrkana tjuṯa kutju nyinanyi, mayutju wiya. Katutjalu watjantjala, yankula nganaṉa palyalpayi.’ ”

11 Yiitjunya, palumpa kutunguḻu tjuṯaṯarra yulparirra manta Kaliliyilawana yankulaya kakarrararringu manta Tjamiriyanya wantirra. Kakararralpiya yanu karru Tjuutanalakutu, Tjarutjalumalakutu yankukitja. 12 Yankulaya tawunungka yilarringkula, pangki pikatjarra tiinpala ngalyankula Yiitjula waṉma ngarangi. 13 Ngaralaya mirrangu Yiitjulakutu, “Mayutju Yiitju, aḻṯururrilampatju!” 14 Yiitjulu nyakula tjananya watjaṉu, “Yankulaya tuḻkuku mayutjungka walytjangkuyanku nintila!” Yiitjukuṉu wangkaya kulira tuḻkuku mayutjukutu yankukitja ankulaya ngururrpa pangki pikawiyarringkuyinangi. 15 Wati kutjungku pangki pikawiyarringutja nyakula walytjangku, yunyparringkula yarurringu Yiitjulakutu. Yankula Katutjanya waḻkuyinangi. 16 Yiitjula pupakatirra waḻkuṉu, pika palyarringkula. Wati paluru Tjuwuwiya nyinangu, Tjamiriyanya ngurrara.

17-18 Yiitjulu tjananya yaṉangu kutjupa tjuṯa tjapiṉu, “Wati Nyaapalaya palyarringu?, tiinpala yilta? Palatja wati Tjuwuwiya kutju yarurringu ngayunya Katutjanyaṯarra waḻkulkitja. Kutjupa tjuṯaṯarra ngalyanamaraya.” 19 Wati palula Yiitjulu watjaṉu, pupakatinyingka, “Pakara ngurrakutu yarra! Nyuntu ngayunya ngangkaritjarra kulira palyalpi nyinanyi.”

20-21 Palulanguru Paratji tjuṯangkuya Yiitjula tjapiṉu, “Nyaalytjingara Katutjalu tjananya palumpa walytja tjuṯa yaṉṯayaṉṯanmalpa?” Yiitjulu tjananya watjaṉu, “Katutjalu tjananya palumpa walytja tjuṯa yaṉṯayaṉṯantjala, wiya nyurrangarri kurungku nyaku. Katutjanya wiya paṉa ngurrara mayutju tiṉa nguwanpa waaḻa palyangka nyinanyi. Wiya paluru tjananya waarrkana tjuṯa, tjuulytji tjuṯaṯarra kanyiṉi, wiya. Katutjalu kuwarri palumpa walytja tjuṯa yaṉṯayaṉṯaṉi. Nyurrangarrilawanaya nyinanyi, palumpa yaṉṯayaṉṯalpayi tjuṯa.”

22 Yiitjulu tjananya palumpa kutunguḻu tjuṯanya watjaṉu, “Ngula nyurrangarri puṯu yunytjurringkula nyinamalpa, ngayuluṉa yaṉanguku katja piyuku mantakutu ngalyankunytjala nyakukitja. 23 Yaṉangu tjuṯangku nyurrangarrinya watjalku yalatjikutjura, ‘Ngurra nyarratja yaṉanguku katja ngalya yankula nyinanyi.’ Tjinguru yalatjikutjura nyurrangarrinya watjalku, ‘Ngurra palangka yaṉanguku katja nyinanyi. Yarralaka nyawa!’ Wangka palunya kulira tjanalawana tjungurringkula yankunytjawiyaya nyinama! 24 Yaṉanguku katjaṉa piyuku mantakutu ngalyananyingka yaṉangu yuwankarrangku ngayunya nyaku. Layitningingku rungkantja nguwanpa, yuwankarrangku nyakupayi. Palunya nguwanpa ngayunya yaṉangu yuwankarrangku nyaku, ngayulu ngalyananyingka. 25 Kala, kuwarri yaṉangu Tjuwu tjuṯangku ngayunya yitjipungkungku. Watjalkuya yalatji, ‘Yiitju palunya mungutja, wiya nganaṉa kulintjaku, wiya.’ 26-27 Yirriṯi wati Nuuwanya nyinanytjala, yaṉangu tjuṯaya Katutjanya kulilwiya nyinangi, walytjangkuyanku kulilpayi. Mangarri kukaṯarraya ngalkura nyinapayi. Yalatji nguwanpaya nyinarra yuru tiṉangkalpi wiyarringkula wanaṉu. Katutjalu kapi tiṉa wantirriyalkitjangku kulintjala, Nuuwanyangarri kutjuya puuta tiṉangka tjarrpangu, kanarringu kapi tiṉangkamarra. Palunya tayimi yaṉangu tjuṯa yilta Katutjanya kulilwiya nyinapayi. Yalatji nguwanpa ngulaya yaṉangu tjuṯa Katutjanya kulilwiya nyinaku, yaṉanguku katjaṉa piyuku mantakutu ngalyananyingka.

28 “Palunya tjuṯa nguwanpaya yaṉangu kutjupa tjuṯa Katutjanya kulilwiya nyinangi, wati Laatanya yurrunpa nyinanyingka. Mangarri kukaṯarraya ngalkura nyinapayi. Yulytjaya payimilara kanyira ngula tjalamilalpayi. Kaanangkaya kututja mangarri pakaltjingalpayi. Waaḻaya kututja palyalpayi. 29 Wati Laatanya tawunu Tjutumalanguru pakara yanutjangka Katutjalu tjanampa wantirriyaṉu waru tili, tiṉa puntu ilkaringuru, kamparra tjananya yiluntankunytjaku, Katutjanyaya kulilwiya nyinangutjangka. 30 Palunya tjananya nguwanpaya yaṉangu tjuṯa Katutjanya kulilwiyaya nyinamalpa, yaṉanguku katjaṉa piyuku mantakutu ngalyananyingka. Yuḻṯa palula tjuulytji tjuṯangku tjananya pungku Tjarutjalumanya ngurrara tjuṯa.

31 “Yuḻṯa palula, wati waaḻangka yila nyinarra wiya pakara tjarrpanytjaku, yulytja mantjilkitja, paluru yulytja kulintjawiya tjalkaḻungkunytjaku, pungkupayi tjuṯangkamarra. Palunya nguwanpa wati kaanangka waarrkarriku wiya purikutu kuuta mantjilkitja ngaṉṯikutu yankunytjaku, paluru kuuta kulintjawiya tjalkaḻungkunytjaku, pungkupayi tjuṯangkamarra. 32 Minyma palunya kulilaya! Laataku miiṯa, nguṉṯilangarala nyangangi, ‘Ngayulu yunytjurringanyi nyarrangka ngayuku yulytja mantjintjaku.’ Palunyatjanu paluru ngarala puḻirringu.

33 “Yaṉangungku kana nyinakitjangku mangarri tiṉa, mani yulytjaṯarra mantjilkitja kutu kulira nyinapayi, Katutjalu ngula kuutawutjungka watjara iyalku. Yaṉangu kutjupangku kana nyinakitjangku kulintjawiya, Katutjaku waarrka palyara nyinapayi, Katutjalu kuutawutjungka waḻkura katiku kana kutulpi nyinamalpa. 34 Yaṉanguku katjaṉa piyuku mantakutu ngalya yananyingka, yaṉangu kutjarra mungangka tjungu ngarriku. Ilkari ngurrara tjuṯangku Katutjaku walytja kutju ngurrtjara katiku, kutjupa wantikatiku. 35 Yuḻṯa palula kungka kutjarrangku pulanku mangarri yuṉinypa rungkaṉingka, kungka Katutjaku walytja kutjuya ngurrtjara katiku, kutjupaya wantikatiku, ilkari ngurrara tjuṯangku. 36 Yuḻṯa palula wati kutjarra kaanangka tjungu waarrkarringanyingka, ilkari ngurrara tjuṯangkuya wati Katutjaku walytja kutjuya ngurrtjara katiku, kutjupaya wantikatiku.” 37 Palumpa kutunguḻu tjuṯangku Yiitjunya tjapiṉu, “Mayutju, ngurra nyaalytjingka panyapa nguwanpa ngaraku?” Yiitjulu tjananya watjaṉu yara yalatji “Kuka ilungutja ngarrinyingka waḻawurru tjuṯaya kaaṉka tjuṯaṯarra tjungurripayi, ngalkukitja. Palunya nguwanpa ngayulu mantakutu piyuku ngalyananyingka, yaṉangu tjuṯa tjungurriku.”

<- Luukaṉu 16Luukaṉu 18 ->