Kilitjiyanya Ngurrara Tjuṯaku Wantirriyaṉutja

1-2 Manta Kilitjiyalawananyurra nyinanyi ngurra tjuṯawana. Kututja nyurrangarri tjungurringkupayi Yiitju Kurayitjanya puḻkapungkunytjaku. Ngayulu Puulalu, ngayuku walytja tjuṯangkuṯarra piipa ngaatjanya wakara wantirriyaṉi riitarringkula kulintjaku. Yiitju Kurayitjalu paapa Katutjaluṯarra watjaṉu ngayulu palumpa waarrka palyantjaku, wiya mayutju yaṉangungku yalatji watjaṉu, wiya. Yiitju Kurayitja palumpara Katutjanya yunyparringkula mirringuru yilta palunya pakaltjingaṉu. 3 Kuliṉiṉa paluru kutjarra nyurrangarrinya aḻṯururringkula yaṉṯayaṉṯalku yunypanyurra nyinanytjaku. 4 Yaṉangu tjuṯangku kutu kuya palyara nyinapayi. Katutjaku nganaṉa tjukarurru nyinanytjaku Yiitju Kurayitjanya mirrirringu kuya nganampa waṉikitja. Katutjalu yurrunpa watjantjala Yiitjulu kulira watiyangka waralyngarala mirrirringu. 5 Katutja palunya nganaṉa kutu puḻkapungkunytjaku, paluru Yiitjunya nganampa yaḻṯururringkula ngalya wantirriyaṉutjangka. Yalatji nganaṉa yuwankarrangku kulira palunya kutu puḻkapungkunytjaku.

6 Katutjalu aḻṯururringkula nyurrangarrinya yirriṯi palumpa walytja tjuṯa ngulytjuṉu, Yiitju Kurayitjakuṉu wangkanyurra kuliṉutjangka. Puṯuṉa kuliṉi, nyaanguru tjaampalangkunyurra Katutjaku wangka wantirra?, wangka kutjupa kuliṉi? Rawa wiyanyurra tjukarurru nyinapayi Katutjaku wangkaku. 7 Wangka kutjupa wiyanyurra kulintjaku, Yiitjukuṉu wangka kutjunyurra kulintjaku, wangka tjukarurru. Kutjupa tjuṯangku nyurrangarrinya wiyawanangku wangka kutjupa nintiṉi, Kurayitjakuṉu wangkanyurra kulira wantinytjaku. 8-9 Nganaṉatju nyurrangarrinya yurrunpa wangka Yiitjunyatjarra nintilpayi. Wangka palunya kutjunyurra kulintjaku, wangka kutjupa wiya. Nganampa walytja manta ngurrarangku tjinguru ilkari ngurrarangku wangka kutjupa nyurrangarrinya nintintjala Katutjalu ngula palunya payira iyalku warukutu. Wangka palunya ngayulu nyurrangarrinya watjara piyuku watjaṉi, ngayulu yunytjurringanyi Katutjalu ngunytjiwana watjalpayi palunya payira wantirriyanytjaku warukutu.

10 Tjuwuku luwuwana nyinakitja tjuṯangku watjalpayi, “Puulalu tjananya yaṉangu tjuṯa nintilpayi, Tjuwuku luwuwana wiya nyinanytjaku, tjana Puulaku yunypa nyinanytjaku.” Nyurrangarri yalatji ngayuku wangka kulintjaku. Ngayulu Puulaluṉa nyurrangarrinya tjukarurru watjaṉi, nganaṉa wiyawana nintilpayi tjuṯa wiya kulintjaku. Ngayulu wiya yalatji nintilpayi tjana ngayunya puḻkapungkunytjaku, ngayulu kuliṉi Katutjanya ngayuku yunypa nyinanytjaku, ngayulu palumpa wangka tjananya nintintjala. Yiitju Kurayitjaku waarrkanangkuṉa nyurrangarrinya tjukarurru palumpaṉu wangka watjalpayi.

11 Walytja tjuṯa! Wangka ngaatjanyaya kulila! Wangka Yiitjunyatjarra ngayulu tjakultjunkupayi, ngayukuṉu wangka wiya, yaṉangu kutjupakuṉu wangka wiya. 12 Yaṉangu kutjupangkuṉi wiya wangka palunya nintiṉu, Yiitju Kurayitjaluṉi wangka palunya nintiṉu.

13 Nyurrangarri ninti ngayuku, ngayuluṉa Tjuwu nyinanyi. Yurrunpa Tjuwuku luwutjarrangku ngayulu Yiitjuku walytja tjuṯa panypurangkula witira tjiilakutu katipayi, aḻṯuruwiyangku. Ngayulu kuliṉingi, “Tjana wiya Yiitjunya waḻkulkitja kutu tjungurringkunytjaku.” 14 Tjuwu tiṉaṉa ngayulu nyinapayi, Tjuwuku luwuwana nyinapayi luwutjarra kutjupa tjuṯangka wirriḻi ngayulu luwu palulawana tjukarurru nyinapayi. Yirriṯi nyinanytja tjuṯakuṉu wangkawanaṯarra ngayulu tjukarurru nyinapayi. 15 Ngayulu pipirri wiima ngarrinyingka yurrunpa, Katutjalu kuliṉu, “Puulanya pipirri wiima ngarrirra tiṉarrinytjala ngayulu palunya nintilku paluru ngayuku waarrka palyantjaku.” Paluru ngayuku aḻṯururringkula 16 palumpa katja nintiṉu. Paluruṉi watjaṉu palumpa wangka Tjuwuwiya tjuṯawana tjakultjurinkunytjaku. Yalatjiṉi nintintjala wiyaṉa yankula wati kutjupangka tjapiṉu, “Wangka yaalytji ngayulu yaṉangu tjuṯangka tjakultjunku?” Wiyaṉa yaṉangu kutjupangka yalatji tjapiṉu. 17 Ngayulu wiya Tjarutjalumalakutu yankula Yiitjuku kutunguḻu tjuṯa tjapiṉu, “Wangka yaalytji ngayulu yaṉangu tjuṯangka tjakultjunku?” Tjana yurrunpa Yiitjuku waarrkana tjuṯa nyinangi, ngayuluṉara ngaṉṯi palumpa waarrkana nyinanyi. Palunyatjanu ngurra Tamatjakatjanya wantikatirra ngayulu yanu manta Yarapiyalakutu tjukarurru. Nyinarraṉa tawunu Tamatjakatjalakutu piyuku yanu. Yalatjiṉa nyinanytjala Katutjaluṉi kututja wangka Yiitjunyatjarra nintiṉingi, wiya yaṉangu kutjupangku.

18 Palulanguru yiiya tjirripala ngayulu nyinarra Tjarutjalumalakutulpi yanu wati Piitanya Yiitjuku waarrkana wangkakitja. Piitaku ngurrangka wiika kutjarraṉa nyinangi. 19 Yiitjuku waarrkana kutjupa tjuṯangka wiyaṉa tjungurringkula wangkangu. Wanyuṉaka kulila! Tjayimitjanya mayutju Yiitjuku maḻanypa ngayulu tjungurringkula wangkangu. 20 Yuwa, Katutjaluṉi nintilpayi wangka Yiitjunyatjarra, yaṉangu kutjupangkuṉi wiya ngayunya nintilpayi. Wangka yalatjiṉa tjukarurru wangkanyi, Katutjala kurungka.

21 Tjarutjalumangka nyinarra ngayulu manta Tjiriyalawana yankula nyinangi. Palulanguru ngayulu yankula manta Tjilitjiyalawana nyinangi. 22 Yiitjuku walytja Tjuutiyanya ngurrara tjuṯa ngayuku ngurrpa nyinangi, wiya tjana ngayunya nyakupayi. 23-24 Tjakulpa kutjuya kulira watjara waṉingi yalatji, “Wati yini Puulalu Yiitjuku walytja tjuṯa Tjarutjalumanya ngurrara tjuṯa panypurangkula tjiilakutu katirra tjarrpatjunkupayi. Palurulpi Yiitjukuṉu wangka tjakultjurinanyi ngurra tjuṯawana. Yirriṯi paluru Yiitjukuṉu wangkaku nyinangi tuunlayiki. Palulanguru paluru kuwarri nyinarra mayutju Yiitjukuṉu wangka tjakultjurinanyi. Paapa Katutjalu palunya tjukarurruṉu.” Yalatjiya Tjuutiyanya ngurrara tjuṯangku ngayunya kulira Katutjanya puḻkapungkupayi.

Kilitjiyalakutu 2 ->