Yipitjalakutu 6

Mayutju kulira tjukarurru nyinanytjaku

1 Pipirri tjuṯa, nyurrangarri Yiitjuku walytjarringkula, wangka ngaatjanyaya kulila! Yiitju Kurayitjaku walytjanyurra nyinarra paapaku maamaku wangkakunyurra tjukarurru kulira nyinanytjaku. Yalatjinyurra tjukarurru nyinanytjaku. 2-3 Katutjaku wangka tiṉa, wangka kutjupa tjuṯangka munkarra yalatji piipangka ngarrinyi, “Paapaku maamakuṯarranyurra tjukarurru nyinanytjaku. Wangka pulampa kulira palyantjaku.” Wangka panyapa watjara Katutjalu wangka kutjupalpi yalatji watjaṉu, “Palumpa kutjarrakunyurra tjukarurru nyinarra, manta ngaangkanyurra palya nyinamalpa rawa.”

4 Paapa tjuṯangku, maama tjuṯangkuṯarra Yiitjuku walytjarringkula wangka ngaatjanyaya kulila! Pipirri tjuṯa tjananya wiya nyurrangarri yunytjuwiyangku payintjaku, tjana pikarringkula nyinapayingka nyupalimpalpi. Yunytjungku nyurrangarri tjananya tjukarurru yaṉṯayaṉṯantjaku. Kanyira tjananya nyupali Yiitju Kurayitjakuṉu wangka nintintjaku, tjana kulira Yiitjuku tjukarurru nyinanytjaku.

Irriṯi Puulanya nyinanytjala mayutju kutjungku waarrkana tjuṯa kanyilpayi palumpa ngurrawana kutu waarrkarrinytjaku. Luwu tjanampa ngarangu waarrkana tjuṯa mayutju walytjaku kutju tjana kutu waarrkarrinytjaku, mayutju kutjupaku waarrkarrinytjawiya. Mayutju paluru tjananya wiitjimani yungkuwiyangku mangarri mantarraṯarra yungkula yaṉṯayaṉṯalpayi.

5-6 Waarrkana tjuṯa Yiitjuku walytjarringkula, wangka ngaatjanyaya kulila! Mayutju walytjakunyurra kutu tjukarurru nyinanytjaku. Yiitju Kurayitjaku wangka nyurrangarri kulira tjukarurru palyalpayi. Wangka palunya nguwanpa nyurrangarri Mayutju walytjaku wangka kulira tjukarurru palyantjaku. Nyuntupa mayutjungku wiya nyanganyingka kutu palumpa wangkawana kulira tjukarurru waarrkarrinytjaku. Nyurrangarri Yiitju Kurayitjaku waarrkana tjuṯa nyinanyi, Katutjakuṯarra. Katutjalu kuliṉi nyurrangarri mayutju walytjaku tjukarurru nyinanytjaku. 7 Tjinguru nyuntupa mayutju waaḻangka nyinanytjawiyangka Yiitju Kurayitjanya yankula waaḻa palula mayutju nyinamara. Nyuntu palumpa wangka kulira tjukarurru palyanmara. Palunya nguwanpa nyuntu mayutju walytjaku wangka kulira tjukarurru palyantjaku. 8 Tjinguru nyuntu mayutju walytjaku kulira kutu tjukarurru palyantjala ngula Katutjalu nyuntunya yunyparringkula kana kanyilku palumpa ngurrangka. Tjinguru yaṉangu kutjupangku waarrkanawiyangku yaṉangu kutjupa tjuṯaku tjukarurru palyalku. Yalatji palya tjanampa palyantjala, waarrkana nguwanpaku Katutjalu palunya yunyparringkula kana kanyilku palumpa ngurrangka.

9 Waarrkanaku mayutju tjuṯanyurra Yiitjuku walytjarringkula wangka ngaatjanyaya kulila! Waarrkana tjuṯa nyurrangarri purinypa yaṉṯayaṉṯara kanyintjaku, pungkula kanyintjawiyangku. Mayutju tiṉa ilkari ngurraranyurra mayutju tjuṯangku kulila! Paluru waarrkana tjuṯaku mayutju nyinanyi, nyurrangarrimpa mayutju tjuṯakuṯarra. Paluru wiya mayutju tjuṯaku kutju yunyparringanyi, yuwankarraku yunyparringanyi, waarrkana tjuṯakuṯarra.

Mamuku mayutjungku tjingapunganyingka wiyanyurra kulintjaku

10-11 Nyurrangarri wangka ngaatjanyalpi kulintjaku. Yiitju Kurayitjaku walytjanyurra nyinarra palunya tjapintjaku, paluru nyurrangarrinya rapantjaku, mamuku mayutjungkamarra. Katutjaluṯarra nyurrangarrinya rapalku Yiitjuku tjukarurrulpi nyinanytjaku. Paluru nyurrangarrinya rapalku mamuku mayutjungku tjingapunganyingka kuliranyurra wantinytjaku. 12 Yaṉangu tjuṯangku kutju wiya nganaṉanya tjingapunganyi, Yiitjuku wangka wantinytjaku, mamuku mayutjungku, palumpa waarrkana tjuṯangkuṯarra nganaṉanya tjingapunganyi. 13 Nganaṉa Katutjanya tjapintjaku paluru nganaṉanya rapantjaku. Nganaṉa rapa yalatji kutu ngaranytjaku, mamuku mayutjungku nganaṉanya tjingapunganyingka, Yiitjuku wangkawana kutju nyinanytjaku tjukarurru, kulira kutjupawana yankunytjawiya. 14 Nyurrangarri Katutjaku wangkawana kutu nintirringkunytjaku. Nintirringkula tjukarurru nyinanytjaku, wangka tjukarurru kutju wangkanytjaku, ngunytji watjantjawiya. Yalatjinyurra tjukarurru nyinarra mamuku mayutjungku tjingapunganyingka palumpa wangkanyurra kulira wantiku, Katutjaku wangkawana kutju nyurrangarri nyinanytjaku. 15 Yiitjukuṉu wangkawananyurra nintirringkula parra tjakultjurinkunytjaku. Yaṉangu tjuṯangku wangka palunya kulira Katutjaku kalypalpiya nyinaku. 16 Kutu nyurrangarri Yiitjuku wangka kulira tjukarurru nyinanytjaku, mamuku mayutjungku tjingapunganyingka palunya kulilwiya tjukarurru kutu nyinanytjaku. 17 Nyurrangarri Katutjaku walytjarringkula yankula yaṉangu tjuṯangka tjakultjunkunytjaku. Katutjaku kurrunpangku nyurrangarrinya nintilku palumpa wangka tjukarurru tjananya tjakultjunkunytjaku.

18 Katutjaku kurrunpangku nyurrangarrinya nintiṉingka, kutjupa tjuṯaku tjapintjaku. Kutu tjanampa nyurrangarri Katutjanya tjapintjaku, purrkarrinytjawiyangku. Yiitjuku walytja tjuṯakuṯarra nyurrangarri tjapintjaku. 19 Ngayukuṯarra nyurrangarri tjapintjaku ngayulu Yiitjuku wangka tjukarurru tjakultjunkunytjaku, nguḻurrinytjawiyangku. Wangka Yiitju Kurayitjanyatjarra palunya yirriṯi Katutjalu kutju kulilpayi, paluru wangka palunya yutiṉulpi ngayulu tjakultjurinkunytjaku. 20 Katutjaluṉi iyaṉu waarrka palunya palyarinkunytjaku. Palumpa wangka Yiitjunyatjarra ngayulu tjakultjurinutjangka tjana ngayunya tjiilangka tjarrpatjunu. Kuwarri ngayulu tjiilangka kutu nyinanyi. Yuwa, ngayukutju nyurrangarri Katutjanya tjapintjaku, ngayulu palumpa waarrka tjukarurru palyantjaku.

Piipa wakara wiyarrikitjangku watjalku

21-22 Wati Titjikatjanya ngayulu nyurrangarrimpa wantirriyalku, paluru nyurrangarrinya wangka ngayunyatjarra tjakultjunku. Paluru nyurrangarrinya tjakultjunku ngayulu tjiilangka nyinarra Yiitjuku waarrka palyaṉutjangka. Paluru nyurrangarrinya wangka ngayunyatjarra, Katutjaku wangkaṯarra nintintjala nyurrangarri yunypalpi nyinaku. Titjikatja paluru nganampa walytja nyinanyi, paluru Yiitjuku waarrkana palya nyinanyi.

23 Ngayulu paapa Katutjanya tjapinmalpa paluru Yiitju Kurayitjaluṯarra nyurrangarrinya yaṉṯayaṉṯantjaku. Yalatji paluru kutjarrangku nyurrangarrinya yaṉṯayaṉṯantjala nyurrangarri yunypa nyinaku, yaṉangu kutjupa tjuṯaku yunytju nyinarra Yiitjuku tjukarurru nyinamalpa. 24 Ngayulu yunytjurringanyi Katutjalu nyurrangarrinya aḻṯururringkula yaṉṯayaṉṯantjaku, nyurrangarri kutu Yiitju Kurayitjaku tjukarurru nyinanytjala. Yiitju paluru ilta nganampa mayutju nyinanyi.

<- Yipitjalakutu 5