Tjitjaluniyanya Ngurrara Tjuṯaku Piipa Nampa 2

1-2 Nganaṉatju Puulalu, Tjayilitjalu, Timitjiyilu Tjitjaluniyanya ngurrara tjuṯaku nyurrangarrimpa piipa ngaatjanya wakara wantirriyaṉi. Nintingkulatju kuliṉi nyurrangarri mayutju Yiitju Kurayitjaku walytja tjuṯa nyinanyi, paapa Katutjakuṯarra walytja nyurrangarri nyinanyi. Ngayulu Katutjanya Yiitjunyaṯarra tjapilpayi aḻṯururringkula nyurrangarrinya kutu yaṉṯayaṉṯantjaku, nyurrangarri palumpa kutjarra yunypa nyinanytjaku. 3 Yilta, nyurrangarri Katutjaku walytja tjuṯa tjukarurru kutu nyinanyi. Yiitjuku walytja kutjupa tjuṯaku nyurrangarri kutu yunytju tjanampa nyinanyi. Yalatjinyurra tjukarurru nyinanytjala Katutjanyalatju kutu waḻkulpayi. 4 Ngurra tjuṯawana nganaṉatju Yiitjuku walytja kutjupa tjuṯangka yalatji tjakultjunkupayi, “Yiitjuku yunytjuwiya tjuṯangku panypurangkula pungkunytjala Tjitjaluniyanya ngurrara tjuṯaya kutu tjukarurru nyinanyi.”

5 Paluru tjana yunytjuwiya tjuṯangku panypurangkula pungkunytjala nyurrangarri alatji kulintjaku, “Katutjanya nganampa yunypa nyinanyi. Paluru nintingku kuliṉi, nganaṉanya tjana panypurangkula pungkunytjala. Ngula palurulanya yilta yaṉṯayaṉṯalku palumpa ngurrangka.” 6-7 Ngula Katutjalu yunytjuwiya tjuṯa tjananya kuutawutjungka kulira payira wantirriyalku, kanya nyurrangarrinya tjukarurru yaṉṯayaṉṯalku. Nganaṉanyaṯarra paluru yaṉṯayaṉṯara kanyilku yunytjuwiya tjuṯangkamarra, Yiitju Kurayitjanya piyuku mantakutu ngalyankunytjala, palumpa ilkari ngurrara tjuṯawana tjungu. 8-9 Yuḻṯa palula Yiitjuku yunytjuwiya tjuṯa, palumpa wangka kulira wantipayi tjuṯaṯarra tjananya watjara wantirriyalku waru tiṉakutu. Yilta, mayutju nganampa Yiitjulu palunya tjananya warukutu wantirriyalku, Katutjaku wangka ngaatjanya kulira wantingutjangka, tjana. Wiya tjana Katutjaku ngurrangka kana nyinaku, warungkaya kutu kampamalpa. Warungkamarra tjananya Katutjalu ngangkari tiṉatjarrangku wiya yaṉṯayaṉṯalku. 10 Yalatji ngaraku Yiitju Kurayitjanya mantakutu piyuku ngalyananyingka. Yuḻṯa palula palumpa wangka kulira walytjarringutja tjuṯangkuya Yiitjulawana tjungurringkula palunya waḻkulku. Nyurrangarriṯarra yalatji palunya waḻkulku, nganampa wangka tjakultjunutja kulira.

11 Yurrunpa Katutjalu kuliṉu Tjitjaluniyanya ngurrara tjuṯanyurra palumpa walytja tjuṯa nyinanytjaku. Nganaṉatju kutu palunya tjapilpayi nyurrangarri palumpa walytja tjukarurru kutu nyinanytjaku. Yalatjiṯarralatju tjapilpayi, Katutjalu nyurrangarrinya kaṉṯilyankunytjaku palumpa waarrka palyantjaku. Yalatji palyalkitjanyurra yunytjurringanyi Yiitjuku walytja tjuṯa nyinarra. 12 Yalatjinyurra palumpa waarrka palyantjala nyakula yaṉangu tjuṯangku Yiitju Kurayitjanya puḻkapungku. Palunyatjanu Katutjalu Yiitju Kurayitjalu nyurrangarrinyalpi puḻkapungku palya nyinapayi kutjarrangku.

2 Tjitjaluniyalakutu 2 ->