1-2 Katutjaku kurrunpangkuṉi ngayunya Puulanya nintiṉu yalatji. Ngula paṉa ilkariṯarra wiyarringkunytjala yurrunpa Yiitjuku walytja tjuṯaya tjukarurru nyinarra Yiitjuku wangkalpiya tjana wantiku, kutjupa tjuṯaya tjukarurru kutu nyinamalpa, Yiitjuku. Mamungku tjingapunganyingka nintilpayi tjuṯangku wiyawanalpi tjananya nintilku, Katutjaku wangka tjukarurru nguwanpa. Yalatji nintilpayi tjuṯangku tjananya nintintjala paluru tjana Yiitjuku walytja tjuṯangku kulira tjana wiyawanalpi nyinaku. Nintilpayi paluru tjana ngunytjinytjuya nyinaku. 3-4 Ngunytjinytju paluru tjana kuwarri nyinanyi. Paluru tjana wiyawana tjananya yalatji nintilpayi. Miiṯararrapula wiya nyinanytjaku, wati anta kungka tjiingkila kutu nyinanytjaku. Wangka yalatjiṯarra tjana nintilpayi, “Mangarri anta kuka ngaatja kutju ngalkunytjaku, mangarri anta kuka kutjupa wiya nyurrangarri ngalkunytjaku.” Yalatji wiya Katutjaku wangkangka ngaranyi. Mangarri anta kuka yuwankarra Katutjalu palyaṉu nganaṉa palya ngalkunytjaku, Katutjaku wangka kulilpayi tjuṯangku. Palya nganaṉa mangarri anta kuka tjuṯa ngalkunytjaku. Nganaṉa yalatji ngalkukitjangku Katutjanya yalatji tjapintjaku, “Nyuntunyalatju waḻkuṉi, mangarri anta kuka ngaatjanya nganaṉanya nyuntu yungutjangka.” 5 Yalatji nganaṉa tjapintjala, Katutjalu kulilku, “Tjana ngayunya tjapiṉi mangarri anta kuka ngayulu yungutjangka. Palya tjana mangarri anta kuka palunya ngalkuntjaku.”

6 Timitjiyi, wangka ngaatjanya kulila! Nyuntu Yiitjuku waarrkana palya nyinanyi. Nyuntu wangka palunya tjananya nintintjaku aṉangu tjuṯangka. Palulanguru tjana kulilku, “Yuwa, Timitjiyilulanya tjukarurru nintiṉi. Paluru yangupala nyinarra rawangku Katutjaku wangka riitarringkula ninti nyinanyi. Paluru wangka palulawana ilta tjukarurru nyinanyi.” 7 Timitjiyi, nyuntu wangka ngaatjanyaṯarra kulila! Yaṉangukuṉu tjukurrpa tjuṯa wiya nyuntu kulintjaku, wiya tjananya tjukurrpa palunya tjuṯawana nyuntu nintintjaku, wanti! Katutjaku wangkaku kutju nintirringkula nyuntu tjananya nintintjaku. Nyuntu Katutjaku wangka kutu riitarringkula Katutjala kutu purayirringkunytjaku, nintilkitjangku. 8-9 Yaṉangu tjuṯangku yalatji watjalpayi, “Nganaṉa turiyinarringkunytjaku tjaputjapuku.” Yalatji nguwanpa nyuntu Katutjaku tjukarurru nyinakitja kutu turiyinarringkunytjaku yalatji. Nyuntu Katutjaku wangka riitarringkula palulawana tjukarurru nyinanytjaku. Palulanguru nyuntu kana kutu nyinaku palumpa ngurrangka. Wangka palunya nyuntu rawa kulira tjukarurrulpi Katutjaku kutu nyinaku. 10 Katutjaku waarrka nganaṉa kutu palyaṉi Katutjaku tjukarurru kutu nyinanytjaku, wantinytjawiyangku. Tuunlayiki tjuṯangku nganaṉanya panypurangkunytjala, nganaṉa palumpa waarrka kutu palyantjaku, wantinytjawiyangku. Yalatji nganaṉa kulintjaku, “Nganaṉa Katutjaku tjukarurru kutu nyinanytjala paluru nganaṉanya kanara palumpa ngurrangka nyinatjunku.” Yuwa, Katutjalu kuliṉi yaṉangu yuwankarra palumpa walytjarrinytjaku. Yaṉangungku Yiitjuku wangka kulira palumpa walytjarringkula kana kutu nyinamalpa.

11 Wangka palunya tjananya tjukarurru nintila, nguḻuwiyangku! 12 Nyuntu yangupala nyinanyi, Timitjiyi, tjiḻpiwiyanu. Nyuntu palya tjananya tjiḻpi tjuṯa nintintjaku, wiya kutjupangkunta alatji marrkuntjaku, “Nyuntu tjiḻpiwiya yangupala nyinanyi, wiya nyuntu nganaṉanya nintintjaku.” Wiya tjana yalatji nyuntunya marrkuntjaku. Nyuntu tjukarurru nyinarra kutu tjananya nintintjaku, Katutjaku wangka! Yaṉangu uwankarraku nyuntu palya tjanampa nyinama!, pikapikarrinytjawiya. Yalatji nyuntu tjukarurru nyinanytjala uwankarrangkunta nyakula tjukarurrulpiya nyinaku, nyuntu tjukarurru nyinanytja nguwanpa.

13 Ngayulu ngula maa yankula nyuntulawana nyinaku ngurra nyuntupaṉungka. Nyuntulawana nyinarra ngayulu Yiitjuku walytja tjuṯa tjananya nintilku. Kuwarri nyuntu kutu tjananya nintila! Kutu nyuntu Katutjaku waarrka palyanma, tjanalawana!, tjana kulira yunypa nyinanytjaku Yiitjuku. Yiitjuku walytja tjuṯaya tjungurrinytjala Katutjaku wangka tjanampa nyuntu riitarriwa!, tjana kulira nintirrinytjaku. 14 Katutjalunta ngangkari nguwanpa tjarrpatjunu, yaṉangu tjuṯa nyuntu nintintjaku. Yurrunpa yalatjinta tjarrpatjunu, Katutjaku wangka watjalpayi tjuṯangku, tjiḻpi tjuṯangkuṯarra nyuntula katangka mara tjunkula ngaratjunkunytjala. 15 Yalatji tjanalawana nyuntu Katutjaku waarrka tjukarurru kutu palyantjaku. Yalatji nyuntu tjukarurru palyantjala nyakula Yiitjuku walytja tjuṯangku yunypangku yalatji tjana kulilku, “Yuwa, Timitjiyilu Katutjaku waarrka tjukarurru palyaṉi.” 16 Nyuntu rawangku kulila!, Timitjiyi, tjukarurru kutu nyuntu nyinanytjaku, Yiitjuku. Nyuntu, Katutjaku wangka tjukarurru kutu nintintjaku. Yalatji nyuntu tjukarurru nyinarra tjukarurru nintintjala, Katutjalunta nyinatjunku palumpa ngurrangka kana kutu nyinanytjaku. Yaṉangu kutjupa tjuṯaṯarra Katutjalu ngurra palula nyinatjunku nyuntupa wangkaya kulira Yiitjuku walytjarringutja.

<- 1 Timitjiyiku 31 Timitjiyiku 5 ->