1 Irriṯi, kuya tjuṯangku panypurangkula pungkunytjala, Yiitjunya mikintjarra nyinapayi. Palunya nguwanpa kuya tjuṯangku nyurrangarrinyalpi panypurangkula pungkuku. Yalatji nyurrangarrinya tjana panypurangkula pungkunytjala tjukarurru kutunyurra nyinanytjaku nguḻuwiya. Kutjupa tjuṯangku nyurrangarrinya nyakula yalatji kulilku, “Yilta, tjana Yiitjuku walytja tjukarurru nyinanyi, wiyaya ngunytjiwana nyinanyi, wiya.” 2 Yalatji nyurrangarri tjukarurru kutu nyinanytjala, Katutjanya nyurrangarrimpa yunypa nyinaku. Yuwa, Katutjaku wangkawananyurra tjukarurru nyinanytjaku, walytjangku kulira kuyawana nyinanytjawiya. 3 Yirriṯi nyurrangarri Katutjaku ngurrpangku kuya palyara nyinapayi. Tjaampalangkunyurra walytjangku kulira miiṯa kutjupa kutjupawana yankupayi. Tjaampalangkunyurra tjurratja tjikira turaangkarripayi. Tjaampalangkunyurra tjurratja tjikira mangarri tiṉa tjungungku ngalkupayi, yunypangku. Yalatjinyurra kutu wiyawana nyinapayi waarrkarrinytjawiya. Katutjanya nguwanpa tjuṯanyurra waḻkura nyinapayi, Katutjanya iltanyurra kulira wantipayi. 4 Palulanguru nyurrangarri Yiitjuku walytjarringkula tjukarurrulpi nyinanyi. Kutjupa tjuṯa tjana kutu nyinanyi Katutjaku ngurrpa. Paluru tjana nyurrangarrinya puṯu tjingapungkupayi tjanalawana nyinarra kuya palyantjaku. Palunyatjanu paluru tjana nyurrangarrimpa ngurrkurringkula panypurangkupayi. 5 Katutjalu palunya tjananya ngula kuutawutjungka kaatjimilalku. Yuḻṯa palula yaṉangu tjuṯa Katutjalu kuutawutjungka watjalku, kana nyinapayi tjuṯa, kutjupa tjuṯaṯarra yurrunpa mirrirringkula kanarringutja tjuṯaṯarra. 6 Yurrunpa mirrirringutja tjuṯangka tjanala Yiitjuku walytja tjuṯangku palumpa wangka tjakultjunkupayi. Paluru tjana ngula kuutawutjungka ngaranytjala Katutjalu tjananya tjapilku, “Yaalytjiyaalytjinyurra mantangka nyinapayi?” Tjanampa wangka kulira Katutjalu tjaampala tjananya watjalku kana kutu nyinanytjaku, palumpa ngurrangka.

7 Ngula manta ilkariṯarra wiyarriku. Yuḻṯa palunya yilarringanyi. Yalatji yilarringanyingka nguḻurrinytjawiya Yiitjuku tjukarurru kutu nyinanytjaku. Katutjanyaya tjapinma!, paluru nyurrangarrinya yaṉṯayaṉṯalku. 8 Wangka ngaatja maṯupurra ngaranyi. Nyurrangarri Yiitjuku walytja tjuṯaku yunytju nyinanytjaku. Yalatjinyurra yunytju tjanampa nyinarra kalypa nyinanytjaku. Yalatji tjanampa nyinanytjala tjana nyurrangarrimpa kalypa nyinaku kuya yurrunpa nyurrangarri tjanala palyaṉutjangka. 9 Tjinguru yaṉangu kutjupa ngurra kutjupanguru nyuntupa ngurrakutu ngalyankula ngaranytjala, nyuntu palunya yaḻṯirra paḻtjantjaku, pulangkitiṯarra nyuntu palunya yungkunytjaku wuumpi ngarrinytjaku. Wiya nyuntu yalatji kulintjaku, “Wati palatja ngurra kutjupakutu yanamara, ngurra ngayuku wantirra.” 10 Katutjalu nganaṉanya palumpa walytja nyinatjunu kutjupa tjuṯaṯarra. Yalatji nganaṉanya nyinatjunkula nintilpayi palumpa waarrka tjukarurru palyantjaku. Yalatji palurulanya nintintjala nganaṉa yaṉangu kutjupaku tjukarurru palyantjaku. 11 Tjinguru Katutjalunta nintiṉu palumpa wangka yaṉangu tjuṯangka nintintjaku. Palumpa wangka kulira nyuntu ilta tjananya nintintjaku. Tjinguru Katutjalu palumpa walytja kutjupa nintiṉu yaṉangu tjuṯaku tjukarurru palyantjaku. Palumpa wangka kulira yaṉangu paluru ilta kutjupa tjuṯaku tjukarurru palyantjaku. Katutjalu yaṉangu palunya kutu rapalku paluru yaṉangu kutjupa tjuṯaku kutu tjukarurru palyantjaku. Tjinguru yaṉangu paluru yalatji kutjupa tjuṯaku tjukarurru palyantjala yaṉangu tjuṯangku palunya nyakula Katutjanya yalatji puḻkawaṉiku, “Yaṉangu palangku yilta Yiitjuku waarrka tjukarurru palyalpayi.” Katutjanya yilta nganampa mayutju tiṉa nyinanyi, ngangkari puntutjarra, nganaṉa yuwankarrangku palunya puḻkawaṉinytjaku.

12-13 Walytja tjuṯa, wangka ngaatjaya kulila! Tjinguru nyurrangarrinya yunytjuwiya tjuṯangku panypurangkula pungkunytjala, wiyanyurra puṯu kulira nyinanytjaku, yunypanyurra nyinanytjaku, yalatji kulira, “Irriṯi yunytjuwiya tjuṯangku Yiitjunya panypurangkula pungu. Palunya nguwanpa nganaṉanyalpi tjana panypurangkula punganyi.” Yalatjinyurra nyinarra ngula puntura yunypa nyinaku, Yiitjunya mantakutu piyuku ngalyankunytjala. Wiyanyurra yalatji kulintjaku, “Nganaṉanya tjana wantimara, wiya nganaṉanya tjana panypurangkula pungkunytjaku.” Nganaṉanya Yiitjuku walytja tjuṯa yilta panypurangkula pungkuku. 14 Yuwa, paluru tjana nyurrangarrinya Yiitjuku walytja panypurangkula pungkunytjala yunypaya nyinama! Yalatjinyurra kulilku, “Katutjaku kurrunpangku ngayunya rapara yaṉṯayaṉṯaṉi ngangkari puntutjarrangku, ngayulu palumpa kutu tjukarurru nyinanyi.” 15 Tjinguru wati kutjupangku yaṉangu mirri pungkunytjala mayutju tjuṯangku palunya ngaparrtjingku mirri pungku. Tjinguru wati kutjupangku yaṉangu kutjupaku yulytja mulyaṯangku mantjintjala mayutju tjuṯangku palunya ngaparrtjingku pungku. Tjinguru wati kutjupangku yaṉangu kutjupangka kuya palyantjala mayutju tjuṯangku palunya ngaparrtjingku pungku. Tjinguru nyurrangarri yalatji nguwanpa wiyawana nyinanytjala mayutju tjuṯangku nyurrangarrinya ngaparrtjingku pungku. Wiyanyurra yalatji nguwanpa nyinanytjaku, wiya. 16 Nyurrangarri yalatji wiyawana nyinanytjawiyangka tjinguru Yiitjuku yunytjuwiya tjuṯangku nyurrangarrinya panypurangkula pungkuku. Yalatji tjana nyurrangarrinya pungkunytjala yunypanyurra nyinarra yalatji Katutjanya puḻkawaṉinytjaku, “Katutja. Kuliṉilatju nyuntu nganaṉanya ilta yaṉṯayaṉṯaṉi. Paluru tjana nganaṉanya kutu panypurangkula punganyi, nganaṉa ilta nyuntupa walytja tjuṯa nyinanyi.” 17 Ngula Katutjalu nganaṉanya kuutawutjungka ngaratjunku. Tayimi paluru yilarringanyi. Paluru nganaṉanya yaṉangu uwankarra watjalku, tjukarurru nyinapayi tjuṯa, kuya palyalpayi tjuṯaṯarra. Yurrunpa paluru nganaṉanya palumpa walytja tjuṯa purinypangku tjapilku yaalytjiyaalytji nganaṉa mantangka palyalpayi. Palunyatjanu palumpa yunytjuwiya tjuṯalpi tjananya purinypangku tjapilku. Warukutulpi tjananya waṉirriyalku, tjana mantangka Yiitjuku wangka kulira wantingutjangka. 18 Katutjaku wangka yirriṯi tjunutja yalatji ngarrinyi,