1-2 Walytja tjuṯa, wangka ngaatjanya kulila! Yirriṯi ngayulu nyurrangarrilakutu maa yankula puṯu kuliṉu nintilkitjangku, Katutjaku wangkaku ngurrpa nyinanytjala. Palumpa kurrunpa wiyanyurra kulilpayi. Ngayuluṉa nyurrangarrinya wangka wiima nguwanpa purinypangku nintilpayi, Yiitjunyatjarra. Kuwarrinyurra ngurrpa nguwanpa nyinanyi, puntura nintirringkunytjawiya. 3 Kutunyurra nyinanyi Katutjaku ngurrpa tjuṯa nguwanpa. Yiitjuku walytja kutjupa tjuṯakunyurra pikarringkula wangkapayi. Yalatji kalyparrinytjawiyanyurra nyinanytjala ngayulu kuliṉi Katutjaku ngurrpa tjuṯa nguwanpanyurra nyinanyi, palumpa kurrunpatjarrawiya. 4 Kutjupa tjuṯangkunyurra watjalpayi yalatji, “Nganaṉa Puulaku waarrkana tjuṯa nyinanyi, paluru nganampa nintilpayi palya nyinanyi. Nintilpayi kutjupa tjuṯangku wiyawana nintilpayi.” Kutjupa tjuṯangkunyurra yalatji watjalpayi, “Nganaṉa Yapulutjaku waarrkana tjuṯa nyinanyi, paluru nganampa nintilpayi palya nyinanyi. Nintilpayi kutjupa tjuṯaku nganaṉa wiya yunyparringanyi.” Yalatjiya Katutjaku ngurrpa tjuṯa nintilpayi kutjuku yunyparringanyi, nintilpayi kutjupa tjuṯa tjana panypurangkupayi. 5 Yapulutjanya ngalinyaya kulila! Ngalitju Katutjaku waarrkana nyinanyi. Ngalitju nyurrangarrinya nintilpayi Yiitjuku wangkanyurra kulintjaku. Katutjalu ngalinya nintintjala wangka palulawanalitju nyurrangarrinya nintilpayi. 6 Yurrunpa ngayulu nyurrangarrinya wangka Yiitjunyatjarra nintiṉingi. Ngaṉṯi Yapulutjalu nyurrangarrinya nintiṉingi, Katutjaku wangkanyurra puntura kulintjaku. Yalatji nyurrangarri Katutjaku wangka kulira watiya yukiri palya nguwanpa pakaṉu, Katutjalu Yapulutjaluṯarra nyurrangarrinya nintintjala. 7 Katutjanya kutju maṯupurra nyinanyi paluru nyurrangarrinya nintilpayi. Ngalitju palumpa waarrkana kutjarra nyinanyi. Ngalinyatju wiyanyurra waḻkuntjaku Katutjanya kutjunyurra waḻkuntjaku. 8 Nintilpayi kutjuku yunyparringkula nintilpayi kutjupa wiyanyurra panypurangkunytjaku, wantiya! Ngalitju liipula nyinanyi Katutjaku waarrkana kutjarra. Paluru Katutjalu ngalinyatju ngula waḻkulku ngalitju palumpa waarrka mantangka palyara wiyaṉutjangka. 9 Ngalitju Katutjaku waarrkana kutjarrangku palumpa waarrka palyalpayi. Yalatjilatju Katutjaluṯarra tjungungku palumpa waarrka nyurrangarrilawana palyantjala nyurrangarri palumpa walytja tjuṯalpi nyinanyi. Nganaṉatju nyurrangarrinya nintira watiya yukiri palya nguwanpa pakaltjingaṉi.

10-11 Katutjaluṉi watjaṉu palumpa wangka ngurra tjuṯawana tjakultjurinkunytjaku. Yurrunpa ngayulu nyurrangarrilakutu maa yankula wangka Yiitjunyatjarra nintiṉingi. Palunyatjanu nintilpayi kutjupa tjuṯangku nyurrangarrinya nintilpayi Katutjaku wangkanyurra puntura kulintjaku. Yiitjuku walytja nintilkitjangku nintilpayingku yalatji kulintjaku, “Ngayulu tjananya Katutjaku wangka tjukarurrungku nintintjaku, wangka Yiitjunyatjarra.” Katutjalu Yiitju Kurayitjanya ngalya wantirriyaṉu yaṉangu tjuṯangku palumpa wangka kulintjaku. Nintilpayingku Yiitjukuṉu wangkawana kutju tjananya nintintjaku, wangka kutjupawana wiya. 12 Nintilpayi kutjupa tjuṯangku wangka Yiitjunyatjarra tjukarurrungku tjananya nintilpayi, kanya nintilpayi kutjupa tjuṯangku wangka kutjupawanangku tjananya ngunytjiwanangku nintilpayi. 13-15 Ngula Katutjalu tjananya kuutawutjungka tjapilku palumpa wangka kutjupa tjuṯangka mantangka nintiṉingitjangka. Tjinguru nintilpayi tjuṯangku tjananya purinypangku wangka Yiitjunyatjarra nintiṉangitjangka yaṉangu tjuṯa palumpa walytjarringkupayi. Katutjanya nintilpayi palumpa tjanampa yunyparriku. Tjinguru nintilpayi kutjupa tjuṯangku tjananya wangka kutjupawanangku tjananya nintiṉangitjangka yaṉangu tjuṯa wiya Yiitjuku walytjarringkupayi. Katutjanya nintilpayi palumpa tjanampa wiya yunyparringku. Paluru aḻṯururringkula tjananya nintira tjukarurrulku.

16 Wangka ngaatjanyaya kulila! Katutjaku walytja tjuṯa nyurrangarri nyinanytjala palumpa kurrunpa nyurrangarrilawana nyinanyi. 17 Katutjaku walytja tjuṯa tjananya tjinguru nintilpayingku wiyawana kutu nintintjala paluru tjana munupinarringkula wiyawanalpi nyinaku. Palumpa walytja tjuṯa wiyawanalpi nyinatjipingkamarra Katutjalu nintilpayi palunya mirri pungku, palumpa walytja tjuṯa yaṉṯayaṉṯalkitjangku. Nyurrangarriṯarra palumpa walytja tjuṯa nyinanyi.

18 Wangka ngaatjanya yilta ngaranyi, kulintjakunyurra. Kutjupa tjuṯangkunyurra yalatji kuliṉi, “Tjaampalaya Katutjaku ngurrpa tjuṯa, uwankarraku nintilingku nyinanyi. Palunya tjananya nguwanpa nganaṉa nintilingku nyinanyi.” Yalatji wiya nyurrangarri uwankarraku nintilingku nyinanyi, puṯu kulilpayi tjuṯanyurra nyinanyi. Nyurrangarri yalatji Yiitjuku wangka kulira palumpa walytjarringamara. Palulangurunyurra Katutjaku ninti nyinamara. 19 Katutjanya kutju uwankarraku nintilingku nyinanyi, yilta. Paluru yalatji kuliṉi, “Ngayuku tuunlayiki tjuṯa wiya uwankarraku nintilingku nyinanyi, puṯu kulilpayi tjuṯaya nyinanyi.” Katutjaku wangka yurrunpa tjunutja yalatji ngarrinyi, “Yaṉangu tjuṯa nintilingku nyinaku. Paluru tjana palyalkitjangku kulintjala Katutjalu tjananya kawaṉtjingalku, tjana palulawana palyalpayingka.” 20 Katutjaku wangka kutjupa yalatji ngaranyi, “Yaṉangu tjuṯa nintilingku nyinaku. Paluru tjana palyalkitjangku kulilku. Yalatji kulira tjana puṯu palyalku, puṯu kulilpayi tjuṯangku.” 21-22 Wiyanyurra yalatji kulintjaku, “Nganaṉa nintilpayi tjuṯaku ninti nyinanyi. Yalatjiku ninti nyinarra nganaṉa ingkaṯa palumpa yunyparringanyi, paluru nganampa mayutju nyinanyi.” Ngayulu, Yapulutjanyaṯarra, Piitanyaṯarra nyurrangarrimpa waarrkana tjuṯa nyinanyi, wiyalatju mayutju tjuṯa nyinanyi. Wiya ingkaṯa tjuṯa kutjunyurra kulintjaku, nyurrangarri yalatjilpi kulintjaku. Katutjalu nyurrangarrimpa uwankarra palyaṉu watiya mangarritjarra tjuṯa, kuka tjuṯa, ngurraṯarra. Paluru nyurrangarrinya mantangka nyinatjunkula kanyira yaṉṯayaṉṯaṉi. Ngula palumpa tayimingkanyurra wiyarringkula kana kutu nyinamalpa. 23 Nyurrangarri Yiitju Kurayitjaku walytja tjuṯa nyinanyi, kanya Yiitjunya Katutjaku walytja nyinanyi. Yalatjinyurra kulira yunypa nyinanytjaku, ingkaṯa tjuṯaku, wiya nganaṉanyatju kutju kulintjaku.

<- 1 Kurinytjiyalakutu 21 Kurinytjiyalakutu 4 ->