1 Jesu cʉnʉpʉ Olivo wame tidʉpʉ wahari. 2 Sa yero bohrearo Cohãcjʉ̃ wʉhʉpʉ tiquiro esari tja. Tiquiro esagʉ̃ ihñañe masa peyequina tiquiro cahapʉ cahmecoari. Tiquina sa cahmecoagʉ̃ ihñano tiquiro pehe dujitjiãno tiquinare buhe dʉcari. 3 Tiquiro sa buheri watoa ʉsã acaye judio masa buheyequina, fariseo masa mehna ti wʉhʉpʉ numinore ne cãhtari. Ticoro ʉmʉno mehna ñano yegʉ̃ waro wacũeno mehna esa pjeahye tiquina ticorore. Sa esa pjeye ticorore Cohãcjʉ̃ wʉhʉpʉ ne sajãri tiquina. Ne sajã sa tuhasa ijipihtiyequina ihñono ticorore duhu docoye ohõ saha nidi:

4 —‍Buhegʉ, ahricoro ʉmʉno mehna ñano ticoro yegʉ̃ waro wacũeno mehna ticorore esa pjei. 5 Cohãcjʉ̃ dutiyere Moise mʉnanopʉ marine tiquiro cũri ohõ saha nine: “Ʉmʉno mehna ñano yericorore ʉtã paca mehna doque wejẽña”, niahye Cohãcjʉ̃ dutiye. ¿Mʉhʉ waro dʉhse ni tʉhotuajari ahrire? ni sinituri tiquina Jesure.

6 Jesu ñano nigʉ̃ tʉho duaye nimedi tiquina tiquirore yahusãñe tehe. Tiquina sa sinituepegʉ̃ta Jesu muhri quehe, yehpapʉ tiquiro omo piria mehna ojoari. 7 Sa tiquina ni sinituducugʉ̃ Jesu pehe wahcã nuju sa, tiquinare yahuri:

—‍Mʉsa mehna cjʉ̃no ñano yerariquiro ticorore ʉtã mehna doque mʉhtaahdo, nidi Jesu.

8 Sa ni tuhasa pari turi muhri quehe, yehpapʉ ojoari tja. 9 Tire tʉhoye tiquina ñañe yerire wacũñe, tiquina wahmisʉmʉa pehe wijia mʉhtari. Tiquina bato tiriquina mehna cjẽna gʉ̃hʉ wijia pihtia wahari. Sa yero numino topʉ ducuricoro Jesu mehna tojoari. 10 Sa yero Jesu wahcã nuju sa ticorore sinituri:

—‍¿Nohopʉ wahajari tiquina? ¿Mʉhʉre buhiri dahre duamediquina mariedajari yojopʉre? nidi ticorore.

11 —‍Mariedare pʉhto, ni yʉhtiri ticoro.

—‍Yʉhʉ gʉ̃hʉ buhiri dahreraja mʉhʉre. Wahaya. Sa yego ñañene ye nemoedacãhña, nidi Jesu ticorore.]

12 Pari turi Jesu ti wʉhʉpʉ ijiyequinare yahuri:

—‍Buhrioro marine to ihña masigʉ̃ yero sahata yʉhʉ ahri yehpa cjẽnare Cohãcjʉ̃re masigʉ̃ yeaja. Yʉhʉre wacũ tutuariquiro ijipihtiye decori Cohãcjʉ̃ mehna sa ijiducurota. Sa yero tiquiro quehnoañene wacũnota. Sa yero tiquiro ñañene wacũ duerare, ni yahuri Jesu.

13 Tiquiro sa nigʉ̃ tiquirore fariseo masa ohõ saha nidi:

—‍Mʉhʉ basi mʉhʉ ijiye tiyere sa ni yahuducugʉ nine. Sa ye mʉhʉ ohõ saha ni mʉhʉ esa tuharo mʉhʉ ni yahuducu maca quẽhe ne dʉhseati ijierare, nidi tiquina Jesure.

Tiquina sa nigʉ̃ Jesu yʉhtiri:

14 —‍Yʉhʉ ahtarirore masiaja yʉhʉ. Yʉhʉ wahato gʉ̃hʉre masiaja yʉhʉ. Mʉsa ne tire masiedare. Mʉsa ohõ saha niepegʉ̃ta yʉhʉ ijiye tiyere mʉsare yʉhʉ yahuri poto tjire. 15 Mʉsa esa tuharo mʉsa ihñari dihitare masine mʉsa. Sa yena quehnoano masiedare mʉsa. Sa masiedapenata yʉhʉre ñano ni yahuducure mʉsa. Yʉhʉ pehe yʉhʉ esa tuharo masare ne sa niedaja. 16 Sa yegʉ masa tiquina ijiye tiyere ihña masigʉ yʉhʉ esa tuharo ihña masiedaja. Yʉhʉ pũrita yʉhʉre ohoriquiro mehna ihña masiaja. Sa yegʉ masa tiquina ijiye tiyere yʉhʉ ihña masiñe poto tjire. 17 Mʉsare dutiye tiquina ojoari pũ ohõ saha ni yahure. “Pʉaro masa ihcãno saha tiquina yahugʉ̃ ohõ saha tiquina yahuye poto tjire”, ni yahu ojoari jiri. 18 Yʉhʉre yahuriquiro mehna ʉsã pʉana tjiaja. Yʉhʉ ijiye tiyere yahuaja yʉhʉ. Sa yero yʉhʉ Pacʉ gʉ̃hʉ yahure yʉhʉ pehere. Tiquiro tjire yʉhʉre ohoriquiro, nidi Jesu.

19 —‍¿Nohopʉ ijiagari mʉhʉ pacʉ? ni sinituri tiquina.

—‍Yʉhʉre mʉsa masiedare. Yʉhʉ Pacʉ gʉ̃hʉre masiedare mʉsa. Yʉhʉre masina, yʉhʉ Pacʉ gʉ̃hʉre masiboaga mʉsa, ni yʉhtiri Jesu tiquinare.

20 Jesu tiquinare buhero sa ni yahuducuri Cohãcjʉ̃ wʉhʉpʉ tiquina niñeru sãñe acari cahapʉ. Tiquiro ñano yʉhdʉati pje ijieranidi. Sa ye tiquina mehna tiquiro ijiepegʉ̃ta tiquina tiquirore ñehedari.

21 Pari turi Jesu tiquinare yahuri tja:

—‍Yʉhʉ ahtariropʉ wahaʉtja. Yʉhʉ wahari bato mʉsa yʉhʉre macanata. Sa yena mʉsa ñañe buhiri tiye mehna yarianata. Yʉhʉ wahatopʉre mʉsa pehe waha masisi, ni yahuri Jesu.

22 —‍“Yʉhʉ wahatopʉre mʉsa pehe waha masisi”, tiquiro nigʉ̃ tʉhoye, “¿Ahriquiro tiquiro basi wejẽ yariarotari, sa nino?” nidi ʉsã acaye judio masa tiquina basi.

23 Tiquina basi sa nigʉ̃ Jesu yahuri tiquinare:

—‍Mʉsa pehe ahri yehpa cjãna ijire. Yʉhʉ pehe ʉhmʉse cjʉ̃ ijiaja. Ahri yehpapʉ bajuarina ijire mʉsa pehe. Ʉhmʉsepʉ ahtarigʉ ijiaja yʉhʉ pehe. 24 Mʉsa yʉhʉ ijiye tiyere yʉhʉ nidire “Poto ijierare”, nina, mʉsa ñañe buhiri tiye mehna yarianata mʉsa. Sa yegʉ “Mʉsa ñañe buhiri tiye mehna yarianata mʉsa”, nimi mʉsare, nidi Jesu tiquinare.

25 —‍¿Noa boro ijiajari mʉhʉ? ni sinituri tiquina.

—‍Coã waropʉre yʉhʉ niducuriro sahata ijiaja yʉhʉ. 26 Mʉsare yʉhʉ yahuati pajiro dʉhsarĩne. Sa yero mʉsa ñano yeri buhirire mʉsare yʉhʉ yahuati pajiro dʉhsarĩne. Sa yegʉ yʉhʉre ohoriquiro tiquiro yahurire ahri yehpa cjẽnare yahuaja. Tiquiro yahuri poto tjire, nidi Jesu tiquinare.

27 “Yʉhʉre ohoriquiro”, tiquiro nigʉ̃ tʉhoye, “Mari Pacʉ ijiaga”, ni tʉhotuerari tiquina. 28 Tiquina sa ni tʉhotueragʉ̃ ihñano Jesu yahuri tiquinare.

—‍Yʉhʉre masʉre Cohãcjʉ̃ ohorigʉre mʉsa yucʉ teõ mehna wahcõ doconata. Mʉsa sa yena, “Tiquiro Cohãcjʉ̃ ohoriquiro tjire”, ni masinata mʉsa yʉhʉre. Sa yena yʉhʉ esa tuharo yʉhʉ yerarigʉ ijigʉ̃ masinata mʉsa. Sa yena yʉhʉ Pacʉ yʉhʉre tiquiro buheri dihitare yahurigʉ yʉhʉ ijigʉ̃ gʉ̃hʉre masinata mʉsa. 29 Sa yero yʉhʉre ohoriquiro pehe yʉhʉ mehna ijire. Tiquiro cahmeñene ijipihtiye decori yeducuaja. Sa yero yʉhʉre tiquiro ne cohãedare, nidi Jesu.

30 Tiquiro sa nigʉ̃ tʉhoye, tiquirore masa peyequina wacũ tutuari.

31 Sa ye apequina judio masa Jesure wacũ tutuari. Sa yero Jesu tiquinare yahuri:

—‍Yʉhʉ dutiyere ye pehona, potota yʉhʉ buhena ijire mʉsa. 32 Sa yena poto masinata mʉsa. Poto ijiyere masina, ñañe yeyere duhu masinata. Sa yena cahacjẽna yero saha iji nemosi mʉsa, nidi Jesu tiquinare.

33 Tiquiro sa nigʉ̃ tʉhoye ohõ saha ni yʉhtiri tiquina:

—‍Ʉsã pehe panopʉ cjʉ̃no Abrahã mʉnano panamena iji turiana ijiaja. Sa yena ne apequina tiquina cahacjãna ijieraja ʉsã. ¿Sa yegʉ “Cahacjẽna yero saha iji nemosi”, nigʉ, dʉhse ijiro boro ʉsãre sa niajari mʉhʉ? ni sinituri tiquina Jesure.

34 Tiquina sa nigʉ̃ tʉhoro ohõ saha nidi tiquiro:

—‍Ijirota niaja mʉsare. Ijipihtiyequina ñañene yeyequina pehe tiquina ñañene ye duhu masiedare. Sa yero ñañe pehe tiquina pʉhtoro yero saha ijire. Sa ijiyequina ijiye cahacjẽna yero saha ijire tiquina. 35 Cahacjʉ̃no pehe tiquiro pʉhtoro ya curua cjʉ̃no ijipihtiye decori ijiducuerare. Ti wʉhʉ cjʉ̃no macʉno pehe ijipihtiye decori potota ti curua cjʉ̃no ijire tiquiro. (Yʉhʉ pehe Cohãcjʉ̃ macʉ ijiaja. Sa yegʉ dutigʉ ijiaja. Mʉsa ñañe yeyere duhu dutiitja.) 36 Sa yena yʉhʉ Cohãcjʉ̃ macʉ ñañene yʉhʉ duhugʉ̃ yenohrina ijina potota ñañene duhurina ijire mʉsa. 37 Abrahã mʉnano panamena iji turiana mʉsa ijigʉ̃ masiaja. Sa ijiepenata yʉhʉ yahuye pehere tʉho duerare mʉsa. Sa yena yʉhʉre wejẽ duare mʉsa. 38 Yʉhʉ Pacʉ yʉhʉre tiquiro masigʉ̃ yerire yahuaja mʉsare. Yʉhʉ sa yahuepegʉ̃ta mʉsa pacʉ watĩno mʉsare tiquiro dutiyere yere mʉsa gʉ̃hʉ, nidi Jesu tiquinare.

39 —‍Abrahã mʉnano panopʉ cjʉ̃no ʉsã ñecʉ mʉnano ijie tiahye. Sa yero watĩno ʉsã pacʉ ijierare, ni yʉhtiri tiquina.

Tiquina sa nigʉ̃ Jesu yʉhtiri:

—‍Abrahã panamena iji turiana ijina, tiquiro yeriro sahata yeboaga mʉsa. 40 Cohãcjʉ̃ yʉhʉre poto tiquiro yahuyere mʉsare yʉhʉ yahuepegʉ̃ta yʉhʉre wejẽ duare mʉsa. Abrahã mʉnano pehe ne sa yera tiahye. 41 Mʉsa pacʉ tiquiro yeriro sahata yere mʉsa, nidi Jesu tiquinare.

Tiquiro sa nigʉ̃ tiquina yʉhtiri:

—‍Omoca dʉhtemehneñequina pohna ijieraja ʉsã. Ihcãquirota ijire ʉsã Pacʉ. Tiquirota ijire Cohãcjʉ̃, nidi tiquina.

42 Tiquina sa nigʉ̃ Jesu yʉhtiri:

—‍Cohãcjʉ̃ mehna cjʉ̃ ijigʉ, ohõpʉre ahtaʉ. Sa yena Cohãcjʉ̃ mʉsa Pacʉ tiquiro ijigʉ̃ yʉhʉre cahĩboya mʉsa. Yʉhʉ esa tuharo ahtaerʉ yʉhʉ pũrita. Cohãcjʉ̃ tiquiro ohogʉ̃ ahtaʉ ohõpʉre. 43 ¿Dʉhsena yʉhʉ yahuducuyere tʉhoerajari mʉsa? Yʉhʉ yahuyere tʉho duerare mʉsa. Sa yena tʉhoerare mʉsa. 44 Mʉsa pacʉ pehe watĩno ijire. Sa yena watĩno cahmeñe pehere ye duare mʉsa. Ahri yehpa coã waropʉ to iji dʉcagʉ̃pʉ, yojopʉ gʉ̃hʉre tiquiro masare wejẽdiquiro ijire. Tiquirore poto yahuducuye mariedare. Sa yero tiquiro ne poto yahuducuerare. Tiquiro coã waropʉre ni meho mʉhta dʉcariquiro ijie tiahye. Sa yero tiquiro sa ni mehoducuriquiro ijiro, ni mehoñene yahure. 45 Yʉhʉ pehe mʉsare poto yahuaja. Sa yʉhʉ yahuepegʉ̃ta yʉhʉre tʉhoerare mʉsa. 46 “Mʉhʉ ñano yegʉ ijire”, yʉhʉre ni masiedare mʉsa. ¿Poto mʉsare yʉhʉ yahuepegʉ̃ta dʉhsena tʉhoerajari mʉsa? 47 Cohãcjʉ̃ pohne pehe tiquiro yahuducuyere tʉhore. Tiquiro pohne ijierana, tiquiro yahuducuyere tʉho duerare mʉsa, nidi Jesu tiquinare.

48 Tiquiro sa nigʉ̃ tʉhoye judio masa tiquirore ohõ saha nidi:

—‍“Mʉhʉ Samaria cjʉ̃ ijire. Sa yegʉ watĩnore cʉore mʉhʉ”, ʉsã nidi poto tjire, nidi tiquina Jesure.

49 Tiquina sa nigʉ̃ tʉhoro ohõ saha ni yʉhtiri Jesu:

—‍Watĩnore cʉoeraja yʉhʉ. Yʉhʉ Pacʉre ño peoaja. Mʉsa pehe yʉhʉre ño peoerare. 50 Yʉhʉre masa tiquina ño peogʉ̃ cahmedaja yʉhʉ. Yʉhʉ Pacʉ pehe yʉhʉre ño peogʉ̃ cahmene masare. Tiquiro pũrita yʉhʉ ijiye tiyere quehnoano ihña masino, sata ño peo dutire. Sa yero yʉhʉre tiquina cahmedari buhiri, buhiri dahreatiquiro ijirota tiquiro. 51 Ijirota niaja mʉsare. Yʉhʉ dutiyere yeriquiro ijipihtiye decori Cohãcjʉ̃ mehna sa ijiducurota, nidi Jesu.

52 Tiquiro sa nigʉ̃ tʉhoye ohõ saha nidi tiquina:

—‍Yojopʉ pũritare watĩnore cʉogʉ mʉhʉ ijigʉ̃ ʉsã quehnoano masiaja. Abrahã mʉnano yariaa wahahye. Cohãcjʉ̃ yere yahu mʉhtariquina gʉ̃hʉ yaria pihtia wahahye. ¿Sa yegʉ “Yʉhʉ dutiyere yeriquiro ijipihtiye decori Cohãcjʉ̃ mehna sa ijiducurota”, nigʉ dʉhse nigʉ sa niajari mʉhʉ? 53 ¿Ʉsã ñecʉ mʉnano Abrahã yʉhdʉoro tutuajari mʉhʉ? Tiquiro, Cohãcjʉ̃ yere yahu mʉhtariquina gʉ̃hʉ yariaa wahahye. ¿Mʉhʉ pehe noa boro ijiajari mʉhʉ, sa ni yahuducugʉ? Mʉhʉ sa nibogʉ ijierare, nidi tiquina.

54 Tiquina sa nigʉ̃ tʉhoro Jesu yahu nemori:

—‍Yʉhʉ basi “Tutuagʉ ijiaja yʉhʉ”, yʉhʉ nigʉ, tutuagʉ ijieraboaga yʉhʉ. Yʉhʉ Pacʉ pehe “Tiquiro tutuariquiro ijire”, nine yʉhʉre. “Ʉsã Pacʉ”, mʉsa nidiquiro pehe yʉhʉ Pacʉ tjire. 55 Mʉsa pehe yʉhʉ Pacʉre ne masiedare. Yʉhʉ pehe tiquirore masiaja. “Tiquirore masiedaja”, nigʉ mʉsa yero saha ni mehoñe peyagʉ ijiboaga yʉhʉ. Potota tiquirore masiaja. Sa yegʉ tiquiro dutiyere yeaja. 56 Ahri yehpapʉ yʉhʉ ahtatore mari ñecʉ Abrahã mʉnano masie tiahye. Sa masino tiquiro bucuee tiahye, nidi Jesu.

Tiquiro sa nigʉ̃ tiquina yʉhtiri:

57 —‍Cincuenta cʉhmari cʉoeraga mʉhʉ. Abrahã mʉnano panopʉ cjʉ̃no ijiri. ¿Yojopʉre tiquiro mʉnanore mʉhʉ dʉhse masiboagari? nidi judio masa Jesure.

58 —‍Ijirota niaja mʉsare. Abrahã tiquiro ijiato pano yʉhʉ pehe iji mʉhta tuhasae tii, nidi Jesu tiquinare.

59 Tiquiro sa nigʉ̃ tʉhoye tiquina pehe ʉtã pacare ne, tiquirore doque duamedi. Tiquina sa doque duepegʉ̃ta Jesu pehe Cohãcjʉ̃ wʉhʉpʉ ijiriquiro duhti wijiaa wahari.

<- San Juan 7San Juan 9 ->