1 Jesu Ñu yʉhdʉoro peyequina buheyequinare tiquiro cʉogʉ̃, Ñu yʉhdʉoro masare tiquiro wame yegʉ̃ fariseo masa tʉhoahye. 2 Tiquina sa tʉhoepegʉ̃ta Jesu pehe tiquiro basi masare wame yerari. Ʉsã tiquiro buhena pehe masare wame yei. 3 Fariseo masa tiquina sa masigʉ̃ tʉhoro Jesu pehe Judea yehpapʉ ijiriquiro Galilea yehpapʉ ʉsãre siho tojoaa wahari.

4 Topʉ wahana Samaria yehpare esa yʉhdʉ cãna tana nii ʉsã. 5 Sa yʉhdʉ cãna Samaria yehpapʉ ijiri macapʉ Sicar wame tiri macapʉ esaʉ. Ti maca cahapʉ panopʉ cjʉ̃no Jacob mʉnano tiquiro macʉno José mʉnanore tiquiro ohori yehpa ijiri. 6 Topʉ Jacob mʉnano tiquiro sihnidi cope ijiri. Sa yero Jesu pehe yoaropʉ ahtariquiro ijiro, tiquiro wahyia yʉhdʉaro ti cope dʉhtʉ cahapʉ nuju sari. Ti pje tiquiro nuju sari pje coheri pje waro ijiri. 7-8 Ʉsã tiquiro buhena pehe macapʉ ihyayere ʉsã dúna wahari bato ihcãquirota tiquiro topʉ tojoa nuju sari. Sa yero Samaria cjõno ti copepʉ aco waro wihigʉ̃ Jesu ticorore acore siniahye:

—‍Acore ohoya yʉhʉre, niahye.

9 —‍Mʉhʉ judio masʉ ijire. Yʉhʉ pehe Samaria cjõ ijiaja. ¿Dʉhsegʉ yʉhʉre acore siniajari mʉhʉ? niahye ticoro Jesure.

Judio masa Samaria cjẽnare ihña tuhtiyequina ijire. Sa yero ticoro sa niahye.

10 Ticoro sa nidi bato Jesu ticorore yahuahye:

—‍Mʉhʉre Cohãcjʉ̃ tiquiro yedoho duayere masigo, mʉhʉre acore sinigʉre masigo, mʉhʉ yʉhʉ pehere siniboaya. Mʉhʉ sa sinigʉ̃ apeye aco pehere ohoboaya yʉhʉ. Ti aco pehe catigʉ̃ yere, niahye Jesu ticorore.

11 Tiquiro sa nigʉ̃ tʉhoro ticoro yʉhtiahye tiquirore:

—‍Ne mʉhʉre sutu mariedare. Sa yero ahri cope ʉhcʉãrĩne. ¿Sa yegʉ ahri catigʉ̃ yeye acore nohopʉ wa neboagari mʉhʉ? 12 Mari ñecʉ mʉnano Jacob panopʉ cjʉ̃no ahri copere marine cũe tiahye. Tiquiro, tiquiro pohne, nuñequina gʉ̃hʉ ahri acore sihnie tiahye. ¿“Apeye acore ohoboaya yʉhʉ”, mʉhʉ nigʉ, Jacob yʉhdʉoro tutuagʉ ijiajari mʉhʉ, sa ni tʉhotugʉ? niahye ticoro.

13 Ticoro sa nigʉ̃ Jesu yʉhtiahye:

—‍Ijipihtiyequina ahri acore sihniñequina, pari turi aco wʉoeta. 14 Yee aco pehere sihniñequina ne pari turi aco wʉosi. Sa ye, yee acore sihniñequina Cohãcjʉ̃ mehna sa ijiducueta. Ma pohtepʉ aco to sa wijiaducuro sahata yee aco ne pihtisi, niahye Jesu.

15 Tiquiro sa nigʉ̃ tʉhoro numino pehe ohõ saha niahye:

—‍Ti acore ohoya yʉhʉre pari turi yʉhʉ aco wʉoeraro quehnoano. Sa yego pari turi ne ohõpʉre aco wasi yʉhʉ, niahye ticoro.

16 Ticoro sa nigʉ̃ Jesu ticorore yahuahye:

—‍Ti pje pũrita mʉhʉ manʉnore pijigo wahaya. Piji tuhasa ohõpʉ ahtaya tiquiro mehna, niahye Jesu ticorore.

17-18 —‍Manʉ mariego ijiaja yʉhʉ, niahye ticoro.

—‍Ijirota nimene mʉhʉ. Ihcã omope tahari manʉ ti tuhasamedi mʉhʉ. Sa yero yojopʉre mʉhʉ mehna ijiriquiro mʉhʉ manʉno ijierare. Sa ye “Manʉ mariego ijiaja”, nigo potota nimene mʉhʉ, niahye Jesu ticorore.

19 Tiquiro sa nigʉ̃ tʉhoro ohõ saha niahye ticoro:

—‍Ãa, Cohãcjʉ̃ yere yahu mʉhtagʉ ijire mʉhʉ, yʉhʉ tʉhotugʉ̃. 20 Ʉsã ñecʉsʉmʉa iji turiayequina mʉna ahdʉ cʉnʉpʉ Cohãcjʉ̃re ño peoe tiahye. Sa yena mʉsa pehe judio masa “Jerusalẽpʉ Cohãcjʉ̃re ño peoro cahmene masare”, nie tiri mʉsa judio masa, niahye ticoro.

Ticoro sa nigʉ̃ Jesu yʉhtiahye:

21 —‍Numio, yʉhʉ pehere tʉhorĩña. Camepʉ ahdʉ cʉnʉpʉ, Jerusalẽpʉ gʉ̃hʉre mari Pacʉre ño peosi mʉsa. 22 Mʉsa pehe mʉsa ño peoriquirore masiedare. Masare yʉhdʉoatiquiro judio masʉnota ijire. Sa yena ʉsã judio masa pehe ʉsã ño peoriquirore masiaja. 23 Yojopʉre, camepʉ gʉ̃hʉre Cohãcjʉ̃re potota ño peoyequina tiquina quehnoano tʉhotuye mehna tiquirore ño peoeta. Sa mari ño peogʉ̃ cahmene Cohãcjʉ̃. 24 Cohãcjʉ̃re, pagʉ marieniquiro tiquiro ijigʉ̃ masa tiquirore ihñedare. Sa ye tiquirore ño peoye, tiquina quehnoano tʉhotuye mehna tiquirore quehnoano potota ño peoro cahmene masare, niahye Jesu.

25 Tiquiro sa nigʉ̃ta ticoro yʉhtiahye:

—‍Mesia, “Cristo” tiquina nidiquiro pehe masare yʉhdʉoatiquiro tiquiro ahtatire masiaja yʉhʉ. Tiquiro ahtaro marine ijipihtiyere buhe peho cãnota, niahye ticoro.

26 —‍Yʉhʉta ijiaja Cristo, niahye Jesu ticorore.

27 Tiquiro sa nigʉ̃ waro wihii ʉsã. Sa yena ʉsã tiquiro buhena pehe Jesu numino mehna tiquiro yahuducugʉ̃ ihñana, ihña maria wahaʉ. Sa ihña mariepenata, “¿Dʉhse cahmeajari mʉhʉ? ¿Dʉhse niari mʉhʉ ticorore?” ni sinituerʉ tiquirore. 28 Sa yero numino ticoro ya suture duhu dapo cã, macapʉ wahaa wahari. Topʉ esaro masare yahuro, ohõ saha niahye:

29 —‍Yʉhʉ yerire yahu pehoriquirore ihñana ahtaya mʉsa. Tiquiro potota Cristo ijiboaga, ape taha yero, niahye ticoro.

30 Ticoro sa nigʉ̃ tʉhoye ti maca cjẽna pehe Jesure ihñañe ahtari. 31 Ti pjere ʉsã Jesu buhena pehe tiquirore tutuaro ihya dutimi:

—‍Buhegʉ, ihyaya, nimi ʉsã.

32 —‍Sijoro ijiye ihyayere cʉoaja yʉhʉ. Tire mʉsa masiedare, nidi tiquiro.

33 Tiquiro sa nigʉ̃ tʉhona ʉsã basi ohõ saha ni yahuducuu:

—‍¿Apequina tiquirore ihyaye oho tuhasayari? nii ʉsã basi.

Ʉsã sa nigʉ̃ Jesu yahuri:

34 —‍Masa pehe ihya coare. Yʉhʉre ohoriquiro tiquiro cahmeñe pehere ye coaja yʉhʉ pehe. 35 “Pititia asʉ̃ dʉhsare mari dʉca duha neato”, wese upʉro tiquiro nidiro saha mʉsa pehe ni tʉhotueracãhña. “Cohãcjʉ̃ yere ʉsã yahuato dʉhsarĩne”, ni tʉhotueracãhña. Ijirota niita niaja mʉsare. Yojopʉ pũritare masare ihñaña. Dʉcare neni pje to ijiro sahata, yojopʉ pũrita masa yʉhʉ buheyere tiquina tʉhoati pje ijiro nine. 36 Oteye dʉcare neñequinare tiquina wapa yeriro sahata yeere buheriquinare, yeequina ijiatiquinare pijiyequinare, tiquina sa yeri wapa tiquinare quehnoano yeitja yʉhʉ. Tiquina sa buhegʉ̃ tʉhoye yʉhʉ buheyere tʉhoyequina yeequina pehe Cohãcjʉ̃ mehna ijipihtiye decori ijiducueta. Sa ye tiquinare buhe mʉhtañequina, came yeequina wahagʉ̃ yeyequina gʉ̃hʉ ihcãno saha bucueducueta. 37 “Ihcãquiro ote mʉhtariquiro ijire. Apequiro pehe dʉcare neniquiro ijire”, nie tiahye panopʉ. Ti ijirota ijire. Tiquina sa nidiro sahata ihquẽquina yeere yahu mʉhtañequina ijire. Apequina pehe yeere buheye, yeequina wahagʉ̃ yere. 38 Wese upʉro yequina dahra cohteyequina oterariquina tiquina ijiepegʉ̃ tiquiro oteye dʉcare tiquinare ne dutiro ohore. Sa masare buhe mʉhtaedarina mʉsa ijiepegʉ̃ta yeequina wahatiquinare buhe dutigʉ ohoaja mʉsare. Apequina pehe tiquinare buhe mʉhta tuhasari. Tiquina buheriquinapʉre pari turi buhe nemona, yeequina wahagʉ̃ yenata mʉsa pehe. Sa ye buhe mʉhtañequina pehe tiquina yedohoro mehna apequinare yeequina wahagʉ̃ yenata mʉsa, nidi Jesu.

39 Ti pjere Samaria cjõno “Yʉhʉ yerire tiquiro yahu pehori”, ticoro sa nigʉ̃ tʉhoye Samaria cjẽna peyequina Jesure cahmeahye. 40 Sa ye Samaria cjẽna Jesu cahapʉ esaye, “Ʉsã mehna tojoarĩña”, nidi tiquirore. Tiquina sa nigʉ̃ ʉsã gʉ̃hʉ tiquiro mehna pʉa deco tojoarĩi. 41 Apequina gʉ̃hʉ peyequina Jesure tʉhoye, cahmedi tiquirore. 42 Ohõ saha nidi masa numinore:

—‍Coã waropʉre mʉhʉ yahurire tʉhona, Jesure cahmei. Yojopʉ pũritare tiquiro yahuducuyere tʉhona tiquirore cahmeaja. Sa yena tiquiro pehere tʉhona ahri yehpa cjẽnare pecapʉ wahaboriquinare yʉhdʉoriquiro potota tiquiro ijigʉ̃ yojopʉ ʉsã masiaja, nidi masa Samaria cjõnore.

43 Pʉa deco bato Jesu ʉsãre Galilea yehpapʉ siho wahari. 44 Coã waropʉre ohõ saha nie tiri tiquiro: “Cohãcjʉ̃ yere yahu mʉhtariquirore tiquiro ya yehpa cjẽna tiquirore ño peoerare. Sa ye yʉhʉre ño peoerare ohõ cjẽna ohõpʉ yʉhʉ bʉcʉarigʉ ijigʉ̃”, nie tiri Jesu. 45 Sa ye Galileapʉ tiquiro esagʉ̃ to cjẽna tiquirore quehnoano piti cari. To pano Jerusalẽpʉ bose deco Jesu tiquiro yerire ihñariquina ijiri tiquina.

46 Sa ye Canápʉ Galileapʉ ijiri macapʉ acore tiquiro ʉhse co bajumehnedi macapʉ wahaʉ ʉsã tiquiro mehna. Caná cahapʉ ijiri macapʉ Capernau wame tiri macapʉ pʉhtoro macʉno dohatiro niahye. 47 Sa yero Jesu Judeapʉ ijiriquiro tiquiro Galileapʉ esagʉ̃ pʉhtoro tʉhoahye. Tire tʉhoro Jesu cahapʉ wihiri:

—‍Yʉhʉ macʉ yariaro nidi. Sa ye tiquirore yʉhdʉogʉ ahtaya, ni tutuaro mehna pijiri tiquirore.

48 Tiquiro sa nigʉ̃ tʉhoro Jesu yʉhtiri:

—‍Cohãcjʉ̃ tutuaye mehna yʉhʉ yegʉ̃ ihñedana, ne yʉhʉre wacũ tutuerare mʉsa, nidi Jesu tiquirore.

49 Tiquiro sa nigʉ̃ pʉhtoro pehe ohõ saha nidi:

—‍Pʉhto, yʉhʉ macʉ tiquiro yariato pano ahtaya, nidi tiquiro Jesure.

50 —‍Tojoahya. Mʉhʉ macʉ catiaga, nidi Jesu.

Tiquiro sa nigʉ̃ tʉhoro, “Tiquiro nidiro sahata catirota yʉhʉ macʉ”, nino, pʉhtoro tojoaa wahari.

51 Sa tojoaducuriquirore tiquiro cahacjẽna tiquirore piti ca, yahuahye:

—‍Mʉhʉ macʉ catiri, ni yahuahye tiquina tiquirore.

52 —‍¿Noho asʉ̃ ijigʉ̃ yʉhdʉari yʉhʉ macʉ? ni sinituahye tiquiro cahacjẽnare.

—‍Canʉre coheri pje batogã ujuaye sururi tiquirore, niahye tiquina.

53 Tiquina sa nigʉ̃ tʉhoro ohõ saha ni tʉhotuahye tiquiro: “Jesu yʉhʉre tiquiro sa ni yahuri pjeta ujuaye suruaya”, ni tʉhotuahye pʉhtoro pehe. “Poto ninota niaya yʉhʉre”, nino, tiquiro ijipihtiyequina tiquiro acaye mehna Jesure wacũ tutuahye.

54 Jesu Judea yehpapʉ ijiriquiro Galilea yehpapʉ tiquiro esari bato pʉhtoro macʉnore tiquiro yʉhdʉorire mari queogʉ̃ pʉa taha Cohãcjʉ̃ tutuaye mehna ye ihño tuhasari Jesu.

<- San Juan 3San Juan 5 ->