1 Yʉhʉ cahĩna, apequina “Cohãcjʉ̃ yaquiro Espíriture cʉoaja”, niñequina tiquina ijiepegʉ̃ta tiquina ye buheye ni mehoñe ijire. Sa ye apequina pehe Espíritu Santo warore cʉoyequina ni mehono marieno buhere tiquina. Peyequina “Cohãcjʉ̃ yere yahu mʉhtarina ijiaja”, niepeta ni mehoñequina ijire yojopʉre. Ijipihtiropʉre ijire tiquina. Sa yena apequina mʉsare tiquina buheye ni mehoñe buheye ijigʉ̃ ihña masiña mʉsa. Cohãcjʉ̃ ye ti ijigʉ̃ gʉ̃hʉre ihña masiña mʉsa. 2 Cohãcjʉ̃ yaquiro Espíriture cʉoyequinare mʉsa ihña masi duana, ohõ saha masinata: “Jesucristo ahri yehpapʉ masʉno pagʉ waro cʉoriquiro ahtari jiri”, ni, buheyequina Cohãcjʉ̃ yaquiro Espíriture cʉoyequina ijire tiquina. Sa yena sa ni buheyequinare ihña masinata mʉsa. 3 Apequina pehe “Jesu ahri yehpapʉ masʉno pagʉ waro cʉoriquiro ahtaerari jiri”, ni buheyequina Cohãcjʉ̃ yaquiro Espíriture cʉoeyequina ijire. Tiquina ye tʉhotuye Cristore ihña tuhtiriquiro tiquiro tʉhoturo saha ijire. “Cristore ihña tuhtiriquiro ahtarota”, tiquina nidire tʉho tuhasari mʉsa. Sa ye tiquiro ye buheye ahri yehpapʉre wihi tuhasari.

4 Mʉsa pehe yʉhʉ pohna, Cohãcjʉ̃ yequina ijire mʉsa. Sa yena “Cohãcjʉ̃ yere yahu mʉhtarina ijiaja ʉsã”, ni, mehoñequinare yʉhdʉdʉca tuhasari mʉsa. Mʉsa mehna ijiriquiro Espíritu Santo pehe tutua yʉhdʉdʉcare. Sa yero ahri yehpa cjẽna yaquiro watĩno yʉhdʉoro tutuare. Sa yena ni mehoñequinare yʉhdʉdʉcari mʉsa. Sa yena ti buheyere cahmedari mʉsa. 5 Ni mehoñequina pehe ahri yehpa cjẽna ijire. Sa ye tiquina ahri yehpa cjẽ ñañene tiquina buhegʉ̃ ahri yehpa cjẽna ñañequina pehe tiquinare quehnoano tʉhore. 6 Mari pehe Cohãcjʉ̃ yequina ijiaja. Sa ye Cohãcjʉ̃re masiñequina marine quehnoano tʉhore. Apequina pehe Cohãcjʉ̃ yequina ijieraye, marine ne tʉho duerare. Tiquina sa tʉho dueragʉ̃ ihñana tiquina ye buheye Cohãcjʉ̃ ye buheye ti ijieragʉ̃ masinata mari. Sa yena apequina pehe marine tiquina tʉhogʉ̃ tiquina ye buheye quehnoañe buheye ti ijigʉ̃ gʉ̃hʉre masiaja mari.

7 Yʉhʉ cahĩna, Cohãcjʉ̃ marine apequinare cahĩgʉ̃ yeriquiro ijire. Tiquiro sa yeriquiro ijigʉ̃ ihñana mari mehna cjẽnare cahĩihna mari. Masare quehnoano cahĩñequina pehe Cohãcjʉ̃ pohne ijire. Sa ye tiquina Cohãcjʉ̃re quehnoano masine. 8 Cohãcjʉ̃ masa ijipihtiyequinare tutuaro cahĩducuriquiro ijire. Tiquiro sa cahĩducuriquiro ijigʉ̃ masare cahĩeñequina pehe Cohãcjʉ̃re masiedare. 9 Cohãcjʉ̃ marine tiquiro cahĩñene mari masi duana, ohõ saha masinata: Cohãcjʉ̃ pehe tiquiro macʉnore ihcãquirota ijiriquirore marine yʉhdʉoatiquirore ahri yehpapʉre ohoahye. Sa ohoro marine tiquiro cahĩñene marine masigʉ̃ yero niahye. 10 Apequinare cahĩñe waro ohõ saha ijire: Cohãcjʉ̃re mari cahĩñe pehe poto cahĩñe waro ijierare. Marine Cohãcjʉ̃ tiquiro cahĩñe pũrita potota cahĩñe waro ijire. Sa yero tiquiro macʉnore mari ñañene cohãtiquirore ohoro marine tutuaro cahĩne tiquiro.

11 Yʉhʉ acaye, Cohãcjʉ̃ marine tiquiro sa tutuaro cahĩgʉ̃ ihñana mari gʉ̃hʉ mari mehna cjẽnare cahĩihna. 12 Masa pehe ne Cohãcjʉ̃re ihñedari. Tiquirore mari ihñedapegʉ̃ta mari mehna cjẽnare mari cahĩgʉ̃, Cohãcjʉ̃ pehe mari mehna sa ijiducuro nine. Sa yero potota marine cahĩ nemoducugʉ̃ yere tiquiro. 13 Cohãcjʉ̃ pehe marine tiquiro yaquiro Espíriture ohori. Sa yena Espíriture cʉona, Cohãcjʉ̃ mehna mari quehnoano ijiyere masiaja mari. 14 Sa yena mari Pacʉ tiquiro macʉnore ahri yehpa cjẽnare yʉhdʉoatiquirore tiquiro ohorire ʉsã ihñaʉ. Tire ihñana apequinapʉre tire yahuaja ʉsã. 15 Cohãcjʉ̃ mehna cjʉ̃no ohõ saha nidiquiro ijire: “Jesu Cohãcjʉ̃ macʉno ijire”, nidiquiro tiquiro pũrita Cohãcjʉ̃ mehna cjʉ̃no ijiro nine. Sa yero Cohãcjʉ̃ gʉ̃hʉ tiquiro mehna cjʉ̃no ijiro nine.

16 Sa yena marine Cohãcjʉ̃ tiquiro cahĩñene mari masiaja. Sa yena marine potota cahĩniquiro tiquiro ijigʉ̃ masiaja mari. Cohãcjʉ̃ masa ijipihtiyequinare tutuaro cahĩducuriquiro ijire. Sa yero apequiro masare cahĩducuriquiro Cohãcjʉ̃ mehna cjʉ̃no ijire. Sa yero Cohãcjʉ̃ gʉ̃hʉ tiquiro mehna cjʉ̃no ijire. 17 Sa yena mari quehnoano cahĩ nemoducuaja Cohãcjʉ̃re, apequina gʉ̃hʉre, buhiri dahreri deco ijigʉ̃ mari cuero marieno mari ijiatire. Sa yena cuesi mari ahri yehpapʉ Cristo yero saha ijina. 18 Apequinare mari cahĩgʉ̃ cuero mariedare. Cohãcjʉ̃ marine tiquiro cahĩñene masina mari ne cueraja. Masa cueye tiquinare buhiri dahreatire cue nine. Sa cueye ñano yʉhdʉre. Sa yero cueriquiro pehe Cohãcjʉ̃ cahĩñene masieniquiro ijire. 19 Marine Cohãcjʉ̃ cahĩ mʉhtahye. Sa yena mari gʉ̃hʉ tiquirore cahĩaja. 20 Ihcãquiro “Cohãcjʉ̃re cahĩaja”, nidiquiro ijieperota apequirore ihña tuhtiro, ni mehoriquiro ijire tiquiro. Tiquiro ihñariquirore cahĩedaro, Cohãcjʉ̃re tiquiro ihñeniquiro gʉ̃hʉre cahĩ masiedare tiquiro. 21 Sa yero ahri ijire marine Cristo tiquiro dutiriro: Cohãcjʉ̃re cahĩna, mʉsa cahapʉ ijiyequina gʉ̃hʉre cahĩña.

<- 1 San Juan 31 San Juan 5 ->