2 Gi rixanu galikakpotunanni ga wa poyagkaklewluni
putakyagoklewle.
Gi rixanu Wale giklukanuwnayegjixlo tsro kapoklewaklero,
chiji gajene gimtukachro tapoklewleya.
Wayegrenegraga rapnuyegitna walamyoya.
3 Rumepe wane chinretna,
¡Gimalwutanru Goyakalu!
Tyoxikikolupgya gatskogognenatanu gike rixiniko
mnikawnakatupa.
4 Ga wa gepmole gepkoxamkoje tsrune ga wa gepkoxamkojene gepkoxamkojejixirune chiji gapoka. Yoptsojityegitluna Goyakalu, pogirchi tuplapijere tuplatachri. Wane chinna:
Wane gixkalurupa. ¡Gimalwutanru Goyakalu!
5 Ga wa pogirchi tuplapijere rushpakya satu tokanchi wane chinachri:
Nshikaletgimalwuretanru Woyakalute,
pejnurunekgi wayegrengi, ga wa pikjengi,
mturune ga wa tsrune.
6 Ga wa pagima nyijnakota, gixolune yineplajgima pixka, ga wa gixo gonkakgima pixka, ga wa rutloglegima pixka, wane chinachri:
¡Gimalwutanru Goyakalu!
Gi rixanu pogirewata Wutsrukate
Woyakalute pejnuruko Girukotachri.
7 Wumuwatanu ga wa wumjikpotutanu.
Ga wa wumalwutanru.
Gi rixanu rapokatka gowega Wgene kashimyole.
Ga wa ganunropa galpokotachrotka.
8 Ga wa teneeka tyoshmakyaplu
wale potu klatalu mkachri katajimtalu ga wa powralu.
Ga wa wane chinno, “Tyenwa Goyakalu tokanu galikakpotu.”
10 Ga wa gijixipta napoka nyoptsojityegityaplu. Ga wa wale wane chinno, “Pgirukotinwa. Gi waneko pixanu. Pixje wayegrechrino gita, satu wannatno gita, wa pumolene gipgujtalewlu Gesopirana waneyalune. Goyakalu pyoptsojityegitanu. Gi rixanu wa gipgujtalewlu Gesopirana walenwa Goyakalu tokanu genekikolu pixka.”
Goyakalu Tokanu gakagloklewatachri
11 Ga wa netlu tengogne kotpuukaluru. Ga wa wane netyalu kawalyo klatalu. Ga wa wale gogo tuplatachri Walenwa Poyagkakachri chinkaluru, ga wa Galikakpotu. Poyagkaklewleya rutakyagoklewata ga wa yagotlewata. 12 Ga wa giygale xirnachrimero pixka rixa. Ga wa gijiwu rawa gixo pogirchi sagyeta. Waneylu giwaka yonatkaluru, gi satuna gimatanru, seyni Walepje gimatlu. 13 Ga wa mkachri granchi yoshmookaluru gitakachrini. Ga wa giwaka wane chinka Goyakalu Tokanu. 14 Ga wa solalone tengogne gajene gomkagitlu, klatalone kawalyone yapachine, wale potu mkachri gitakachine klatalu ga wa powralu. 15 Ga wa ginama rushpakya yoglolewapi gepragaspuru, payinkaka ruylakinripa. Ga wa kanojerchi yowumaje rugirukotanna. Ga wa Wale gakatoklu tapatgatyawaka, Goyakalu pejnuruko Girukotachri jigekanu gimtuwnale wingate yegi. 16 Ga wa gimkalu ga wa gitpali yonatika giwaka: Pogirchine Pogire, ga wa gitsrukaachine Gitsrukate.
Kmatsuru ga wa gixashatachri Goyakalu tokanu geneklewatachri gipnale
17 Ga wa satu Goyakalutowreru neta tkachi tunwatachri. Tsruplaji rixa saplewleyegitna. Wane chinna pejnuruneko koshichine ga wa kamejirune tengogne ganikajite galnachine:
Ginanu. Gapatanu tsru nachnewlu yegi Goyakalunu.
18 Gnikyaplu pogirchinegitu, ga wa solalone gitsrukatenegitu, ga wa gichkolungitu, ga wa kawalyonegitu, ga wa wanna gogo tuplanatachinegitu, ga wa pejnuruneko gishpakachinegitu, ga wa wayegrechine ga wa mturune ga wa tsrunegitu.
19 Ga wa netlu kmatsuru, ga wa tyechijne pogirene, ga wa wanna solalotene gapatachinni yagotyapluna kawalyo gogo tuplatachri ga wa Wale solaloteneyma. 20 Ga wa kmatsuru kashichkaluru ga wa waleymalu gixashatachri Goyakalu tokanu geneklewatachri, wa getkalurkaka kamrutachri wale getanu. Wa tyekakayma yokwitanna kmatsuru gimaxikle yoptotachine, ga wa yaglu yoptsojityegitachine. Wa nyi gepi giwekachinni xirnachripowga giknookana, wa gasogre xirnyachripowga. 21 Ga wa gixetachinni giylatkana kawalyo gogo tuplatachri yoglolewapreya ginama gishpakyachriya. Ga wa pejnuruneko koshichine jinanna wannanigituya.
