1 Giyagni, nomolene, kpashiringi, patomgakolungi tengogneya, gyanshinikanyegitanru wa yokanatkaluru ga wa sasertotene Gitsrukate potu wupgujtapiranyegitanruya. Walenwa Geso. 2 Walenwa poyagkakachri wa rutakjeryegiya, Moysisi pixka psolupjiko walepjiya. 3 Gi rixanu rumuknu kagwaakalurni Geso Moysisi pnute rumalwutikolupa, wa panchi kamrutachri pixka kagwakpiratkalurupa panchi pnute. 4 Gi rixanu pejnurukopji kamrutkalurni pimrineya. Seyni wa pejnurkakako kamrutachri Walenwa Goyakalu. 5 Ga wa Moysisi galikakni poyagkakachri rixa psoluyako gipji, wane kamrurewatyachri pixka, rupgujtatyaplu ginkakletpiranatkalurkakapa. 6 Seyni Kristo wgenchi rixa gipjiyako. Walepjiwu wixa wa gaponshinikanrewlu ga wa galixkowlu kagwaklewluya wpoyegita gimretletini yoptukyawakpotunanuko.
Malixgajitkatu ma mixinitipa satu wa gixa
7 Giyagni wa Giwekikaluru Kpashiri chinyawaka:
“Xawakni gyijnaktokanutinri,
8Gi nshikpokwakgajitanu
wa wanna jigekanuwkaklewatinrini pixka
yantaletlegogne yine mwiyawakaya.
9Wa gitsrukatenni yantaletyawakno
rumata getanshinikanutyapnona.
Reta kamruretnona.
10Gepkoxamkojemole walapu
njigekanuwyegitna nyi
gimuweekakgognenatachinni.
Wane nchina,
‘Pupjegajgognenatna. Gi rumatluna nogapkaka.’
11Gita kawchinanu nchinyawaka njigekanuya,
‘Gi jiglokanruna napnanutyawaka.’ ”
12 Getinwa, nomolene, muglegajitu ga wa malixgajitkatu, wa Goyakalu giwekachri gitspalatyachri ma mixinitipa satu wa gixa. 13 Seyni giykokakanu pagognemnunanuka xawakni chinikowakawa. Gi satuna gixa shikpokwakanshinikanutinripa mukochri yokwireya. 14 Gi rixanu wixa koxa Kristo waneyalunwu wa galikakni poyegi gimretle wixiniplu wegaponshinikanrewle yoptukyawakpotunanuko. 15 Wane chinkopshini:
“Xawakni gyijnaktokanutinri,
gi nshikpokwakgajitanu
wa jigekanuwkakikowaka pixka
yantaletlegogne pochkewakaya.”
16 Gi rixanu ¿ginna wa jemachinemka jigekanuwkaklu? ¿Gi ge pejnuruneko wa Gigipto gishpakamtyachine Moysisiyma? 17 ¿Ginna wa Wale jigekanuwnayegitanune gepkoxamkojemole walapu? ¿Gi ge wannakni wa mukochirewatachinni, wa gimannina yineru mwiyawakaya giknookalurni? 18 Ga wa ¿ginnanwa Wale kawchinanu wane china gi wa rapnanutyawaka jiglokanunna? ¿Gi ge malixaklenni? 19 Wetlu gi rumkata jiglokletanunna ma malixlenna chinanu.
