Romanos 10

1 Nhiirũ, anhi'ĩ hete ji Tupana'ga pe jire'yja'g̃a ndepyga judeus'g̃a ndepyga tojiko ti g̃a Cristo'ga rehe javo. A'ereki ji apota hete g̃ajikoga ga rehe. 2 A'e ji g̃a mombe'gwovo: Oko hete g̃a Tupana'ga rehe xako ti garemimbotarimova'ea rupi javo novĩa. Emo g̃a ndokokwahavi reki garemimbotarimova'ea rupi. 3 G̃a ndokoi Tupana'ga remimombyryva rupi. Igwete g̃a etehei: “Xanhimombyry nhande,” ei g̃a. “Xako nhande Moisésva'ea remimbo'eagwera rupi. A'ero po ti Tupana'ga ei nhande ve: ‘Pepyry hete pe,’ e po ti ga nhande ve nehẽ,” e'i tehe g̃a. A'ea g̃a e'i tehe okoe'yma Tupana'ga remimombyryva rupi. 4 Cristo'ga jate g̃wendu katu pa Moisésva'ea remimbo'eagwera. Nhande nihendukatupavi a'ea nhanenhimombyryve'yma. Nurã nhande jikogi Cristo'ga rehe Tupana'ga te'i pepyry pe javo nhande ve.

Ojiko pa po g̃a Cristo'ga rehe hamo

5 Ymya Moisésva'ea ikwatijari g̃a mombe'gwovo hako – kiroki g̃a e'i: “Po nhande hendukatui Tupana'ga remimbo'ea, a'ero po ti nhande pyryvamo nehẽ.” Kiroki g̃a e'i a'ea – g̃a pe Moisésva'ea ei:

“A'ea rendukatupava po ti g̃a mombyryvi a'ero nehẽ,” ei Moisésva'ea.

6 Jara'g̃a pe ki a'e te ahe e'i ikwatija g̃a mombe'gwovo no – kiroki g̃a e'i: “Nhande jikogame Tupana'ga rehe po ti ga nhande mombyryvi nehẽ.” G̃a pe Moisésva'ea ei:

“Te'iyme ti g̃a oyvyteri pe:

‘Tojiupi ti g̃a yvagi pe’.”

Cristo'ga mbojyva pe jugwi Moisésva'ea ei te'iyme ti g̃a a'ea javo. A'ereki Cristo'ga uripe raikwehe tamombyry g̃a javo. 7 Igwete Moisésva'ea ei no:

“Te'iyme ti g̃a no:

‘Toho po ti g̃a omanove'g̃a gwyri pe’.”

Cristo'ga mbogwerava pe jugwi Moisésva'ea ei te'iyme ti g̃a a'ea javo. A'ereki Cristo'ga okweravipe reki omanoa hugwi raikwehe. 8 Moisésva'ea e'i a'ero:

“Pekwaha pe Tupana'ga nhi'ig̃a,” ei ahe.

“A'ereki nonhimimi pe me a.

Penhi'ĩ pe a'ea rehe.

Pejapyaka pe a'ea rehe Tupana'ga nhi'ig̃a rehe,” ei ahe ikwatija hako.

A'ea ore imombe'ui pe me no tapejiko ti ga rehe javo. 9 Penhimombe'u ti jara'g̃a pe Jesus'ga ko jipojykaharete'ga javo, oro'e ore pe me. Perovia hete ti pejipy'a pe Jesus'ga kwerava Tupana'ga ombogwera ga gamanoa hugwi javo. Heroviaheterame a'ea po ti Tupana'ga pe mondoukari ojipyri yvagi pe aerẽ nehẽ. 10 A'ereki heroviaheterame nhandepy'a pe nhande xajiko Jesus'ga rehe. Nhande jikogame ga rehe ga ko jipojykaharete'ga javo, a'ero Tupana'ga ei nhande ve pepyry hete pe javo. A'ero po ti ga nhande mondoukari ojipyri nehẽ. 11 Tupana'ga rembikwatijarukara e'i no:

“Kiroki g̃a ojiko ga rehe

– g̃a po ti ndipoyjayjare'ymuhũi nehẽ,” e'i.

12 Yvyakotyve'g̃a pe nhaporemo i'ei. A'ereki g̃a ojo'ja hete Tupana'ga pe judeus'g̃a judeus'g̃arũive'g̃a pavẽi. A'ereki Jesus Cristo'ga ko judeus'g̃a pojykaharete'ga. Ga jitehe ko judeus'g̃arũive'g̃a pojykaharete'ga no. Ga omombyry hete g̃a pe nhaporemo g̃a jikogame ga rehe ore poko javo. 13 A'ereki ikwatijara e'i no:

“Kiroki g̃a ojiko nhandepojykaharete'ga rehe ore poko javo

– g̃a mondouka po ti ga yvagi pe ojipyri nehẽ,” e'i.

14 Emo ojikoge'ymame ga rehe po g̃a nde'i ore poko javo ga pe. Ganhi'ig̃a renduve'ymame po g̃a ndojikogi ga rehe. Ga mombe'ue'ymame g̃a pe po g̃a nohenduvi ganhi'ig̃a. 15 Tupana'ga g̃a mondoe'ymame ga mombe'uuka g̃a pe po g̃a nomombe'ui ga g̃a pe a'ero. Emo Tupana'ga g̃a mondouka tuhẽ reki ga mombe'gwovouka g̃a pe. Igwete ikwatijara e'i no:

“Pyry hete tuhẽ g̃a ndurame imombe'gwovo pyryva'ea nhande ve,” e'i hako.

16 Emo imombe'urame g̃a pe g̃a nhaporemo rũi g̃wendu katu Tupana'ga remimombe'upyryva. Nanongara pe Isaíasva'ea ei Tupana'ga pe hako:

“G̃a nohendukatui reki ore imombe'urame g̃a pe,” ei ahe opojykaharete'ga pe hako.

17 Nahã a'ero. Hendukaturame jate Cristo'ga mombe'ua nhande jikogi ga rehe.

18 “Oro israelitas'g̃a, nohenduvi g̃a pyryva'ea mombe'ua naerũ?” e'i po g̃a ji ve. G̃wendu tuhẽ reki g̃a. A'ereki ikwatijara e'i:

“Yvyakotyve'g̃a nhaporemo g̃wendu g̃anhi'ig̃a.

A'ereki g̃agwyri pe nhaporemo g̃a oho imombe'gwovo pyryva'ea,” e'i ikwatijara hako.

19 “Israelitas'g̃a ndokwahavi naerũ?” e po g̃a. Okwaha tuhẽ g̃a. Moisésva'ea ypy omombe'u a'ea Tupana'ga nhi'ig̃a mombe'urame ikwatija hako. Tupana'ga e'i israelitas'g̃a pe:

“Pe'ji tehe pe israelitas'g̃arũive'g̃a pe:

‘G̃a ko Tupana'gareheve'g̃a rũi.

G̃a ndokwahavihu,’ pe'ji tehe pe israelitas'g̃arũive'g̃a pe,” ei Tupana'ga.

“G̃a pe jitehe po ti ji imombyryvi nehẽ.

Nahã po ti ji pe monhimyrõi israelitas'g̃arũive'g̃a ndehe nehẽ.

Igwete po ti ji pe monhimboahivi nehẽ no,” ei Tupana'ga israelitas'g̃a pe.

Moisésva'ea okwatija Tupana'ga nhi'ig̃a inog̃a hako.

20 Isaíasva'ea koji'i ndopojihuvi imombe'gwovo Tupana'ga nhi'ig̃a. Tupana'ga e'i israelitas'g̃arũive'g̃a mombe'gwovo:

“Ymya g̃a ndajikwahapotari.

Ag̃wamo ki a'e te g̃a ji kwahavi,” ei ga.

“Ymya g̃a nde'i: ‘Pemombe'u ti Tupana'ga ore ve.’

Ag̃wamo ki a'e te ji anhimboukwaha g̃a pe,” ei Tupana'ga israelitas'g̃arũive'g̃a mombe'gwovo.

Isaíasva'ea omombe'u a'ea Tupana'ga nhi'ig̃a ikwatija hako.

21 Emo ahe omombe'u israelitas'g̃a no imombe'urame Tupana'ga nhi'ig̃a. Tupana'ga e'i hako:

“A'ea'e ji g̃a pe jipi novĩa:

‘Pejiko ti ji rehe’,” ei ga.

“Emo g̃a nanhirendupotari.

G̃a noangarihu ojikoge'yma ji rehe,” ei Tupana'ga israelitas'g̃a mombe'gwovo.

Isaíasva'ea okwatija a'ea Tupana'ga nhi'ig̃a hako.

<- Romanos 9 Romanos 11 ->