Link to home pageLanguagesLink to all Bible versions on this site

AHE OMOMBE'U HEBREUSVA'EA PE
Carta aos Hebreus
Ojipea hebreusva'ea rera israelitas. Israelitasva'ea ko Israelva'ea rakykwepoharava'ea.

1
Tupana'ga ra'yra'ga
1 Ymyahũ Tupana'ga ei onhi'ig̃a mombe'uharava'ea pe yvyakotyva'ea pe hako: “Pemombe'u ti jireaporog̃ita pende'yja'g̃a pe,” ei Tupana'ga.
A'ero ganhi'ig̃a mombe'uharava'ea imombe'ui ganhi'ig̃a gwe'yjava'ea pe nhaneramonhava'ea pe hebreusva'ea pe israelitasva'ea pe hako. Manamenameuhũa rupi Tupana'ga ikwahavukara'ja'javi ojeaporog̃ita onhi'ig̃a mombe'uharava'ea pe he'yjuhuva'ea pe. Hajihejiheva'ea rupi ga ikwahavukari ahe ve. “Hebreus'g̃a ti ji kwahavi jireaporog̃ita kwahavame nehẽ,” ei ga ahe ve.
A'ero ganhi'ig̃a mombe'uharava'ea ga kwahavukari nhaneramonhava'ea pe gareaporog̃ita mombe'urame ahe ve. Nahã ko ymyahũ hako.

2 Ag̃wamo reki mbapavava'ea rupi gwa'yra'ga pe Tupana'ga ei: “Emombe'u ti jireaporog̃ita yvyakotyve'g̃a pe,” ei ga. A'ero gara'yra'ga imombe'ui gareaporog̃ita nhande ve.

Gwa'yra'ga pe Tupana'ga japopavukari yvya yvaga reheve ymyahũ hako. Ga pe ga ei hako: “Amondo pa ji nde ve. Aerẽ po ti nde herekopavi a'ero nehẽ,” ei ga gwa'yra'ga pe.

3 Gara'yra'ga hendy'jandy'ja hepiuka uva'ga rendy'java gakatua. Gaha ko Tupana'ga javijitehe. Inhi'ĩpopoaka ga. Ganhi'ig̃a g̃waramo yvya ndopavi yvaga pavẽi okovo. Ga tuhẽ imombori nhanderekote'varuhua nhande hugwi. Imomborirẽ ga apygi yvagi pe nhanderuvihavuhuhete'ga pyri Tupana'ga pyri gajohukoty rũi. Pevo g̃a memei g̃a ndekoi nhanderuvihavuhuhetero.

Tupana'ga ra'yra'ga huvihava Tupana'gapyrive'g̃a hohe
4 Nahã koji'i Tupana'ga ra'yra'ga huvihava Tupana'gapyrive'g̃a hohe yvagipeve'g̃a hohe. Jukwaha ga huvihava Tupana'ga ero g̃waramo ga pe:
“Ndehe ko jira'yra.”
A'ea erame Tupana'ga ei gwa'yra'ga mombe'gwovo ga huvihava jipyrive'g̃a hohe javo. 5 A'ereki ojipyrive'g̃a pe Tupana'ga nde'iangavi:
“Jira'yramo nde rekoi.
Jihi a'e yvyakotyve'g̃a pe nhaporemo nde mombe'gwovo kiro:
Gaha ko jira'yra'ga.”
Ojipyrive'g̃a pe rũi Tupana'ga ei a'ea. Gwa'yra'ga pe jate ga ei a'ea.
Onhi'ig̃a'java ga nomombe'ui ojipyrive'g̃a javo:
“Jihi po ti garuvamo ako nehẽ.
Gaha po ti jira'yramo oko nehẽ.”
Ojipyrive'g̃a rũi Tupana'ga omombe'u o'erame a'ea. Gwa'yra'ga jate ga omombe'u o'erame a'ea.

6 Onhi'ig̃a'java gwa'yrypy'ga mondorame yvya koty yvyakotyve'g̃a mbyteri pe Tupana'ga ei:

“Jipyrive'g̃a tombohete ti jira'yrypy'ga,” ei ga.

7 Ojipyrive'g̃a mombe'gwovo Tupana'ga ei reki:

“Ji erame jijipyrive'g̃a pe kotihĩ g̃a hoi yvytua ja nhinhi'ig̃a mombe'gwovo.
Tata ja kotihĩ g̃a hoi imombe'gwovo ji erame,” ei Tupana'ga.

8 Gwa'yra'ga pe Tupana'ga ei reki:

“Jiruvihavuhuhetea,” ei ga gwa'yra'ga pe.
“Nane'ymi po ti nde ejiheve'g̃a nduvihavuhuhetea avuirama nehẽ.
Nane'ymi po ti a'itituhẽva'ea rehe nde nhi'ig̃i g̃a pe
g̃a mongouka katu enhi'ig̃a rupi ekovo g̃anduvihavuhuhetero nehẽ.
9 Pyry hete nde ve g̃a ndekokaturame.
Ite'varuhu nde ve g̃a ndekote'varuhurame.
Nurã jihi nderuvihavuhuhetero a'e nde ve:
Eko ti g̃anduvihavuhuhetero nepavẽive'g̃a hohe ejoryvamo,” ei Tupana'ga gwa'yra'ga pe.
10 “Jipojykaharetea,” ei Tupana'ga gwa'yra'ga pe.
“Jypya ndehe tuhẽ ereapo yvya yvaga reheve.
11 Opa po ti yvaga yvya pavẽi nehẽ.
Ndehe po ti erepyta avuirama nehẽ.
Tapy'ynhapira nhymyanamo.
Na jitehe po ti yvya nhymyanamo yvaga pavẽi nehẽ.
12 Gwekyi ahe tapy'ynhapirymyana i'arimova'ea imamana inog̃a
opohia jugwi imbojopy'ruavo.
Na jitehe po ti nde pohiri yvya hugwi yvaga hugwi
imbojopy'ruavo nhymyaname nehẽ.
Ndehe po ti naneymyani ekovo avuirama nehẽ.
Nderepavi po ti nde nehẽ no,” ei Tupana'ga gwa'yra'ga pe.

13 Tupana'ga nde'iangavi ojipyrive'g̃a pe:

“Eapy ti ji pyri jijohukoty rũi
ekovo g̃waramo g̃anduvihavuhuhetero.
A'ero po ti ji nearõe'ỹve'g̃a mongoukari nenhi'ig̃a rupi nehẽ.”
Ojipyrive'g̃a pe rũi ga ei a'ea. Gwa'yra'ga pe jate ga ei a'ea.

14 Tupana'gapyrive'g̃a ko ha'oe'ỹve'g̃a yvagipeve'g̃a oporavykyavo Tupana'ga pe. G̃a nhaporemo opokopoko yvyakotyve'g̃a jipi. A'ereki Tupana'ga e'i g̃a pe: “Peho ti g̃a pyri yvya koty g̃a pokoga – kiroki g̃a hugwi ji amombo g̃andekote'varuhua tuhu ti g̃a upa ji pyri avuirama nehẽ javo,” ei Tupana'ga.

Hebreus 2 ->