Link to home pageLanguagesLink to all Bible versions on this site
9
Isra7eeluntsi doorintto
1 Taanii Kiristtoosar turo ohine, worddidhdhoos. Geeshi Ayyaana kaalitsize ta wozintta taanii worddidhoossanno taas markkidhane. 2 Ta wozintte Isra7eeluntsis gaama azzanon ashshoosse waaye ta gidda yene. 3 Taanii, ta ishuntsin ta iginuntsi gisho Kiristtoosappa shaakkintti Xoozze baadditsappa oomora yezezako kadhane. 4 Unttin Isra7eeluntsana, Xoozii unttana fa na7untsana mahida, fa bonchchito unttis qonccizida. Unttara caaqqida; higge unttis inggida. Un Xooz goynode turii oge beezida; Xoozii ufays qaala unttis inggida. 5 Un yelinttera mayzunts kochchi; mahi Kiristtoosa ashora un kochchi maaqqii yi7ida. Ubbappa kattara maaqqide Xoozze medhinas anjjinttida. Amin77e![a]

6 Yezin, Xoozze qaaltta shaarinttida ga7e baaya. Isra7eeleppa yi7ide ubba turii Isra7eele maaqqoos. 7 Mahi Abrahama kochchi ubba Abrahama na7a maaqqoos. Xoozii Abrahamas, «Ne zartta Yisaaqa baggara xeeginttoda» yagayda. 8 Yinno gaazanna ashora yelinttide na7a ubbuntsi Xooz na7a maaqqoos. Yezin turii Isra7eele na7a Xoozii Abrahamas gelide qaaltti gaar yelinttide na7a.[b] 9 yagaazanno.[c] Xoozii inggoda ga7i gelide qaaltta, «Taanii wontsi bere hyannii wode yo7oda; Saaran dhiiratsi na7a yeloda»[d]

10 Yinno xalaala baayzin Irbbiqa fettii nu aday Yisaaqappa mentte na7untsana wodaxide wode, 11 un yelinttodeppa iita woy lo77o oochchodeppa tiino oochara baayzin doorer maaqqize Xoozze qoftta minggode fana, 12 «Anggisse geezes kiitinttoda» yaga7i Laatstsii Irbbiqas ohida. 13 Ga7intti xaafinttida.[e] Yinnan Geeshi Maxaafite, «Yayqooba kadhida, Eesawo ixxida»[f]

14 Yeezin, nu waagawude? Xoozii firdda deshizane? Ade. 15 Laatstsii Musego,

«Ta maarodes koyduntsana maaroda;
ta yiqsinttodes koyduntsis yiqsinttoda»[g]yagayda. 16 Yikke, Xoozze doore as qofa woy oochara baayzin E maarotitsite.

17 Geeshi Maxaafite, Gibxxe kaatizego, «Taanii, ta wolqqito neella beezodesin ta suntsita alame ubba gidda erinttode fana yinnis nena ka7itizida»[h]ga7intti xaafinttida. 18 Yikke, Xoozii maarodes koyzaya maarane; wozintto muumisades koyzay wozintto muumizane.

Xoozze kachiton maarotitsito
19 Yinttappa fetay, «Yeezin, Xooz asi iita oocha gisho akkos bore? Xoozze qoftto atto gawude oode?» Ga7i oocodes dandda7ane.

20 Yezin ta ishayo, Xoozara lallodes ne oode? Looqappa medhinttide miishe fana medhdhidego, «Tana hyannii gaar oochchii akkos medhdhido?»[i] ga7i oocodes dandda7ane? 21 Woy looqa medhdhiday fettii looqappa fetaya bonchcho miishe, hyankkaya mahi bore miishe mahi medhdhodes adetits wolqqa baaya?

22 Xoozii fa kachchito beezodes fa wolqqito erssodes koyi, firddas giigide hyanqqo na7untsana gaama genccera dandda7ezako ne akko ere? 23 Yinno E oochchidanna tiinii bonchchos giigizide, fa dooride na7untsis fa bonchchito qonccissades. 24 Ayhuduntsana xalaala maaqqikaayzin, Ayhude maaqqoosse nuunin Xoozara doorinttida.

25 Nabe Hose7e maxaafite,

«Ta asi maaqqikaayzuntsana, Ta asi ga7i xeegoda.
Ta siiqikaayze worzhito, ‹Siiqinttiduntsana› ga7i xeegoda.
26 Un, ‹Ta worzha baaya› ga7intti xeeginttide besite,[j]
‹De7o Xoozze na7a› ga7intti xeeginttoda»[k]yagayda.

27 Nabe Isayaasa Isra7eele asuntsbaz,

«Isra7eele asuntsi abba gaxa yeze shafe fana gaanggikon,
unttappa eeratsi asuntsi xalaala attoda.
28 Yinna sa7alla afa ellisii folinttoda.»[l] 29 Mahi Isayaasa,
«Ubbappa wolqqaama Laatstse nuus eeratsi kochchi ashshikaayzako,
nuunii Soodoman gamoora katama fana dhabod yeshsha»
[m]yaga7i tiinii ohida.

30 Yeezin, nu waagawude? Xillotitsi kaalloosse Ayhude maaqqoosse asuntsi ammanora xillotitsi denggida. 31 Yezin xillotitsago yeltsize higge yeze Isra7eele asuntsi xillotitsi denggikaaya. 32 Akkos denggaanxido? Un xillotitsita ammanora baayzin oochara ekkodes koyde gishos. Yeyize gisho, un, «Dhubbize shuchchara» dhubbnttida. 33 Geeshi Maxaafite, bo7ote

«Taanii Xiyoone dhubbize shuchchin lallan gaddoda.
Eza ammanze oonin yeellidhoos»
[n]ga7intti xaafinttida.

<- Roome 8Roome 10 ->