Link to home pageLanguagesLink to all Bible versions on this site

1 Yinnippa suuba, salo gaama asunts,

«Xoozze galatintto!
Atotitsi, bonchchon wolqqa nu Xoozzes maaqqe.
2 E firddita turon xillo.
Sa7a tunizide damma olalito Xoozii firddide gishon
fa arunts suutsito iippa mahida»
gaazin si7ida.[a]

3 Mahin fa qaaltto dhoqi yiizii,

«Xoozza galata yello.
Cugitan medhippa medhina yellodes cugoda»
yagayda.[b]

4 Lam7itam oyddii cimuntsin oyddii medhetuntsi araatizella bettide Xoozzes bunqitii,

«Amin77e! Xoozza galata yello»
yaga7i goynida.

5 Yinnippa suuba ootsara,

«Aruntso,
Eza zhashtizuntso eeratsuntso dammuntso,
nu Xoozza galatote»
yagaaze qaala zufanzeppa kezida.[c]

6 Gaama asunts ootsi fana, damma goggize borkka hyaatsi guume fana, dada fana dhogize ootsara,

«Xoozza galata yello;
ubba ahize nu Laatstse, ka7itida.[d]
7 Nu ufayttoda, galatoda eza bonchchoda.
Akkos gayko Durize sarge yellide gishon eza gelizanna giigide gisho.
8 Gelodes giigidanna focizan geeshi maaqqide
liino ma7o ma77ode fana iis ingginttida»
gawudera ta si7ida. (Liino ma7o geeshuntsi xillo oocha aazize.)

9 Yinnippa suuba, kiitanchchize taago, «Durize sargito xeeginttiduntsi anjjinttiduntsana» ga7i xaafo. Mahin, «Hyanna Xoozze turii qaala» yagayda.[e]

10 Ye wode ta ees goynodes E tohitilla afa gol7ida. Yezin E, «Yinno oochaame fana naagintto! Taanii Yesuusa baz markkidhize ne fanan ne ishuntsi fana aro. Ne Xoozzes goyno» yagayda. Yikke, Yesuusa markkatitsita nabetitsi ayyaana.

Bootsi faara toggidaya
11 Salo bugunttin bi7ida, hyaychche bootsi fariza toggiday Ammaninttidayan Turii asi ga7inttane. E xillotitsara firddanen olinttane.[f] 12 E aafita tama loxe fana; E ommite gaama worqqa zawude yene. Eeppa attin melle ooden eroosse xaafinttide suntsi yene.[g] 13 E suutsar wuxurkkinttide ma7o ma77ida; E suntsitan Xoozze Qaala ga7inttida. 14 Focizan geeshi maaqqide liino ma7o ma77ide salo olanchuntsi bootsi faruntsana toggii E suubito kaallane. 15 Worzhito gachchize mashsha E doonttippa kezane. E meqo gufera asuntsana ahane. Ezin Ubbappa Damma Xoozze hyanqo woyne ushito gum7ize bessito E yedhdhoda.[h] 16 E ma7itillan E magatsitilla afa, «Kaatuntsi Kaati Laatstsuntsi Laatstsi» yagaaze suntsi xaafinttida.

17 Yinnippa suuba, fettii kiitanchchize awalla afa eqqidaya bi7ida. Ezin salora firize landda ubbuntsis fa qaaltto dhoqi yiizii, «Hyayga yo7ote! Xoozze diggisa ma7ades fettii bessa shiiqote.[i] 18 Yi7i kaatuntsi asho, shalaqunts asho, wottaddarunts asho, farunts asho, faruntsana toggizunts asho, as ubba asho, arunts asho, laatstsuntsi asho, dammuntsin eeratsuntsi asho mo7ote» gayda.

19 Fariza toggidayran olinttizuntsara olinttodes sa7a kaatuntsin unttis olinttize olanchuntsi fettii bessa shiiqezin bi7ida. 20 Yezin xootsizen E suntsite kille baz oochchide xootsize malla ekkiden E misilito goyniduntsana balitside worddo nabize eera wolla aykinttida. Lam77untsin diinne eexize tama abba faxa olinttida.[j] 21 Attiduntsi fara toggiday doonappa kezize mashshara hyayqqida. Landduntsi ubba un ashito mu7i mizhida.

<- Wahannisa Qonccitsi 18Wahannisa Qonccitsi 20 ->