1 Yikke, yin Kiristtoosara hyayqoppa denddidanni fana, Xoozappa mizaqi zalara bettide Kiristtoosa yeze besite, salo yeze baz koyote.[a] 2 Salo yezuntsalla afa yin qoftto gaddote fattin sa7a yezebazalla afa gaddippete. 3 Yin hyayqora shaakkinttide fana hyanna alame nagara oochappa shaakkinttida. Yin de7ita Kiristtoosar wolla Xoozze gidda aachinttida. 4 Yinttis de7o maaqqide Kiristtoosa qonccize wode ye wode yinttin eera bonchchor qonccoda.
5 Yinnii gisho, yin gidda yeze alame amotitsito wodhote. Yentsesin olale, tunatitsi, olalodes amudhdhe, eeqa goyno fana maaqqide qiiridhdhe. 6 Hyantses baggara Xoozze baadditsi kiitinttoose asalla afa ye7oda. 7 Yinttin zaga yinna iita ogite hyanttitera hyantsesana oochchitera yeshsha.
8 Hyatte yin hyantsesana baadditsi, ixa, kachchi, zigirssi, borsize ohe yinttappa hyaasote. 9 Gal7a amotitsito I oochitira yinttappa gaaride gisho fete fetes worddidhdhippete.[b] 10 Xoozze medho aazize, eratitsara laaminttide kille hyanotitsi ma77ote.[c] 11 Hyanna kille medhetitsite, Girike asi woy Ayhude asi, garrazinttide woy garrazinttikaayze, Barbaare asi[d] woy Iskute asi[e] aro woy bonchcho asi baaya. Kiristtoosa ubba; E ubbanne yene.
12 Yinnii gisho, Xoozara doorinttide asi fana geeshshuntsanan kadhinttiduntsana maaqqii, maarotitsi, keehatitsi, ashkketitsin dandda7a ma77ote.[f] 13 Fetay feta dandda7ote. Ooden lagge eza qohide yeziko ees atto ga7o. Laatstsii yinttis atto ga7idanni gaara yinttin wolis atto ga7ote.[g] 14 Yinna ubbannilla afa ubbanno fettilla shiishii accize siiqo ma77ote. 15 Xoozii yinttana fettii asi mahi xeegidanna, sarotitsis maaqqide gisho Kiristtoosa sarotitsita yin wozintto aho; galatizuntsanan maaqqote.
16 Kiristtoosa qaala yin wozintte kumii yezo. Cinccatitsi ubba fete fetaya tamaarssoten zorote. Mazmurera, nashshera ayyaana yetstsara Xoozza wozinappa galatittera yexxote.[h] 17 Xoozze Aday Yesuusa baggara galatittera yin ohinttizebaz woy oochchizebaz ubba Laatstse Yesuusa suntsite oochchote.
19 Azinuntso, yin machchuntsana kadhote; unttis iitippete.[j]
20 Na7untso, yinttana yeliduntsis ubba baza kiitinttote; yinna Laatstsii ufayssize baz.[k]
21 Aduntso, yin na7untsi ufayssi gachchaame gaar unttana zhilizippete.[l]
22 Aruntso, sa7a yinttis Laatstsii maaqqiduntsis ubba baza kiitinttote. Laatstsi bonchchitera luule wozinappa kiitinttii unttana ufayssote fattin asi bo7o ga7i oochchippete.[m] 23 Yin oochchize oochito ubba asis maaqqikaayzin Laatstsis oochchize fana wozinappa oochchote. 24 Laatstsappa laata woyto yin ekkodanno erote; yin Laatstse Kiristtoosas oochchane. 25 Xoozii as sino bi7i firddoosse gisho ooden iita oocha oochchiko fa iita oochiti gisho kushe mahe ekkoda.[n]
<- Qolaasiyasa 2Qolaasiyasa 4 ->- a Maz. 110:1
- b Efe. 4:22
- c Medho 1:26; Efe. 4:24
- d Barbaare asi: Gaazanna tamaarikaayza woy eroossa woy yelinttideppa si7i ga7i yeze asi ga7e.
- e Iskute asi Gaazanna wozina mintsi asi woy wozina iita asi ga7e
- f Efe. 4:2
- g Efe. 4:32
- h Efe. 5:19-20
- i Efe. 5:22; 1 Phex. 3:1
- j Efe. 5:25; 1 Phex. 3:7
- k Efe. 6:1
- l Efe. 6:4
- m Efe. 6:5-8
- n Efe. 6:5-8