1 ይንፓ ሱባ፥ ታ መለ ምንꬅ ኪታንቾ ሳሎፓ ሳአ ዎꬎደራ ብእዳ። ኤ ꬎነ ማእዳ፤ ኤ ኦምትላ አፋ ዙላ የነ። ኤ ስንታ አዋ ፋና፤ ኤ ቶህታ ታማ ቱስ ፋና። 2 የ ኪታንችዘ ቡጉꬅ የዘ ፈቲ ኤራꬅ ጻጽንትደ ማጻፈ ፋ ኩሽተ አይኪ፥ ፋ ምዛቅ ቶህዛ አባላ አፋ፥ ፋ ዎርክታ ቶህዛ ሳአላ አፋ ኤስዳ። 3 ꬋዝዘ ጋሞ ፋና ፋ ቃልቶ ꬎቅ ዪዚ ኡክዳ። ኤ ኡክደ ዎደ ላፑን ዳዱንꬅ ፋ ꬎግቶ ስስዳ።

4 ላፑን ዳዱንꬅ ፋ ꬎግቶ ስስደ ዎደ ታ ጻፎደስ ጊግንትዳ። የዝን ሳሎፓ፥ «ላፑን ዳዱንꬅ ኦህዳኖ ማታመራ ጎርዶፕ አትን ጻፍፐ» ያጋዘ ኦꬅ ስእዳ።

5 ይንፓ ሱባ፥ አባላ አፋን ሳአላ አፋ ኤቅደ፥ ታ ብእደ ኪታንችዘ፥ ፋ ምዛቅ ኩሽቶ ሳሎ ኡደ ምጭዳ። [a] 6 ኤ ሳሎን እ ግዳ የዘ ባዝ ኡባ፥ ሳአን እ ግዳ የዘ ባዝ ኡባ፥ አባን እ ግዳ የዘ ባዝ ኡባ መꬍደ፥ መዽና የዘ ጾዘ ሱንꬅተ ጫቂ፥ «ይኬፓ ሱባ፥ ጾዚ ጋምአማ። 7 የዝን ላፑንꬆ ኪታንችዘ ፋ ሞይዛ ኦልደ ዎደ ጾዚ ፋ አሮ ማቅደ ናቡንꬅ ባጋራ ቆንጭዝደ ጋꬅ ቆፍታ ፎልንቶዳ» ጋይዳ።

8 ይንፓ ሱባ፥ አባላ አፋን ሳአላ አፋ ኤቂ፥ «ኤ ኩሽተ ቡጉንቲ የዘ ጻጽንትደ ማጻፍዛ ኪታንችዘ ኩሽትፓ ኤኮ» ያጋእ ላምእንꬃ ሳሎፓ ታስ ኦሆደራ ስእዳ።

9 ታኒ የ ኪታንችዘጎ Ꮉንግ፥ ኤራꬅ ጻጽንትደ ማጻፍዛ እንጎ ጋእ ኦጭዳ። ኤ ታጎ፥ «ኤኪ ሞኦ፤ እዛ ነ ሳዝተ ጫንጎዳ፥ የዝን ነ ዶንተ ሽዳ ፋና ማልኦዳ» ጋይዳ።

10 ታኒ ኪታንችዘ ኩሸፓ የ ኤራꬅ ጻጽንትደ ማጻፍዛ ኤኪ ሙእዳ፤ ታ ዶንተ ሽዳ ፋና ማልእዳ፥ የዝን ታ ሳዝተ ጫንግዳ። 11 ይንፓ ሱባ፥ ታጎ፥ «ኔኒ ኮች ኡባስ፥ ዎርዣ ኡባስ፥ ዱማ ዱማ ዶናራ ኦህንትዙንꬅስን ካቱንꬅስ ትንቢተ ማህ ኦሆደስ ቤዛነ» ያጋይዳ።

<- ዋሐንሳ ቆንጭꬅ 9ዋሐንሳ ቆንጭꬅ 11 ->