1 ይንፓ ማቂ፥ አይሁዱንꬅ የሱሳ ዎꬎደስ ኮይደ ግሾ ኤ ይሁዳ አሺ ጋልላራ ዉትዳ። 2 አይሁዱንꬅ ቦንችዘ ዳሰ ባአለ ኡክዳ። [a] 3 ይኒ ግሾ፥ የሱሳ እሹንꬅ፥ «ነ ታማሩንꬅ ነ ኦችዘ ክለ ባዝቶ በአደ ጋር Ꮉንፋ ደንዲ ይሁዳ ሳአ ቅቶ። 4 ፋስ ቆንጪ ኤርንቶደስ ኮይዘ አስ ኦደን ፋ ኦችቶ አቾስ። ነ Ꮉንሳና ኦቺ ነባዝ አላመስ ቆንጭዞ» ያጋይዳ። 5 ኤ እሹንꬅ ይኖ ጋይዳና አማንካይዘ ግሾ።

6 የሱሳ ኡንታጎ፥ «ታስ ዎደ Ꮉጋ የልካያ፥ የዝን ይንትስ ኡባ ዎደ ዎታነ። 7 አላመ ይንታና እጾደስ ዳንዳኦስ፥ የዝን ታኒ አላመ ኦችታ ኢታ ማቅዛኖ ማርክꬍዘ ግሾ ታና እጻነ። 8 ይን ባአልቶ ቅቶተ፤ ታስ ዎደ የልካይዘ ግሾ ታኒ ባአልቶ Ꮉንጎስ» ያጋይዳ። 9 ኤ ይኖ ጋእ ጋልላ አትዳ።

10 ኤ እሹንꬅ ባአለ ቦንቾደስ ቅትዳንፓ ማቂ የሱሳ ኦደን ኤርካይዝን በንትካይዛራ ይና በስተ Ꮉንግዳ። 11 አይሁዱንꬅ ባአለ ቦንችዘ በስተ፥ «ኤ አባ የነ?» ያጋእ ኤዛ ኮይዳ።

12 አሱንꬅ ዙዝንጊ ኤ ባዝ ኦህንታነ። ባጉንꬅ፥ «ኤ ሎኦ አስ» ጋዘ ዎደ መሉንꬅ ማህ፥ «አደ፥ ኤ አስ ባልꬃነ» ያጋይዳ። 13 የዝን አይሁደ Ꮉላቁንꬅስ ዣሽትደ ግሾ ኦደን ኤ ባዝ ቆንጨ ኦህንቶስ።

14 ባአለ ቦንቺ ግዳ የሎደራ የሱሳ ጾዘ ኬꬃ Ꮉንግ ታማርሰ አይክዳ። 15 አይሁዱንꬅ፥ «Ꮉይ አꬄ ትምርተ ታማርካይዛራ ማጻፈ ዋይዝ ኤርዶ?» ጋእ ጋማ ቆፕዳ።

16 የሱሳ ማህ፥ «ታ ታማርስዘ ትምርትታ ታና ኪተዘ ጾዘ ካለፓ የእዘ ትምርተፕ አትን ታ ባዝ ባያ። 17 ጾዘ ቆፋ ኦቾደስ ኮይዘ ኦደን Ꮉና ትምርትታ ጾዘ ካለፓ የእዛኮን ዎይ ታኒ ታፓ ኦህዛኮ ኤራነ። 18 ፋ ባዝ ኦህዘ ኦደን ፋ ቦንቾ ኮያነ። የዝን ፋና ኪተዘ ቦንቾ ኮይዘ ኦደን ኤ ቱሪ አስ፤ ኤ ግዳ ዎርዶ ባያ። 19 ሙሴ ይንትስ ህገ እንግዳ፥ የዝን ይንታፓ ኦደን ህገ ናግካያ። ዬዝን አኮስ ታና ዎꬎደስ ኮየ?» ያጋይዳ።

20 አሱንꬅ ማህ፥ «ኔራ ጻላሄ የነ፤ ነና ዎꬎደስ ኦደ ኮይዘ?» ያጋይዳ።

21 የሱሳ፥ «ታ ፈቲ ክሌ ባዝ ኦችን ይን ኡቡንꬅ ጋማ ቆፕዳ። 22 ይን፥ ይን ናኡንꬃና ጋራዞደ ጋር ሙሴስ ዎጋ እንግዳ። የዝን ይን ማይዙንꬃፓ አይኪ የዘ ዎጋፕ አትን ሙሴ ባያ። ይኒ ግሾ፥ ይን ሳምባታ ዎደ ꬊራꬅ ናኡንꬃና ጋራዛነ። [b] 23 ሙሴ ህገ ሻርንታመ ፋና ይን ሳምባታ ዎደ ጋራዘባዝ ማቅኮ፥ ታ ፈቲ አꬄ ኩሙꬅ ጋልቶ ሳምባታር ፋꬅደ ግሾ ታራ አኮስ ካጭንተ?[c] 24 ቱሪ ፍርዳ ፍርዶተፕ አትን አስ ስኖ ብእ ፍርድፐተ» ያጋይዳ።

25 የሩሳላመ አሱንꬃፓ ፈተ ፈተ፥ «ኡን ዎꬎደስ ኮይዘ አꬄ Ꮉያ ባነ? 26 ይኬ፥ ኤ ቆንጨ ኦህነ፤ ኡን ኤዛ አኮን ጋኦስ። ኤ ክርስቶሳ ማቅዳኖ አይሁደ Ꮉላቁንꬅ ቱሮ ኤረሶነ? 27 ክርስቶሳ የእዘ ዎደ ኤ አባፓ የዛኮ ኦደን ኤሮስ፥ የዝን Ꮉይ አꬄ አናፓ የኤዛኮ ኑ ኤራነ» ያጋይዳ።

28 የሱሳ ጾዘ ኬꬃ ታማርስተራ ፋ ቃልቶ ꬎቅ ዪዚ፥ «ቱሮ ይን ታ ኦና የዛኮን ታ አባፕ የኤዛኮ ኤራነ? ታኒ ታ ዎልቃራ ይእካያ፥ የዝን ታና ኪተዘ ቱሪ አደ፤ ይን ኤዛ ኤሮስ። 29 የዝን ታኒ ኤ ኪትን ኤ ካለፓ ይእደ ግሾ ኤዛ ኤራነ» ያጋእ ኡክዳ።

30 ይኒ ግሾ፥ ኡን ኤዛ አይኮደስ ኮይዳ። የዝን ኤስ ዎደ Ꮉጋ የልካይዘ ግሾ ኦደን ኤላ ኩሸ ጋድካያ። 31 የዝን ጋማ አሱንꬅ የሱሳ አማኒ፥ «ክርስቶሳ የእዘ ዎደ Ꮉይ አꬄ ኦችዘ ክለ ባዛፓ አꬂ ኦቾዳነ?» ያጋይዳ።

32 ፋርሳዉኑꬅ ጋማ አሱንꬅ የሱሳ ባዝ ካልካሽዛኖ ስእዳ። ካህኑንꬅ Ꮉላቁንꬅን ፋርሳዉኑꬅ ኤዛ አይꬂ አጭሳደስ ጾዘ ኬꬃ ናግዙንꬃና ኪትዳ።

33 የሱሳ፥ «ታ ይንታራ ኤራꬅ ዎደ ጋምኦዳ፤ ይንፓ ሱባ ታና ኪተዘጎ ቅቶዳ። 34 ይን ታና ኮዮዳ፥ የዝን ደንጋማ። ታ የዘ በስቶ ይን ዮኦደስ ዳንዳኦስ» ያጋይዳ።

35 አይሁዱንꬅ ፈተ ፈተራ፥ «Ꮉይ ኑ ደንጋመ በሳ አባ ቅቶደስ ይየ? ግርኬ ካታማ በቲ የዘ አይሁዱንꬃና Ꮉንግ ታማርሶደስ ቅቶዳነ? 36 ‹ይን ታና ኮዮዳ፥ የዝን ደንጋማ› ማህ፥ ‹ታኒ የዘ በሳ ይን ዮኦደስ ዳንዳአማ› ጋዛና አክ ጋእንተ?» ያጋይዳ።

37 ባአለ ቦንችዘ Ꮉልኤ ቃምተ የሱሳ ደንዲ፥ ፋ ቃልቶ ꬎቅ ዪዚ፥ «ባርꬍደ ኦደን ታጎ ይእ ኡዦ። [d] 38 ታና አማንዘ ኦደን ጌሽ ማጻፍታ ጋይዳንጋራ ደኦ እንግዘ Ꮉꬅ ኣፈ ኤ ግዳፓ ጎጎዳ» ያጋይዳ። [e] 39 ኤ ይኖ ጋይዳና ኤዛ አማነዙንꬅ ኤኮደስ የዘ ጌሽ አያናባዝ ኦህዳ። የሱሳ Ꮉጋ ቦንችንትካይዘ ግሾ የ ዎደ ጌሽ አያና እንግንትካያ።

40 የንꬅ አሱንꬃፓ ጋሙንꬅ ኤ ጋዛኖ ስእ፥ «Ꮉይ ቱሮ ዮኦዳ ጋእንትደ ናብዛያ»[f] ያጋይዳ።

41 መሉንꬅ ማህ፥ «Ꮉይ ክርስቶሳ» ያጋይዳ።

ማህን መሉንꬅ፥ «ክርስቶሳ ጋልላፓ የእነነ? 42 ጌሽ ማጻፍተ፥ ‹ክርስቶሳ ዳዉተ ኮቻፓ ዳዉተ የዝደ ቤተለመ ካታማፓ የኦዳ› ጋይካነ?» ያጋይዳ። [g] 43 ይኒ ግሾ፥ የሱሳ ባጋራ አሱንꬅ ዎል ግዳ ሻክንትዳ። 44 የንꬅ አሱንꬃፓ ፈተ ፈተ ኤዛ አይኮደስ ኮይዳ፥ የዝን ኦደን ኤላ ኩሸ ጋድካያ።

45 ጾዘ ኬꬂ ናግዙንꬅ ካህኑንꬅ Ꮉላቁንꬃጎን ፋርሳዉኑꬃጎ ሱብ ማቂ ይእን ኡን፥ «አኮስ ኤዛ ከአንጽዶ?» ያጋእ ኦጭዳ።

46 ጾዘ ኬꬂ ናግዙንꬅ ኡንታጎ፥ «Ꮉይ አꬄ ኦህዛን ጋራ ኦደን ኦሆስ» ጋእ ማህዳ።

47 ፋርሳዉኑንꬅ ማህ፥ «ኤ ይንታናን ባልꬅዳ? 48 አይሁደ Ꮉላቁንꬃፓ ዎይ ፋርሳዉንꬃፓ ኤዛ አማንደ አስ የነ? 49 ሙሴ ህገ ኤሮሰ Ꮉንꬅ አሱንꬅ ቱኔዙንꬃና» ያጋይዳ።

50 ፋርሳዉንꬃፓ ፈተ ቃማ የሱሳጎ Ꮉንግደ ንቆድሞሳ ኡንታጎ፥ [h] 51 «ፈቲ አስ ጋዛኖ ስእካይዛራ ዎይ ኤ አኮ ኦቼዛኮ ኤርካይዛራ ቲኖ ኤላ ፍርድዛና ኑ ህግተ የነ?» ያጋይዳ። 52 ኡን ማህ፥ «ኔንን ጋልላ አስ? ጋልላ ሳአፓ ናበ ከዛማኖ ጌሽ ማጻፈፓ ቁርች ኤሮ» ያጋይዳ። 53 ይንፓ ሱባ ፈተ ፈተ ፋ ካራ ቅትዳ።

<- ዋሐንሳ 6ዋሐንሳ 8 ->