1 ፈቲ ሀናንያ ጋዘ አꬄ ፋ ማችታ ሳጲርራ ጋደ ባይዝዳ። 2 ይና ባይዝደ ብርትፓ ፋ ማችታ ኤርዝን አሺ፥ አትዳኖ ክእ ሐዋሩንꬅስ እንግዳ።

3 የዝን ጴጥሮሳ ሀናንያጎ፥ «ነ ጌሽ አያና ጭሞደ ጋራን ጋድቶ ባይዝደ ብርትፓ ሻኪ አሾደ ጋር ጻላሄ ነ ዎዝንተ አኮስ ገልዶ? 4 ኔኒ ባይዞዳንፓ ቲኖ ጋድዘ ነባዝ ባነ? ማህ ነ ባይዝ ማቅንን ሚሽታ ነባዝ ባነ? ዬዝን፥ ይኒ ጋርዘ ባዝ ኦቾደስ አኮስ ነ ዎዝንተ ቆፕዶ? ነ ጾዝ ቲኖ ዎርድꬍዳፕ አትን አስ ቲኖ ዎርድꬍካያ» ያጋይዳ።

5 ሀናንያ ይና ቃልቶ ስእደ ጋር ጎልእ Ꮉይቂዳ፤ ይኖ ስእደ ኡቡንꬅ ዳማ ዣሽትዳ። 6 ናአትꬁንꬅ ደንዲ ኤ አህቶ ዚꬊ ጻጺ ካንግ ሞግዳ።

7 Ꮉይꬕ ሳተፓ ሱባ ሀናንያ ማችታ ይኖ ኤርካይዛራ ጴጥሮሳ የዘ በስተ ገልዳ። 8 ጴጥሮሳ ኢጎ፥ «ይን ጋድቶ ይና ብርትስ ጋማቲ ባይዝዳተ? አነ ታስ ኦሆ» ያጋይዳ።

እዛን፥ «ዬ፥ ይና ብርትስ ጋማቲ ባይዝዳ» ያጋይዳ።

9 ጴጥሮሳ ማችቶ፥ «ኔራን ነ አዝንዘራ ላꬄ አያና ፋታኖደስ አኮስ ዞርንትዶተ? ይኬ፥ ነ አዝንዛ ሞግደ አሱንꬅ ባለ የነ፤ ነናን ኡን ባለ ከሶዳ» ያጋይዳ።

10 ማችታ ኢራ ጴጥሮሳ ቶህት ካለ ጎልእ Ꮉይቂዳ፤ ሻካኑንꬅ ገልዘ ዎደ Ꮉይቂዳኖ ደንግ ባለ ኬሲ፥ እ አዝንዘ ካለ ካንግ ሞግዳ። 11 ኩሙꬅ ዎሳ ኬꬅታን ይኖ ስእደ መለ አሱንꬅ ኡባ ዳማ ዣሽትዳ።

12 ሐዋሩንꬅ ጋማ ቆፍዘ ባዝን ክሌ ባዝ አሱንꬅ ግዳ ኦችተር የነ። ኡቡንꬅ ፈቲ ዎዝናር ሶሎሞነ ፉርꬃ ሺቃነ። 13 መለ አሳፓ ፈቲ አስን ኡንታር ማድንቶደስ ሚንግካያ፥ የዝን አሱንꬅ ኡንታና ቦንችዳ። 14 አማንዘ ꬊራꬁንꬅን ማቹንꬅ ፋይድታ ቲኖስትፓ ጋንግተ ቅትዳ። 15 ይኒ ግሾ፥ አሱንꬅ Ꮉርጋንቹንꬃና ሻንቻፋራን አልጋራ ቶኪ ጴጥሮሳ አꬍዘ ዎደ ኤ ዳሽታ ኡንታፓ ፈተላ ፈተላ ዳሾደ ጋር ኦገ ዶና ኬሲ ጋዳነ። 16 ማህ ጋማ አሱንꬅ የሩሳላመ ካለ የዘ ካታማፓ Ꮉርግንትዙንꬃና ቱና አያና ዋይꬅዘ አሱንꬃና ኤኪ የእነ፤ ኡቡንꬅን ፋጻነ።

17 ካህኑንꬅ Ꮉላቅዘን ኤራ የዘ ሳዱቃዉንꬅ ኡባ እጸራ ኩሚ ሐዋሩንꬃላ ደንድዳ። 18 ሐዋሩንꬃና አይኪ ዎርዣ አች ኬꬃ ኦልዳ። 19 የዝን ላꬂ ኪታንቾ ቃማ አች ኬꬃ ፉርꬅቶ ቡጊ ሐዋሩንꬃና ባለ ኬሲ፥ 20 «Ꮉንግ፥ ጾዘ ኬꬃ ኤቂ Ꮉና ክለ ደኦ ቃልቶ አሱንꬅስ ኡባ ኦሆተ» ያጋይዳ። 21 ሐዋሩንꬅ ይኖ ስእደ ዎደ ዎንታ ጎዳ ጾዘ ኬꬃ ገሊ ታማርሰ አይክዳ።

ካህኑንꬅ Ꮉላቅዘን ኤራ የዙንꬅ ይእ፥ እስራኤለ ጭሙንꬃና ኡባ ጼጊ ሺሺ ሐዋሩንꬃና ፋ ቲኖ ኮኦደ ጋር ዎታዳሩንꬃና አች ኬꬃ ኪትዳ። 22 የዝን ዎታዳሩንꬅ አች ኬꬅተ Ꮉንግ ሐዋሩንꬃና ደንግካያ። ሱብ ማቂ ይእ አሱንꬃጎ፥ 23 «ኑ Ꮉንግዘ ዎደ አች ኬꬅት ፉርꬅታ ምንꬂ ጎርድንትን፥ ናግዙንꬅ ፉርꬅተ ኤቅዱንꬃና ደንግዳ። የዝን ኑ ፉርꬅቶ ቡግዘ ዎደ ግዳ መለ አቶ የዝን ፈቲ አስን ባያ» ያጋይዳ። 24 ይኒ ግሾ፥ ጾዘ ኬꬅተ ዎታዳሩንꬃና ኪትዘ ካህኑንꬅ Ꮉላቁንꬅ ይኖ ስኤዘ ዎደ «ሐዋሩንꬃላ አኮ Ꮉንዶ?» ጋእ ታውዳ።

25 የ ዎደ ፈቲ አስ ኡንታጎ ይእ፥ «ይኬ፥ ይን አጭደ አሱንꬅ ጾዘ ኬꬅተ ኤቂ አሱንꬃና ታማርሳነ» ያጋእ ኡንትስ ኦህዳ። 26 ጾዘ ኬꬅተ ዎታዳሩንꬃና ኪትዘ ፋ ዎታዳሩንꬃራ Ꮉንግ ሐዋሩንꬃና ክእዳ። የዝን ኡን ፋና አሱንꬅ ሹቻራ ꬎጎዳ ጋእ ዣሽትደ ግሾ ኡንታና አዳሽ ክእዳ።

27 ኡን ሐዋሩንꬃና ክእ፥ ሺቅደ ሻንጉንꬅ ቲንተ ኤስን ካህኑንꬅ Ꮉላቅዘ ኡንታጎ፥ 28 «ይንታና ኑኒ የ አꬄ ሱንꬅተ ታማርሳመ ጋር ምንꬂ ኪትካነ? ይኬ፥ ይን ትምርትቶ የሩሳላመ ካታማ ኡባ የልꬅዳ። የ አꬄ ሸምፕትስ ኑና ጋልሳደስ ኮያነነ?» ያጋእ ኦጭዳ። [a]

29 ጴጥሮሳራን Ꮉንኮ ሐዋሩንꬃራ ኡንትስ ማህተ፥ «ኑኒ አስስ ኪትንቶዳንፓ ጾዝስ ኪትንቶደስ ቤዛነ። 30 ማስቃላላ ይን ሱጺ ዎꬍደ የሱሳ ኑ አዱንꬅ ጾዘ Ꮉይቆፓ ደንꬅዳ። 31 እስራኤሉንꬅ ናጋራፓ ማቃደ ጋራን ኡን ናጋርታ አቶ ጋእንቶደ ጋር ጾዚ የሱሳ አህዛያን አሽዛያ ማህ ቦንቾራ ፋፓ ምዛቅ ዛላር በትꬅዳ። 32 ይንስ ኑ ማርካ፤ ማህ ጾዘ ፋና ኪትንትዙንꬅስ እንግደ ጌሽ አያናን ማርካ» ያጋይዳ።

33 ሺቅደ አሱንꬅ ይኖ ስኤዘ ዎደ ዳማ ዥልꬊ፥ ሐዋሩንꬃና ዎꬎደስ ቆፕዳ። 34 የዝን አስ ኡባ ግዳ ዳማ ቦንችንትደ፥ ህገ አስታማረ ማቅደ፥ ጋማልያለ ጋዘ ፈቲ ፋርሳዉዘ ደንዲ ኤቂ ሐዋሩንꬃና ኤራꬅ ጎደ ባለ ከሶደ ጋር ኪትዳ። 35 ይንፓ ሱባ፥ ሺቅደ አሱንꬃጎ፥ «እስራኤለ አሱንꬆ፥ Ꮉንꬅ አሱንꬃላ ይን ኦቾደስ ቆፕደ ባዝትፓ ናግንቶተ። 36 አኮስ ጋይኮ፥ Ꮉንፓ ቲኖ ተዎዳሳ ፋና፥ ‹ታ ዳማ› ጋእ ደንድን፥ ኦይዲ ጼት ማቃደ አሱንꬅ ኤራ ዎላ ማቅዳ። የዝን ኤዛ ዎꬍን ኤዛ ካልዘ ኡቡንꬅ ላንትን ፋꬆሰ አስ ማቂ አትዳ። 37 ይንፓ ሱባ፥ አሱንꬅ ፋይድንትደ ዎደ ጋልላፓ የዘ ይሁዳ ደንዲ ጋማ አሱንꬅ ፋና ካሎደ ጋር ዪዝዳ፥ የዝን ኤዛ ዎꬍን ኤዛ ካልዘ አሱንꬅ ኡባ ላንትዳ። 38 Ꮉተን ታ ይንትስ ኦህነ፤ Ꮉንꬅ አሱንꬃፓ ሻግንቶተ፤ ኡንታና ቦችፐተ። አኮስ ጋይኮ፥ Ꮉና ቆፍቶን Ꮉና ኦችቶ አስ ኦችዘባዝ ማቅኮ ꬋቦዳ። 39 የዝን Ꮉና ቆፍታን Ꮉና ኦችታ ጾዛፓ ይእደባዝ ማቅኮ፥ ይን ኡንታና ꬋብሶደስ ዳንዳኦስ። ቱርፓ ይን ጾዛራ ካጭንትተራ በንታመ ፋና» ያጋእ ኦህዳ። ይኒ ግሾ፥ ሺቅደ አሱንꬅ ጋማልያለ ዞርዳኖ ኤክዳ።

40 ሐዋሩንꬃና Ꮉንካ ፋጎ ጼጊ አላንጋራ ጋራፍዝዳ። ይንፓ ሱባ፥ ኡንታጎ፥ «የሱሳ ሱንꬅቶ ላምእንꬃ ኦህፐተ» ጋእ ብሊ ዳክዳ። 41 የሱሳ ሱንꬅት ግሾ ኡን ቦርንቴ ቤዘባዝ ማቅዳኖ ኤርዘ ግሾ ሻንጉንꬅ ቲኖፓ ኡፋይትተራ ከዝዳ። 42 ኡን ኡባ ዎደ ጾዘ ኬꬃን አስ ኬꬃን የሱሳ ኤ ክርስቶሳ ማቅዳኖ ታማርሰን ሳባኬን አሽካያ።

<- ሐዋሩንꬅ ኦቻ 4ሐዋሩንꬅ ኦቻ 6 ->