1 ፈቲ ኦደ ጴጥሮሳን ዋሐንሳን ጾዝ ዎሶደስ ኡዱፉን ሳተ ጾዘ ኬꬃ Ꮉንግዳ። 2 የልንትዳንፓ ደንዲ ቶሄ ዎቦ ማቅደ ፈቲ አስ ጾዘ ኬꬃ ገልዘ አሳፓ ሙጻታ ዎሶደ ፋና ኡባ ዎደ ሎኦ ጋዘ ጾዘ ኬꬅትስ ፉርꬅተ ቶኪ ክእ ጋዳነ። 3 የ አꬄ ጴጥሮሳን ዋሐንሳን ጾዘ ኬꬅተ ገሎደስ የኦደራ ብእ ኡንታና ሙጻታ ዎስዳ።

4 ኡንትን ኤዛ ዳኪ ብእ፥ ጴጥሮሳ «ኑና Ꮉንካ ቦኦ» ያጋይዳ። 5 ቶሄ ዎቦ አꬄ ኡን አኮ ባዝ እማዳ አዝን ኡንታና ብእዳ። 6 የዝን ጴጥሮሳ ኤጎ፥ «ታስ ብራን ዎርቃን ባያ፥ የዝን ታስ የዛኖ ታ ኔስ እንጎዳ። ናዝረተ የሱስ ክርስቶሳ ሱንꬅተ ደንዲ ጎደን Ꮉንካን የꬎ» ያጋይዳ።

7 ይንፓ ማቂ፥ ኤ ምዛቅ ኩሽቶ አይኪ ደንꬅዳ። ኤልሲ ኤ ቶህታን ቅልችታን ምንግዳ። 8 አꬃይ ዶሊ ደንዲ ኤቅዳ። ጎደን Ꮉንካን የ አይክዳ። ይንፓ ማቂ፥ የꬍተራ፥ ዶልተራን ጾዝ ጋላትተራ ኡንታራ ዎላ ጾዘ ኬꬃ ገልዳ።

9 ኤ የꬎደራ ጾዝ ጋላቶደራን አሱንꬅ ኡባ ኤዛ ብእዳ። 10 ብእደ ኡባ ሙጻታ ዎሶደስ ሎኦ ጋዘ ጾዘ ኬꬃ ፉርꬅተ በትደ ኤዛ ማቅዳኖ ኤርዳ፤ ኤ Ꮉንዳኖ ብእ ጋማ ቆፋራ ኩምዳ።

11 አꬃይ ጴጥሮሳፓን ዋሐንሳፓን ዱጾስ ጋእ አይኪ የዝን አሱንꬅ ኡባ ጋማ ቆፒ፥ ሶሎሞና ፉርꬅ ጋዘ በሳ ዎላ ኡንታጎ ይእዳ። 12 ጴጥሮሳ አሱንꬃና ብእደ ዎደ አሱንꬃጎ፥ «እስራኤለ አሱንꬆ፥ አኮስ Ꮉነ ጋማ ቆፐተ? ዎይ አኮስ ኑና ዳኪ በኤተ? ኑኒ ኑ ዎልቃራ ዎይ ኑ ጾዝ ዣሽትደ ግሾ Ꮉይ አꬃ ፋ ቶሄር የꬎደ ጋር ዪሳዳ ይንትስ አዛነ? 13 አብራሃማ፥ ይሳቃ፥ ያይቆባ ጾዘ፥ ኑ አዱንꬅ ጾዘ፥ ፋ ናአያ የሱሳ ቦንችዳ። የዝን ይን Ꮉይቆስ አꬂ እንግዳያ ጵላጦሳ ብሎደስ ኮይን ይን ኤ ቲኖ፥ ‹ኑ ኤዛ ኮዮስ› ያጋይዳ። [a] 14 ይን ጌሽዛን ጽልዛን፥ ‹ኑ ኤዛ ኮዮስ› ጋእ፥ ሸምፖ ዎꬍዳያ ይንትስ ብሎደ ጋር ጵላጦሳ ዎስዳ። [b] 15 ደኦ እንግዛያ ይን ዎꬍዳ፥ የዝን ጾዚ Ꮉይቆፓ ኤዛ ደንꬅዳ። ይንስ ኑ ማርካ። 16 Ꮉይ ይን በእዘን ኤርዘ አꬄ ፋጺ ሚንግዳና የሱሳ ሱንꬅተ አማንዳነ። Ꮉይ ይን ኡቡንꬅ ቲንተ ኤዛ Ꮉንጋር ፋꬅደ ኤ የሱሳ አማንደ ግሾ።

17 «Ꮉተን ታ እሹንꬆ፥ ይንትን ይንታና ካልꬅዙንꬅ ጋር፥ ኤርካይዛራ ኦችዳኖ ታ ኤራነ። 18 የዝን ጾዚ ዛጋ ናቡንꬅ ኡቡንꬅ ዶንተ፥ ‹ክርስቶሳ ማꬋ ኤኮደስ ቤዛነ› ያጋይዳኖ ይእ ፎልንቶደ ፋና ኦችዳ። 19 ይኬ፥ ጾዚ ይን ናጋርቶ አቶ ጋዉደ ጋር ማሮትꬅ ገሎተን ላꬃጎ ማቆተ። 20 ላꬄ ካለፓ ምንꬅꬅዘ ዎደ ይንትስ የኦደ ፋና ጾዚ ኤዛ ቲንꬊ ዶርደ ክርስቶስ የሱሳ ይንትስ ዳኮዳ። 21 ጾዚ ፋ ጌሽ ናቡንꬅ ዶንተ ዛጋ ኦህዳን ጋር ኡባ ባዝ ክልꬎደ ዎደ የሎደስ የሱሳ ሳሎ ጋምኦደስ ቤዛነ። 22 ሙሴ፥ ‹ላꬂ ጾዚ ታና ደንꬅዳን ጋር ይን ግዳ ፋ ይንትስ ናበ ደንꬆዳ። ይን ኤ ጋዛኖ ኡባ ስኦተ። [c] 23 የ ናብዘ ኦህዛኖ ስኦሰ አꬄ ኦደን አስ ግዳፓ ሻክንት ꬋቦዳ› ጋይዳ። [d]

24 «ማህ ሳሙኤላፓ አይኪ የዘ ናቡንꬅ ኡባ ይና ቃምትባዝ ኦህዳ። 25 ይን ናቡንꬅ ናኡንꬃና፤ ማህ ጾዚ አብራሃማስ፥ ‹ሳአ የዘ አስ ኡባ ታ ነ ኮችት ባጋር አንጆዳ› ጋእ ኑ አዱንꬅስ ጫቆ ቃላ ላቶደ ናኡንꬃና።[e] 26 ጾዚ ይንታና ኡባ ይን ኢታ ኦግትፓ ማህ አንጆደ ፋና ፋ ናአያ ደንꬂ ይንትስ ቲኒ ዳክዳ» ያጋይዳ።

<- ሐዋሩንꬅ ኦቻ 2ሐዋሩንꬅ ኦቻ 4 ->