1 ፍስጦሳ ፋ አዉራጃ ገሊ Ꮉይꬕ ቃማፓ ሱባ ቂሳርያፓ የሩሳላመ ቅትዳ። 2 እዘ ካህኑንꬅ Ꮉላቁንꬅን አይሁዱንꬃና ካልꬅዙንꬅ ጳዉሎሳ ሞትዳ። 3 «ጳዉሎሳ የሩሳላመ ክእዚ ኑስ ሎኦ ባዝ ኦቾያ» ጋእ ዎስዳ፤ ይኖ ኡን ጋይዳና ጳዉሎሳ ኦገ ናጊ ኤዛ ዎꬎደስ ኮይደ ግሾ። 4 ፍስጦሳ ኡንታጎ፥ «ጳዉሎሳ፥ ቂሳርያ አች ኬꬃ የነ፤ ታኒ ታ ኦምተን ኤልሲ ሱባ ማቃደስ ይእነ። 5 ኤ ባልደባዝ የዝኮ ይን ሹሙንꬅ ታራ ቂሳርያ ዎꬊ ኤዛ ሞቶ» ያጋእ ማህዳ።

6 ፍስጦሳ ኡን ካለ ኦስፉን ዎይ ታጵ ቃማ ጋር ጋምእዳንፓ ሱባ ቂሳርያ ዎꬍዳ። ዎንትስት ዎደ ፍርዳ ኦይዳላ በቲ ጳዉሎሳ ኮኦደ ጋር ኪትዳ። 7 ኤ ይእን የሩሳላመፓ ይእደ አይሁዱንꬅ ኤ ካለ ኤቂ ኡን ማርካ ሺሾደስ ዳንዳኦሰ ዳማ ምንꬅ ሞቶ ኤላ ሺሽዳ። 8 ጳዉሎሳ ማህ፥ «ታኒ አይሁዱንꬅ ህገ ማቅን ጾዘ ኬꬃ ማቅን ዎይ ሮመ ካት ማቅን ቄሳረ ቆህካያ» ጋይዳ።

9 የዝን ፍስጦሳ አይሁዱንꬃና ኡፋይሶደስ ኮይ ጳዉሎሳጎ፥ «የሩሳላመ Ꮉንግ Ꮉና ሞትስ እዘ ታ ቲንተ ፍርድንቶደስ ኮያነ?» ያጋእ ኦጭዳ።

10 የዝን ጳዉሎሳ፥ «ታኒ ፍርድንቶደስ ቤዝዘ ቄሳረ ፍርዳ ኬꬃ ቲኖ ኤቅዳ። ኔኒ ሎይꬂ ኤርዛን ጋር ታ አይሁዱንꬃና አኮራን ቆህካያ። 11 ይኬ፥ ታኒ ቆህደባዝን Ꮉይቆስ የልꬅደባዝ ኦችደባዝ ማቅዛኮ Ꮉይቆፓ ታና አሾ ጋኦስ። የዝን ኡን ታና ሞትዘ ሞታ ጨር ማቅኮ ኦደን ታና ኡንትስ አꬂ እንጎደስ ዳንዳኦስ። ቄሳረ ታ ባዝ ፍርዶ ጋእ ኦጫነ» ጋይዳ።

12 የ ዎደ ፍስጦሳ ፋ ዞርንትዙንꬃራ ዞርንት፥ «ኔኒ ቄሳረ ታ ባዝ ፍርዶ ጋእ ኦጭዳ፤ ቄሳረጎ ቅቶዳ» ጋእ ማህዳ።

13 ኤራꬅ ቃማፓ ሱባ ካት አግርጳን ባርኒቀን ፍስጦሳ ሳርꬆደስ ቂሳርያ Ꮉንግዳ። 14 እዘ ኡን ጋማ ዎደ ጋምእን፥ ፍስጦሳ ካትዘስ ጳዉሎሳባዝ Ꮉንጋራ ያጋእ ቆንጭዝዳ፤ «ፍልክሳ ብልካይዛራ አሺ ቅትደ ፈቲ አꬄ Ꮉነ የነ። 15 ታኒ የሩሳላመ Ꮉንግደ ዎደ ካህኑንꬅ Ꮉላቁንꬅን አይሁደ ጭሙንꬅ ኤላ አፋ ፍርዶደ ጋር ታና ዎሲ ኤ ባዝ ታላ ሞትዳ። 16 ታኒ፥ ‹ሞትንትደ አꬄ ፋና ሞትዙንꬅ ቲኖ ኤቂ ፋ ሞትዳንስ ማሄ እንግካይዝን፥ ኦና ማቅኮን አꬊ እንግንትዛና ሮመ ዎጋ ባያ› ጋእ ኡንትስ ማህዳ።

17 «ይኒ ግሾ፥ ኡን Ꮉነ ሺቅደ ዎደ ታኒ ጋምእካይዛራ ዎንትስት ዎደ ፍርዳ ኬꬃ ገሊ ጳዉሎሳ ኮኦደ ጋር ኪትዳ። 18 ኤዛ ሞትዙንꬅ ኤ ካለ ዉቲ ኤቂ፥ ኢታባዛራ ኤዛ ሞትካይዛር አሻማ ጋእ ታኒ ቆፕዳን ጋር ኤዛ ሞትካያ። 19 የዝን ኡን ፋ አማኖባዝን ጳዉሎሳ፥ ‹ፋጻ የነ› ጋዘ ፈቲ Ꮉይቂደ የሱሳ ጋእንትዘ አꬄባዝ ኤራ ላላነ። 20 Ꮉና ኦህታ ታና ሻኮደስ ዴጽደ ግሾ ጳዉሎሳ የሩሳላመ Ꮉንግ፥ እዘ ፍርድንቶደስ ኮይዛኮ ጋእ ኤዛ ኦጭዳ። 21 የዝን ጳዉሎሳ ፋ ኦህቶ ቄሳረ በአደ ዎንꬅስ አች ኬꬃ ጋምኦደስ ኦጭዳ። ታኒ ኤዛ ቄሳረጎ ዳኮደ ዎንꬅስ ኤ አጭንቶደ ጋር ኪትዳ» ያጋይዳ።

22 ይኒ ግሾ፥ አግርጳ ፍስጦሳጎ፥ «ታኒ ታ ኦምተን Ꮉይ አꬄ ጋዛኖ ስኦደስ ኮያነ» ጋይዳ።

ፍስጦሳ ኤጎ፥ «ኔኒ ዎንታ ኤ ጋዛኖ ስኦዳ» ያጋይዳ።

23 ዎንትስት ዎደ አግርጳን ባርኒቀን ዳማ ቦንቾራ ሻላቁንꬃራ ካታማ የዘ አህዘ አሱንꬃራ ይእ ፍርዳ ኬꬃ ገልዳ። ፍስጦሳ ጳዉሎሳ ጼግዝ ክእዳ። 24 ፍስጦሳ፥ «ካት አግርጳ፥ Ꮉነ ኑራ የዘ አሱንꬆ፥ አይሁዱንꬅ የሩሳላመን Ꮉነን ዉይሲ፥ ‹ኤ ይኬፓ ሱባ ፋጻ የሳደስ ቤዞስ› ያጋእ፥ ታና ዎስደ አꬃ Ꮉያ ይን በእነ። 25 የዝን ኤዛ Ꮉይቆስ የልꬅዘባዝ አኮ ባዝን ታኒ ደንግካያ። ኤ ፋ ኦምተ፥ ‹ቄሳረ ታ ባዝ ፍርዶ ጋእ ኦጫነ› ጋይደ ግሾ ቄሳረጎ ኤዛ ዳኮደስ ቆፋ አጭዳ። 26 ታኒ ኤ ባዝ ታ ላꬄ ቄሳረስ ጻፎደስ ማቅዘ ኤርንትደባዝ አኮን ባያ። ይኒ ግሾ፥ ኤ ባዝ ይን ብእኮ ታ ጻፎደባዝ በንቶድ የዛኮ ጋእ ይን ቲኖ አꬂ ካት፥ አግርጳ፥ ነ ቲኖ ኤዛ ክእዳ። 27 አኮስ ጋይኮ፥ አጭንትደ አꬃ አꬅዘ ዎደ ኤ አኮስ ሞትንተዛኮ ምክናቶ ኤርስዝካይዛራ አሽዛና ታስ ኤያትꬅ አዛነ» ያጋይዳ።

<- ሐዋሩንꬅ ኦቻ 24ሐዋሩንꬅ ኦቻ 26 ->