1 ቂሳርያ፥ «ጣልያ ኦላ አሱንꬃና» ጋእንትዘ ኦልንትዙንꬅ ግዳ ፈቲ ቆርነልዮሳ ጋእንትዘ ማቶ Ꮉላቃ የነ። 2 ቆርነልዮሳ ፋ ካራ አሱንꬃራ ጾዝ ጎይንዛን ዣሽትዘ አስን፥ ዳሁንꬃና ማዳነ፥ ማህ ኡባ ዎደ ጾዝ ዎሳነ። 3 ፈቲ ዎደ ኡዱፉን ሳተ ኩምዝን ጾዝ ኪታንቾ ኤጎ ይእ፥ «ቆርነልዮሳ» ጋእ ጼጎደራ ኤ ቆንጭꬃራ ጌሽ ብእዳ።

4 ቆርነልዮሳ ዣሽቲ ኪታንችዛ ዳኪ ሎይꬂ ብእ፥ «ላꬆ፥ ይና አኮ?» ያጋይዳ።

ኪታንችዘ ማህ፥ «ነ ዎስታን ዳሁንꬃና ነ ማድዳና ጾዘ ቲኖ ቆፍንተስ የልዳ። 5 Ꮉተ አሱንꬃና እዮጰ ዳኪ፥ ጴጥሮሳ ጋዘ ስሞና ክእዞ። 6 ጴጥሮሳ አባ ጋጻ ቆለ Ꮉሽዘ ስሞና ካራ ዛቆተꬅ በትዳ» ጋይዳ።

7 ቆርነልዮሳ ፋስ ኦህደ ኪታንችዘ ቅትን፥ ፋ አሩንꬃፓ ላምኡንꬃና ጾዝ ጎይንዘ ፋ ካለ የዘ ዎታዳሩንꬃፓ ፈታ ጼጊ፥ 8 ኡንትስ ኦህ እዮጰ ኪትዳ።

9 ዎንትስት ዎደ ኡን Ꮉንግ፥ እዮጰ ካታማ ኡኮደራ እዝፑን ሳተ ጋር የዝን ጾዝ ዎሶደስ ጴጥሮሳ ፎቀላ ከዝዳ። 10 ኤ ናይꬊ ካꬃ ማደስ ኮይዳ፥ የዝን ካꬃ ካጾደራ ኤ አያናራ ማቂ ቆንጭꬅ ብእዳ። 11 ሳሎ ቡጉንትን፥ ዳማ አፉላ አዝዘ ባዝ ኦይዲ ዛላራ አይክንቲ ዎꬎደራ ኤ ብእዳ። 12 እዛ በስተ ኦይዲ ቶሄራ የዘ ጉርደ ጾꬅ፥ ሳዛራ ጎችንትዘ መትꬅን ሳሎ ላንዳ ኡባ የነ። 13 የ ዎደ «ጴጥሮሳ፥ ደንዲ ኤቂ ሹኪ ሞኦ» ጋዘ ቃላ ኤጎ ይእዳ።

14 የዝን ጴጥሮሳ፥ «ላꬆ፥ አደ! ታ ቱና ባዝ ሙሎን ሙእ ኤሮስ» ጋይዳ።

15 ማህ፥ «ጾዚ ጌሽዳኖ ነ ቱና ጋእፐ» ጋዘ ቃላ ላምእንꬃ ኤጎ ይእዳ። 16 ይናን፥ Ꮉይꬕ ቶሄ ይእዳንፓ ማቂ የ ዳማ አፉላ አዝዘ ኤልሲ ኡደ ሳሎ ኤክንትዳ።

17 ጴጥሮሳ ፋ በኤዘ ቆንጭꬅት ብልꬅታ፥ «አኮ ማቃድ የሳ?» ጋእ ፋ ዎዝንተ ቆፖደራ፥ ቆርነልዮሳ ኪተዘ አሱንꬅ ስሞና ካራ ኦጪ ደንግ ባለ ኤቅዳ። 18 ፋ ቃልቶ ኡን ꬎቅ ዪዚ፥ «ጴጥሮሳ ጋዘ ስሞና ዛቆትꬅ የዘ Ꮉነ የነ?» ያጋእ ኦጭዳ።

19 ጴጥሮሳ ቆንጭꬃራ ብእዳኖ ታዎደራ፥ ጌሽ አያና ኤጎ፥ «Ꮉይቼ፥ Ꮉይꬕ አሱንꬅ ነና ኮያነ። 20 ደንዲ ዎꬎ፥ ታ ኡንታና ኪተዘ ግሾ ሶእካይዛራ ኡንታራ ቅቶ» ያጋይዳ።

21 ጴጥሮሳ አሱንꬃጎ ዎꬊ፥ «ይን ኮይዘ ታና፤ አኮስ ይእዶተ?» ያጋይዳ።

22 ኡን ማህ፥ «ኑና ማቶ Ꮉላቅዘ ቆርነልዮሳ ኪትዳ። ኤ ጽሎ፥ ጾዝ ጎይንዘ አስን አይሁደ አሱንꬅ ግዳ ኡባ ጋማ ቦንችንትደ አስ። ቆርነልዮሳ፥ ነና ፋ ካራ ክእዚ ቃላ ኔፓ ስኦደ ፋና ጌሽ ኪታንቾ ኤስ ኦህዳ» ያጋይዳ። 23 ጴጥሮሳ አሱንꬃና ኬꬃ ገልꬂ ሞክዳ።

ዎንትስት ዎደ፥ ደንዲ ኡንታራ ቅትዳ። እዮጴ ካታማ የዘ አማንዙንꬃፓ ፈቲ ፈቲ አሱንꬅ ኤራ ዎላ ቅትዳ። 24 ዎንትስት ዎደ፥ ቂሳርያ የልዳ። ቆርነልዮሳ ፋ እግኑንꬃናን ፋ ካለ ላጉንꬃና ፈትላ ጼጊ ሺሺ፥ ጴጥሮሳ ናጋነ። 25 ጴጥሮሳ ኬꬃ ገሎደስ ይአደራ፥ ቆርነልዮሳ ኤራ የልንት ኤ ቲኖ ጎልእ ኤስ ጎይኖደስ ኮይዳ። 26 የዝን ጴጥሮሳ፥ «ደንዶ፥ ታንን ታ ኦምተ ነ ጋር አስ» ያጋእ ኤዛ ደንꬅዳ።

27 ጴጥሮሳ ቆርነልዮሳራ ኦህተራ ኬꬃ ገልዘ ዎደ ጋማ አሱንꬅ ሺቅዳኖ ደንግዳ። 28 ኤ አሱንꬃጎ፥ «አይሁደ አስ መለ ዎርዣራ ዎላ ማቃደስ ዎይ የልንቶደስ ዎጋ ባይዛኖ ይን ኤራነ። የዝን ታኒ ኦደን ቱና ዎይ ጌሽ ጋአመ ጋር ጾዚ ታና ቤዝዳ። 29 ይኒ ግሾ፥ ይን ታጎ ኪትን እጽካይዛራ ይእዳ። Ꮉተ ታና አኮስ ጼግዘዛኮ ታስ ኦሆተ» ያጋይዳ።

30 ቆርነልዮሳ፥ «ታኒ Ꮉይኖ ኦይዲ ቃማፓ ቲኖ Ꮉኒ ዎደ ኡዱፉን ሳተ ዎሳ ዎሶደራ፥ ፎእዘ ማኦ ማእደ አስ ታ ቲኖ ኤቅዳ። 31 ኤ ታጎ፥ ‹ቆርነልዮሳ፥ ጾዚ ነ ዎስቶ ስእዳ፥ ኔኒ ዳሁንꬃና ማድዳኖ ቆፕዳ። 32 ይኬ፥ አስ እዮጰ ኪቲ፥ ስሞን ጴጥሮሳ ጋዛያ ጼግዞ። ኤ፥ ስሞና ጋዘ ቆለ Ꮉሽዘ አꬄ ካራ አባ ጋጻ በትዳ› ያጋይዳ። 33 ይኒ ግሾ፥ ታ ኔጎ ኤልሲ ኪትዳ፤ ነ ይእዳና ሎኦ። ይኬ፥ ጾዚ ነና ኪትደባዝ ኡባ ስኦደስ Ꮉተ ኑ ኡቡንꬅ Ꮉነ ላꬄ ቲኖ የነ» ያጋይዳ።

34 ካሊ፥ ጴጥሮሳ፥ «ጾዚ አስስ ስኖ ብእ አስ አሳፓ ሻጎስ። [a] 35 የዝን አስ ኡባ ኦና ማቅኮን ፋስ ዣሽትዛያን ጽሎ ኦቻ ኦችዘላ ጾዚ ኡፋይትዛኖ ታ ቱሮ ቆፕዳ። 36 ጾዚ፥ ኡቡንꬅ ላꬂ ማቅደ የሱስ ክርስቶሳ ባጋራ ሳሮትꬅ ኦህተራ Ꮉና ዎንገልቶ እስራኤለ አሱንꬅስ ኪተዛኖ ይን ኤራነ። 37 ዋሐንሳ ጽንቃተ ባዝ ሳባክደ ዎደፓ አይኪ ጋልላን ይሁዳ ሳአ ኡባ የሎደስ Ꮉንዳኖ ይን ኤራነ። 38 ጾዚ ናዝረተ የሱሳ ጌሽ አያናራ ትዢ ዎልቃ እንግዳ። ጾዚ ኤራ የዘ ግሾ ሎኦ ባዝ ኤ ኦችተራ ጻላሄ ኩሸ አቅዱንꬃና ኡባ ፋꬅተራ ዉትዳ።

39 «አይሁደ ሳአን የሩሳላመ ኤ ኦችደ ኡባባዝትስ ኑ ማርካ። ኡን ማስቃላላ ሱጺ ኤዛ ዎꬍዳ። 40 የዝን ጾዚ Ꮉይꬓንꬃ ዎደ Ꮉይቆፓ ኤዛ ደንꬂ አሱንꬅስ ቆንጮደ ጋር ዪዝዳ። 41 ይና ቆንጭꬅታ ጾዚ ቲኖ ዶርደ ማርኩንꬅስ ፋትን አስ ኡባስ ማቆስ። ኤ Ꮉይቆፓ ደንድዳንፓ ማቂ ኤራ ሙእ ኡዥዳ። 42 ኑ ዎንገለ አሱንꬅስ ኦሆደ ጋራን ፋጻ የዙንꬃላን Ꮉይቂዱንꬃላ ፍርዶደስ ጾዚ ሹምደ የሱሳ ማቅዛኖ ማርክꬋደ ጋር ኑና ኪትዳ። 43 ጾዚ ኤዛ አማንዘ ኡባ ናጋርታ፥ ኤ ሱንꬅተ አቶ ጋእንትዛኖ ናቡንꬅ ማርክꬋነ» ያጋይዳ።

44 ጴጥሮሳ Ꮉጋ ይና ኦህቶ Ꮉስካይዝን ቃላ ስእዘ ኡቡንꬃላ ጌሽ አያና ዎꬍዳ። 45 ጴጥሮሳራ እዮጴፓ ይእደ አማንዘ ጋራዝንትደ አይሁደ ኡቡንꬃላን፥ አይሁደ ማቆሱንꬃላን ጌሽ አያና ዎꬍዳኖ ብእ ጋማ ቆፕዳ። 46 አኮስ ጋይኮ፥ ኡን መለ መለ ዶናራ ኦህተራን ጾዘ ዳማትꬅቶ ሳቦደራ ስእዳ።

የ ዎደ ጴጥሮሳ ማህ፥ 47 «Ꮉንስ ማህ ኑ ጋር ጌሽ አያና ኤክዱንꬅ ጻማቅንታመ ጋር Ꮉꬅ ካዮደ ኦደ?» ያጋይዳ። 48 ኡን የሱስ ክርስቶሳ ሱንꬅተ ጻማቅንቶደ ጋር ኡንታና ኪትዳ። ይንፓ ማቂ፥ ኡን ፋራ ኤራꬅ ዎደ በቶደ ጋር ጴጥሮሳ ዎስዳ።

<- ሐዋሩንꬅ ኦቻ 9ሐዋሩንꬅ ኦቻ 11 ->