1 ኑ እሹንꬆ፥ ጾዚ መቀዶንያ የዘ ዎሳ ኬꬁንꬅስ እንግደ አꬎ ኬሃትꬅቶ ይን ኤሮደ ጋር ኑ ኮያነ። [a] 2 ኡን ዳማ ማꬋራ ፋታንንትዳ፥ የዝን ኡን ኡፋይስታ ዎልቃማ። ኡን ዳሃትꬅትስ ዉዙላ ባያ፥ የዝን አꬂ እንገራ ጋማ ዳልግዳ። 3 ኡን ፋ ዎልቂት ጋራን ፋ ዎልቂትፓ ኣꬍዛኖ ካꬊ እንግዳንስ ታ ማርካ። 4 ኡን ጾዝ አስ ማድዘ ሎኦ ኦቻ ኑራ ኦቾደስ ኮይ ኑና ጋማ ዎስዳ። 5 ኡን ኑኒ ቆፕዳንፓ አꬂ ኦችዳ። ቲንꬊ ፋና ላꬅስ እንግዳ፤ ካሊ፥ ጾዘ ቆፋ ጋር ኡን ፋና ኑስ እንግዳ።

6 Ꮉና ዳልጋ ኦችቶ አይክደ ትቶ ጉጂ ኦቾደ ጋራን ይንታና ማዲ፥ ይና ኦችቶ ፎልሳደ ጋር ኤዛ ዎስዳ። 7 የዝን ይን ኡባባዝተ፥ አማኖራ፥ ኦሄራ፥ ኤራትꬃራ፥ ዳማ አሞራ፥ ኑና ሲቆራን ኡባባዝተ ዱርꬍዳን ፋና Ꮉና ሎኦ ኦችተን ይን ዳልጋ ማቃደ ጋር ኑ ኮያነ።

8 ታኒ ይኖ ኪቶደስ ጋኦስ። የዝን መሉንꬅ ዳማ አሙቶ ይን ሲቆራ የልꬅ ብእ ይን አኮ ፋና ቱሮ የዛኮ ኤሮደስ ጋነ። 9 ይን ኑ ላꬄ የሱስ ክርስቶሳ አꬎ ኬሃትꬅቶ ኤራነ። ክርስቶሳ ዱረ ማቂ በቲ፥ ይን ኤ ዳሃትꬅተ ዱርꬋደ ጋር ይን ግሾ ዳህꬍዳ።

10 ታኒ Ꮉና ኦህተ ይንታና ማድዘ ዞረ ዞሮደስ ኮያነ። ይን ኦማ በረ እማደስ ጻላላ ማቅካይዝን ይኖ ኦቾደስ አሞትꬃራን ይን ቲናነ። 11 ይን ኦቾደስ አይክደ ኦችቶ Ꮉተ ፎሎተ። ይን ይንትስ የዛን ጋር እንግኮ፥ ይና ይን እንጎደስ ቆፕዳኖ ቱሮ ማህነ። 12 ፈቲ አስ እንጎደስ አሙꬍኮ፥ ኤ እሞታ ጾዘ ቲኖ ኤክንትዛና፥ ኤ ፋስ የዛን ፋና እንግኮ ፋትን ባይዘ ባዛፓ እንጎደስ ኡንእንትን ባያ።

13 ታኒ ይኖ ጋዛና፥ ይን ኡባና ፈቲ ልከ ማቃደ ጋር ጋእ ፋትን መሉንꬅ ማꬍትፓ ሸምፕን ይን ማꬍꬋደ ጋር ባያ። 14 ይን ማꬍꬍዘ ዎደ ኡንትስ ጋንግዳንፓ ይን ማꬍትስ ማቃደ ፋና Ꮉተ ይንትስ ጋንግዳና ኡን ማꬍትስ ፌዣነ። ይኒ ፋና ይን ግዳ ዎልከ ማቃዳ። 15 ጌሽ ማጻፍተ፥ «ጋማ ሺሽደስ ትርፍካያ፤ ኤራꬅ ሺሽደስ ፋጭካያ» ጋእንት ጻፍንትዳን ጋር። [b]

16 ኑ ይንትስ ቆፕዛንጋራ ትቶን ይንትስ ቆፖደ ጋር ኦችደ ጾዘ ጋላትንቶ። 17 ትቶ ይንታጎ Ꮉንግዳና፥ ኑ ኤዛ ደንꬅꬅደ ግሾ ጻላላ ማቅካይዝን ኤ ፋ ቆፍተ Ꮉማደስ አሙꬍደ ግሾ። 18 ዎንገለ ማርክራ ዎሳ ኬꬃ ኡባነ ጋማ ኤርንትደ እሻ፥ ኑኒ ትቶራ ዳካነ። 19 ይንላ ኑኒ Ꮉና ዳልጋ እሞትꬅቶ ካንግዘ ዎደ ኑራ Ꮉማደ ጋር Ꮉና ዳልጋ ኦችትራ ላꬃ ቦንቾደስን መሉንꬃና ማዶደስ የዘ አሙቶ ቤሳደስ ኤ ዎሳ ኬꬅተ ዶርንትዳ።

20 Ꮉና እንግንትደ ዳልጋ እሞትꬅቶ፥ ኑ ኦቻላ ፌሽዘ ዎደ ኑና ቦራመ ፋና ናግንቶዳ። 21 ኑኒ ላꬄ ቲኖ ጻላላ ማቅካይዝን አስ ቲኖን ሎኦ ማቅደ ባዝ ኦቾዳ። [c]

22 ማህ ጋማ ዎደ ፋታና ግዳ ሚንግ አꬍደ ኑ እሻ፥ ኡንታራ ይንታጎ ክትዳ። ኤ ይንግዳ ሎይꬂ አማንንትዘ ግሾ Ꮉተ ይንታና ማዶደስ ጋማ አሙꬋነ። 23 ትቶባዝ ኤሮደስ ኮይዛኮ፥ ኤ ይንታና ማዶደስ ታራ ኦችዘ ታ ኦቻ ላገ። መለ እሹንꬅባዝ ማቅኮ ዎሳ ኬꬁንꬅ ኪትዱንꬃና፤ ማህ አሱንꬅ ኡን የስቶ ብእ ክርስቶሳ ቦንቻነ። 24 ይኒ ግሾ፥ ዎሳ ኬꬅታ ይን ሲቅቶን ኑ ይንታና አማንንትዛና ቱሮ ማቅዳኖ ቤሳደስ ይን ሲቅቶ Ꮉንꬅ አሱንꬃና ቤዞተ።

<- 2 ቆሮንቶሳ 72 ቆሮንቶሳ 9 ->