16
አማንዘ አሱንꬅስ ሺቅደ ማደ ሚሸ
1 አማንዘ አሱንꬅስ ሚሸ ሺሸባዝ ጋላትያ ዎሳ ኬꬅስ ታኒ ኪትዳን ፋና ይንትን ኦቾተ። [a] 2 ሚሸ ሺሽታ ታ ይንታጎ Ꮉንግዘ ዎደ ማቃመ ፋና ፈቲ ፈቲ ሳምንታፓ ቲኖ ቃማ፥ ዎጋ ዎደ ዎጋ ዎደ ፋ ደንግዛንፓ ኬሲ ፋ ካራ ሺሾ። 3 ታኒ እዘ Ꮉንግደ ዎደ ሚሽቶ የሩሳላመ የልꬆደ ፋና ይን ዶርደ አሱንꬅስ ዳብዳበ እንግ ኡንታና የሩሳላመ ኪቶዳ። 4 ኡንታራ ታ Ꮉንግዛና ኮሽዘ ባዝ ማቅኮ ኡን ታራ Ꮉማደስ ዳንዳአነ።
ጳዉሎሳ ቆፋ
5 ታኒ መቀዶንያራ አꬎደስ ቆፕደ ግሾ እዘ Ꮉንግ ይንታጎ የኦዳ። [b] 6 ታ Ꮉንግዛና አባ ማቅኮን፥ ታ ቅትዛነ ይን ታና ሞይዞደ ጋር ይን ካለ ኤራꬅ ዎደ ጋምእካይዛራ አሾስ። ሴተ አግኑንꬃና ይን ካለ አꬅካይዛራ ዋይ አሾዳ። 7 ታኒ ኦገራ አꬍተራ ይንታና በአደስ ኮዮስ። ላꬂ ጋይኮ፥ ይን ካለ ኤራꬅ ዎደ ጋምኦደስ ቆፓነ።
8 የዝን ታኒ ጰንጠቆስጠ ባአለ የሎደስ ኤፈሶነ ጋምኦዳ። 9 ታስ ኦቻ ኩምደ ዳልጋ ፉርꬅ ቡጉንትዳ፥ የዝን ጋማ ኦልንትዘ ሞርኩንꬅ የነ። [c]
10 ኤ ታ ጋር ላꬄ ኦቻ ኦችዘ አስ ማቅደ ግሾ ጢሞትዮሳ ይንታጎ Ꮉንግኮ፥ ይን ካለ ኤ ይርግካይዛራ የሳደ ጋር ዪዞተ። [d] 11 ኦደን ኤዛ ለቂፐ። ኤ ታጎ ሳሮራ ማቃደ ጋር ኤዛ ማዲ ሞይዞተ። ታኒ ኤ Ꮉንኩꬅ አማንዙንꬃራ ማቃዳኖ ናጋነ።
12 ኑ እሸ አጵሎሳ Ꮉንኩንꬅ አማንዙንꬃራ ይንታጎ Ꮉማደ ጋር ታ ኤዛ ምንꬂ ዎሳነ። Ꮉተ ይንታጎ Ꮉማደስ ኮይካያ፥ የዝን ኤስ ዎትደ ዎደ ይንታጎ Ꮉማዳ።
ዉርሱꬅ ዞረን ሳር
13 ባርኮተ፤ አማኖራ ኤቆተ፤ ጻሎተ፤ ምንጎተ። 14 ኦችቶ ኡባ ሲቆራ ኦቾተ።
15 ታ እሹንꬆ፥ እስጢፋኖሳን ኤ ካራ አሱንꬅ አካያ ግዳ ኡን ቲኖ አማንዱንꬃና ማቅዳኖ አማንዙንꬃና ማዶደስ ፋና አꬂ እንግዳኖ ይን ኤራነ። [e] 16 ይንትን ኡን ጋር አሱንꬅስን፥ ኡንታራ ኦቻራ ላቢዘ ኡቡንꬅስ ኪትንቶደ ጋር ታ ይንታና ዎሳነ።
17 እስጢፋኖሳ፥ ፈርዶናጽሳን አካይቆሳ ታጎ ይእዳና ታና ኡፋይስዳ። ይን ባይዘ በስተ ኡን ይንታና ማቂ ታ ፋጭቶ ኩንꬅዳ። 18 ኡን ይንታና ኡፋይስዳን ፋና ታናን ኡፋይስዳ። ይኒ ፋና አሱንꬃና ቦትፈተ።
19 እስያ ዎሳ ኬꬃ አሱንꬅ ይንታና ሳሮ ጋነ። አቂላን ጵርስቅላን ፋ ካራ ሺቅዘ ዎሳ ኬꬃ አሱንꬃራ ዎላ ይንታና ላꬄ ሱንꬅተ ዎዝናፓ ሳሮꬅዳ።[f] 20 አማንዘ እሹንꬅ ኡቡንꬅ ይንታና ሳሮ ያጋይዳ።