APOCALIPSIS 5

1 Diguebbʉ ya, dú janti ca hnáa ca mí ju̱xi jar ndo tju̱jnitsjɛ, mí ca̱ hnar jɛhmi jár jogui dyɛ. Car jɛhmi mí bbantzi, mí cuati yojto timbre cʉ mí mpɛhmi, cja̱ mí cuati letra pʉ mbo, hne̱h pʉ xøtze. 2 Cja̱ pé dú janti hnar ángele, már nzɛdi cja̱ mí ndo ña̱ nzajqui, bi hñi̱na̱:

―¿Toca̱ rí ntzöhui da xøhtibi yí timbre nʉr jɛhmi cja̱ da cca̱hti ter bɛh ca̱ i ma̱?―

3 Cja̱ jin to mí bbʉy, ni digue pʉ jar ji̱tzi ni digue cua jar jöy, ni digue pʉ mbo jar jöy pʉ jabʉ i bbʉh cʉ ánima. Jin to mí bbʉh ca mír ntzöhui di xohti car jɛhmi cja̱ di cca̱hti ter bɛh ca̱ i ma̱. 4 Nugö, dúr Juan, ndár øde, cja̱ dú ndo nzoni, porque jin to mí bbʉh ca di pɛhtzi derecho pa di xohti car jɛhmi cja̱ di cca̱hti. 5 Diguebbʉ ya, bi nzojqui hna cʉ tita, bi xijqui:

―Dyo guí zoni, como i bbʉj nʉ hnar hñøjø nʉ i jñɛjmi hnar león, rí hñe̱je̱ digue cár familia car Judá. Bi hmʉy digue cár cji ca ndor rey David, cja̱ xí ngo ʉ́r lugar‑ca̱. Guegue xí nda̱pi ca rá nttzo, cja̱ i pɛhtzi derecho da xøhtibi quí timbre car jɛhmi, da tʉngui cja̱ da cca̱hti te i ma̱.―

6 Diguebbʉ ya dú janti ca hnaa, ncjahmʉ múr tzi dɛti. Mí ni̱gui cʉ seña pʉ jabʉ xquí ntjohtibi cár cuerpo bbʉ mí bböhti, cja̱ pé mí bbʉjtjo. Mí bbʉ yojto quí hmondri hne̱ yojto quí dö. Cʉ yojto quí dö i jñɛjmi cár Tzi Espíritu ca Ocja̱. Nuca̱, i bbʉy gá yojto cja̱ i dyo göhtjo nʉr jöy, göhtjo i janti. Cʉ veinticuatro tita, mí i̱tijʉ madé car ndo tju̱jnitsjɛ nʉ jabʉ mbí ju̱x car Tzi Ta ji̱tzi. Cja̱ cʉ gojo ángele cʉ mí jñɛjmi zu̱we̱, mí bböh pʉ jáy nttza̱ni car ndo tju̱jnitsjɛ. Nu ca hnáa ca mí ncja ngu hnar Tzi Dɛti, már bböj nʉ mbo cʉ veinticuatro tita, delante nʉ jabʉ mbí ju̱x car Tzi Ta. 7 Diguebbʉ ya car Tzi Dɛti bi guati pʉ jar ndo tju̱jnitsjɛ, bi ma bú ca̱ car jɛhmi ca már ca̱ cár Tzi Ta jár jogui dyɛ. 8 Cja̱ bbʉ mbú cá̱ car jɛhmi car Tzi Dɛti, nubbʉ, cʉ gojo ángele cʉ mí jñɛjmi zu̱we̱ co cʉ veinticuatro tita, bi guatijʉ car Tzi Dɛti, bi nda̱ndiña̱jmu̱jʉ delante guegue. Cʉ tita, göhtjo mí tjɛjʉ bbida gá arpa cja̱ co moji gá oro cʉ mí ñu̱xi guitjoni. Car guitjoni i jñɛjmi quí oración quí ba̱jtzi ca Ocja̱ bbʉ rí bøxi ji̱tzi. 9 Diguebbʉ ya, cʉ veinticuatro tita, göhtjojʉ bi xöjtibijʉ hnar tzi ddadyo tsjödi car Tzi Dɛti. Mí ma̱jmʉ ncjahua:

Nuquiguɛ, grí ntzöhui gui ca̱guɛ na̱r jɛhmi cja̱ gui xøhtibi yí timbre, como guehquɛ bi bböjtiqui.

Nuquɛ co quer cji xcú tönguije dí cja̱hnije, xcú cjaguije í mɛjtiguije ca Ocja̱.

Dá e̱jme göhtjo tema raza co göhtjo tema nación.

Dí mi̱ngu̱je göhtjo tema jöy, cja̱ dí ña̱je göhtjo tema jña̱.

10 Xcú cuajtiguije jár dyɛ nir Tzi Ta pa gu øhtibije quí jmandado cja̱ gu pɛjpije guegue.

Guejtjo da ttajquije cʉm cargoje pa gu mandadoje pʉ jar jöy.

Mí ncjahua car tsjödi bi tsjöjtibi car Tzi Dɛti.

11 Diguebbʉ ya dú janti hnar ndo jmundo cʉ ángele, mí bböh pʉ jáy nttza̱ni car ndo tju̱jnitsjɛ. Mí yojmi cʉ gojo ángele cʉ mí jñɛjmi zu̱we̱ co cʉ veinticuatro tita. Nu cʉ ángele, már ndo ngu̱tsjɛ, mí tjoh hnar millón cʉ gá millón. Cja̱ dú øjcö göhtjo‑cʉ, már xöjmʉ nzajqui, már ma̱jmʉ:

12 Dí xöjtibije nʉr Tzi Dɛti nʉ bi bböhti.

Rí ntzöhui da jña̱ cár cargo pa da mandado. Cja̱ rí ntzöhui da ttuni göhtjo cʉ riqueza cʉ i bbʉ jar mundo.

Jøntsjɛ guegue i pa̱di göhtjo, cja̱ ʉ́r mɛjti guegue car ttzɛdi ca dár zɛcöje.

Rí ntzöhui gu i̱htzibije guegue, cja̱ gu öjpije mpöjcje, cja̱ gu nda̱neje.

13 Diguebbʉ ya, pé dú øde, már ña̱jʉ göhtjo yʉ i bbʉ í nzajqui, göhtjo yʉ te xí dyøti ca Ocja̱, yʉ i bbʉh pʉ jar ji̱tzi, cja̱ co yʉ i bbʉjcua jar jöy, cja̱ co yʉ i bbʉh pʉ mbo car mar. Göhtjo mí ña̱jʉ, mí ma̱jmʉ:

Dí xöjtibije nʉr Tzi Ta nʉ i ju̱x pʉ jabʉ i mandado, co guejti nʉr Tzi Dɛti.

Dí i̱htzibije guegue, cja̱ dí nda̱neje.

Rí ntzöhui‑yʉ da mandadohui göhtjo ʉr tiempo, nim pa jabʉ drí tzöyahui.

14 Cja̱ bbʉ mí guadijʉ mí xöjmʉ, nubbʉ bi ma̱n cʉ gojo ángele cʉ mí jñɛjmi zu̱we̱:

―Cierto, rí ntzöhui da tsjöjtibi‑yʉ cja̱ da mandadohui göhtjo ʉr tiempo.―

Cja̱ guejti cʉ veinticuatro tita bi nda̱ndiña̱jmu̱jʉ, bi nda̱nejʉ car Tzi Dɛti, yojmi cár Tzi Ta, como guegue‑cʉ i cja ʉ́r nzajquihui göhtjo ʉr tiempo, nim pa jabʉ drí tjegue.

Los siete timbres