―Majuąni dí xi ahʉ, 'bʉ i 'da ahʉ ngue hin gni tuhʉ 'bʉ bi dʉ'mi di manda ua rá ts'ɛdi Oją.
2 Nu'bʉ mi tho'a n'dato pa xím man ra Jesús na, bi zixa ra Pedro nɛ'a ra Jacobo nɛ ra Xuua bʉ ma'ueni bʉ bí ja n'da ra t'øhø xʉn hɛ̨ts'i. Nu'bʉ mí zøm bʉ, bi nu yʉ́ xädi bim pä'a ra Jesús. 3 Nɛ rá pahni bim pädi bi fɛxni, nɛ ɛ̨mmɛ bi t'axqui xinda gue'ʉ gätho mi'da t'ɛ̨mbi xʉn t'axi. 4 Nɛ bi nɛqui bʉ ra Elías n'youi ra Moisés, bin yąhʉ ra Jesús, mi 'bʉh maya'bʉ ʉ. 5 Nu ra Pedro bʉya bi xih ra Jesús:
―Ma xänbate i, xʉn ho ngue gätho dí 'bʉhmbʉ ua ya, bi 'yɛ̨na. Ga høhmbe hyu yʉ t'ʉngu. N'da'e nɛ n'da Moisés, nɛ n'da Elías, bi 'yɛ̨na.
6 Ngubʉ bi ma nguetho him mi pądi 'bɛ'a bi ma nguetho ɛ̨mmɛ bi mbidi. 7 Nɛ nubʉya, bá ɛ̨h yʉ güi bi gomp'ʉ mi 'bä ʉ nɛ bi 'yø a n'da ra nde ʉ ngue bin yą bʉ ja yʉ güi, bi 'yɛ̨na:
―Guehna ma Ts'ʉnt'ʉ ɛ̨mmɛ dadí huɛ̨qui, dami 'yømanhohʉ 'bɛ'a da man na, bi 'yɛ̨n a ra nde bin yą.
8 Nɛ nu'bʉ min hanni ʉ yʉ́ xädi ra Jesús, njon mam bi nu, hønt'a ra Jesús bi nu i 'bäpʉ.
9 Nɛ nu'bʉ mi gąpʉ ja ra t'øhø, bi 'yɛ̨mp'ʉ yʉ́ xädi ngue njo'o to da xifi 'bɛ'a xi nu bʉ, jague'bʉ bi dąmbɛ̨nisɛ a ra Jesús gue nu'a bin ją'i ua ja ra ximhäi a. 10 Janangue a bi bɛ̨ntho a ram hma bi sifi nɛ him bi ma. Nɛ bin 'yänzɛhɛ nɛ bin 'yɛ̨mp'ʉ:
―Bɛ'a ní mba a ram hma bi ma ra Jesús ngue da dąmbɛ̨ni.
11 Nɛ bi 'yän'na ra Jesús ʉ bʉya:
―'Bɛ'a ní mba a i man yʉ xänbate niją ngue jatho duam 'bɛt'o ra Elías nɛ m'bɛjua ra Cristo, bi 'yɛ̨mbi.
12 Mi dą a ra Jesús, bi 'yɛ̨mp'ʉ:
―Majuąni im man ʉ, bam 'bɛt'o ra Elías di hoqui gätho 'bɛ'a ja ua. Nɛ ha guím bɛ̨mhbʉ 'bɛ'a man rám hman Oją ngue din ja bʉya, ngue da zøh man'da din ją'i ua ja ra ximhäi, da nu xʉn ngu ran ʉnbi nɛ da t'ɛ̨mbi nte di muui. 13 Pɛ dí xi ahʉ ngue bi zøcua a gue bi thocpa rá 'bɛfi ra Elías, nɛ bi 'yørpe gätho mí ndesɛ yʉ ją'i da 'yørpe, tengu nt'o't'i nangue a, bi 'yɛ̨na.
Ra Jesús bi hoc'a n'da ra t'ʉhni min 'youi ra zįthu
14 Nɛ nu'bʉ mi zøpʉ 'bʉh mi'da yʉ́ xädi bi nu n'da munts'i yʉ ją'i ngue madi thɛ̨'ts'ʉ. Nɛ nu'ʉ 'da yʉ xänbate niją ngue madin junthʉ yʉ́ xädizɛhɛ ra Jesús. 15 Gätho yʉ ją'i mi 'bʉpʉ bi hyonya thoho 'bʉ min nu ba ɛ̨pʉ ra Jesús nɛ bin 'yɛ̨mp'ʉ: “Bɛ'a din ja ya.” Nɛ 'bex bin tihi bi mba bí zɛngua. 16 Nɛ nu ra Jesús bi 'yän'dʉ nɛ bi 'yɛ̨mp'ʉ:
―'Bɛ'a gue gnín junthʉ, bi 'yɛ̨mp'ʉ.
17 'Bex bi dą a n'da ran 'yohʉ mín 'yohʉ yʉ ją'i:
―Xänbate i, nugä bá sigä ua n'da ma ts'ʉnt'ʉ ngue in 'youi ra zįthu di japi i gore. 18 Nɛ hønbʉ go hapʉ i sits'i, nɛ i huą'ts'i, nɛ i pøn yʉ fʉgui rá nde bʉya. Nɛ di cuxt' yʉ́ ts'i nɛ di bøcabi. Nɛ dá xi ʉ ni xädi bʉya gue da hyønba thi ra zįthu pɛ him bi zä, bi 'yɛ̨n'a.
19 Nu'a ra Jesús bi 'yɛ̨mp'a:
―Nu'ehʉ guexta a hin guí ɛ̨c'yɛihʉ 'bɛ'a dí xi ahʉ. Ha'mi pa ngue ga tøp'a thoho ahʉ ngue gui 'yɛ̨c'yɛigahʉ. Nu'a ni ts'ʉnt'ʉ ba singa ya, bi 'yɛ̨n'a ra Jesús.
20 Bá ts'i bʉya. Nu'a ra zįthu 'bʉ mi nu ra Jesús 'bex bi dɛxa häi ra ts'ʉnt'ʉ min 'youi. Nɛ nu'bʉ mi zo bʉ häi din dąn bʉya, nɛ i pøn yʉ fʉgui rá nde. 21 Nu ra Jesús bi 'yän'na rá ta ra ts'ʉnt'ʉ:
―Man jąm'bʉ bi mbʉdi.
Bi dą a rá ta ra ts'ʉnt'ʉ bʉya:
―Bi mbʉ 'bʉ min t'ʉhni. 22 Nɛ xʉn ngu yʉ nįdi di japi i apʉ ja ra sibi nɛpʉ po ra dehe 'bʉ i 'yo bʉ, i nde dí du a. Nu'bʉ da zä, dami zɛc'be gui huɛ̨ga'be, bi 'yɛ̨mbi.
23 Nu ra Jesús bi dądi:
―Hąhą, nu'bʉ guí ɛ̨c'yɛi gue i ja ma ts'ɛdi. Gätho din ja a da nde n'da ra ją'i 'bʉ i ɛ̨c'yɛi i ja rá ts'ɛdi Oją, bi 'yɛ̨mbi.
24 Nu'a rá ta ra t'ʉhni 'bex bi dąti nts'ɛdi:
―Majuąni dí ɛ̨c'yɛi pɛ dami jaqui man'da ga ɛ̨c'yɛi xʉn ho, bi 'yɛ̨na.
25 Nɛ min nu ra Jesús, man'da ni zøtho yʉ ją'i, janangue a 'bex bi hyøn a thi ra zįthu min 'youi ra ts'ʉnt'ʉ, bi 'yɛ̨mbi:
―Grá gore zįthu nɛ grá gogu, dami pøm bʉ nɛ him man gui cʉrpʉ rá mbʉi na ra ts'ʉnt'ʉ, bi 'yɛ̨mbi.
26 Nɛ nu'a ra zįthu bi mbafi nɛ nts'ɛdi bi huąspa rá ją'i ra t'ʉhni, nɛ bi bøm bʉya. Nu'a ra t'ʉhni bi gohi tengu 'bʉ xi du. Nɛ xʉn ngu ʉ ɛ̨na: “Bi du.” 27 Pɛ nu'a ra Jesús bi bɛnba rá 'yɛ, nɛ bi xots'i, nɛ bim 'bäh ra t'ʉhni bʉya.
28 Nɛ bi mbähä yʉ́ xädi ra Jesús bʉ ja ra ngu bʉya. Nu'bʉ mi zøm bʉ bi 'yän bʉ ma'ueni ts'ʉ:
―Hanja him bi zä dá hømhbe thi ra zįthu min 'youi ra t'ʉhni, bi 'yɛ̨n'ʉ yʉ́ xädi.
29 Nɛ nu ra Jesús bi 'yɛ̨mp'ʉ:
―Nuna ra zįthu tengu na, hin da zä gui hyømhbʉ thi 'bʉ hinga m'bɛt'o gui 'yɛ't' nin sihmɛhʉ nɛ ɛ̨mmɛ gan yąhʉ Oją, bi 'yɛ̨mp'ʉ yʉ́ xädi ra Jesús.
Ra Jesús im ma mahøn'a rán dąte
30 Nu'bʉ mi bøm bʉ ra Jesús nɛ yʉ́ xädi, bi mbähä bʉ Galilea, nɛ nu ra Jesús njom bi ndepe da bądi ngue i 'yo bʉ. 31 Nguetho mí xänba yʉ́ xädi nɛ mí ɛ̨mbi:
―Nugä nque dán ją'igä ua ja ra ximhäi, da mba ma dägä bʉ ja yʉ́ 'yɛ yʉn 'yohʉ nɛ da thogä. Nɛ nu'bʉ dá tu, ga thąmbɛ̨nigä 'bʉ na hyupa. 32 Pɛ nu yʉ́ xädi him bi bądi 'bɛ'a nam bøn'a bi ma nɛ mí su da 'yänni.
Nu'a i nde dim 'bɛt'o din 'yɛ̨hɛ thoho a
33 Nɛ bi zøm bʉ Capernaum bʉya. Nɛ nu'bʉ mi zøm bʉ ja yʉ́ ngu, nu ra Jesús bi 'yän 'dʉ yʉ́ xädi:
―'Bɛ'a gnín junthʉ bʉ 'yu.
34 Nɛ him bi dą ʉ nguetho xin junt pʉ 'yu, xin 'yänni nangue'a to'o dim 'bɛt'o. 35 Nu'bʉ min säya ra Jesús,
―Bá thąmhbʉ ua, bi 'yɛ̨mp'ʉ 'dɛ'mayoho yʉ́ xädi. Nɛ nubʉya bi 'yɛ̨mp'ʉ:
―To'o nde di ngʉrbi da 'yøt'e ngue dim 'bɛjua thoho nɛ din 'yɛ̨hɛ nangue gätho ʉ mi'da, bi 'yɛ̨n'a ra Jesús.
36 Nɛ nubʉya bi japi dim 'bä inde n'da ra t'ʉhni, nɛ bi dospa rá xįxi nɛ bi 'yɛ̨mp'ʉ:
37 ―Nu'a te'o i simanho n'da ra t'ʉhni nangue ma thuhugä, nɛcä i simanhogui. Nɛ nu'a to'o i simanhogui, hinga høngdä i simanhogä a pɛ nɛ'a Oją bá pɛngä ua i simanho a, bi 'yɛ̨n a ra Jesús.
Nu'a i tɛn rá ts'ɛdi ra Jesús rám fäts'iui a
38 Nu ra Xuua bi 'yɛ̨mp'a ra Jesús:
―Xänbate i, xtán nuhe n'da ran 'yohʉ i ndøn'na ni thuhu 'bʉ i høn a thi yʉ zįthu in 'youi 'da yʉ ją'i, nɛ dá hɛcpahe, nguetho hin dín 'yohʉ.
39 Pɛ nu ra Jesús bi 'yɛ̨mp'ʉ:
―Nde'bʉ hin xqui hɛcpahʉ nguetho hin di c'ąman'ʉgä to'o øt' yʉn t'øt'e mixte nangue ma ts'ɛtigä. 40 Nɛ nu'ʉ to'o i 'bʉi ngue him man sʉihʉ, gue'ʉ mam fäts'ihʉ ʉ. 41 Hønt'a go te'o di 'da ahʉ ts'ʉ ra dehe ngue i pądi guí tɛngahʉ, majuąni dí xi ahʉ i ja 'bɛ'a di un Oją a nangue ran ho bi 'yøt'ahʉ, bi 'yɛ̨n a ra Jesús.
Nu'a da 'yøt' ran ts'o xʉn ngu ran ʉnbi da nu a
42 Nɛ xø bi 'yɛ̨n'a ra Jesús:
―Hønt'a te'o di 'bɛpi da 'yøt' ran ts'o n'da ra t'ʉhni i ɛ̨c'yɛigui, xʉn ʉtho ran ts'ɛmbi da nu a. Man'da xʉn ʉ xinda gue'bʉ da thurpi rá 'yʉga bʉ ja ra do ngue ra jʉni xʉn hyʉ, nɛ da t'ɛn bʉ mbonthe ja ra deją. 43 Nu'bʉ ni 'yɛhʉ di ja ahʉ gui 'yøthʉ ran ts'o, xʉn ho 'bʉ gui 'yøthʉ tengu 'bʉ gui hyɛjʉ. Madague gan do'yɛhʉ pɛgue gui tįmhbʉ ra te maząi, xinda gue'bʉ di ja yoho ni 'yɛhʉ nɛ gui nuhʉ ran ʉnbi maząi guepʉ ja ra sibi njąm'bʉ i huɛ̨t'i. 44 Xʉn ʉtho guin nuhʉ bʉ 'bʉ, tengu tho 'bʉ i sa a ni ngøhʉ yʉ zu'uɛ̨, nɛ njąm'bʉ din hɛ̨ a dí zapi gätho yʉ pa, nɛ tengu 'bʉ n'da ra sibi njąm'bʉ da huɛ̨t'i.
45 O nu'bʉ ni guahʉ di ja ahʉ gui 'yøthʉ ran ts'o, xʉn ho 'bʉ gui 'yøthʉ tengu 'bʉ gui hyɛjʉ. Madague gan doguahʉ pɛgue gui tįmhbʉ ra te maząi xinda gue'bʉ di ja yoho ni guahʉ nɛ gui nuhʉ ran ʉnbi maząi. 46 Xʉn ʉ tho guin nuhʉ bʉ 'bʉ, tengu tho n'da ra du ngue 'bʉh yʉ́ zu'uɛ̨ sap yʉ́ ngø nɛ njąm'bʉ din hɛ̨ a ni zapi gätho yʉ pa, nɛ tengu 'bʉ n'da ra sibi njąm'bʉ da huɛ̨t'i.
47 O nu'bʉ ni dähʉ di ja ahʉ gui 'yøthʉ ran ts'o, xʉn ho 'bʉ gui 'yøthʉ tengu 'bʉ gui hyąhmbʉ. Madague gan 'dadä thohohʉ, pɛgue gui cʉthʉ bʉ di manda rá ts'ɛdi Oją, xinda gue'bʉ di ja yoho ni dähʉ nɛ gui nuhʉ ran ʉnbi maząi. 48 Xʉn ʉ tho guin nuhʉ bʉ 'bʉ, tengu tho n'da ra du ngue 'bʉh yʉ́ zu'uɛ̨ sap yʉ́ ngø nɛ njąm'bʉ din hɛ̨ a ni zapi gätho yʉ pa, nɛ tengu 'bʉ n'da ra sibi njąm'bʉ da huɛ̨t'i.
49 Gätho ahʉ din ja ahʉ yʉn ʉnbi 'dahma gui pømanhohʉ, tengu tho ʉ yʉ 'bøts'e din t'un Oją i pa ma japi ra ų ngue da bømanho. 50 Nu ra ų xʉn ho. Pɛ nu'bʉ bi 'bɛh rá ts'ɛdi ya hin'yʉ 'bɛ'a sä dín hoqui. Nɛ ngutho ahʉ o guidi jafʉ gui 'bɛhmbʉ ran ho i ja ahʉ. Pɛ guim 'bʉmanhohʉ ni mija'ihʉ.
