1 Nu'ʉ yʉ pa ʉ, xʉn ngu yʉ ją'i bim pɛti mahøn'a bʉ ma'ueni mi 'bʉh ra Jesús, nɛ nte mi ja bʉ 'bɛ'a da zi, nguetho ma'ueni bʉ. Janangue a bi zohn'dʉ yʉ́ xädi ra Jesús nɛ bi 'yɛ̨mp'ʉ:
2 ―Nhuɛ̨cate tho yʉ ją'i nguetho ná hyupa dí 'bʉhmbʉ ua ya, nɛ hin'yʉ da zi. 3 Nɛ nu'bʉ ga pɛnpʉ yʉ́ ngu yʉ ją'i ngue ban sihmɛ bʉ masque da güent ra thuhu bʉ 'yu nguetho nu'ʉ 'da yabʉ bá nɛts'i, bi 'yɛ̨n a ra Jesús.
4 Bi dą ʉ yʉ́ xädi bʉya:
―Ma'ueni ua, hapʉ da zä da thįn a da zi ya 'bʉcua.
5 Nu ra Jesús bi 'yän'dʉ:
―Hangu yʉ hmɛ guí cʉhʉ, bi 'yɛ̨mp'ʉ.
―Yotomhmɛ, bi 'yɛ̨n ʉ.
6 Nu ra Jesús bʉya bi xifi da hyupʉ häi yʉ ją'i. Nɛ bi hyąn ʉ yotomhmɛ bi 'yäp ra jamadi Oją nɛ bi xɛm bʉya, bi un'dʉ yʉ́ xädi di darpa ʉ yʉ ją'i i hupʉ. 7 Nɛ yʉ t'ʉhuą mi cʉ ʉ, bi jąpi nɛ bi un'dʉ yʉ́ xädi bʉya bi darpa yʉ ją'i hupʉ. 8 Gätho bin sihmɛ ʉ nɛ bin niyą xʉn ho. Nɛ nu'bʉ mi mba ma pɛti ʉ bi bongui, bin ja yoto 'bøts'e. 9 Nɛ nu'ʉ bin sihmɛ mi jua'i goho mahuąhi. Nɛ nubʉya, bi xih yʉ ją'i da mba yʉ́ ngu. 10 Nɛ bi yʉrpʉ ja ra mbosa ra Jesús bʉya nɛ yʉ́ xädi, bi zøm bʉ ra häi Dalmanuta.
Yʉ fariseo i äp ra hmɛpya a ra Jesús
11 'Bex bi zøm bʉ yʉ fariseo bʉya bi zä ra Jesús 'bʉ majuąni Oją bi un rá ts'ɛdi nɛ bi 'yäp yʉ hmɛpya mahɛ̨ts'i. 12 Pɛ nu ra Jesús bin gą'ts'i, bi du rá mbʉi nguetho guexta'a hingui ɛ̨c'yɛi gue ja rá ts'ɛdi, nɛ bi 'yɛ̨mp'ʉ:
―Hanja ngue guexta'a guí äjʉ yʉ hmɛpya. Majuąni dí xi ahʉ hin te ma hmɛpya ga ut'ahʉ ya.
13 Nɛ bi zopʉ ʉ bʉya, bi mba bi yʉrpʉ ja ra mbosa mahøn'a ʉ, bi mba bʉ 'danguadi.
Yʉ́ xädi ra Jesús bi xifi di jamansu nangue yʉ́n xädi yʉ fariseo
14 Pɛ nu yʉ́ xädi ra Jesús bi pumbɛ̨ni him bi hyąx ra hmɛ. Nɛ hønt'a zi n'dam hmɛ mi o bʉ ja ra mbosa. 15 N'da ran t'uti bi xih yʉ́ xädi ra Jesús nɛ bi 'yɛ̨mbi:
―Dami jamansuhʉ nangue rá íxi yʉ fariseo nɛ rá íxi ra Herodes, bi 'yɛ̨mp'ʉ.
17 Pɛ nu ra Jesús 'bex bi bądi ngue him mi pą ʉ ngue gue'ʉ yʉ́n t'øt'e yʉ fariseo nɛ'ʉ mi tɛn ra Herodes bi xifi, nɛ bi 'yɛmp'ʉ:
―Ha gue'a gnín 'yänhdʉ a, ngue nte bá hąhʉ ra hmɛ. Hin gadin 'yomfɛ̨nihʉ, xʉm mɛ tho ni mbʉihʉ. 18 Ja ni dähʉ nɛ hin guím bɛ̨mhbʉ 'bɛ'a gá nuhʉ, ja ni zaguhʉ nɛ hin guím bɛ̨mhbʉ a gá 'yøhmbʉ. 19 Nɛ nu'bʉ má xɛngä cʉt'a yʉ hmɛ dá japi bin xąndi janague bin niyą xʉn ho cʉt'a mahuąhi dá 'uįngä, ha'mi 'bøts'e yʉ xɛqui gá pɛthʉ thą.
Nɛ bi 'yɛ̨n ʉ:
―'Dɛ'mayo 'bøts'e.
20 Nɛ nu'bʉ má xɛngä yoto yʉ hmɛ dá japi bin xąndi janangue a bin niyą xʉn ho goho mahuąhi dá 'uįngä, ha'mi 'bøts'e gá pɛthʉ yʉ xɛqui thą.
Nɛ bi 'yɛ̨n'ʉ:
―Yoto 'bøts'e.
21 ―Ha guexta'a hin guí pąhmbʉ a dím mangä, bi 'yɛ̨n'a ra Jesús.
Ra Jesús bi hoc'a n'da ra xädä bʉ ra hnini Betsaida
22 Nu'bʉ mi zøm bʉ ra hnini Betsaida ra Jesús nɛ yʉ́ xädi, 'bex bá ts'inba n'da ra xädä, nɛ bi t'äp ra mate da dädi. 23 Nu ra Jesús bʉya bi bɛnba rá 'yɛ ra xädä nɛ bi zix bʉ ma'ueni ts'ʉ ra hnini. Bi zorpa yʉ́ dä nɛ bi därpa yʉ́ xidä, nɛ nubʉya bi 'yän 'bʉ in nu ts'ʉ ran nɛqui. 24 Nɛ nu'bʉ min hanni ra xädä bi 'yɛ̨na:
―Dín nugä yʉ ją'i ya, ɛ̨na yʉ za, pɛ i 'yo, bi 'yɛ̨na.
25 Nɛ bi därpa yʉ́ dä mahøn'a nɛ bi japi bi nu xʉn ho ran nɛqui bʉya. 26 Nɛ nu ra Jesús bʉya bi mbɛnpʉ rá ngu bi 'yɛ̨mbi:
―Hin gui mba bʉ hnini nɛ njo'o to gui xifi nangue a dá øt'e'e, bi 'yɛ̨mp'a mí xädä.
Ra Pedro bi ma gue gue'a rá Thahni Oją a ra Jesús
27 Nɛ nu'bʉ mi bøm bʉ ra hnini Betsaida a ra Jesús nɛ yʉ́ xädi, bi mbähä bʉ ja yʉ hnini ra xɛqui Cesarea Filipo. Nu'bʉ mi mba bʉ 'yu bi 'yän'ndʉ yʉ́ xädi nɛ bi 'yɛ̨mp'ʉ:
―'Bɛ'a i man yʉ ją'i nanguecä, bi 'yɛ̨n'a ra Jesús.
28 Nɛ nu'ʉ bi dąti:
―Ɛ̨n ʉ 'da yʉ ją'i gue'e grá Xuua Nxixyą. Nɛ nu'ʉ mi'da i ɛ̨n ʉ gue'e grá Elías. Nɛ mi'da i ɛ̨n ʉ, gue'e 'da ʉ yʉ pøngahyą mi 'bʉh maya'bʉ, bi 'yɛ̨n ʉ yʉ́ xädi.
29 Nu ra Jesús bi 'yänzɛhɛ yʉ́ xädi mahøn'a:
―Xi ahʉ, 'bɛ'a guí mamhbʉ nanguecä.
'Bex bi dą a ra Pedro, bi 'yɛ̨mbi:
―Nu'i gue'e grá Cristo, rá Thahni i Oją, bi 'yɛ̨n'a. 30 Nɛ nu'a ra Jesús bi hɛcua yʉ́ xädi ngue hin da ma to'o a.
Bi man ra Jesús nangue rán dątezɛhɛ
31 Nu ra Jesús bi dʉ'mi bi xi ʉ yʉ́ xädi 'bɛ'a da t'ørpe ngue gue'a bin ją'i ua ja ra ximhäi a, nɛ bi xi'ʉ ngue hin da numanho ma ngʉrbihe yʉ dąc'yɛi, nɛ yʉ ngʉrba mbäją nɛ yʉ xänbate niją, nɛ bi xi ʉ jatho da nu xʉn ngu ran ʉnbi nɛ da tho, nɛ da dąmbɛ̨ni 'bʉ ná hyupa. 32 Nɛ bi xifi xʉn ho 'bɛ'a da t'ørpe, hin'yʉ 'bɛ'a bi gøn'dʉ. Pɛ nu ra Pedro bi zixmanhɛ̨ nɛ bi hɛcpi, bi 'yɛ̨mbi:
―Njon gui japi da bɛnt'i i, damin yąni, bi 'yɛ̨mbi. 33 Nu ra Jesús bi hyand bʉ mi 'bäh mi'da yʉ́ xädi 'bʉ mi 'yɛ̨mp'a ra Pedro:
―Dami 'uegue nangue ma hmigä grá zįthu Satanás. Nu'i hingui sä guim bɛ̨ni tengu im bɛ̨n Oją, hønt'a guím bɛ̨n a guín nu ua ja ra ximhäi, bi 'yɛ̨mbi.
34 Nu'a ra Jesús bʉya bi zohn'dʉ yʉ ją'i nɛ yʉ́ xädi nɛ bi 'yɛ̨mp'ʉ:
Hønt'a go to'o i nde da dɛngui, hin da zän zɛhɛ 'bɛ'a da 'yøt'e nɛ da hyät yʉn ʉnbi madague da tho, nɛ da bɛ̨ni tengu dím bɛngä. 35 Nguetho nu'ʉ to'o i su da du nanguecä, pɛ gätho yʉ pa da nu ran ʉnbi maząi ʉ, pɛ nu'ʉ hingui su da du nanguecä nɛ nangue mam hmangä, gätho yʉ pa maząi dim 'bʉ ʉ. 36 Hin'yʉ 'bɛ'a xʉn ho da nu ʉ yʉ ją'i 'bʉ xtí pɛti gätho 'bɛ'a i ja ua ja ra ximhäi, nɛ hønt'a ran ʉnbi maząi da nu ʉ. 37 Hin'yʉ 'bɛ'a sä da 'yøt'a n'da ra ją'i ngue da 'yɛ̨na di pøsɛ rá te, bi 'yɛ̨n a ra Jesús.
38 Nɛ xø bi 'yɛ̨na:
―Nɛ nu'a to'o i pɛ'ts' rá sä nanguecä nɛ nangue mam hmangä bʉ 'bʉ ʉ hingui ɛ̨c'yɛi Oją, nɛcä ngue dán ją'igä ua ja ra ximhäi, xín ga ɛ̨mbi ma t'ʉhni 'bʉ rán zɛgui ra pa a, 'bʉ bá pengä mahøn'a. Nɛ din jagä rá ts'ɛdi ma Ta bʉ mahɛ̨ts'i nɛ gätho yʉ́m 'bɛhni ban 'yohe 'bʉ bá ɛ̨cä mahøn'a, bi 'yɛ̨n a ra Jesús.
<- SAN MARCOS 7SAN MARCOS 9 ->
