5
Brak tein matpa gon bok ma wamtip ohe meng oh
1 Gahan noh wandeioh mutuh ap tan ma tongnot pat han oh orhe bes oper tan oh brak tein matin gon bok tit marin patgop. Kat dahdapat kat dahdapathe brak matpa bok tit marin patgop. Marin pat oh be han ihir dapetipririm beshei gata gap ohsi kasip matpa bok oh marin patgop. 2 Marin pathe daham wandeioh Got ohsi tap hat pat han enser kasipnap han tit kasip mengtei Wo. Wo. Han nih ongeng tahat patdapat gata moh emara brak moh dapetin ina hat pato rit ungop. 3 Rit utporhan ama brak oh dapem satin han tit aw tei mahat ma Got ohsi tap hat pati hano kakdah mama pati hano haputpa ire pati mong tem hrep maham ma pati hano ihir ama brak oh dapem satin han ihir ti na pati hangopa. 4 Na patihan ongeng tahat patdapat gata gap moh emara brak moh dapem satin han tit na pat moho daham noh ruumsan yimtip. 5 Yimtiporhan han pohon maihir tit We. Go yimapra. Wamtin. Juda bap ire kasip han raion hatin hat pat han Depit ohe puh ohdapat mahaw ihirnong ambapte matir ohoh ihan ohwi gata gap emara dapetin ina hat patmur napongop.
Jon oh sipsip bap wamaro hatip ohe meng oh
6 Gahan noh wandeioh mutuh ohe ap tan tongnoma ihirnong ohe hrep papti ohe ap tan tei oh sipsip bap tit tandeit pat hangop. Oh mutuh tandeit pat hangopa; hatriphei dasi bapo han pohono ihir ohnong parper mat paptingopa. Sipsip bap ma tandeit pat hatip oh inamdapat sutpa han orhor pat hangop. Orhe kak tei ambah hatin oh beshei hangop. Kinhe beshei kin hangop. Ama beshei kin oh beshei aptei sios ihirnong kasip mat papat ohe Yahsup Got oh aw pe mong pe ma darhetip Yahsup ohmur. 7 Ihat pat han sipsip bap oh susa ap tan mutuh tongnot pat han ohe bes oper tan brak tein bok oh oh daringop. 8 Datporhan hatriphei dasi bapo 24 han pohono ihir sipsip bap orhe danong hama orhe hrep oh bos hamnong hangopa. Ihir nitat gita hatin ros hatin oh marin ayao gor kweisi hatpa dis oh nitat marin ayao hat pati hangopa. Dis ma marin pati hatpa oh Got ohe rum tem ha ronoh rim gapgwesi han ma atendeishe ohe gapgwe han oh dis dah oh teip mar marin patingopa. Ama gapgwe han dis dahnong mar ma marin pati hatpa oh orhe nita han bap dire Got ohsi mengripti ohe gapgwe ohmur. 9 Ama ihir bos hamnong hama kopenohe ga tit riptingopa. Kopenohe ga tit ma ritpa oh mamarumur.
Gonong nitpawa; Gonong nitpawa. Nitperhan gwe heim oh tanduketipwa; tanduketipwa. Tandukera ama heim ohsi kakdah han ihirnong amohotipwa; amohotipwa. Ihir Got ohe nita ha hatingwe rim amohotipwa; amohotipwa. Han ambap ambap amohotipwa; amohotipwa. Han ameng ameng nitatsi han amohotipwa; amohotipwa. Ina nitasi han amohotipwa; amohotipwa. Mong mong nitatsi han amohotipwa; amohotipwa. Gowi ihtin hanmura; ihtin hanmura. Ihan brak tein bok oh gowi datin hanmura; datin hanmura. Dara gata emtin hanmura; emtin hanmura. 10 Ihirnong dire Got ohe nita bap matipwa; nita bap matipwa. Iham ihirnong gorhorsi tap ham kat han ihirnong papindin han matipwa; papindin han matipwa. Mara Got ohe hanat bok han matipwa; hanat bok han matipwa. Imtip han ihir kakdah mong ohe kakhan hatipriwa; kakhan hatipriwa
ihat ga rim armi deiptingopa.
Sipsip bap taman ihitnong armi deiptin wamtip ohe meng oh
11 Gahan noh wamar amraoh Got ohsi pati da bap enser ihir wanohe tam ban na satin hatin hat patim ap tan mutuh ma tongnot pat hano hatriphei dasi bapo han pohono ihirnong parper mara ga riptingopa. 12 Ga ma ritpa oh mamaru hat patmur.
Sipsip bap mohnong sutpawa; sutpawa. Ihtin han orhorwi kakhan hatin ohe kasip datin hanmura; orhorwi datin hanmura. Orhorwi Got ohe da ohe kamah hanmura; kamah hanmura. Orhorwi dakuu hannapmura; dakuu hannapmura. Orhorwi kasipnap hanmura; kasipnap hanmura. Oh ihtin han ohoh ihan orhornongwi winsi matin hanmura; winsi matin hanmura. Orhornongwi has yahnapsi hanmuro porin hanmura; porin hanmura. Orhornongwi armi matin hanmura; armi matin hanmura
por armi mara ga poriptingopa.
13 Gahan noh amraoh Got ohe ma dasi matip erer oh aw tei mahat Got ohsi pati ohe dasi erero mong tei moh ohe dasi erero mong hrep ohe dasi erero tom hru tem dasi erero oh gonsi gon ihitnongwi armi mar ga poriptingopa. Ga ma potpa ga oh mamaru hat patmur.
Mutuh ap tan ma tongnot pat hansi sipsip bap ihitnongmura; ihitnongmura. Ihitnongwi winsi matin hanmura; winsi matin hanmura. Ihitnongwi has yahnapsi hanmuro porin hanmura; porin hanmura. Ihitnongwi kasipnap hanmuro porin hanmura; porin hanmura. Ihitnongwi ihtin han ohoh ihan ihitnongwi eimat armi mar papteprimura; papteprimura
por ga poriptingopa. 14 Potperhan hatriphei dasi bap maihir oh Arpinmuro potperhan ama han pohon ihir bos hamnong ham timama ihitnong armi deiptingopa.
<- Erer tarpatipra 4Erer tarpatipra 6 ->