1 Jisaso nuhur sus wandeiyaoh tit han tit sup uh ake dus orhor kin kwisi itipsi han tit patgop. 2 Pathan Jisas orhorsi pati han nuhur ohnong Tisa. Han moh orhe er hat sapat ohe pe oh kin kwi hatipda da supsi itap ite er hat sashe ohe pe oh kin kwisi sup uh itip por dahamtipa. 3 Dahamtiperhan oh Es. Orhe peo supsi itap ite er hat sashe peo oh basmur. Got orhor Kaput mama brer moh ohe tei norhe kasip oh kuuhan ire kinteinong pitap mar pinggitipramur rim kis mat papat brer oh sup uh itipmur. 4-5 Mong da tei tamreiptimur. Patem kwitem hatporhan kudus oh kinhat tamreindiprohe. Nohhe mama pat oh mong da mat papatmur. Kimsi noh saporhan mong moh kwi hatipramur. Ihan mong da mat papat dik morhor nohnong ma nadarhetip han orhe atamreindin oh hat patmur napongop.

6 Naporpat mongnong tumbe gut asara mongnong gapa deipat ohe kinnong sirap oh asaringop. 7 Atporhan Gin go susa Siroam tom hru oh kin gahmatinmur por darhengop. Siroam ma porishe oh nadarheriyamur ma porishe ohmur. Anong darhetporhan oh susa kin sa gahmatipri. Gahmara kin wataham yah hat ama pip oh.

8 Ihat wataham yah hat sapatin arwapiro oh deip hapatin wamat pati hano ihir kat han ihir Mama han oh tongnom ma deip hapatgwer han orhor basda. 9 Kat han ihir Es. Rumkin orhor hatin orhor moh wan hanmur ama gigoshatpa oh. Gigoshatperhan ama han oh Es. Kin kwisi hat orhor ma nitpa han oh norhormur ama potip oh. 10-11 Potporhan ihir Ihan go kinhahrit kin oh watahah potperhan oh Jisas ma poripti han oh mong gapa mar sirap oh nohe kin moh nasara Gin go Siroam tom hrunong susa gahmatin napor nadarherhe. Nadarhetporhan noh susa gahmara kin watahahmur ama potip oh. 12 Potporhan ihir Ama han oh gin de tei pat potperhan oh Noh hanhanmur ama potip oh.

13 Gipotporhan ihir ama kin kwisi hat patesuh han ohnong Parisi ire patinong ama pihipa oh. 14 Pisusa Mama han ohnong tuperipti dik orhor Jisas oh mong gapa mar sirap oh ohe kin tei atporhan oh tom gahmatporhan ohe kin oh watahahmur ama potpa oh.

15 Potperhan Parisi ihir Go kinhahrit kin watahah por ama dahamtipa oh. Dahamtiperhan oh Nohnong mong gapa mar sirap oh nohe kin moh natporhan noh tomsi gahmara noh kin mama watahah ohmur ama potip oh. 16 Gipotporhan kat han Parisi ihir Ama han oh tuperipti dik ohe danong na hapat han moh Got oh na darhetip hankino ama ritpa oh. Kat han ihir Es. Got oh er hat sapti han ihirnong pang buksi han matporhan hanip dire na imtin hatin han tit matin hatinda. Basra. Na imtin hatinmur. Mama han moh na imtin hatin da indeipat han ohoh ihan moh Got orhe darhetip hanmur gigosham ihir ama yot da hatpa oh.

17 Ihapti it ohnong Gorhornong ma kin nayah dei oh gwe da oh kiano dahapat por dahamtiperhan oh Noh Oh arpin propetmur dahahmur ama potip oh. 18 Potporhan ihir Han moh arpin kin kwisi hat patesuh handa. Ihan supsi itap ihit ha apringwe. Apriyarit nuhur dahamtiper rim ama meng darhetpa oh. Meng darhetperhan supsi itap ihit amram ama apdapa oh. 19 Apriperhan ihitnong Han moh gute monda. Rih kin kwisi orhor sup go itipda. Gin kinhahrit kin moh watahat por ama supsi itap ihitnong ama dahamtipa oh. 20 Dahamtiperhan ihit Moh arpin nute monmur. Kin kwisi orhor itpamur. 21 Gin ohe ma watahato ohnong ma kin ayah mat hano oh nuhuthe hanhan hat patimur. Oh hanip yah ihir ohoh ihan gur orhornong dahamtinmur. Dahamtiperhan orhor sa napotiproh ama potpa oh.

22-23 Ihit Juda ihir Jisas ohnong Moh Kraismur ma poriya han ihir rotu apnong mohri na maraprimur ritiri teio rim ihit kas ham Orhor hanip yah ihir ohoh ihan gur orhornong dahamtiperhan orhor sa napotiproh ama potpa oh.

24 Potperhan ihir it kin kwisi han ohnong Go Got ohe kintei ohoh arpin meng orhor napotinmur. Ama han ohnong nuhur Oh er hat sapat hanmur rim am hat patimur ama potpa oh. 25 Potperhan oh Ama han oh er hat sapat hando yah hat sapat hando nohhe ohnong hanhan hat patmur. Noh nohnong ma yah nahat mohwi am hat patmur. Noh rih kin kwi han patesuhmur. Gin kin watahat sapatmur. Mohnongwi am hat patmur ama gipotip oh. 26 Gipotporhan ihir Gonong kinnahatporhan gwe kin oh yah hat por dahamtiperhan 27 oh Noh rih ma napor meng oh gur na dahayamur. Gin noh gurnong it naporit gurhe Nuhur orhe han hatpera daham nohnong it dahanahaptida ama potip oh.

28 Potporhan ihir ohnong dasei mar Gorhor pokwi ohe mengnong dimar ohe han hat patmur. Nuhur Moses ohe mengnongwi dimar orhe han hat pati nuhurmur. 29 Nuhur Moses ohnong Got ohe meng porisuh hanmur dahat patimura; ama han ohnong nuhur de hano rim hanhan hat patimur por kin kwi hat patesuh han ohnong dasei meng por ama imtipa oh. 30 Imtiperhan oh Epe. Nohe kin moh ponahat orhor gur de hano dahaptida. 31-33 Rihhe supir ihir kin kwisi brer itperhan ihir pondeiptinhe ti wandeishesida. Er da hat sapti han ire Got ohnong dahandeipti meng oh amram imtiprohda. Basra. Orhornong armi maro orhe danong hamo hapti han ire mengnongwi amrama imtiprohwa. Ihtin ohoh ihan Jisas oh Got ohe patdapat na apdapneng na imtin hatin han asohhe na indeipatnengmur. Indeipat ohoh ihan noh Oh Got ohe patdapat apdap han ma hapat dahapatmur ama potip oh. 34 Gipotporhan ihir Sua uh gonong er gapsi orhor nitipmur. Er gapsi orhor nitip ohoh ihan go nuhurnong sawa meng tit napor am nahatin hatinda por indeipti ama darhetpa oh.

35 Gahan Jisas oh orhe kin ma ayah mat han ohnong imar dasei mata ohe meng oh amrapat kin ayah mat han ohnong angmar susa wandeipat ohnong Go Got ohe ma darhetip Hanip Brer ohnong Oh arpin namburin han nadarhetip ma hapat dahat patda por dahandeingop. 36 Por dahamtiporhan oh Ama han oh niho. Go nohnong Gwe ma yah nahat han oh mama han ohmur naporit noh ohnong am hama Oh arpin Got ohe darhetipra ma ritip han oh ma hapat dahatpor pongop.

37 Potporhan Jisas oh Ama han oh gorhor wanahama ditadit mama mengripti han nohmur pongop. 38 Potporhan oh Hanipyaha. Gin noh arpin Got ohe ihirnong amburin han darhetipramur ma ritip han oh go ma hapat dahahmur pora mem ham Jisas orhe danong ham armi deingop.

39 Armi matporhan Jisas oh Noh kakdah mama apdap oh kin kwisi han gur wataham ha dahatingwe rim apdapmur. Nuhur kin yahsi han nuhurmur rim dasuh meng ripti han guroh kin kwisi hat orhorwi ha patengwe rim noh apdapmur pongop. 40 Potporhan kat han Parisi ihir ohe duup oh patimdapat amrapti Epe. Nuhur kin kwisi han hat patin ginaporda pongopa. 41 Potperhan oh Gur Nuhur kin kwisi han ihir hatin hat pati moh oh ha yah nahatinoh dahaptineng gur nohnong Yah nahatina napotperhan noh gurnong yah nahatporhan er gapsi timbas hat patinengmur. Gur Nuhur yah hat patimur ma dahapti oh noh na yah nahatporhan er gapsi orhorwi hat ma pati oh kin kwisi hatin hat pati bap gurmur pongop.

<- Jon 8Jon 10 ->