Hibru
ihirnong brak mat atip ohe meng oh
Hibru ihirnong mama brak mat atip han ohe win oh hanhan hat patimur. Ohe ma brak mat atip oh kat Juda bap ihir Hanipyah orhe danong ham orhe nita hapti it kakdah morhe hanat bok han ire meng amram ire hrepnong hatper ihaptin mama meng moh brak mat atipmur. Brak mat ma atip oh ihir Krais orhorwi dire hanat bok han ham tandaptuhut pat han ma hapat ha da hatingwe rim mameng moh ihirnong por brak mat atipmur.

Got ohe meng oh orhe mon ohe boknong mar napotip ohe meng oh

1 Got ohe rih Juda bap dire awher ihirnong ma meng porisuh oh mamaru mat porisuhmur. Got ohe treman pat meng pot pisashe han propet ihirnong ti mat ti mat meng trun pinggitporhan ire atem teidapat dire awher ihirnong meng porishemur. 2 Gin Krais oh hapur saporhan ohe pepe dik pati moh Got orhe meng oh orhe mon orhe boknong mar napotipmur. Itap oh orhe mon orhe boknong mar ma darhetip oh mong erer ma darpatip oh mon orhe bes teinongwi mar darpatip ma hapat. Norhe hrep papat erer moh mon orhorwi datipra ma hapat daham mamen mat papatdapat darhetipmur. Darhetporhan orhe boknong mar meng napotipmur. 3 Orhe boknong mar meng napor ma darhetip brer ohhe mamaru hat patmur. Itap orhor hatin hat patin itap orhe has yah da oh mon orhe boknong has mat papatin dir wamar am haptimur. Orhe meng oh kasipsi han hat pat ohoh ihan orhe meng kasip hrepnong mar mong erernong moh kasip mat papatmur. Ihtin han ohoh ihan oh dire er hapti ohe bisei er gap oh nahirmar yah naham napapten han hatipmur. Hapat putei mahat ma armi mar papti kakhan orhe bes oper tannong ham tongnom wanahat napapatmur.

Got ohe mon oh win isipsi han ham tandaptuhut pat ohe meng oh

4 Mon oh win isipsi han ohoh ihan itap orhe bes waper tan oh tongnot patmur. Ama ihtin win isip oh enser ihir timbasmur. Orhorwi ihtin winsi han hat pat han ohoh ihan enser ihirnong orhe kasip hrepnong mar papatmur. Ihan orhorwi win isipsi han ham tandaptuhut patmur. 5 Itap oh orhorwi tandaptuhut pat hanmur daham meng potporhan ma brak matpa meng oh mamaru hat patmur.

Go Got norhe monmur. Ire kintei moh norhe erer gon oh gorhor pokwimur datiprao rim gin noh mameng moh napormur.

potporhan brak matpamur. Tit meng orhe boknong potporhan ma brak matpa oh mamaru hat patmur.

Noh orhe itap hat patepramur. Oh norhe brer hat patepramur.

gipotporhan brak matpamur. Ama ihtin meng oh enser ire boknong matporhan brak matpada. Basra. Orhe mon orhe boknongwi mar meng potip ohoh ihan orhorwi tandaptuhut pat hanmur. 6 Ama tandaptuhut pat duuptei brer orhornong kakdahnong moh darhetinmat oh enser ihirnong Gur orhornongwi armi mat paptenmuro porpat kakdahnong moh darhetipmur. 7 Enser ire boknong mar meng ritporhan ma brak matpa oh mamaru hat patmur.

Got oh enser ihirnong Gur nohe natamreindin oh inim pupuka hatin hat patim natamreiyao irat has hatin hat patim natamreiyao hat patenmur por kis matipmur.

ritporhan brak matpamur. 8 Mon ohe boknong potporhan ma brak matpa meng oh ihtin meng ti na potipmur. Ohnong oh mamaru mat potipmur.

Got gorhor kakhan ham ihirnong ma papat oh papatru eimat paptepramur. Papatru ma paptepra oh duung dasi hat orhor paptepramur. 9 Papatim yah hat ma sapti ohe duung danong ohwi bopor mar rum mutuh mat papatmur. Er hat sapti ohe da oh na bopor mara heisup mat papatmur. Ihat pat han ohoh ihan noh gorhe Got ohoh ihan norhordapat kakhan ihirnong kis mar ma imah wu amoripti ohe tan mat gononghe dipwi isip hat paten ohe amam da oh gorhe boknong mar napirmur. Ama imat napir ohe amam da oh gorhe yah han ihirnong imat na apripatmur. Gorhornongwi imat isip mat napripatmur.

Got oh ama meng oh orhe mon ohe boknongwi mar ritporhan brak matpamur.

10 Tit meng ma itap oh mon orhe boknong orhor mar ritporhan ma brak matpa meng oh mamaru hat patmur.

Rih mongo aw tano oh na darpat patin orhor Hanipyah gorhor mong tan mohri kasip kameno rim ohri darpatipmur. Darpama aw tanhe gorhe bes tei orhor darpatipmur. 11 Gorhe bes tei darpatip erer moh gonsi timbas hatipramur. Gorhor pokwi na timbas ham patru patepramur. Ama erer ihir watah dipwi an patin er hatporhan ma mandaptiru hat er hatipramur. 12 Er hatporhan er watah daphot mandama wan yah watah aripti ohe tan mat gorhor erer moh rihohe mandama kopenohe matipramur. Erer moh yawar mara kopenohe matipra orhor gorhoroh er ham na timbas ham gorhe yah hat mama patru hat orhorwi patru patepra hanmur.

Ama meng oh Got oh mon ohe boknong mar ritporhan brak matpamur.

13 Gahan tit meng oh orhe mon ohe boknong mar ma brak matpa oh mamaru hat patmur.

Norhe mon go yahnap han ohoh ihan go norhe bes yahnap oper tan moh tongnotinmur. Tongnot patin noh gorhe mahaw han ihirnong gorhe hrepnong matipramur.

ritporhan brak matpamur. Ama ihtin meng oh enser ire boknong mar potporhan ti na brak matpamur. Ire boknong mar ti na potip ohoh ihan mon orhorwi tandaptuhut pat hanmur. 14 Enser ihir gonsi oh Got ohe atamreipti da bap ihirmur. Ihtin bap hat patim Got oh Gur norhe ambutipra kuuhan bap ihirnong panggeim paptenmur por darhetporhan ihir arpin napanggeim napapti bap ihirmur.

Hibru 2 ->