Mo has masma ab ha neid g Jiosh g Tutuligo hemajkam
1-2 Muꞌijj g ni‑wehm Tutuligo o s‑ohhodamk g Jesus pi wohochudch mo d Jiosh si Kehsha. Kuni heg hekaj si pi ap ni‑tahtk. K g ni‑ihbdag shaꞌi si s‑koꞌok. S‑mahch ani mani g wohokam em‑ahgid nani pi pi ni‑elid ch em‑ahgid. K g Hekia S‑apꞌekam Gewkdag an ni‑uꞌukch. 3 Si ani tatchua mat wo e doꞌibia g ni‑wehm oꞌodham, chum anis hems heg hekaj pi wo ni‑doꞌibia. 4-5 Do chum Jiosh hemajkamga. Jiosh at ab i ha chuhcha g t‑shohshonbad k am ha ahgid mat si s‑kehg haꞌichu hab wo t‑juni. Ab o si has t‑elid g Jiosh ch ab t‑mahkch g e‑chehanig. Kuch hab s‑t‑mahch ch hab junihim g ab si has elida Jiosh wui. T g Jiosh si Kehsha ab t‑amjed i wuhsh ia jewed dahm. Tt heg hekaj ab wo si has elidad g Jiosh chum hekid. Neh!
6 K eda muꞌijj g ni‑wehm oꞌodham pi ab hu wohochud g Jiosh si Kehsha. K wabshaba id pi hab d ahga mas g Jiosh pi am hu hab wo juh hegai mo hab kaij mat hab wo juh. Pi atsh wehsijj g Tutuligo d wo Jiosh hemajkamgak. 7 Id ant am wo em‑tashogi am em‑ahgidch ab amjed g Abrahambad. Pi atsh wehsijj g Abrahambad amjedkam wo enigak hegai mash wa g Jiosh ab makiog. Gohk ash wa aꞌalidag g Abrahambad. Sh hema hab chehgig Isaac. Kush g Jiosh hab kaij ab Abrahambad wui:
Hegam waꞌi Isaac amjedkam at wo enigak hegai mani ab m‑makiog. Genesis 21:12
8-9 Ihda Isaacbad ash d hegai matsh wa g Abrahambad wehm kihkam bei matsh eda heki hu okst natsh pi g Jiosh am i ha wehmt k hab kaij:
Dat wo hemako ahidagk, t g Sarah wo ge cheoj madt. Genesis 18:10
Id o am chehgidch mat hegam d wo waꞌi Jiosh hemajkamgak mat hedai g Jiosh am wo i ha chuhcha.
10 Neh, tsh am hema hohnt g Isaacbad am i geꞌedak. Sh id hab chehgig Rebecca ch gohk ha mahmadt. 11-12 Sh hab kaij g Jiosh ab wui g Rebeccabad:
Geꞌechu at d wo piongajk g alichu. Genesis 25:23
Tsh eda idam koi an hu mamsi k koi ab hu haꞌichu chuꞌijig. Tsh g Jiosh ab i wai g chumchu mat hekaj wo tashok mo ab hejel ab g Jiosh mat hedai ab wo i ha wai. 13 Hegai mo d geꞌechu ash hab chehgig Esau. Sh g chumchu hab chehgig Jacob. K hab chuꞌig g Jiosh oꞌohana mash g Jiosh hab kaij:
Ab ant i wai g Jacob k g wehngaj Esau pi ab hu i wai. Malachi 1:2-3
14 Pegih, naꞌams haꞌi hab elid mat pi ap chuꞌi g Jiosh. K wabshaba pi hab chuꞌig 15 nash pi hab kaij ab Mosesbad wui:
Nt wo s‑ha hoꞌigeꞌel hegam mani hab ha elid. Exodus 33:19
16 K heg hekaj tasho mo s‑ha hoꞌigeꞌid heg wabsh hekaj mo hab ha elid. Pi at hedai heg wabsh hekaj wo nei g Jiosh hoꞌigeꞌidadag mas haschu i tatchua ch haschu am hab juni him.
17 An o oꞌohanas mash hab kaij g Jiosh am wui g ha‑kownalig g Egypt t am hemajkam:
Am ant i m‑dai mapt d wo kownalk id si hekaj mant ab m‑wui wo kekiwua k am wo ha chehgi g ni‑gewkdag k am wo mahsko ni‑wua wehsko jewed dahm. Exodus 9:16
18 K heg hekaj tasho mo g Jiosh s‑ha hoꞌigeꞌid mo hedai hab i elid ch hab ha wua mo hedai hab i elid mat pi ab hu wo kaihamad g neꞌokij.
Matsh g Jiosh haꞌi wo s‑ha hoꞌigeꞌid k haꞌi wo ha lodai
19 Neh, tp hems hema wo kah ihda k hab wo chei, “Pegih, pi at haꞌichu ab hu wo chum t‑abch g Jiosh matp heg hab wa masma hab t‑juh map has i kaij.” 20 Nt wabshaba wo em‑ahgi mo pi ab hu shaꞌi ab g oꞌodham mas ab wui wo neo g Jiosh. Dach Jiosh nahtoi ch pi edgid g apꞌedag machs ab wui hab wo chei mas haschu ahgk hab masma t‑nahto.
21 Neh, nat hig pi hab wo ha juh g hahaꞌatdam g hab mams hahaꞌa mat wo tatchuad? Hema atp hems d wo s‑kehg haꞌak ch hema d wo pi kehg haꞌak. 22 Pegih, t g Jiosh wehs hab ha juh g hemajkam. K haꞌi pi ap d hemajkam. K wabshaba g Jiosh s‑ha bahbgi. T am wo i e ai mat am wo chehgi g e‑gewkdag k wo s‑koꞌokam ha namkid. 23 Kuch haꞌi s‑ap d hemajkam no pi ab si s‑t‑hoꞌigeꞌid g Jiosh. Am at i t‑apꞌech matt hab masma wo nei g gewkdaj. 24 Ahpim gawul mahs hemajkam am d ep waidaj. Jiosh at ab ep i em‑gawulkai. 25 Neh, bo masma an oꞌohadag heg oꞌohana ed mash hab chehgig Hosea mo hab kaij g Jiosh:
Bant wo ha juh hegam mo pi d ni‑hemajkamga mat d haha wo ni‑hemajkamgak k ab wo si pihk ni‑elidad ha wui.
26 Kumt hab wo ha aꞌagad mo d ni‑hemajkamga. Hosea 2:23, 1:10
Neh, bash kaij g Jiosh. 27-28 Kush wa g Isaiabad d Jiosh haꞌichu i tashogiddam ch hab kaij:
E o aihim mat g Jiosh ab wo ha mah g ha‑namkidadag wehs hemajkam.
T pi shaꞌi muꞌi wo e doꞌibia g Tutuligo hemajkam, chum as wo si muꞌijk hab sha masma mo g oꞌod. Isaiah 10:22-23
29 Sh wa am hu hebai hab ep kaij g Isaiabad:
S‑ap atsh huhug g pi apꞌekamkaj hegam kihhim mash hab chechgig Sodom ch Gomorra.
Kut ahchim Tutuligo hab waꞌap s‑ap wo huhug mat hems g Jiosh pi wo haꞌi t‑doꞌibia.
Shaꞌi si s‑gewkdag g Jiosh. Isaiah 1:9
Mo g Tutuligo hemajkam pi amichud g Jiosh si Kehsha
30 Pegih, pi am wa am hu e gahgid g Jiosh apꞌedag ahpim gawul mahs hemajkam ch wabshaba am i kah ab amjed g Jiosh alidag k ab i s‑wohoch. T g Jiosh am i em‑apꞌech e tahgio gam hu hab i juhk g pi ap em‑chuꞌijig. 31 K g ni‑wehm oꞌodham am i chum e apꞌechud g chehanigkaj ch pi bei g e‑apꞌedag 32 nat pi pi ab hu wohoch g Jiosh k pi ab hu bei g si Kehshaj k wabsh am hab chum s‑junimk g s‑apꞌekam mat hekaj wo s‑apꞌek am Jiosh tahgio. Id o heg wa wepo mat e huchwua ab hodai t ab. 33 An o hab chuꞌig Jiosh oꞌohana ed mo hab kaij g Jiosh:
Am ant wo i maskogi g si ni‑Kehsha ha shahgid g Tutuligo mat d wo chum ha‑doꞌibiadagk.
T pi wo e doꞌibia hegam mat pi ab hu wo wohoch.
Id at heg wo wa wepok mat ab wo e huchwua hodai t ab k wo i shul.
Hegam at wo waꞌi e doꞌibia mat ab wo i s‑wohoch. Isaiah 28:16
