REVELATION 19

1 Nt amjed hahawa haꞌichu kah. K id hab kaidag mo shaꞌi muꞌi hemajkam am neneok an dahm kahchim ch ed ch hab kaij:

“Ab ach si has elid g Jiosh.

Doꞌibiadag ch ab has elidadag ch gewkdag o ab d amjedkamaj g Jiosh.

2 Do wohokam ch s-apꞌekam g Jiosh lodaita nat pi s-koꞌokam ab namkid ihda si pi apꞌekam chehpaꞌawi mo padchud g jewed heg hekaj e-tohntomdadag.

Jiosh at s-koꞌokam ab namkid nat pi ha kokda g piongaj.”

3 K am ep Hihnk ch hab kaij:

“Ab ach si has elid g Jiosh.

Mei at ihda geꞌe pi apꞌekam kihhim.

T g kuhbs ab amjed chum hekid am wo wuhshanid.”

4 K eda an dahm kahchim ch ed daha g Jiosh e-kownal daikud an. T ab wui i tohtonwua hegam gokko gamai giꞌik geꞌeged k ab si has elid ch hab kaij, “Pegih neh, ab ach si has elid g Jiosh.”

Matsh g Jiosh alidag am wo i ha hemapai g e-hemajkamga

5 K ab hahawa hema neok miajed g Jiosh kownal daikud ch hab kaij:

“Ab g wo si has i elid g Jiosh ch ab s-wohog elid ahpim piongaj ch ahpim wehs hemajkam mam haꞌi d s-has hahaꞌichu ch haꞌi pi d has hahaꞌichu.”

6 Ni hahawa ep kah muꞌi hemajkam. K g ha-neꞌoki hab kaidag mo g s-gewk shuhdagi an med ch hab kaidag mat g tataniki ab si s-kaidam kop. Ha ani kah mo hab kaij:

“Ab ach ihm g Jiosh no pi d si uhgk t-kownalig ch uꞌukch g gewkdag am wehs hemajkam ha dahm.

7 Ab att wo si i s-hehgigk ch wo s-ap t-tahtkkad ch ab wo si has i el g gewkdaj.

E at ai mat ab wo i ha hemapai g e-hemajkamga hegai mo kahwalkaj ab e chehgidch.

T heg wo wa wepodagk mo g si geꞌe hohnta.

T g hemajkamgaj ab si e nahto wehhejed

8 hab sha masma mat g wo kuntam ab si s-tohama wo e enigadad.

Ihda lohba o wepogidas g s-apꞌekam haꞌichu hab ha-juni.”

9 K hab kaij g anghil ab ni-wui, “An g oꞌohan ihda: Ab at wo i ha hemapai g e-hemajkamga hegai mo kahwalkaj ab e chehgidch. Kut wo si s-hehgigk hab masma mamt wo si s-hehgigk am ha-gegosig ed g wo ha hohntam.” K hab ep kaij g anghil, “Id o d si s-wohokam Jiosh neꞌoki.” 10 Kunt am hahawa si i gei wecho k ab si has i el. K wabshaba hab kaij ab ni-wui, “Pi g hab masma ab si has ni-elid mani d Jiosh. Ab g si ihm g Jiosh. Dani wabsh piongaj hab masma mam ahpim mam ab s-wohochud hegai wohokam mat g Jesus am i em-tashogi.” Neh, bo kaij g anghil. K ihda wohokam d hegai mo ab amjed an uꞌukch g e-amichudadag g Jiosh haꞌichu i tashogiddam.

Hegai mo g s-toa kawyu cheshajchug

11 Nt hahawa ep nei g dahm kahchim. T i e kuhpiꞌo. K am hab chuꞌig g s-toa kawyu. K an ab da hegai mam hab aꞌaga Wohokam. Heg o d hegai mo am s-ap ha lodait ch s-ap hab wua g cheggiadag. 12 Wuhpuij o hab masma s-mahs mo ab mehmheihim. K muꞌi gigiko an hab chuhchuꞌig moꞌoj an. An o hema oꞌohadag g chehgig ab ab. K heg waꞌi hejel s-mahch mo haschu wud. 13 K g lihwaj d wabsh i ehꞌed. Kum hab aꞌaga Jiosh Neꞌoki no pi g Jiosh am gahi wuhshanim neok ab t-wui. 14 T g muꞌi anghil am i oi hab masma mo g shondal k g s-tohta kakawyu ha chehchejch ch s-tohtam e eꞌenigadadch. 15 Is-pahyo o ab i wuhshanis chinij amjed hegai Jiosh Neꞌoki. T id heg hekaj wo ha gewito g jejewed k am hahawa s-gewkam wo i ha wanim g wainomi usagakaj k s-koꞌokam wo ha namkid hegam mo bagachud g Jiosh. Id at heg wo wa wepodagk mamt g uhdwis wo kehiwia. 16 Ab lihwaj ab ch an kahioj an o id chehgig an oꞌohadag ‘Si Geꞌe Kownal am Wehs ha Dahm g Kokownal.’

17 Ni hahawa hema ep neid g anghil. Id o am kehk tash ch ed. K eda g uꞌuwhig an nenꞌe hewel ch ed. K id ab ha wui si s-kaidam neok ch hab kaij, “Am g wo hihim k am wo i e hemapai mat g Jiosh am hab wo em-juni g si geꞌe gegosig. 18 T wo em-gegos g pi ap hemajkam ha-chuhkugkaj. Kumt chum hems wo huh g ha-chuhkug g kokownal ch shondal ha-geꞌegeꞌejig ch s-has hahaꞌichu ch ep wo huh g ha-chuhkug g kakawyu ch hegam mo ha chehchejch ch hegam mo d nenehol.”

19 Ni hahawa ep neid hegai s-ta Ehbidamakam mat wa heki hu in i wuhsh. Wehs g kokownal an jewed dahm at am i ha hemapai g e-shondalig k am i wehmt g s-ta Ehbidamakam mat wo cheggia hegai mo g s-toa kawyu cheshaj. Kut id g shondaligaj i wehmt. 20 Kumt bei hegai s-ta Ehbidamakam ch heg ehp s-chu Iattomkam Haꞌichu i Tashogiddam. Do ihda mo wa ha iattogid g s-hasig haꞌichukaj hegam mo ab hab juhkch g s-ta Ehbidamakam cheposig ch hegam mat ab i shul wui g wepogidaj. Kumt ha ui hegam gohk k wabsh doakk am ha nehnich heg eda kahchki mo chum hekid meihim. 21 Hegai mo wa g s-toa kawyu cheshaj at ha kokda g ha-shondalig heg hekaj is-pahyo mo wa kamshch ab e-chini ed. Kut g uꞌuwhig am huh g ha-chuhkug k si s-kokwod.

<- REVELATION 18 REVELATION 20 ->