MATTHEW 13

Haꞌichu wepogida ahga ab amjed g haꞌichu eshdam

An g neid g Mark 4:1-9; Luke 8:4-8

1 Heg waꞌi tash ed achd gam hu hihi Galilee Kahchki wui. D am i chum dahiwua g Jesus mat wo t‑mashcha. 2 Kud wabshaba shaꞌi muꞌi hemajkam an e hemapai wehgaj. D heg hekaj gan hu i chesh g Jesus wahlko ch ed k an dahiwua k amjed ha mashcham. D g hemajkam an gegok shuhdagi koa an ch amjed ab kaiham. 3 Kud muꞌi haꞌichu ha tashogid g wepogida ahgakaj ab amjed g Jiosh kownaltalig. Id o d haꞌichu ahgaj mo hab kaij:

“Am ant heꞌes wo i em‑tashogi g Jiosh kownaltalig wepogidch mat hema an i chum gantad g e‑kaichka e‑oid ed. 4 T haꞌi gan hu shul wohg ch ed. T g uꞌuwhig am dada k koꞌito. 5 T haꞌi gan hu shul waw t ab mo pi geꞌej g jewed k ab ha hekaj hi wa chum i wuhsh no pi pi an hu juhk g jewed. 6 T ab i chesh g tash. Kut wabsh gaksh no ge mehk tatk. 7 T haꞌi gan hu shul shaꞌi ch ed. Kut g shaꞌi ab i geꞌege k ha kokda g haꞌichu esha. 8 T wabshaba hegam mat an s‑ap shul moihuna ch ed an wuhshani k muꞌi ab kait. Haꞌi at siant ab kait ch haꞌi chuhdpo wehst‑mahm ch haꞌi waikko wehst‑mahm.” 9 Kud hab hahawa ep kaij g Jesus, “Neh, am g wo s‑ap i aꞌamichud ihda.”

Mash haschu ahgch g wepogida ahgakaj ha mashcham

An g neid g Mark 4:10-12; Luke 8:9-10

10 D am hahawa i e hejelko. Kuchd am wui hihim k ab kakke mas haschu ahgch pi ta amichudam ha mashcham g haꞌichu wepogidakaj.

11 D hab kaij, “Nt wo em‑ahgi mo has d ahga no pi g Jiosh em‑hiwgid mamt wo s‑mai mo haschu hemu am maskogid ab amjed g e‑kownaltalig. Ni wabshaba heg waꞌi ha ahgid haꞌichu wepogida ahga hegam mo pi ab hu wohochudamk. T hab pi wo amich haꞌichu ab amjed g Jiosh kownaltalig. 12 Hegam mat s‑ap wo hekaj g e‑apꞌedag at baꞌich ep wo i nei. T hegam mat pi ap wo hekaj wabsh wo heb hu wua. 13 Heg ani hekaj g haꞌichu wepogidakaj haꞌichu ha ahgid:

Mat pi wo amich, chum as wo haꞌichu neid k wo haꞌichu kah

14 K hekaj am wohokamchud hegai mo an hab chuꞌig Isaiabad oꞌohana ed mash wa hab kaij Jiosh. Bo chuꞌig:

Chum am hekid ab kah g haꞌichu ni‑ahga ch ab neidchug g ni‑apꞌechuda ch wabsh pi amichud

15 no pi g em‑chegitoidag wabsh s‑kohmagi.

Heg o wa wepo mamt am si ha kuhkp g e‑wuhpui ch e‑nahnk mamt pi wo neid k pi wo kah k pi wo amich nam pi pi e nohnogidamk ab ni‑wui.

Kunt heg hekaj pi am hu wo i em‑apꞌech. Isaiah 6:9-10:

Neh, bo chuꞌi g g Jiosh oꞌohana. 16 Kum eda ahpim pi hab shaꞌi mahs mo hegam mash pi amichud. Jiosh o ab s‑em‑hoꞌigeꞌid. Kum s‑ap s‑amichud mam haschu i neid ch kah. 17 Nt wo si shel em‑ahgi mo muꞌijj g kekelibad Jiosh haꞌichu i tashogiddam ch Jiosh hemajkamga chum si tatchua mat wo neid k wo kah ihda mam haschu i neid ch kah idani. K wa wabshaba pi hab mahs am ha wehhejed.

Mash g haꞌichu ahgdam hab masma mo g haꞌichu eshdam

An g neid g Mark 4:13-20; Luke 8:11-15

18 “Am ant haha wo em‑ahgi mani haschu chum em‑mashcham id hekaj haꞌichu ni‑ahga ab amjed g haꞌichu eshdam. Heg kaichka ani wepogid g Jiosh haꞌichu ahga. Id o am e gantan ha shahgid g hemajkam hab masma mo g haꞌichu kai. 19 K eda haꞌi pi amichud no pi g ha‑iꞌibdag s‑kawpk hab sha masma mo g wohg. K g Jiawul am wabsh s‑pehegi ha wohppoꞌid mo haschu i kah.

20 “K haꞌi g ha‑iꞌibdag hab sha masma mo hebai pi geꞌej g jewed ab waw t ab. K idam si s‑hohhoꞌid ch kah g Jiosh haꞌichu ahga 21 ch wabshaba pi wihnam ab hu uꞌukch ch am hi wa heꞌes wo i s‑chegitokahimch. T oi wa g kudutadag ab ha wui wo i hih. Kumt wo ha shoꞌigch id hekaj Jiosh haꞌichu ahga. T ha hekaj wabsh wo taꞌi i shul.

22 “K haꞌi g ha‑iꞌibdag hab sha masma mo hebai s‑shaꞌig. K am ha shaꞌijidch g pihk ha‑elidadag ch s‑ha‑kaisdag. Kut pi haꞌichu wehhejed wo s‑kehgajk am Jiosh wehhejed.

23 “K haꞌi g ha‑iꞌibdag s‑moik hab sha masma mo g moihuna. Idam at wo s‑amich g Jiosh haꞌichu ahga k am wo ahgachugad matp hems haꞌi siant ab ep wo ha baꞌiha k atp hems haꞌi chuhdpo wehst‑mahm k haꞌi g waikko wehst‑mahm ab ep wo ha baꞌiha.”

Haꞌichu wepogida ab amjed g shaꞌi

An g neid g Mark 4:26-29

24 Jesus ad am hema ep ha ahgi g hemajkam g haꞌichu wepogida hab kaijch, “Am ant baꞌichu ep wo i em‑tashogi g Jiosh kownaltalig wepogidch mat hema ei g s‑kehg kai e‑oid ed. 25 T am hu hebai haha wabsh hema jiwia g obgaj chuhug ch ed mo wehsijj kohksh k g shaꞌi kai am ei ha shahgid g pilkani k gam hu hahawa ep hih. 26 Kut am i wuhsh g eꞌes k ab i mudadt. T am hahawa s‑masma i wuhsh g shaꞌi.

27 “K hab kaij g eshdam pionag, ‘S hebai amjed i wuhsh g shaꞌi mapt wa eda t‑mah g s‑kehg kaichka.’

28 “K hab kaij am ha wui, ‘Ni‑obga at hab juh ihda.’

“K hab hahawa ep kaij g piongaj, ‘Natt am wo i ha huhpsh hegam shaꞌi?’

29 “K hab ha ahg, ‘Piaꞌa. Mt wo am hu wabsh g pilkani ha huhpsh. 30 Am g wabsh wo hiwgid mat am e wehm wo wuwha. T ab wo e ai mat wo e hih. Kunt hab haha wo ha ahgi g hihkdam mat g shaꞌi wehpeg am wo ha huhpsh k am wo i hemapad k ged hu wo mehid k am haha wo i hemapai g pilkani k ged hu wo i baꞌiha.’ Neh, bo kaij g ha‑ahmo.”

Matsh has masma wo i geꞌeda g Jiosh kownaltalig

An g neid g Mark 4:30-32; Luke 13:18-19

31 D am hema ep ah g haꞌichu wepogida g Jesus hab kaijch, “Am ant heꞌes wo i em‑tashogi g Jiosh kownaltalig am wepogidch g haꞌichu kai. 32 Neh, heg am eꞌesha mo al chumaj ch oi wa am wo wuhshani k haꞌas wo i geꞌeda mo g s‑ehheg uhs. Tp hems g uꞌuwhig an ab wo koksht. Pegih, t hab wa masma wo geꞌe i geꞌeda g Jiosh kownaltalig, chum as al chum am wo shonwua.”

Matsh wo chehmo g jewed g Jiosh kownaltalig

An g neid g Luke 13:20-21

33 D am hema ep ah g haꞌichu wepogida g Jesus hab kaijch, “Jiosh kownaltalig o hab waꞌap wepogidas mo g jewajidakud. Heg amt wo be k am wo wah wehnadk g chuꞌi k am heꞌes wo i dai. T wo chehmo g wahga mat wehs am wo i kopodka. Pegih, t g Jiosh kownaltalig hab wa masma wo chehmo g jewed.”

Mash heg waꞌi wepogida ha ahgid g Jesus g hemajkam

An g neid g Mark 4:33-34

34 Jesus ad haschu i ha ahgid g hemajkam ch heg waꞌi hekaj haꞌichu wepogida ahga. 35 Heki atki hu waꞌi oꞌoha g kelibad Jiosh haꞌichu i tashogiddam mat id am hab wo wa e juh. K hab chuꞌig g oꞌohanaj:

Haꞌichu wepogida ant wo hekaj k am wo ha ahgi g hemajkam hegai mo pi hekid shaꞌi s‑e mahch ga hu i shohshonk amjed. Psalm 78:2

Matsh g Jesus am i tashogi g wepogida ahga ab amjed g shaꞌi

36 D g Jesus gam hu ha dagito g hemajkam k ged hu i wah kih ch ed. Kuchd am wehmaj hihim k ab hahawa kakke mas has d ahga hegai wepogida ahga ab amjed g shaꞌi mo am t‑ahgid.

37 D hab kaij, “Heg ani wepogidas mo g haꞌichu eshdam ahni Jiosh si Kehsha. 38-39 K g oidag d ihda jewed. K g s‑kehg kai d hegam mat wo e doꞌibia k am wo haꞌichugk Jiosh kownaltalig ed. K g ni‑obga d jijawul ha‑geꞌejig. K g eshaj d hegam mat pi wo e doꞌibia. Hihka tash o d lodaita tash. K hegam mat hab wo juh g hihka d anghil.

40 “Hegai shaꞌi mehidda o hab d ahga mat g pi ap hehemajkam gam hu wo i e shul jiawul kih ed mat hekid wo i e ai g lodaita tash. 41 Am ant wo i ha chuhcha g anghil ahni Jiosh si Kehsha. Kut ab wo i hihi jewed wui k gam hu hab wo i juh hegai matp haschu am wo i em‑wua pi apꞌekam ch ed 42 k gam hu wo ha shul g pi ap chuꞌijkam mei ch ed. T idam wo si shoanid ch ga hu wabsh wo i si e kiꞌisch nat pi wo shaꞌi si s‑koꞌok haꞌichu nakogad. 43 T am hahawa wo si tondad g s‑apꞌekam hemajkam e‑ohg Jiosh kownaltalig ed. Neh, am g wo i aꞌamichud ihda ahpim mam kah!”

Mash g Jiosh kownaltalig heg wepogidas mo g si geꞌe s‑kaisdag

44 D am hema ep ah g Jesus g haꞌichu wepogida ahga hab kaijch, “Jiosh kownaltalig o heg wepogidas mo g s‑namkig haꞌichu mat am hema ehsto oidag ch ed k hahawa muh. T am hema haha wabsh chehg k am wabsh uhpam i maꞌishp k si s‑hehgig ch am i wehs gagda g haꞌichu e‑eniga k am hahawa uhpam ep him k wabsh wehs ha nolawt ihda oidag.”

Mamtsh wehs haꞌichu ha baꞌich wo i s‑behim g Jiosh kownaltalig

45-46 Kud hab ep kaij g Jesus, “Bamt masma wo s‑behim g Jiosh kownaltalig mat g s‑namkig hohodai nolawtdam wo s‑behim hegai mat wehs ha baꞌich wo i s‑kehgajk. Heg at wehs wo gagda g haꞌichu e‑eniga mat wo e nakog k wo ha nolawt hegai s‑namkigchu.”

Mash g Jiosh kownaltalig heg wepogidas mo g waptopi uꞌikud

47 D hab ep kaij g Jesus, “Am ant heꞌes wo i em‑tashogi g Jiosh kownaltalig am wepogidch g waptopi uꞌikud chuagia. Heg at am wo wua g waptopi ha uꞌudam shuhdagi ch ed. T am wo e baꞌiha g nahnko mahs waptopi. 48 Kut am wo i wanchkwua shuhdagi hugid an k am wo dahiwua k wo i ha gawulkad k hegam wo e toꞌi mo s‑kehgaj k g pi kehg waptopi gam hu wo nehnich. 49 Bat wo wa masmak mat hekid wo i e ai g lodaita tash. Anghil at am wo aꞌai hihim k am wo i ha gawulkai g pi apꞌekam hemajkam 50 k ged hu wo ha shul mei ch ed. T idam wo si shoanid ch ga hu wabsh wo i si e kiꞌishch nat pi wo shaꞌi si s‑koꞌok haꞌichu nakogad.”

Mamtsh wo ha mashcha g wechij haꞌichu ch ep g hekiukam haꞌichu

51 D g Jesus ab hahawa t‑kakke, “Namt am wa s‑amich wehs ihda?”

Kuchd hab kaij, “Heuꞌu.”

52 D hab hahawa ep kaij ab t‑wui, “Pegih, mt hahawa pi wabsh g Jiosh heki hu oꞌohana wo ha mashchamad ch wabshaba id wehnadk ep wo ha mashchamad wechij mashchama ab amjed g Jiosh kownaltalig.”

Mash g Jesus si kihꞌamkam pi ab hu tatchua

An g neid g Mark 6:1-6; Luke 4:16-30

53 D g Jesus am i haꞌasa ah idam haꞌichu wepogida ahga. 54 Kuchd gam hu hihi Nazareth wui mo am d si kihkam. D g Jesus am haꞌichu ha mashcham ha‑cheopi ed.

D si has elid hegam mo am kah ch ab wabsh aꞌai i e kakke, “Kus hebai mai wehs ihda amichudadag ch ihda s‑hasig haꞌichu. 55 No hig pi woho d alidaj hegai t‑nawojbad mo d huk chikpandam? No hig pi g Mary d jeꞌej ch g wepngaj d James ch Joses ch Simon ch Jude. 56 Ia o wa kih g uꞌuwigaj. Kus hebai mai wehs ihda.” 57 Neh, bad kaij ch wabsh pi haꞌichuch.

D hab kaij g Jesus ab ha wui, “Jiosh haꞌichu i tashogiddam at chum hebai ab wo si has e elidad. T wabshaba g si kihꞌamkam oꞌodham ch wehmaj kihkam pi ab hu has wo elidad.”

58 Neh, bad kaij ch pi muꞌi s‑hasig haꞌichu hab juh amai no pi pi ab hu wohochud idam mas d Jiosh si Kehsha.

<- MATTHEW 12 MATTHEW 14 ->