Id ash d Jude Oꞌohana

Am ant wo i em-oꞌohani ahni mani d Jude ch d piongaj g Jesus Christ ch d James wehnag.

Jiosh o si pihk e elid em-hekaj ch ab i em-gawulkad k em-nuhkud am wehhejed g e-alidag Jesus Christ.

2 Ab ani tahni g Jiosh mat ab baꞌich wo i s-em-hoꞌigeꞌidad ch ab baꞌich wo i em-mahkad g s-ap dahhadkam ch pihk elidadag.

3-4 Ab ant haꞌichu wo i chum em-oꞌohani ab amjed g t-doꞌibiadag. T wabshaba haꞌi i wuwha mo d s-chu iꞌattomkam ch am chum gawul s-junimk g Jiosh haꞌichu ahga ab amjed g doꞌibiadag ch ab wui gegok g t-kownalig Jesus Christ. Idam o hab s-junimk g pi apꞌekam ch heg hekaj hab kaij mat g oꞌodham wabsh chum haschu has wo junihid ab i s-wohochudk g Jiosh haꞌichu ahga. K wabshaba heki hu an oꞌohanas mat s-koꞌokam wo ha namkid g Jiosh hegam mat ab wui wo gegokiwua. Heki o hu t-ahgid g Jiosh matt haschu ab wo chum s-wohochudad. Kum ahpim ab s-wohochud g haꞌichu ahgaj. Nt heg hekaj am wo i em-oꞌohanid k ab wo i em-gewkemhu mamt si s-gewkam wo uꞌukchid.

5 Am g wo s-chegitok mat has ha juh g Jiosh hegam mo pi ab hu wohog elid. Chum as wehs e doꞌibia g Tutuligo ab Egypt jewed t amjed, k eda muꞌijj pi ab hu wohog elid g Jiosh ch hekaj s-koꞌokam e koꞌij.

6 Am g wo s-chegitok mat has e juh g anghil. Ab o chum s-wohog elid g Jiosh ch wabshaba haꞌi gam hu hab i e juh ab amjed. T hegam am i ha kuh g Jiosh k am s-wihnam ha kuhpch s-chuhugam k ed mat wo ha lodai geꞌe lodaita tash ch ed.

7 Am g wo s-chegitok mat has i ha juh hegam mo am kih Sodom kihhim t am ch Gomorra kihhim t am ch gan hu ha wehgaj. Bo wa ep pi ab hu wohog elid g Jiosh ch hab junihim g pi apꞌekam am ha wehm wohpiwup hegam mo pi d ha-wehm kihkam. Chechoj o am e wehm wohpiwup ch hab wua g pi apꞌekam. T g Jiosh ab i huduni g mehi am ha dahm idam kihhim k am wehs ha kokda g hemajkam. Bo wa masma i t-tashogid g Jiosh mat s-koꞌokam wo ha namkid hegam mat pi wo dagito g pi apꞌekam. T g s-koꞌok ha-namkidadag pi hekid wo huhug.

8 Idam s-chu iꞌattomkam mo am haꞌichu chum em-mashcham ash haꞌichu chehchk ch heg oidch am hab e junihim ch hekaj e uamhun ch pi ab hu wohog elid g Jiosh ch nahnko ha ahg g anghil. 9 Chum ash wa hems hegai anghil ha-geꞌejig mash hab chehgig Michael pi s-koꞌokam ab abchud g ge Jiawul no pi heg hab waꞌap d chum anghilkahim. Jiawul ash wa pi ap hab e wua am chum s-behimkch g Mosesbad mat am i muh. Kush ihda Michael am s-daꞌid ch wabshaba pi s-koꞌokam has ahg ch hab hi wabsh kaij, “Jiosh at wo waꞌi s-m-kehꞌel heg hekaj.” 10 Sh wabshaba hegam s-chu iꞌattomkam nahnko ahg mo haschu i pi amichud ch hab wua mo haschu i tatchua hab masma mo g mischini haꞌichu doakam ch hab masma e uamhun. 11 Jiosh at s-koꞌokam wo ha namkid no pi pi ab hu wohog elid.

Heki o hu mash wa hema d Cain ch mua g e-wehnag. Kush eda g wehngaj d s-apꞌekam. K idam s-chu iꞌattomkam am hab waꞌap e wua.

Hema ash wa d Balaam ch am ahgachug g Jiosh haꞌichu ahga heg wabsh hekaj mat wo ui g lial. K idam s-chu iꞌattomkam hab waꞌap e wua.

Hema ash wa d Kora ch ab wui kehk g Jiosh. K idam s-chu iꞌattomkam hab waꞌap e wua. T heg hekaj g Jiosh im hu hab wo i ha juh ab e amjed.

12 Kah ani mash idam s-chu iꞌattomkam am em-wehm e gegosid ch am chum em-uamhun.

Neh, pi at am hu wo i em-wehmajk g chewagi matp gam hu wabsh wo wiꞌichkwua k pi wo ha juh. T hab wa masma pi am hu wo i em-wehmajk idam mo wabsh hejel i e chegito.

Neh, t wabsh wo e huhp g haꞌichu babhedam uhs matp pi ab hu wo ha babhed mat eda wo chum e ai mat ab wo bai. Kut idam s-chu iꞌattomkam hab wa masma wabsh wo huhug no pi pi shaꞌi e chehgid g haꞌichu s-apꞌekam ab ha amjed. 13 S-ta edam haꞌichu ash am wabsh e chehgid ab ha amjed hab masma mo g totshagi am e chehgid an shuhdagi hugid an. Idam o wabsh pi dodolima ch ab aihim mat g Jiosh gm hu wo ha shul geꞌe s-chuhugam k ed.

14-15 Tsh wabshaba g Jiosh heki hu hema tashogi mat has wo ha juh. Sh id hab chehgig Enoc ch d wosmdaj hegai mash g woskaj wosk d si wehpeg oꞌodham. Sh g Jiosh hab ahg mat wo ha ahgi g hemajkam mat ab wo i hih g Jiosh mat wehs wo ha lodait k s-koꞌokam wo ha namkid hegam mo pi tatchua ch has ahg ch hab wua g pi apꞌekam. T wehst-mahm mihl anghil ab wo i oi.

16 Idam s-chu iꞌattomkam o chum hekid aꞌaga g pi e-apꞌedag ch hab wua g pi ap e-tatchui. Ge o e hahaschud ch hab wabsh e wua mo ab haꞌi si ha hahaꞌichuchud mat hekaj ab aigo wo si ha hahaꞌichuch.

17 Am g wo s-chegitok mo haschu i em-ahgid hegam mo d chuhchaij g t-kownalig Jesus Christ. 18 Bo wa kaij ab em-wui, “Am at haꞌi wo i wuwha em-shahgid mo eda e aihim g si ha oidch tash k hab wabsh wo junihid g hejel e-tatchui ch wo nahnko em-ahgad.” 19 T am wo tashok mo idam pi shaꞌi e dagitokch am wui g Hekia S-apꞌekam Gewkdag no pi am hab junihim g hejel e-tatchui ch hab chum em-wua mamt ab aꞌai e wui wo gegokiwua.

20 Do si hekia s-apꞌekam g t-wohochudadag. Kumt heg ab baꞌich i s-wihnam wo e uꞌukchid. T g Hekia S-apꞌekam Gewkdag ab wo em-mahkchid g gewkdag mamt hekaj am wo neneokad Jiosh wui. 21 Mt wabsh chum hekid am wo edak g Jiosh pihk elidadag ch s-e tahtk ch wo nenidad mat g t-kownalig Jesus ab wo i em-wahpki Jiosh kihdag ed mamt hahawa chum hekid an wo haꞌichugk.

22 Ab g wo i s-ha hoꞌigeꞌid hegam mo pi mahch mas haschu wo s-wohoch 23 k am wo i ha ahgi g Jiosh haꞌichu ahga. T hab wo e doꞌibia ab i s-wohochudk. Kumt wabshaba wo s-e nenꞌoidk mo haschu pi ap hab wua mamt ahpim hab waꞌap pi heg hekaj wo e uamhu.

24-25 Ab att wo si has elidad g Jiosh nat pi g alidaj Jesus Christ t-doꞌibia k d t-kownalig. Jiosh o si s-gewkdag ch wehs haꞌichu dahm chum hekid. Ab att wo i t-dagito wui. T wo e nako mat wo t-nuhkud. Kutt pi gam hu hab wo i t-juh ab amjed. T am wo i t-wahpki e-kihdag ed. Kutt wo si s-hehgigk ch ab wo si has elidad chum hekid.